ئەڤرۆ نیوز:
دادگەھا بروملی یا باشوری لەندەن دوھی بریار دا ستێرا بەرێ یا ئنگلیزی دێڤد بیکھام بۆ ماوێ شەش ھەیڤان ژ ھاژوتنا ترومبیلێ قەدەغە کر.
ئەڤ بریارا دادگەھێ دەرھەقی بێکھام دا ھات پشتی یاریزانێ ناڤبری ل ماوێ بوری موبایل بکارئینای د دەمێ ھاژوتنێ دا و پشتی دانپێدان ب ڤێ تومەتێ کر بەرامبەر دادوەری، دیسان دادگەھێ بریار دا ب کوژمێ ٧٥٠ جونیە ئسترلینی(٨٦٨) یورویا سزا بدەت دگەل مەزاختیێن پێرابوونێن دادوەری.
ئەڤرۆ نيوز:
رێڤەبەرێ بەنکا خوینێ ل دھۆکێ دیار کر کو د شەڤا ئێکێ دا ژ دانانا کەمپینا خوین بەخشینێ 61 بوتلێن خوینێ ھاتنە کۆمکرن.
عادل علی، رێڤەبەری بەنکا خوینێ ل دھۆکێ دیار کر کو کەمپینا ھەوا کۆمکرنا خوینێ ل ھەیڤا رەمەزانا پیرۆز د ناڤ بازارێ دھۆکێ دا ب تایبەتی ژی ل پارکا نەورۆز بەرامبەر ئاڤاھیێ پارێزگەھا دھۆکێ دەستپێکریە و ھەموو شەڤا ژ دەمژمێر 8:00 ھەتا 12:00 ب شەڤێ دھێتە دانان و گۆت: “ل شەڤا بۆری ڤێ ھەوێ دەستپێکریە و 61 بۆتلێن خوینێ ھاتینە کۆمکرن ئەو ھەوا خوین بەخشینێ دێ ل ھەمان دەم و جە یا بەردەوام بیت و تیمەکێ بەنکا خوینێ ھاتیە پێک ئینان بۆ وەرگرتنا خوینێ ژ وەلاتیان”.
ناڤھاتی ئاماژە دا وێ چەندێ کو رۆژانە ئەو پێدڤی خوینێ دبن، لەورا داخوازن ھەر ئێکێ شیان ھەبن قەستا کەمپینا خوین بەخشینێ د ناڤ بازارێ دھۆکێ دا بکەت بۆ خوین بەخشینێ، چونکو ھندەک نەخۆش ھەنە بەردەوام و ھەیڤانە پێدڤی ب خوینێ ھەنە، ژبلی نەخۆشێن نشتەگەری بۆ دھێنە ئەنجامدان پێدڤی ب خوینێ دبن، لەوڕا پێدڤیە وان بەردەوام خوین ھەبیت.
ئەڤرۆ نیوز:
چاڤدێر و رەوشەنبیرێ پارێزگەھا سلێمانیێ، عینایەت نامق ل دۆر ھەبوونا حزبێن سیاسی ل سلێمانیێ باڵ بالانەیا دناڤا وان حزباندا ھەی، دبێژیت زیانەکا مەزن ب پێشکەفتن و گەشەکرنا باژێرێ سلێمانیێ دایە.
عینايەت نامق د ھەڤدیتنەکا تایبەت دا بۆ رۆژناما ئەڤرۆ راگەھاند، ھەبوونا فرە حزبی ل دونیایێ نیشانا دیموکراسیێ یی ل ھەموو وەلاتان ژی وەلاتی دئازادن حزبا دروست بکەن، بەلی کێشە ل وێرێ ھەیە ئازادیا رەھا ل چ وەلاتەکێ نینە، بەلێ ل باژێرێ مە دروستکرنا حزبی یا بوویە بازرگانی یا سکسی، کو ھەر ئەو حزب دژی سەربخوەیا کوردستانێ بوویە، ئەڤ رەنگێ حزبان دبێژنێ توانباریا مەزن، کو ل سلێمانیێ 70 ھەتا 80 بارەگایێن حزبی تێدا ھەنە و بارەگایێن لایەنێن دەرەکی ژی تێدا سیخۆڕیێ دکەن.
عینایەت نامق گۆت: ل چ وەلانێن دونیایێ نەبوویە حزب دژی سەربلندی و سەربخوەیا وەلاتێ خوە بیت، ب مخابنی ڤە نوکە سلێمانی د رەوشەکا قورسدایە کو سلێمانی ھەردەم یا ئامادەیە بەر ب پێشڤە بچیت داھێنانێ بکەت.
