ئەڤرۆ نیوز، سالار دۆسکی:

ئەندامەکێ پەرلەمانێ کوردستانێ ئاشکراکر کو پارتی دیموکراتی کوردستان یا رژدە ل سەر پەسەندکرنا پرۆژە قانوونا خانەنیشنکرنێ، ب وێ مەرەمێ کو دێ خزمەتەکا مەزن پێشکێشی خەلکێ کوردستانێ ھێتەکرن.

ئاری ھەرسین، ئەندامێ پەرلەمانێ کوردستانێ بۆ ئەڤرۆ نیۆز گۆت: ھەتا نوکە نوزانین کا دێ رونشتنا پەرلەمانێ کوردستانێ ل سەر پرۆژە قانوونا خانەنشینیێ ھێتەکرن یان نە، چونکو دڤێت کۆمبوونەک دناڤبەرا سەرۆکاتیا پەرلەمانی و سەرۆکێن فراکسیونا و لژنێن دارایی وقانوونی ل گەل حوکمەتا ھەرێما کوردستانێ بھێتەکرن و ئەو دێ رۆژەکێ بۆ رۆنشتنا پەرلەمانێ کوردستانێ بەرھەڤ کەن.

ھەرسین ئەو ژی گۆت: ئەڤ پرۆژە قانوونە بۆ ھەر دو خانەنشینێن لەشکەری و مەدەنی یە و ھەر دو گرێدای ژین و ژیارا وەلاتیانە.

ھەڤدەم حاجی کاروان، ئەندامێ پەرلەمانێ کوردستانێ ژ فراکسیۆنا ئێکگرتوویا ئیسلامی یا کوردستانێ بۆ ئەڤرۆ نیۆزئاشکراکر کو چ رێگری ل بەرامبەر پرۆژە قانوونا خانەنشینیێ نەماینە و بتنێ ھندەک بھانا د دانە بەر پرۆژێ قانوونێ و گەلەک دلاوازن وەک بێژن ھەتا رێکەفتنێ نەکەین ئەم کومبوونێ ئەنجام نادەین، نوزانم رێکەفتنێ ل سەر چ بکەین؟، بلا بکەڤیتە بەر دەنگدانێ تە نەڤێت دەنگی ل سەر نەدەت.

حاجی کاروان ئەو ژی گۆت: سەرۆکاتیا پەرلەمانی کوردستانێ دیارکریە کو دێ ڤێ حەفتیێ کومبوونا پەرلەمانی ل سەر پرۆژە قانوونێ ھێتە ئەنجامدان، باوەرناکەم رێژا قانونی تەمام نەبیت چونکە فراکسیۆنا پارتی و ئێکگرتوو ل گەل پرۆژەی نە و ئێکەتی ژی دیارنەکریە کو بەرھەڤی کومبوونێ نابن، ھەتا نوکە چ فراکسیۆنا ئاشکرانەکرینە دژی پرۆژە قانوونێ نە، لێ ھە ئێکێ خواندنەکا تایبەت ھەیە، ئەم بێژین بلا وەک عیراقێ بێت، ھندەک بێژن بلا ئەڤ برگە بھێنە گیروکرن ھەتا پشتی ھەلبژارتنان، لێ بدیتنا مە بلا ئەڤ قانوونە بھێتە پەسەندکرن 100 ملیار دێ بۆ حوکمەتێ ڤەگەرن.

حاجی کاروانی ئەو ژی گۆت: ئەوێن رێگریێ ل پرۆژە قانوونا خانەنشینیێ دکەن، رێژەکا مەزن یا خانەنشین و بندیواران دو مووچان ھەنە، زێدەتر ژ 170 ھزار مووچە خوران نەقانوونی ل کوردستانێ ھەنە.

ھەمان ئەندامێ پەرلەمانێ کوردستانێ ئەو ژی دیارکر کو نەرونشتنا پەرلەمانێ کوردستانێ ل سەر ئەڤی پرۆژەی سەرۆکاتیا پەرلەمانێ کوردستانێ بەرپرسیارە (37) ئیمزا مە کۆمکرینە و مە داخازا رونشتنەکا پەرلەمانی یا نەئاسایی کریە ب مەرەما ئەڤ پرۆژە قانوونە بھێتە پەسەندکرن، ل دووڤ پەیروێ ناقخویێ پەرلەمانێ کوردستانێ دڤێت بەری دو حەفتیان ئەڤ روونشتنە ھاتباکرن و بتنێ سەرۆکاتیا پەرلەمانێ کوردستانێ ئەگەرە ئەڤ قانوونە نەھێتە پەسەندکرن، سوز ب مەھاتیەدان ڤێ حەفتیێ کمبوون بھێتەکرن و ئەگەر نەھاتەکرن دڤێت وەک فراکسیۆنێن پەرلەمانی مە رولەکێ دی ھەبیت و بتنێ دەرکرنا بەیان نامانەبیت.