ئەڤرۆ نیوز:
سەرۆك كۆمارێ توركیا رەجەب تەیب ئەردۆغانی، داخواز ژ سەرۆك وەزیرێن عیراقێ مستەفا كازمی كریە، کو سەرەدانا وی وەلاتی بكەت.
دبەیاننامەكێدا نڤێسینگەها سەرۆك وەزیرێن عیراقێ دیار کریە: د نامەكا تایبەت دا سەرۆكێ توركیا رەجەب تەیب ئەردۆغانی ب فەرمی داخواز ژ مستەفا كازمی كریه، سەرەدانا ئەنقەرە بكەت.
لدووڤ وێ بەیانناما نڤێسینگەها سەرۆك وەزیرێن عیراقێ، فاتح یلدز بالیۆزێ توركیا ل عیراقێ ناما ئەردۆغانی گەهاندیە مستەفا كازمی.
ئەڤرۆ نیوز:
وەزارەتا ساخلەمیا ھەرێمێ دیار کر: د ۲٤ دەمژمێرێن بوری دا ٩١٢ حالەتێن نوو کۆرۆنایێ و ١٩٤ حالەتێن باشبوونێ و ٢٠ حالەتێن وەغەرکرنێ ھاتینە تۆمار کرن.
ھەتا نوکە ٥٨ ھزار و ٢٧٧ حالەتێن ڤایرۆسێ کۆرۆنایێ ل ھەرێما کوردستانی ھاتینە تۆمارکرن، هەتا ڤی دەمی ٣٥ ھزار و ٨٩٩ کەس ژ وێ نەخۆشیێ باشبووینە و دو ھزار و ٦٠ کەسان ژی وەغەر کریە.
ئەڤرۆ نیوز:
ژێدەرەکێ ژ وەزارەتا دارایی یا هەرێما کوردستانێ دیار کریە: 320 ملیار دینار ژ بەغدا گەهشتنە بانکا ناڤەندی یا هەرێما کوردستانێ و چێدبیت سوبەهی دەست ب دابەشکرنا مووچەی بهێتە کرن.
لدووڤ نڤیسارەکا حوکمەتا عیراقێ، کو ئیمزا عەلی عەللاوی، وەزیرێ دارایی یێ عیراقێ ل سەرە و ل رۆژا 13-10-2020 دەرچوویە، ئاماژە ب هنارتنا 320 ملیار دینارێن هەرێما کوردستانێ کریە، تێدا هاتیە کو ئەو پارە بۆ مووچێ هەیڤا 9 یێ فەرمانبەرێن هەرێما کوردستانێ یە.
ئەڤرۆ نیوز:
هەموو سەرێن دەمژمێران عیراق ب بهایێ 290 هزار دۆلاران گازێ دسوژیت و ب هەروە دچیت، ئانکو رۆژانە 6.9 ملیۆن دۆلار و سالانە ژی دگەهیتە زێدەتر ژ 2.5 ملیار دۆلاران، ئەڤە رەوشا وەلاتەکێ یە، کو یەدەکێ گازا وی یا سرۆشتی ب 126.7 تریلیۆن پی یێن سێجا دهێتە خەملاندن و سالانە 700 ملیۆن مەترێن سێجا یێن گازێ دهێنە سۆتن و ب هەروە دچن.
بانکا جیهانی د راپۆرتەکێدا راگەهاند: ئەڤە دەمێ چار سالانە ل سەر ئێک عیراق ل پلا دویێ یا وان وەلاتان دهێت، کو زۆرترین گازا سرۆشتی لێ دهێتە سۆتن، چارێن ئێکێ پێکهاتینە ژ رووسیا، عیراق، ئەمریکا و ئیران، ب تنێ ئەڤ چار وەلاتە 45٪ یا سەرجەمێ گازا دهێته سۆتن ل جیهانێ پێکدئینن، ئەو سالانە 150 ملیار مەترێن سێجا یێن گازێ دسوژن.