ناڤبری سەبارەت ژێرخانا ئابووری ل سلێمانیێ دبێژت، ب ئەگەری ھەبوونا وان ھەموو حزبان ل سلێمانیێ دەست دانایە سەر ھەموو جەمکێن ئابووری ل پارێزگەھێ لورا رەوشا ئابووری یا باژێری گەلەک خراب بوویە، کار یێ کێم بووی وەکی پێدڤی نەشێن گەشەکرنا ئابووری ھەبیت، ھەروەسا دیارکر، خرابیا رەوشا ئابووری ل پارێزگەھا سلێمانیێ کارتێکرن ل سەر رێژا گونەھباری ل سلێمانیێ بەرب زێدەبوونی بچیت، کو گرۆپێن کوشتن و دزی و تلانکرنێ زێدەبووینە، ب مخابنی ڤە رۆژانە دەنگوباسێن گونەھباریێن گەلەک حیبەتی دبھیسین.
ھەمان چاڤدێرێ سیاسی دووپاتکر و گۆت: نوکە سلێمانیێ ب ئەگرەێ ھەوبوونا فرە حزبی و فرە کویخاتیێ و باڵ بالانێ یا ناڤخوەیا حزبان، فەوزایەکا سیاسی و ئابووری و جڤاکی ل سلێمانیێ پەیدا کریە، رەوش یا بەرب خرابتریێ ڤە پێنگاڤان دھاڤێت، زێدەتر دبێژیت، ب دیتنا من سیاسەت ژێرخانەیە، ئانکو رەوشەنبیری و ئابووری و کەلتور و جڤاک و ئامادەباشی سیاسەتە، ئانکو دەمێ سیاسەت و قانوون ھەبوون وەلاتی دێ ھەست ب ئارامی و رەحەتیێ د ھەموو بوارێن ژیانێ دا کەت، ژیانا رەوشەنبیری و جڤاکی و ئابووری و ھەتا دووماھیێ، کو دێ بەر ب پێشکەفتنێ ڤە چیت، بەلێ بەرۆڤاژی ھەموو دێ ھێتە تێکدان.
ئه‌ڤرۆ نیوز:
وه‌زاره‌تا په‌روه‌ردێ ل هه‌رێما كوردستانێ ئه‌ڤرۆ دوشه‌مبى 6/5/2019 چه‌ند پێزانینه‌كان ل دۆر ئه‌زموونان ئاراسته‌ى قوتابیێن 12 ئاماده‌یى دكه‌ت.
د وێ ئاگه‌هداریا وه‌زاره‌تا په‌روه‌ردێ دا هاتیه كو ئه‌و قوتابیێ 12 ئاماده‌یى كو ب 3 وانه‌یان كه‌فتبیت، دشێت پشكداریێ د ئه‌زموونێن وزارى دا بكه‌ت، هه‌كه ب 4 وانه‌یان زێده‌تر كه‌فتبیت، ب كه‌فتى دهێته هژمارتن ودێ ل پۆلا خوه مینیت.
دیاركر ژى كو هه‌ر قوتابیه‌كێ ئێك بابه‌ت یان دو سالان ل سه‌ر ئێك د ئه‌زموونێن وزارى دا ده‌رنه‌چیت، پێدڤیه مامه‌له ئێك بابه‌تى ودو بابه‌تى ل په‌روه‌ردا خوه كربیت، هه‌كه نه، نه‌شێت پشكداریێ د ئه‌زموونێن وزارى دا بكه‌ت وبۆ سالا داهاتى دڤێت ل هه‌موو وانه‌یان ئه‌زموونان بكه‌ت.
وه‌زاره‌تا په‌روه‌ردێ ئاماژه كریه ژى هه‌كه هه‌ر قوتابیه‌ك دو سالان ل سه‌ر ئێك د ئه‌زموونێن وزارى دا ده‌رنه‌چیت، بۆ سالا سیێ دێ هێته سه‌رپشككرن كو بچیته قوتابخانه‌كا ئێڤاران یان ب شێوێ ده‌ره‌كى ئه‌زموونێن وزارى ئه‌نجام بده‌ت.
ئه‌ڤرۆ نيوز:
برياره وه‌زاره‌تا دارايى وئابوورى سوبه‌هى 6/5/2019 ده‌ست ب به‌لاڤكرنا مووچێ هه‌يڤا شوباتا 2019 ب ڤى شێوه‌يى بكه‌ت:
- دوشه‌مبى 6/5/2019 ديوانا وه‌زاره‌تا پێشمه‌رگه وليوايێن پێشمه‌رگه‌ى.
- سێشه‌مبى 7/5/2019 يه‌كه‌يێن 70 و 80 .
- چارشه‌مبى 7/5/2019 وه‌زاره‌تا په‌روه‌ردێ.
- پێنجشه‌مبى 8/5/2019 وه‌زاره‌تا دارايى وئابوورى.
ئێكشه‌مبى 12/5/2019 وه‌زاره‌تا ساخله‌ميێ.
ئەڤرۆ نیوز:
ب فەرمی رێڤەبەرا فروکخانەیا ھەولێر یا نێڤدەولەتی دەسپێکرنا گەشتێن ئاسمانی ئێکسەر ژ ھەولێرێ بۆ دو وەلاتێن ئوروپی راگەھاند.
