ئەڤرۆ نیوز، زنار تۆڤی:

کوردۆ ئیحسان رێڤەبەرێ گشتی یێ وەبەرهێنانێ ل پارێزگەها دهۆکێ، بۆ ئەڤرۆ نیوز دیار کر: کو وان ئاگەهداریا هەموو وەلاتیێن ئاکنجیێن پرۆژێن وەبەرهێنانێ کریە، یێن کو ل شوقە و خانی و ڤیلان دا دژین، ل سەرانسەری پارێزگەها دهۆکێ کو خزمەتگوزاریێن یەکێن ئاکنجیبوونێ هاتینە رێکخستن و کێمکرن لدووڤ لیستێن هەڤپێچ دا، لدووڤ جۆرێ خزمەتێن دهێنە پێشکێشکرن دناڤ سنۆرێ هەر پڕۆژەیەکی دا و لدووڤ رێنمایێن حوکمەتا هەرێما کوردستانێ.

ناڤهاتی دیار کریە ژی: ئەڤ بهایێن نوو یێن خزمەتگوزاریێن یەکێن ئاکنجیبوونێ ژی دی ژ هەیڤا هەشت دەست پێکەن، لەوما داخوازێ ژ وەلاتیان دکەین کو لدووڤ خشتێ هەڤپێچ پارێ خزمەتگوزاریان بدەن، هەر دیسان خودانێن پرۆژان و نڤێسینگەهێن کۆمپانیان ژی دڤێت پێگیر بن ب پێشکێشکرنا خزمەتگوزاریان، هەروەسا هەر پرۆژەیەکێ بەرۆڤاژی گاڤان بهاڤێژیت دێ پێرابوونێن قانوونی ل گەل هێنە کرن.

 
ئەڤرۆ نیوز:

ل دەمژمێر پێنجی ئێڤاریا ئەڤرۆ سێشەمبی، هێزێن ئەسمانی یێن سۆپایێ تورکیا پشتا چیایێ کۆرەژاری ل سنورێ ناحیا شێلادزێ بۆمبەباران کر، هەتا نوکە زیانێن وێ بۆمبەبارانێ نەهاتینە زانین.

ئەڤرۆ نیوز، زنار تۆڤی:

موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا کەسەک بریندار بوو.

ناڤهاتی زێدەتر گۆت: ل شەڤا بوری ل ناڤا سەنتەرێ قەزا زاخۆ و ل جادا بێدارێ ترۆمبێلەکا تایبەت جێب رەنج رۆڤر یا رەنگ شین، ژ ئەگەرێ بلەز هاژوتنێ، ترۆمبێل ل ژێر کونترۆلا شۆفێری دەرکەفتیە و خوە ل سێ ستوونێن کارەبێ ل گەل نیشانەکا هاتنوچوونێ و چەندین داران دایە، د ئەنجامدا کەسەک بریندار بوویە و زیانێن مادی یێن مەزن ب ترۆمبێلێ کەفتینە و ستوونێن کارەبێ ژی هاتینە هەلوەشاندن.