ئه‌ڤرۆنيوز:
برياره شانده‌كێ هه‌رێما كوردستانێ سوباهى شه‌مبيێ 12/1/2018 سه‌ره‌دانا به‌غدا بكه‌ت.
ل دووڤ ماپه‌رێ شه‌فه‌ق نيوز، سوباهى شانده‌كێ بلند يێ هه‌رێما كوردستانێ دێ سه‌ره‌دانا به‌غدا كه‌ت ل دۆر پرسێن ده‌رگه‌هێن سنورى وفرۆكخانان.
ئه‌ڤرۆنيوز:
ل دووڤ پێزانينێن ل ده‌ف وه‌زاره‌تا چاندنێ ل هه‌رێما كوردستانێ هه‌ين، نيزيكى 87 هزار (مه‌زره‌عه) وڤيللا ل هه‌رێما كوردستانێ يێن هاتينه دروستكرن كو پتريا وان ب شێوه‌كێ نه قانوونى يێن هاتينه دروستكرن وپتريا وان ژى دوور ژ رێنمايان كاره‌ب يا بۆ هاتيه راكێشان وبيرێن ئاڤێ بۆ هاتينه لێدان.
محه‌مه‌د شوكرى ئه‌ندامێ لژنا بلند يا چاكسازيێ ل سه‌رۆكاتيا هه‌رێما كوردستانێ بۆ باس دياركر كو پتريا مه‌زره‌عێن هاتينه دروستكرن ب نه‌قانوونێ يێن دروستكرين ونێزيكى 87 هزار مه‌زره‌عه وڤيللا ل كوردستانێ يێن هه‌ين وپتريا وان ب سه‌رپێچى يێن هاتينه دروستكرن.
دياركر” رێ وكاره‌ب بۆ وان مه‌زره‌عان يێن هاتينه دروستكرن وبيرێن ئيرتيوازى وبيرێن دى يێن ئاڤێ يێن بۆ هاتينه لێدان كو هه‌موو يێن بووينه كێشه بۆ كه‌رتێ چاندنێ وئابوورێ گشتى وئاڤا بن ئه‌رد وفشاره‌كا مه‌زن ل سه‌ر كاره‌بێ يا دروستكرى وپترياوان ژى پارێ كاره‌بێ ناده‌ين”.
محه‌مه‌د ئه‌مين فارس، رێڤه‌به‌رێ گشتيێ ژێده‌رێن ئاڤێ ل وه‌زاره‌تا چاندنێ ل هه‌رێمێ گۆت” زێده‌تر ژ 22 هزار بيرێن نه‌قانوونى ودوور ژرێنمايان ل هه‌رێما كوردستانێ يێن هاتينه لێدان”.
ئاشكراكر ژى” وان بيرێن نه‌قانوونى كاريگه‌ريه‌كا خراب ل سه‌ر ژێده‌رێن ئاڤێ كريه وهه‌بوونا وان هه‌موو ڤيللان ژى كاريگه‌ريا خراب كريه سه‌ر ئاڤێ وچاندنێ وپێدڤيه پێرابوون ل به‌رامبه‌ر بهێنه وه‌رگرتن”.
مافپه‌روه‌ر حوسامه‌دين سه‌ردارى دياركر” هنده‌ك كه‌س ب ناڤێ ده‌لال ل باژێرڤانيان كرين وفرۆشتنێ يا ب مولكێ گشتى كرى وب نه‌قانوونى مولكى گشتى يێ ئيفرازكرى وپارچه پارچه يێن فرۆتين ومه‌زره‌عه وڤيللا يێن دروستكرين وكريار ژى يێن بۆ په‌يداكرين”.
سه‌ردارى دياركر كو گه‌له‌ك جاران كه‌سێن به‌رپرس يێن ل گه‌ل وان كه‌سێن كارێن نه‌قانوونى دژى مولكێ گشتى دكه‌ن.
دراپۆرتا لژنا چاكسازيێ يا سه‌رۆكاتيا هه‌رێما كوردستانێ دا هاتيه” بۆ چاره‌سه‌ريا مولكێن داگيركرى يێن حكومى وكێشا سه‌رپێچيێ ل سه‌ر ئه‌ردێ حوكمه‌تێ و ڕێكخستنەوەی گرێبەستەكانی موساتەحە ، پێرابوونێن پێدڤى يێن هاتينه وه‌رگرتن ول ده‌مه‌كێ نێزيك بريار وپێرابوونێن كريارى وپێدڤى ژلايێ حوكمه‌تێ دێ هێنه وه‌رگرتن”.