زێدەتر تەلار فایق د داخویانیەکێ دا دیارکر ئەو شیان دوبارە دەست ب گەشتێن ئاسمانی بۆ ھەردو وەلاتێن ھولەندا و ئەلمانیا دەسپێکرن و ھەر حەفتیەکێ دێ سێ گەشتێن ئێکسەر ژ فروکخانەیا نێڤدەولەتی یا ھەولێر بەر ب باژێرێ ئایندھوڤن یێ ھولەندی و کولن یێ ئەلمانی دەستپێکەت.
ئەو چەندە ژی دیارکر ل ماوێ بھێت دێ کار کەن زێدەتر گەشتێن ئاسمانی بەرب چەندین وەلاتێن ئوروپی ڤەکەن بۆ ئاسانکرنا ھاتن و چوونا رێڤێنگان.
سویسرا، ئازاد گولەی:
ل ماوێ بوری بابەتێ کرینا ترومبێلا ستێرا پرتوگالی و یانا یوڤانتوس یا ئیتالی کرستیانو رونالدوی ئەوا ب کوژمێ ١١ ملیۆن دولاران کری بوویە جھێ گرنگیا راگەھاندنا جیھانێ، لەورا پەیامنێرێ ئەڤرۆ نیوز ل وی جھێ ترومبێلا رونالدوی لێ ئامادەبوو بۆ حەژێکەرێن یاریا تەپا پێ و ڤی یاریزانی ئەڤ وێنەیە ب چافکێ کامیرا ئەڤرۆ نیوز ببینن.
ئەڤرۆ نیوز:
وەزارەتا نافخو یا ھەرێما کوردستانێ ئینانا ترومبێلێن لێدای، چێکری و ژێرئاڤبووی قەدەغە کر.
ل دووڤ نڤیسارەکێ کو ٢/٥/٢٠١٩ بەلاڤ بووی و ئیمزایا وەزیرێ نافخویا ھەرێما کورستانێ ژی ل سەرە تێدا ھاتیە ژ بەر بەرژەوەندیا گشتی و ب مەرەما پاراستنا گیان و سامانێ خەلکێ ھەرێما کوردستانێ و ل دووڤ وان دەستھەلاتێن ھەین ژ قانوونا ھژمارە شەش یا نافخو کو سالا ٢٠٠٩ دەرکەفتیە بریار ھاتیەدان:
١/ ئینانا ترومبێلێن لێدای، چێکری، ژێرئاڤبووی بۆ ناف ھەرێما کوردستانێ برێیا خالێن سنوری یێن نێڤدەولەتی و پارێزگەھێن دی یێن عیراقێ ھاتە قەجەغەکرن.
٢/ ئەڤ بریارە ل رێککەفتی ١/٧/٢٠١٩ دێ کەفتە کاری و جێبەجێکرن.
ئەڤرۆ نیوز:
ل دووڤ چەند ژێدەرێن دەنگوباسان یاریزانێ یانا مانچستەر ستی یا ئنگلیزی رەحیم ستێرلینگ بۆ باشترین یاریزانێ خولا ئنگلیزی یا تەپا پێ ل وەرزێ ئەڤ سالە ٢٠١٨،٢٠١٩.
زێدەتر د ڤی چارچوڤەی دا کوربەندا نڤیسەرێن ئنگلیزی ب رێکا مالپەرێ خوە ئەڤ نووچەیە بەلاڤ کریە و ئاماژە دایە کو یاریزانێ مان ستی رەحیم ستێرلینگ دێ بیتە باشترین یاریزانێ وەرزێ ئەڤ سالە یێ خولا ئنگلیزی.
ئەڤرۆ نیوز، نەوزاد ھلۆری:
ب بەرھەڤبوونا سەرۆکێ حوکمەتا ھەرێما کوردستانێ و شاندەکێ بلند یێ حوکمەتا عیراقێ، گوپیکا ئابووری دناڤبەرا ھەرێما کوردستان و عیراقێ ل ھەولێرێ دەست پێ کر و وەسا بریارە دانوستاندنێ لسەرچەند بابەتان بکەن.
شاندنێ حوکمەتا ھەرێما کوردستانێ ب سەروکاتیا نێچیرڤان بارزانی سەرۆکێ حوکمەتا ھەرێما کوردستانێ، دیسان مەسرور بارزانی سەرۆکێ جڤاتا ئاسایشا ھەرێما کوردستانێ و جێگرێ سەرۆکێ حوکمەتا ھەرێما کوردستانێ و پەیڤدارێ حوکمەتا ھەرێما کوردستانێ ژی پشکدارە، شاندنێ حوکمەتا عیراقێ ب سەرۆکاتیا وەزیرێ دارایێ عیراقێ (فوئاد حسێن) ل گەل ھژمارەکا دن ژ وەزیر و کاربدەستێن دن یێن عیراقێ.
وەسا بریارە کو دانوستاندنێ لسەر ھژمارەکا پرس و بابەتێن ھەتا نوکە دناڤبەرا ھەرێم و بەغدا نەھاتینە چارەسەرکرن ب تایبەتی پرسا بودجە و پەترولێ و خالێن گومرکی و ھەمی ئەو بابەتێن گرێدای ئابووری و چاندنێ بکەن.
نيشاندان