ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا کەسەک ب گرانی بریندار بوو.
ناڤهاتی زێدەتر گۆت: ئەڤرۆ سێشەمبی ٦⁄١٠⁄٢٠٢٠، ل سەر جادا گشتی یا دھوکێ و ل نێزیک کۆمپانیا جیھان سێ ترۆمبێلان لێکدا، کو ترۆمبێلەکا تایبەت ئۆپل ل گەل ترۆمبێلەکا تایبەت لاندوگروزەر ل گەل ترۆمبێلەکا بارھەلگر پیکاب، د ئەنجامدا کەسەک ب گرانی برینداربوویە و زیانێن مادی یێن مەزن گەھشتنە وان ترۆمبێلان ژی.
ئەڤرۆ نیوز:
رێکخراوا ساخلەمیا جیهانی ئاشکرا کریە: دبیت 10% یا ئاکنجیێن سەر روویێ ئەردی تووشی ڤایرۆسێ کۆرۆنایێ ببن، ژ ئەگەرێ بەربەلاڤبوونا وی ڤایرۆسی و ئەنجام نەدانا پشکنینان ژ ئالیێ زۆربەیا وان کەسێن توشبووین ڤە، لدووڤ گۆتنا بەرپرسێن وێ رێکخراوێ 760 ملیۆن کەس تووشی وی ڤایرۆسی بووینە و ئەڤ ژمارە 20 بەرامبەری وێ ژمارێ یە یاکو ب فەرمی هاتیە ئاشکرا کرن، لدووڤ داتایێن زانکۆیا جۆن هۆپکینس هەتا نوکە تووشبوونا 35 ملیۆن کەسان ب وی ڤایرۆسی هاتیە پشت راست کرن.
ئه‌ڤرۆ نیوز، بارزان مزوورى:
لوقمان سلێمان،به‌رپرسێ راگه‌هاندنێ نڤیسینگه‌ها په‌رستگه‌ها لالش بۆ ئه‌ڤرۆ نیوز گۆت: ئه‌ڤرۆ 6/10/2020 لدووڤ بریارا میرێ ئێزدیان و جڤاتا رۆحانیا ئێزدیا بۆ ماوێ حه‌فتیه‌كێ دێ ده‌رگه‌هێ په‌رستگه‌ها لالش هێته داخستن هه‌ر ژ رێكه‌فتى 6/10 هه‌تا 13/10 بریار دێ ل سه‌ر ڤه‌كرنا ده‌رگه‌هێ په‌رستگه‌هێ بۆ سه‌ره‌دانكارا دهێتە ڤه‌كرن.
ناڤهاتى خویاكر مه‌ره‌م ژ ڤێ بریارێ وه‌ك رێزگرتن بۆ گیانێ بابه‌شێخ و پاراستن ژ ژیانا وه‌لاتیان ژ ڤایرۆسێ كورونا ژبه‌ركۆ د نها دا ئه‌م د ره‌وشه‌ك خراپ داینه ژبه‌ر به‌لاڤ بونا ڤایرۆسێ كورونا،
ناڤهاتى گۆت كۆ ئه‌ڤه د ده‌مه‌كى دایه كۆ به‌رى چه‌ند رۆژایه بریار هات بۆ دان كۆ جه‌ژنا جه‌مایێ كۆ ئه‌ڤرۆ 6/10/2020 ئێكه‌م رۆژه ل جه‌ژنێ ئه‌ڤ جه‌ژنه نه‌هێت گێران.
ئەڤرۆ نیوز، زنار تۆڤی:
رێڤەبەرێ پەرتۆکخانێن گشتی ل پارێزگەها دهۆکێ بۆ ئەڤرۆ نیوز دیار کر: ئێدی نڤیسەرێن پارێزگەها دهۆکێ دشێن کێمتر د 10 خۆلەکان دا ژمارا سپاردنێ وەربگرن، هەر چەندە وەزارەتا رەوشەنبیری و لاوان یا حوکمەتا هەرێما کوردستانی ل هه‌یڤا بورى بریار دابوو، كو ژمارا سپاردنێ ب تنێ ژ ئالیێ رێڤەبەریا گشتی یا پەرتوکخانەیان ڤە ل هەولێرێ بهێتە دان.
ئیسماعیل تاهر، رێڤەبەرێ پەرتۆکخانێن گشتی ل پارێزگەها دهۆکێ، زێدەتر گۆت: وەزارەتا رەوشەنبیری ئه‌و ئاگه‌هداركرینه، کو دهۆک دێ وەکو جاران ژمارێن سپاردنێ دەته نڤیسەران و کێمتر ژ 10 خۆلەکان دێ ژمارێ وەرگریت، ئەوژى پشتى په‌رتۆكا خوە یا (PDF) و ناسنامه‌كا كۆپى پێشكێشى په‌رتۆكخانا به‌درخانیان دكه‌ت.
هەروەسا دیار کر ژی: ئێدی ژمارا سپاردنێ ب رێیا ئه‌لەكترۆنى و تێله‌فۆنان ناهێنه دان، دڤێت نڤیسه‌ر یان نوونه‌رێ ده‌زگه‌هێ وه‌شانێ ل په‌رتۆكخانا به‌درخانیان ئاماده‌ببیت و ژمارێ ب نڤیساره‌كا فه‌رمی یا ئیمزا و مۆركرى وه‌ربگریت، ئاماژە دا بێى نڤیسارا فه‌رمی یا په‌رتۆكخانا به‌درخانیان چو په‌رتۆك ل سنۆرێ پارێزگه‌ها دهۆكێ ناهێنە چاپکرن.