ئاماژه ب وێ چه‌ندێ ژى هاتيه كرن، ل سه‌ر ئاستێ داواكارێ گشتى بۆ رێگرتنێ ل سه‌رپێچيێن زێده‌تر 900 سكالايێن قانوونى دژى سه‌رپێچكاران يێن هاتينه ئاراسته‌كرن بۆ دادگه‌هان ل هه‌رێما كوردستانێ.
حسێن محه‌مه‌د، رێڤه‌به‌رێ گشتيێ كاره‌با پارێزگه‌ها هه‌ولێرێ بۆ باس گۆت” كريا كاره‌با مه‌زره‌عا وڤيللا يا هاتيه زێده‌كرن كو وان ڤيللان بخوه‌ڤه دگريت ئه‌وێن ل ده‌وروبه‌رێن باژێران ول ده‌ڤه‌رێن دوور هاتينه دروستكرن، مه‌زره‌عه ژى يێن گه‌شتيارى بخوه‌ڤه دگرن نه‌كو يێن به‌رهه‌مێن چاندنێ”.
گۆت ژى” تنێ ل سنورێ هه‌ولێرێ زێده‌تر ژ هزار ڤيلا ومه‌زره‌عێن گه‌شتيارى يێن هه‌ين وكاره‌بايه‌كێ مه‌زن بكاردئينن ول ده‌مێ دچۆل ژى كاره‌بێ ب هه‌ده‌ر دده‌ن، به‌رى نوكه وه‌كو هه‌ڤپشكێن مالان ره‌فتار دگه‌لدا دهاته كرن، به‌لێ ژنوكه وپێڤه ره‌فتاره‌كا دى دێ ل گه‌لدا هێته كرن”.
رێبوار ئه‌حمه‌د، ئه‌ندامێ جڤاتا پارێزگه‌ها سليمانيێ بۆ باس گۆت” ئه‌و مه‌زره‌عه وخانيێن ب سه‌رپێچى ل سه‌ر مولكێ گشتى هاتينه دروستكرن دێ هێنه تاپۆكرن وئه‌و بريار ل سليمانيێ يا هاتيه ده‌ركرن بۆ وان مه‌زره‌عه وڤيللايێن كو به‌رى نوكه ب نه‌قانوونى هاتينه دروستكرن”.
ئه‌نوه‌ر عومه‌ر، رێڤه‌به‌رێ گشتيێ پلاندانانێ ودووڤچوونێ ل وه‌زاره‌تا چاندنێ راگه‌هاند” چو بريار ورێنما بۆ دروستكرنا ڤيللان نينن، هه‌ر نابيت ڤيللا بهێنه دروستكرن وپێدڤيه بهێنه خرابكرن”.
محه‌مه‌د رێكانى، ئه‌ندامێ ده‌سته‌يا مافێ گشتى ل سه‌رۆكاتيا داواكارێ گشتى ب باس گۆت” ب هزاران كه‌يسێن پێدڤى ل داواكاريا گشتى ل سه‌ر ئه‌نجامدانا سه‌رپێچيێ ل سه‌ر مولكێ گشتى ب ئه‌ردێ چاندنێ وباژێرڤانيێ هاتينه تۆماركرن”.
گۆت ژى” 10 هزار باده‌ك دتايبه‌تن ب سه‌رپێچى كرنێ ل سه‌ر ئه‌ردێ چاندنێ وباژێرڤانيێ، هنده‌ك ژوان كه‌يسان يێن هاتينه بلندكرن بۆ دادگه‌هێ”.
ئه‌ڤرۆنيوز:
وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ ئاگه‌هداريا هه‌موو زانكۆيێن هه‌رێمێ دكه‌ت كو خۆلا دويێ يا پرۆژێ (HOPES) بۆ وه‌رگرتنا (PROPOSAL) دێ ده‌ستپێكه‌ت.
