ئەڤرۆ نیوز:
وەزارەتا چاندنا هەرێما کوردستانێ بریار دا، ژ ١ تەباخێ وێڤە ئینانا چەند بەرهەمێن چاندنێ یێن دەرڤە دێ هێنە قەدەغە کرن.
ئەڤرۆ چارشەمبێ، وەزارەتا چاندنێ دەربارەی قەدەغەیا ئینانا چەند بەرهەمێن چاندنێ یێن دەرڤە دیارکر: ژ پێخەمەت پاراستنا بەرهەمێ ناڤخۆ مە بریارا قەدەغەکرنا ئینانا هەر ئێک ژ بەرهەمێن هنار، هژیر، سێڤ، شتی، پتات، خیار و هنگڤینی دا.
دیارکریە ژی، پشکەک ژ ڤان بەرهەمان مە پێشتر باج لسەر دانابوون، لێ ژ ١ تەباخێ ڤە دێ کار ب بڕیارا قەدەغەکرنێ هێتە دان.
ئەڤرۆ نیوز:
ب مخانى ڤه ل ئێڤاریا 14/7/2020 مامۆستایێ هوزانڤان و ره‌وشه‌نبیر ( سەدیق شه‌رو ) خاترا خوە ژ مه خواست و مالئاڤاهى كر.
مامۆستا ( سەدیق شه‌رو ) هه‌ڤاله‌كێ دلسوزێ سازیێن مه یێن رەوشنبیرى و راگه‌هاندنێ بوو، چه‌ندین سالان د بیاڤێ رادیۆ و تێله‌ڤزیۆن و رۆژنامه و دراما كوردى، ل سازیێن ناڤه‌ندا خانى دا كاره‌كێ به‌رچاڤ كریه و شین تلبێن وى ل بزاڤا رەوشنبیرى و ئه‌ده‌بى و هونه‌رى ل دهۆكێ د دیارن، دێ ل جیهانا نه‌مریێ دا مینن.
هوزانڤانێ دلسۆز مرۆڤه‌كێ رەوشنبیرى و جڤاكى یێ خۆشتڤى بوو، دید و بوچوونێن وى بالكێشا گوهدارا دكر و باندورا خوە دكر.
ب ڤێ هه‌لكه‌فتا دلته‌زین سه‌ره‌خۆشیێ ل كه‌سوكار و هه‌ڤال و خه‌لكێ دكه‌ین ژ خودێ دخوازین جهێ وی ل به‌هشتا به‌رین خوشكه‌ت و ته‌مه‌نه‌ك درێژ بده‌ته كه‌سوكارێن وى.
انا لله وانا الیه راجعون
ناڤه‌ندا خانى
ئەڤرۆ نیوز، زنار تۆڤی:
بەری دەمەکێ سەدیق شەرۆ نڤیسکار و رۆژنامەڤان و مامۆستا و هەلبەستڤانێ دێرینێ پارێزگەها دهوکێ ب ئەگەرێ نەخۆشیێ وەغەر کر.
هەروەسا چەندین هەلبەسێتن وی ژ ئالیێ هونەرمەندێن دهۆکێ بووینە ستران و هاتینە گۆتن، دیسان چەندین بەرنامە ژی بۆ تەلەفزیۆنان بەرهەڤکرینە.
سەدیق شەرۆ ل سالا ١٩٥٤ ل دهۆکێ ژ دایک بوویە و دەرچویێ کۆلیژا ئادابێ یە پشکا زمانێ عەرەبی ل زانکۆیا موسل.
ئەڤرۆ نیوز:
وەزارەتا ساخلەمیا هەرێما کوردستانێ ئامارێن 24 دەمژمێرێن بوری یێن تووشبوون و وەغەرکرنێ ب کۆرۆنایێ بەلاڤکرن و گۆتیە: 181 تووشبوویێن نوو یێن کۆرۆنایێ هاتنە تۆمار کرن و 12 کەس ژی ب وێ پەتایێ مرینە.
هەروەسا گۆتیە: 69 ژ وان تووشبوویان ل سلێمانیێ نە، 48 ل ئیدارا گەرمیان، 40 تووشبوویان ل هەولێرێ، 14 ل هەلەبجە و 10 ژی ل دهۆکێ.
ئەڤرۆ نیوز:
لدووڤ هندەک نووچەیێن جیهانی، چین و ئیران ب رەنگەکێ نهێنی مژوولی ئیمزاکرنا گرێبەستەکێ نە ب گۆژمێ (٤٠٠ ملیار دۆلاران)، دڤێ گرێبەستێ دا، چین دێ وەبەرهێنانێ ل ئیرانێ دا کەت، ل هەمبەری فروشتنا نەفت و گازا ئیرانێ ب رەنگەکێ گەلەک نزم و ئەرزان بۆ حوکمەتا چینی بۆ دەمێ 25 سالان.
