ئه‌ڤرۆ:
هه‌ر دو وه‌زاره‌تێن ده‌رڤه یێن رۆسیا و ئه‌مریكا هۆشداری دانه توركیا كو ده‌ست ب چو ئۆپه‌راسیۆنێن سه‌ربازی ل باكورێ سووریێ نه‌كه‌ت، چونكو ئه‌و یه‌ك دێ بیته ئه‌گه‌رێ ئالۆزبوونا ره‌وشا هه‌ی و داخواز ژ توركیا كرن كو رێزێ ل ئاگربه‌ستێ بگریت و ب سه‌رێ خوه ده‌ست ب چو ئۆپه‌راسیۆنان نه‌كه‌ت.
ماریا زاخارۆڤا په‌یڤدارا وه‌زاره‌تا ده‌رڤه یا رۆسیا راگه‌هاند كو نابیت توركیا ب سه‌رێ خوه ده‌ست ب چو ئۆپه‌راسیۆنێن سه‌ربازی ل باكورێ سووریێ بكه‌ت، چونكو نها ره‌وشا باكورێ سووریێ تا راده‌یه‌كێ ئارامه و هه‌ر ئۆپه‌راسیۆنه‌كا توركیا دێ بیته ئه‌گه‌رێ ئالۆزیێن زێده‌تر و گۆت: (دڤێت توركیا رێزێ ل سه‌روه‌ریا سووریێ بگریت، به‌ری نها توركیا چه‌ندین ئۆپه‌راسیۆن كرینه و ئه‌و ده‌ڤه‌رێن كو ل ژێر كۆنترۆلا توركیا دانه ره‌وشا وان گه‌له‌ك خرابه، ژ به‌ر هندێ ژی دڤێت توركیا ب چو ره‌نگه‌كێ ده‌ست ب ئۆپه‌راسیۆنه‌كا نوو نه‌كه‌ت و رۆسیا ب توندی ل دژی هندێ یه كو توركیا ببیته ئه‌گه‌رێ ئالۆزیێن نوو ل باكورێ سووریێ).
ناڤهاتیێ ئه‌و یه‌ك ژی دیار كر كو دڤێت توركیا باش بزانیت ئه‌و ده‌ڤه‌رێن كو توركیا دڤێت ئێرشی وان بكه‌ت ئه‌و ده‌ڤه‌ر هه‌موو ئاخا سووریێ نه، بێی رازیبوونا سووریێ ژی نابیت هێزێن توركیا ل سووریێ بمینن، ژ به‌ر هندێ ژی ئه‌م ل دژی هندێ نه توركیا ب ئۆپه‌راسیۆنه‌كا نوو ببیته ئه‌گه‌رێ روودانا ئالۆزیێن نوو ل باكورێ سووریێ.
ل ئالیێ دی وه‌زاره‌تا ده‌رڤه یا ئه‌مریكا ژی د داخۆیانیه‌كێ دا راگه‌هاند كو هه‌ر ئۆپه‌راسیۆنه‌كا توركیا ل دژی هێزێن سووریێ دیموكرات دێ كارتێكرنا خوه ل شه‌رێ ل دژی داعشێ كه‌ت، داعش ده‌مه‌كه لاواز بوویه لێ هه‌كه توركیا ده‌ست ب ئۆپه‌راسیۆنه‌كێ ل باكورێ سووریێ بكه‌ت ئه‌و یه‌ك دێ رێ بۆ ئالۆزیێن نوو ڤه‌كه‌ت و بێگومان د ده‌مه‌كێ وه‌سا دا داعش دێ ده‌ست ب كریارێن نوو یێن تیرۆرستی كه‌ت و دێ بیته ئه‌گه‌رێ ئالۆزبوونا ره‌وشا نها یا ئارام ل باكورێ سووریێ، ئه‌و یه‌ك ژی ب چو ره‌نگه‌كێ ناهێته قه‌بوول كرن و دڤێت توركیا رێزێ ل قانوونێن نێڤده‌وله‌تی بگریت و نه‌بیته ئه‌گه‌رێ هندێ داعش و گرۆپێن دی یێن تیرۆرستی ل باكورێ سووریێ بهێز كه‌ڤن.
وه‌زاره‌تا ده‌رڤه یا ئه‌مریكا ئه‌و یه‌ك ژی دیار كریه كو هێزێن وان ل گه‌له‌ك ده‌ڤه‌رێن باكورێ سووریێ بجه بووینه و هه‌ر ئۆپه‌راسیۆنه‌كا توركیا دێ مه‌ترسیێ بۆ سه‌ربازێن وان ژی دروست كه‌ت.
ل هه‌مبه‌ر هۆشداریێن ئه‌مریكا و رۆسیا وه‌زیرێ ده‌رڤه یێ توركیا مه‌لوود چاڤوش ئوغلۆ ژی دوهی ئاخڤی و دیار كر كو مه‌ترسیێن گه‌له‌ك مه‌زن ل سه‌ر توركیا هه‌نه، باكورێ سووریێ بوویه مه‌ترسی بۆ توركیا و توركیا دێ ده‌ست ب ئۆپه‌راسیۆنه‌كا نوو ل منبجێ و تل رفعه‌تێ كه‌ت و ژ بۆ هندێ ژی توركیا چاڤه‌رێی چو وه‌لاته‌كێ ناكه‌ت و دێ یا پێدڤی كه‌ت.
نيشاندان