ئەڤرۆ نیوز:
ئەڤرۆ دوشەمبی، وەزارەتا ساخلەمی و ژینگەها عیراقێ، ئامارێن 24 دەمژمێرێن بوری یێن كۆرۆنایێ بەلاڤکرن و راگەهاندیە: 3 هزار و 808 حالەتێن نوو یێن کۆرۆنایێ هاتینە تۆمار كرن، دیسان 4 هزار و 676 کەس ژی باشبووینە.
هەروەسا 65 تووشبوویێن دی ب كۆرۆنایێ وەغەر کریە.
هەتا نوکە 382949 کەس ل عیراقێ تووشی کۆرۆنایێ بووینە، دیسان 312158 کەس ژی باشبووینە و هەتا نوکە 9464 کەسان وەغەر کریە.
ئەڤرۆ نیوز:
ئەحمەد مەزهەر جبوری، ئەندامێ لژنا دارایی ل پەرلەمانێ عیراقێ دیار کر: داخوازیا حوکمەتا عیراقێ بۆ وەرگرتنا قەرێن ناڤخۆیی و دەرڤە، بەلگەیە ل سەر لاوازیێ د ئەنجامدانا چاكسازیێن ئابووری دا ل عیراقێ، هەروەسا وەرگرتنا قەران دێ بیتە ئەگەرێ ئیفلاس و وێرانكرنا وەلاتی.
ناڤهاتی گوت ژی: دابینكرنا مووچێ فەرمانبەران ئەركێ حوکمەتێ یە و پێدڤیە وی ئەركی بجهـ بینیت، دیسان هەر بزاڤەکا حوکمەتا عیراقێ بدەت كو وێ كێشێ بێخیتە ستوویێ پەرلەمانی، دێ بیتە رەڤین ژ ئەداكرنا كارێ خوە.
ئه‌ڤرۆ نیوز:
ب فه‌رمی یاریزانێ یانا دالکورد یا سویدی و یانا دهۆک یێ به‌ری نوکه هارون ئه‌حمه‌د بۆ ماوێ وه‌رزه‌کێ ب شێوه‌یێ خواستن ژ دالکورد هاته ڤه‌گوهاستن بۆ یانا زاخۆ.
هه‌ژی گوتنێ یه بریار بوو، هارون ئه‌حمه‌د ل ماوێ بوری په‌یوه‌ندی ب یانا دالکورد بکه‌ت پشتی ل ڤه‌گوهاستنێن بوری هه‌ڤبه‌ستا وێ یانا سویدی ئیمزاکری لێ ژبه‌ر نه وه‌رگرتنا ڤیزێ نه‌شیان گه‌شتێ بوو وه‌لاتێ سوید بکه‌ن.
ئەڤرۆ نیوز:
وەزارەتا ئەوقاف و كاروبارێن ئاینی ل هەرێما کوردستانێ راگەهاند: چوونا عوموێ بۆ خەلكێ هەرێما كوردستانێ دێ یا گرێدای بیت ب كێمبوونا رێژا تووشبوونا ڤایرۆسێ كۆرۆنایێ ڤە.
نەبەز ئیسماعیل پەیڤدارێ وەزارتا ئەوقاف و کاروبارین ئاینی دبەیاننامەكێ دا راگەهاند: هەر دەمێ ئاستێ تووشبوونێ ب ڤایرۆسێ كۆرۆنایێ كێم بوو، دێ دەلیڤە هێتەدان وەلاتیێن هەرێما كوردستانێ رێورەسمێن عومرێ ئەدا بكەن.
هەروەسا خۆیاكر: هەر دەمێ وەلاتێ سعودی داخوازیەكا فەرمی ژ هەرێمێ كر بۆ وێ پرسێ، لژنەكا تایبەت دێ بریارێ ل سەر چوونا خەلكێ هەرێمێ دەت بۆ ئەداكرنا عومرێ.
ناڤهاتی ئاشكرا كر: سالانە زێدەتر ژ 20 هزار كەسان ژ هەرێما كوردستانێ قەستا سعودی دكەن بۆ ئەداكرنا عومرێ، لێ ژ ئەگەرێ بەڵاڤبوونا ڤایرۆسێ كۆرۆنایێ، نوکە ئەڤ پرۆسە هاتیە راگرتن.
ئەڤرۆ نیوز، عەلی حاجی:
بەرپرسێ راگەهاندنا ساخلەمیا زاخۆ، بۆ ئەڤرۆ نیوز گۆت: ئەڤرۆ ل زاخۆ زارۆیەکێ د ژیێ سال و نیڤان دا ژ قاتێ حەفتێ دکەڤیت و وەغەر کر.
زێدەتر گۆت ژی: ئەو روودان ئەڤرۆ ل شوقێن نیو زاخۆ دروست بوویە، ئەو زارۆیێ د ژیێ سال و نیڤان دا ژ قاتێ حەفتێ یێ شوقەکێ کەفتیە و ئێکسەر وەغەر کریه و تەرمێ وی زارۆکی بۆ نۆشداریا داد ل زاخۆ هاتیە ڤەگۆهاستن.
نيشاندان