دوێ ئاگه‌هداريا وه‌زاره‌تا خواندنا بلند دا، داخواز ژ هه‌موو زانكۆيێن هه‌رێمێ هاتيه كرن كو پرۆپۆزه‌لێن خوه بۆ ڤى پرۆژه‌ى دده‌مێ دياركرى دا پێشكێش بكه‌ن.
پرۆژێ (HOPES) ژلايێ رێكخراوا داد يا ئه‌لمانى وجڤاتا كه‌لتوورى يا بريتانى ورێكخراوا كاميس فرانس يا فه‌ره‌نسى وئۆفيك دهێته بجهئينان، پرۆژێ ناڤبرى بۆ مه‌ره‌ما پشته‌ڤانيا ده‌ستپێشخه‌ريا داهێنانێ يه دئاميرێن خواندن وپرۆژێن كورت خايه‌ن دا وئه‌و پرۆژه بۆ پشته‌ڤانيا ئاوارێن سووريێ وخه‌لكێ كێم ده‌رامه‌ته ل وه‌لاتێن مسر، هه‌رێما كوردستانێ، ئوردن، لوبنان، توركيا وسووريێ كو ژلايێ ده‌زگه‌هێن ناڤخوه‌يى دهێته بجهئينان.
دهه‌مان ده‌مدا، وه‌زاره‌تا خواندنا بلند هه‌موو زانكۆيێن هه‌رێمێ ئاگه‌هداردكه‌ت كو رۆژا 20/2/2018 دووماهى ژڤانه بۆ وه‌رگرتنا پرۆپۆزه‌لان.
ئه‌ڤرۆنيوز:
دو په‌له‌مانتار ژ ئه‌گه‌رێ ئه‌نجامدانێ شه‌ره بوكسێ دناڤ حه‌ره‌ما په‌رله‌مانى دا، دهێنه سزادان وبۆ ده‌مێ 15 رۆژان ئه‌ندامه‌تيا په‌رله‌مانى ژێ هاته وه‌رگرتن.
سه‌ليم جبوورى، سه‌رۆكێ په‌رله‌مانێ عيراقێ دبه‌رپه‌رێ خوه ل سه‌ر تۆرا جڤاكى يا فه‌يسبووكى، سه‌باره‌ت سزادانا هه‌ردو په‌رله‌مانتاران (رياز غالى وعه‌واد عه‌وادى) كو دكۆمبوونا رۆژا دوشه‌مبيا بۆرى 8/1/2018 دا سنورێ قانوونى ده‌ربازكربوو ل دۆر ده‌نگدانێ ل سه‌ر په‌رله‌مانتاره‌كى، به‌ياننامه‌ك هاتيه ده‌ركرن.
دپشكه‌كا وێ به‌ياننامێ دا هاتيه” سه‌رۆكێ په‌رله‌مانى بريار دا ل دووڤ ده‌ستهه‌لاتێن دستوورى وقانوونى ئاخڤتنێن وان هه‌ردو په‌رله‌مانتاران ژپرۆتوكۆلێ بهێنه ژێبرن و ئه‌ندامه‌تيا وان ژى بۆ ده‌مێ 15 رۆژان بهێته هه‌لاويستن”.
به‌يانناما سه‌رۆكێ په‌رله‌مانێ عيراقێ ئاماژه ب وێ چه‌ندێ كريه” د وا ن 15 رۆژان دا وه‌كو په‌رله‌مانتارێن نه به‌رهه‌ڤبووى دێ ره‌تار دگه‌ل واندا هێته كرن ومووچێ وان دێ هێته برين ودێ هێنه هنارتن ژى بۆ لژنا بنه‌مايێن ره‌وشتى بۆ ڤه‌كۆلينێ”.
ل رۆژا دوشه‌مبى 8/1/2018، شه‌ره ده‌ڤ دناڤبه‌را په‌رله‌مانتارێن ئه‌حرار يێن ب سه‌ر ره‌وتێ سه‌درى ڤه و په‌رله‌مانتارێن ئێكه‌تيا هێزێن نيشتمانى ( يا سونى) دروستبوو وپاشى بۆ شه‌ره بوكس دناڤبه‌را واندا.
ئه‌ڤرۆنيوز:
پێله‌كا به‌فر وبارانێ ل هه‌فتيا بهێت دێ هه‌رێما كوردستانێ ڤه‌گريت وبه‌فر دێ ل هه‌ردو پارێزگه‌هێن دهۆكێ وسلێمانيێ باريت.