هەروەسا د وێ گرێبەستێ دا، حوکمەتا چینێ و ئیران دێ ھەڤکاریا ئێک کەن، ل پەرەپێدانا چەک و تەقەمەنیان و ڤەکۆلینێن زانستی و لێک گوهۆرینا زانیاریان دناڤبەرا دەزگەهێن ئەمنی و مەشقا سەربازی دا، ئەڤ گرێبەستە د دەمەکێ دایە، کو نوکە بارێ ئابووری یێ ئیرانێ گەلەک یێ خرابە و چینێ ژی ئەڤ چەندە ب دەلیڤە زانیە، ژ پێخەمەت پێگەهێ خوە ل ڤێ دەڤەرێ ب هێز بێخیت.
ئەڤرۆ نیوز:
ل گەرا 36 یا خولا ئیسپانیا، یانا ریال مەدرید سەرکەفتنەکا ب زەحمەت ژ دەرڤەی یاریگەها خوە ل سەر یانا گرانادا تۆمار کر، نوکە ب تنێ پێنگاڤەکا دیتر مایە بۆ هندێ ریال ببیتە قارەمانا خولا ئیسپانی.
ریال مەدرید ل دەرڤەی یاریگەها خوە بۆ مێهڤانا یانا گرانادا، یاری ژی ب ئەنجامێ دو گۆلان بەرامبەر گۆلەکێ ب دووماهی هات، هەردو گولێن یانا مەدریدی ل گێمێ ئێکێ هاتنە تۆمار کرن، نوکە ریال ل سەر لیستا خولا ئیسپانیا ب 83 خالان دهێت ب جۆداهیا چار خالان ژ نێزیکترین هەڤرکا خوە یانا بەرشەلۆنا.
ئەڤرۆ نیوز:
ل رۆژا ئێکێ یا ڤەکرنا بازارێن نەفتێ د ڤێ حەفتیێ دا، بهایێ نەفتێ ب رێژا 2% داکەفت، ئەڤە ژی ژ ئەنجامێ نێزیکبوونا کۆمبوونا کۆمیتا چاڤدێریا ئۆپێک پلەسێ بوویە، کو دهێتە پێشبینی کرن رێککەفتنا کێمکرنا بەرهەمئینانا نەفتێ بۆ هەیڤا تەباخێ درێژنەکەن و ب تنێ 7.7 ملیۆن بەرمیلێن نەفتا رۆژانە کێم بکەن کو پێشتر ل سەر رێککەفتبوون.
ئەڤرۆ دوشەمبی 13-07-2020 جارەکا دی بهایێ نەفتێ داکەفت و بهایێ بەرمیلەکێ نەفتا برێنت گەهشتە 42 دۆلار 60 سەنتان، بهایێ بەرمیلەکێ نەفتا تەکساس هاتە ژێر 40 دۆلار و ب 39 دۆلار و 50 سەنتان مامەلە پێ هاتیە کرن.
ئەڤرۆ نیوز:
رێڤەبەریا گشتی یا ساخلەمیا پارێزگەها دهۆکێ راگەهاند: ئەڤرۆ 13/7/2020، شەش نەخۆشێن دی یێن ڤایرۆسێ کۆرۆنایێ ل دهۆکێ کو د نەخۆشخانێ دا بوون، پشتی هەموو پشکنین بۆ هاتینە کرن، دیاربوویە کو ب تەمامی چارەسەربووینە و ب سلامەتی ژ نەخۆشخانێ هاتنە دەرخستن.
هەروەسا گۆتیە: نوکە هژمارا گشتی یا وان نەخۆشێن چارەسەربووین گەهشتنە 196 کەسان و نوکە 95 نەخۆش ماینە د نەخۆشخانێ دا.
ئەڤرۆ نیوز:
رێكخراوا ساخلەمیا جیهانی رایگەهاند: ئەگەر وەلاتێن جیهانێ پابەندی رێكارێن خۆپارێزیێ نەبن، هندی وێڤەترە مەترسیێن ڤایرۆسێ كۆرۆنایێ زێدەتر لێ دهێن.
د كۆنگرەکێ رۆژنامەڤانیدا تێدرۆس ئەدهانوم، رێڤەبەبەرێ گشتی یێ رێکخراوا ساخلەمیا جیهانی گۆت: من دڤێت ب ئاشکرایی بێژم، گەلەک وەلات ب ئاراستێن خەلەت دا دچن، هەتا نوکە ڤایرۆسێ كۆرۆنایێ دوژمنێ ئێکێ یێ جیهانێ یە.
گۆتیە ژی: هەکە وەلاتێن جیهانێ پابەندی رێكارێن بنەرەتی یێن خۆپارێزیێ نەبن، ئەم دێ ژ ڤێ قۆناغێ چینە ئێکا خرابتر و نابیت ب ڤی رەنگی یا بەردەوام بیت.
نيشاندان