هەروەسا گۆتیە: ل سالا 2016 دا عیراقێ زێدەتر ژ 17.5 ملیار مەترێن سێجا و ل سالا 2019 دا ، 18 ملیار مەترێن سێجا یێن گازێ سۆتینە.
لدووڤ زانیاریێن وەزارەتا کارەبا عیراقێ، ئەو وەلاتە 40 ملیۆن پێ یێن سێجا یێ گازێ بۆ کارپێکرنا وێستگەهێن کارەبێ و راستەوخۆ 1200 مێگاوات کارەبێ ژ ئیرانێ هاوردە دکەت، هەروەسا راپۆرتەکا پەیمانگەها واشنتۆن بۆ سیاسەتا رۆژهەلاتا ناڤین، عیراقێ دەهـ هندی وێ گازا هاوردە دکەت، دسوژینیت.
ئیران ب نرخەکێ گران گازێ دەتە عیراقێ، کۆمپانیا بریتش پترۆلیۆم دیارکریە، عیراق بۆ هەر ئێک پێیێ سێجا یێ گازێ 11.23 دۆلاران ددەتە ئیرانێ، ئەڤە د دەمەکێ دایە، کو ئەلمانیا ب 5.42 دۆلاران گازێ ژ رووسیا دکریت و کوێت ژ ئەمریکا دکریت ب 6.49 دۆلاران.
ئەڤرۆ نیوز:
نێرینگه‌ها سووری بۆ مافێن مرۆڤى راگه‌هاندیە: نێزیكى 119 چه‌كدارێن سووری یێن سه‌ر ب توركیاڤه هاتینە کوشتن، کو تورکیا بۆ پشكداریكرنێ د شه‌رێ هه‌رێما ناگۆرنى یا قه‌ره‌باغێ دا ره‌وانه‌ى ئازه‌ربایجانێ كربوون.
هەروەسا دیار كریە: توركیا زێده‌تر ژ 400 چه‌كدارێن دى ژ گرۆپ و میلیشیاتێن سووری به‌رهه‌ڤ كرینه بۆ پشكداریكرنێ د شه‌رێ ئازه‌ربایحان و ئه‌رمینیا دا، هه‌تا نوكه هزار و 450 چه‌كدارێن سووری یێن سه‌ر ب توركیا ڤه هاتینه رەوانەكرن بۆ وی شەری.
ئەڤرۆ نیوز:
وه‌زاره‌تا ساخله‌میا هه‌رێما كوردستانێ ئامارێن نوو یێن ڤایرۆسێ كۆرۆنایێ راگه‌هاندن.
وەزارەتا ساخله‌میا هه‌رێمێ دیر کریە: د دەمێ 24 ده‌مژمێرێن بورى دا 900 كه‌سێن دى تووشى ڤایرۆسێ كۆرۆنا بووینه، ژ وان ژی 317 حاله‌ت ل هەولێرێ، ل سلێمانیێ 302 حاله‌ت، ل گه‌رمیان 32 حاله‌ت، ل هه‌له‌بجه 19 حاله‌ت، ل دهۆكێ ژى 230 حاله‌ت هاتینه تۆمار كرن.
هه‌روەسا گۆتیه: د دەمێ 24 ده‌مژمێرێن بورى دا 22 تووشبوویان وەغەرکریە، كو 4 كه‌س ل هەولێرێ، ل سلێمانیێ 8 كه‌س و ل گه‌رمیان دو كه‌س و ل هه‌له‌بجه دو كه‌س و ل دهۆكێ ژى 6 كه‌س.
نوکە هژمارا گشتی یا تووشبوویێن ڤایرۆسێ كۆرۆنا ل هه‌رێما كوردستانێ گه‌هشته 57 هزار و 365 كه‌سان، هه‌تا نوكه 35 هزار و 705 كه‌س ژى چاره‌سه‌ر بووینه، هه‌روه‌سا هەتا نوکە دو هزار و 40 كه‌سان ژى وەغەرکریە.