مالپه‌رێ www.accuweather.com يێ جيهانێ به‌لاڤكر كو ل رۆژا ئه‌ينيا داهاتى 19/1/2018، پێله‌كا به‌فر وبارانێ دێ هه‌رێما كوردستانێ ڤه‌گريت.
مالپه‌رێ ناڤبرى دياركريه ژى كو به‌فر دێ ل هه‌ردو پارێزگه‌هێن دهۆكێ وسلێمانيێ باريت ول رۆژا پاشتر 20/1/2018 دێ باران هێت وبۆ ده‌مێ چه‌ندين رۆژان يا به‌رده‌وامبيت.
ئه‌ڤرۆنيوز:
ل دووڤ پێزانينێن نوونه‌راتيا حوكمه‌تا هه‌رێما كوردستانێ ل به‌لجيكا وئێكه‌تيا ئورۆپى، وه‌زيرێ به‌رگريێ به‌لجيكا( سيڤن ڤانده‌بوت) ل به‌ربوو سه‌ره‌دانا به‌غداوهه‌ولێرێ بكه‌ت ب مه‌ره‌ما سه‌ره‌دانا هێزێن به‌لجيكى ل وان عيراقێ وكوردستانێ، به‌لێ حوكمه‌تا عيراقێ رێ نه‌دايێ سه‌ره‌دانا هه‌رێما كوردستانێ بكه‌ت.
دلاوه‌ر ئاژگه‌يى نوونه‌رێ حوكمه‌تا هه‌رێما كوردستانێ ل ئێكه‌تيا ئورۆپى دبه‌رپه‌رێ خوه ل سه‌ر تۆرا جڤاكى يا فه‌يسبووكى ئه‌ڤرۆ ئه‌ينيێ 12/1/2018 ئاشكراكر كو ژبه‌ر وێ چه‌ندێ، وه‌زيرێ به‌رگريێ به‌لجيكا بريار دا سه‌ره‌دانا خوه بۆ عيراقێ ب هه‌لوه‌شينيت.
ڤێ رفتارا حوكمه‌تا عيراقى به‌لجيكا دلگران كريه وباليۆزێ عيراقێ ل به‌لجيكا گازى وه‌زاره‌تا ده‌رڤه كر ژبۆ وى چه‌ندێ كو ب فه‌رمى رۆهنكرنێ ل دۆر وى بابه‌تى بده‌ت.
به‌رى نوكه ژى، حه‌يده‌ر عه‌بادى سه‌رۆك وه‌زيرێن عيراقێ، رێگرى ل وه‌زيرێ ده‌رڤه‌يێ ئه‌لمانيا كربوو كو سه‌ره‌دانا هه‌رێما كوردستانێ بكه‌ت.
ئەڤرۆ نیۆز ، زنار تۆڤی:
ئاژانسا ئانادۆل یا تورکی بەلاڤکریە کو ب ئەگەرێ وەرگەریانا پاسەکێ ل باژێرێ سلۆپیا ل باکۆرێ کوردستانێ 9 وەلاتیێن عێراقێ گیانێ خوە ژ دەستداینە و ٢٨ کەسێن دی ژى برینداربوون.
وی ئاژانسێ ئاماژە ب هندێ ژی دایە، کو ئەڤرۆ ئەینیێ پاسەک کو هژمارەکا وەلاتیان تێدابوو، ل سلۆپیا وەگەریایە و ب وی ئەگەرێ ژی 9 کەسان گیانێ خوە ژ دەستدایە.
هەروەسا مالپەرێ دەیلی سەباح یێ تورکی بەلاڤکریە،کو ئەو پاسە ل باژێرێ سلوپیا وەرگەریایە و لدووڤ زانیاریێن دەستپێکی، سێ ژ وان کەسێن گیانێ خوە ژ دەستداین زارۆکن و برینا دو ژ برینداران ژى یا گرانە،هەروەسا گوتیە ژى، پشتى گەهشتنا تیمێن هەوارهاتنێ بریندار ڤەگوهاستینە نەخۆشخانا سلۆپیا.
