ئه‌ڤرۆنيوز:

ژێده‌ره‌كێ ئه‌منى ل حه‌شدا شه‌عبى ل پارێزگه‌ها ئه‌نبار، ئاشكراكر كو فرۆكخانا بنگه‌هێ (عين الاسد) يێ هێزێن ئه‌سمانى يێن عيراقى ل رۆژئاڤايێ ئه‌نبار، هاتنوچوونه‌كا به‌رده‌وام يا فرۆكێن ئه‌مريكى ل ڤان رۆژان ب خوه‌ڤه‌ دبينيت.

ژێده‌رێ ناڤبرى بۆ ئاژانسا (المعلومه‌) يا عيراقى گۆت” بنگه‌هێ (عين الاسد) دهه‌ردو رۆژێن بۆرى هاتنوچوونه‌كا به‌رده‌وام يا فرۆكێن ئه‌مريكى ب خوه‌ڤه‌ ديت”.

دياركر ژى” نه‌هاتيه‌ زانين كا چ دوان فرۆكان دابوو، ژبه‌ركو به‌رپرسياره‌تيا فرۆكخانا بنگه‌هێ ناڤبرى هاتيه‌ ڤه‌گۆهاستن بۆ هێزێن ئه‌مريكى وتاكو بۆ مه‌زنه‌ به‌رپرسێن عيراقى (خوه‌ ژ پله‌ وپايه‌ ژى هه‌بيت)  قه‌ده‌غه‌يه‌ بچن دناڤ وى بنگه‌هى دا”.

ئاماژه‌ دا” هێزێن حه‌شدا شه‌عبى، كاروانه‌كێ مه‌زن يێ ترومبێلێن مه‌ده‌نى ديت كو هێزێن ئه‌مريكى تێدابوون ودهاتن دناڤ بنگه‌هێ (عين الاسد) دا”.

هنده‌ك ژێده‌رێن ئه‌منى يێن عيراقى ل 7/1/2018 ئاشكراكربوو كو هژمارا هێزێن ئه‌مريكى ل بنگه‌هێ (عين الاسد) يا گه‌هشتيه‌ 13 هزار سه‌ربازان، رۆژناما (نايت تمبلر ئه‌نترناشيۆنال) يا بريتانى ژى ئاشكراكربوو كو بريتانيا هێز بۆ عيراقێ هنارتينه‌ بۆ پاراستنا هێزێن ئه‌مريكى ل بنگه‌هێ (عين الاسد) يێ له‌شكرى.

ئه‌ڤرۆ نيوز:

جڤاتا قه‌زا خورماتۆ بێى ئاماده‌بوونا ئه‌ندامێن كورد ب پتريا ده‌نگێن جڤاتێ، شه‌لاش عه‌بدولا قايمقامێ قه‌زا خورماتۆ ژ پۆستێ وى لادا و ل به‌ره‌ كه‌سه‌كێ سه‌ر ب رێكخراوا به‌در ل جهێ وى بدانن.

ب گۆره‌ى پێزانينێن ل به‌ر ده‌ست ئه‌ڤرۆ نيوز ژ سه‌رجه‌مێ 21 ئه‌ندامێن جڤاتا قه‌زايێ هه‌ر ئێك ژ پێكهاتێن كورد و عه‌ره‌ب و توركمان، كورد خودان 7 ئه‌ندامن و 12 ئه‌ندام ( عه‌ره‌ب و توركمانن) پشكدار بووينه‌ و هه‌موويان ده‌نگ ب دوورخستنا شه‌لال عه‌بدولايى دايه‌.

كورد ل جڤاتا قه‌زايێ خودانێن 7 ئه‌ندامانه‌ و ل گه‌ل دو ئه‌ندامێن عه‌ره‌ب پشكدارى ڤێ روونشتنێ نه‌بووينه‌.

ب گۆره‌ى پێزانينێن ئه‌ڤرۆ نيوز كه‌سه‌كێ سه‌ر ب رێكخراوا به‌در يا شيعان ڤه‌ هاتيه‌ پێشنياز كرن كو ڤى پۆستى وه‌رگريت.

ژ به‌ر نه‌بوونا چ تۆمه‌تێن قانوونى توركمانێن خورماتۆ ب تۆمه‌تا ده‌وام نه‌كرنا شه‌لال عه‌بدولايى داخوازا ده‌ست ژ كاركێشانا وى كريه‌، د ده‌مه‌كى دا كو شه‌لال عه‌بدولا ژ لايێ پارێزگارێ سه‌لاحه‌دين ب ره‌نگه‌كێ فه‌رمى داخوازا ده‌ستووريه‌كا فه‌رمى كريه‌ و رازيبوون ل سه‌ر هاتيه‌ كرن.

ئه‌ڤرۆ نيوز:

دادگه‌ها ئتيحادى يا عيراقى بڕيار دا، پێدڤيه‌ ژمارا وان كورسيێن ل په‌رله‌مانێ عيراقێ بۆ پێكهاتێ ئێزدى هاتينه‌ ته‌رخانكرن ل گه‌ل ژمارا خوه‌جهێن وێ پێكهاتێ ب گۆنجيت.

ئه‌لياس سامۆك، ئاخفتنكه‌رێ فه‌رميێ دادگه‌ها ئتيحادى راگه‌هاند كو دادگه‌ها بلندا فيدرال بڕيارا ژمار 11 يا 2010ێ ده‌ركريه‌ كو يا تايبه‌ت ب ژمارا كورسيێن پێكهاتێن ئێزدى ل جڤاتا نوونه‌رێن عيراقێ.

سامۆك ئاماژه‌ ب وێ چه‌ندێ ژى كريه‌ كو ب گۆره‌ى ئه‌وێ بڕيارێ پێدڤيه‌ ژمارا خوه‌جهێن وێ پێكهاتێ ل به‌رچاڤ بهێنه‌ وه‌رگرتن و ب گۆره‌ى وێ ژمارێ كورسى پێ بهێنه‌ دان”.

دا زانين ژى كو ب گۆره‌ى قانوونێ و ل به‌ر چاڤ وه‌رگرتنا ئامارا ده‌نگده‌ران هه‌ر 100 هزار كه‌سان مافێ وه‌رگرتنا كورسيه‌كێ ل جڤاتا نوونه‌ران هه‌يه‌.