ئەڤرۆ نیوز:
په‌یمانگه‌ها بلند یا ساخلەمیا گشتی ل زانكۆیا ئه‌سكه‌نده‌ریه ل وەلاتێ مسرێ، ئاماژه به چه‌ند شیرەتان دایە، كو گرنگه دایك و باب به‌رامبه‌ری زارۆیێن خوە پەیرەو بکەن دەمێ دگەهنە د ژیێ سنێلەیێ دا.
مالپەرێ ئه‌هرام یێ مسری دیار کریە: گەلەک دایك و باب هەنە، وان دڤێت ب رێیا توندوتیژیێ بریارێن خوە ب سه‌ر زارۆیێن خوە یێن سنێلە دا بسه‌پینن، د دەمەکێ دا ئه‌و جۆرێ رەفتاران، دێ كاریگه‌ریێن بەرۆڤاژی هەبن.
وێ پەیمانگەهێ چەند شیرەت بۆ دایک و بابان هەنە، داکو ژ وان رەفتاران دوور بکەڤن، ژ وان ژی:
ل سه‌ر دایك و بابان پێدڤیه به‌رامبه‌ر زارۆیێن خوە ببنه نموونه، چونكی زارۆک و ب تایبه‌تی د قۆناغا سنێلەیێ دا، رۆلێ چاڤلێکرنێ دبینن، ب تایبه‌تی چاڤلێکرنا دایك و بابان.
دەمێ زارۆک یان سنێلە تشتەکێ باش دکەت، ل سه‌ر دایك و بابان پێدڤیه ده‌ستخۆشیێ لێ بكه‌ن و هان بده‌ن بۆ كارێن باشتر.
ل جهێ هندێ، کو دایك و باب خوە ژ زارۆیێن خوە یێن سنێلە دوور بکەن، باشتره ل گه‌لدا بن، ل گەل وان هەڤال بن و هه‌ردەم گوهداریا وان بکەن و دەمەکێ باش بۆ ئاخفتنێ ل گەل وان ته‌رخان بكه‌ن.
دەمێ سنێلە کارەکێ خراب دکەت، یان ڤیا كارەکێ خراب بكەت، ل سه‌ر دایك و بابان پێدڤیە ب هێمنی ل گەل باخڤن، بۆ وی شرۆڤە بكه‌ن كو ئه‌و خەلەتیا وی دڤێت بکەت، یا چاوانە و دێ ئه‌نجامێن وێ د چاوا بن.
گەلەک یا گرنگە، بۆ رەفتارکرنێ ل گه‌ل زارۆیێن سنێلە، دایك و باب ل سه‌ر هه‌ر تشتەکێ رێكبكه‌ڤن، نه‌كو هه‌ر ئێک ب رەنگەکێ رەفتارێ ل گه‌ل بكه‌ت.
ئەڤرۆ نیوز:
به‌رپرسه‌كێ وه‌زاره‌تا ساخله‌میا عیراقێ ده‌رباره‌ی ئینانا ڤاكسینێ دژی كۆرۆنایێ دیار کریە: رێكخراوا ساخله‌میا جیهانى هه‌تا دووماهیا ئەڤ سالە دێ كارى ب فاكسینێ بریتانى یان یێ چینى كه‌ت.
د. وسام حسێن بسپورێ ساخله‌میا گشتى ل وه‌زاره‌تا ساخله‌مى و ژینگه‌ها عیراقێ دبێژیت: عیراق د هه‌ڤپه‌یمانیا هه‌ڤبه‌شا فاكسینێدایه و دێ 10 ملیۆن ده‌رمانان وه‌رگریت و دێ تێرا 25% یێ ئاكنجیێن عیراقێ كه‌ت و پشتى قۆناغا ئێكێ دێ 10 ملیۆنێن دى ژى وه‌رگریت.