ئەڤرۆ نیۆز ، زنار تۆڤی:
وەکو دیار هەڤپەیمانیا نوری مالکی بۆ هەلبژارتنێن 2018 یێن عێراقێ هاتە ئاشکرا کرن کو ژ ٧ لایێن سیاسی پێکهاتیە و ئەو هەڤپەیمانیە ب سەرۆکاتیا نوری مالکی ب خۆیە.
هەڤپەیمانیا نوری مالکی کو ناڤێ وێ دولەتا یاسایە ژ حزبێن ( دەعوە، دوعات ئیسلام، بزاڤا نور، تەڤگەرا وەسەت،بزاڤا بەشائیر شەبابی، لیستا مەعەل قانون، حزبا مەدەنی، تەڤگەرا سەقافی وەتەنی پێکهاتیە.
ئەڤە ژى ددەمەکێدایە،کو د ماوێ چەند رۆژێن بوری دا، هندەک زانیاری ئاشکرابووینە کو ئاماژە ب وێ هندێ ددەن،کو حەیدەر عەبادی دانوستاندن ل گەل لایەکێ حەشدا شەعبی کریە ژبۆ کو پێکڤە ژ دەرڤەیێ لیستا دەولەتا یاسا لیستەکێ بۆ هەلبژاردنان پێک بینن.
هەروەسا هندی عەبادی ئەندامێ حزبا دەعوە بیت،نەشێت ژ دەرڤەی سیاسیەتا حزبا خوە لیستەکا سەربەخۆ دورست بکەت.
د هەمان دەمدا بریارە ل هەیڤا ئەیارا ئەڤ سالە، هەلبژارتنێن عێراقێ بۆ پەرلەمانی و جڤاتێن پارێزگەها بهێنە ئەنجامدان.
ئەڤرۆ نیۆز، تۆڤی:
ئەڤە چەند پێزانینەکن ل سەر رەنگێن رەسیفا و گرنگە هەموو شۆفێر بزانن،ژ پێخەمەت هندێ کو ترۆمبێلێن خۆ ل جهێن قەدەغە رانەوەستینن و نەهێنە سزادان،ئەو رەنگ ژی ئەڤەنە:
هەکە رەنگێ رەسیفی یێ زەر و رەش بیت،راوەستیان لێ قەدەغەیە.
لێ هەکە رەنگێ رەسیفی یێ سپی و رەش بیت،دروستە تۆ لێ راوەستی.
هەروەسا هەکە رەنگێ رەسیفی یێ شين و سپی بیت،ئەو بۆ جهێ هاتنا خوارا نەفەرانە ژ ترۆمبێلێن پاس و نەفەرهەلگر.
دیسا هەکە رەنگێ رەسیفی یێ سپی و زەر بیت،ب چو رەنگان نابیت تۆ لێ راوەستى.
ئەڤرۆ نیۆز،زنار تۆڤی:
شاندەکێ حوکمەتا هەرێما کوردستانێ ب سەرۆکاتیا نێچیرڤان بارزانی سەرۆکێ حوکمەتا هەرێما کودستانێ ل ڤاتیکانە ب مەبەستا کۆمبوونێ و دیدارێ ل گەل پاپا فرانچیس، پاپایێ ڤاتیکان و بریارە ئەو شاندە ل گەل وەزیرێ دەرڤە یێ ڤاتیکانێ کۆمببن.
شاندێ هەرێما کوردستانێ ل ڤاتیکان پێکهاتیە ژ نێچیرڤان بارزانی سەرۆک وەزیرێن هەرێما کوردستانێ، فوئاد حوسێن سەرۆکێ دیوانا سەرۆکاتیا هەرێما کوردستانێ و رێزان قادر نوونەرێ حوکمەتا هەرێما کوردستانێ ل ئیتالیا.
کۆمبوونا سەرۆک وەزیرێن هەرێما کوردستانێ و پاپایێ ڤاتیکان رۆژا ئەینی 12-1-2017 ل دەمژمێر 9:00 ب دەمێ ڤاتیکان و دەمژمێر 11:00 دێ ب دەمێ هەولێرێ بیت.
پەیوەندیێن دناڤبەرا هەولێر و ڤاتیکانێ دا پەیوەندیێن کەڤنن،ل سالا 2014 دا سەرۆک بارزانی، سەرەدانا ڤاتیکانێ کریە و چاڤ ب پاپای کەفتیە.
نيشاندان