هەروەسا گۆت ژى: بكارئینانا وى ژ ئالیێ نه‌خۆشانڤه چو مه‌ترسى ل سه‌ر نابیت، چونكى ئه‌ڤ ده‌رزیه دێ بۆ سیهێن نه‌خوشى تایبه‌ت بۆ 79% یا وان تووشبوویێن دبن هه‌ناسه‌یا ده‌ستكردا هێته دانان، ده‌مێ چاره‌سه‌ركرنێ ژى بله‌زتر دكه‌ت، چونكى ئه‌و ده‌رزیه هه‌لگرێ كومه‌كا پروتینایه ژ ( ئینترفیرون بیتا ).
ئەڤرۆ نیوز:
بۆ ل بەرچاڤگرتنا رەوشا دارایا وەلاتیێن هەرێما کوردستانێ، وەزارەتا خواندنا بلند و ڤەکۆلینێن زانستى، کرێیا خواندنا پارالێل و ئێڤاران ل سەرجەم زانکۆ و پەیمانگەهێن حکومی ب رێژا (٤٥%) هەڤشێوێ سالا بوری بۆ سەرجەم قۆناغێن خواندنێ کێمکریە.
ئەڤرۆ دوشەمبی، د. ئارام محەمەد قادر سەرۆکێ جڤاتا وەزارەتێ و وەزیرێ خواندنا بلند و ڤەکۆلینێن زانستی و ب ئامادەبوونا بریکارێ وەزارەتێ و سەرۆکێن زانکۆیان و ئەندامێن جڤاتا وەزارەتێ، کۆمبوونا ژمارە (١٠) یا جڤاتا وەزارەتا خواندنا بلند و ڤەکۆلینێن زانستى ل هۆلا کۆمبوونێن سەنتەرێ رەوشەنبیرى و جڤاکی یێ زانکۆیا سەلاحەدین برێڤەچوو.
د پێنگاڤا ئێکێ دا، جڤاتا وەزارەتێ پشتی دانوستاندنێ، بریاردا ب کێمکرنا رێژا (٤٥%) یا کرێیا خواندنا پارالێل و ئێڤاران ل ماوێ کابینا نەهێ یا حکومەتا هەرێما کوردستانێ بۆ سەرجەم قۆناغێن خواندنێ ل زانکۆ و پەیمانگەهێن حکومی یێن هەرێما کوردستانێ هەڤشێوێ سالێن بوری، ئەڤ بریارە دێ خواندنا (دبلۆم، بەکالۆریۆس، ماستەر و دکتۆرا) یێ ڤەگریت.
ئەڤرۆ نیوز، زنار:
رێڤەبەریا شوونواران ل پارێزگەها دهۆكێ دیتنا پارچەكا شوونواران ل گرێ بالیۆز راگەهاند، كو ژیێ وێ پارچێ بۆ پێشی دو هزار و 181 سالان ڤەدگەریت.
د. حەسەن ئەحمەد قاسم رێڤەبەرێ شوونۆارێن دهۆێ راگەهاند: ئەو پارچا ل گرێ بالیۆز ب دووراتیا 10 كیلۆمەتران ل رۆژئاڤایێ باژێرێ دهۆکێ هاتیە دیتن، گرنگیەكا مەزن یا هەی بۆ مێژوو و شارستانیەتا كوردستانێ.
هەروەسا گۆتیە: كو تێكستەك ب زمانێ (هێلینستی) ل سەر هاتیە نڤێسین، پشتی ئەو نڤیسینە ژ ئالیێ شارەزایێن شوونواران ڤە هاتیە وەرگێران، دیاربوویە کو ناڤێ پاشا (سیلوقی هیلنستی دیمتریوس) ئەوێ ل سالا 165 ل پێشی زایینێ حوكومرانی ل ڤێ دەڤەرێ كری، ب رێنڤیسا گریكیا كەڤن ل سەر هاتیە نەخشاندن.
نيشاندان