ئه‌ڤرۆ نيوز:
به‌رى ده‌مه‌كێ كێم جێگرێ پارێزگارێ به‌رێ يێ دهۆكێ گورگيس شليمۆن چو به‌ر دلۆڤانيا خودێ و نوكه بۆ نوشداريا داد هاته ره‌وانه‌كرن.
په‌يامنێرێ ئه‌ڤرۆ نيوز، محه‌مه عه‌لى نورى، كو ل نه‌خۆشخانا ئازادى يێ ئاماده بوو ئاشكه‌را كر كو به‌رى ده‌مه‌كێ كێم گۆگيس شليممۆن جێگرێ پارێزگارێ دهۆكێ ژ ئه‌گه‌رێ جه‌لته‌كا مێشكى چو به‌ر دلۆڤانيا خودێ.
دا زانين ژى كو كوڕێ ناڤبرى ئه‌ڤ چه‌نده پشت راست و دا زانين كو ژ نشكه‌كێ ڤه ل مال بوو و جه‌لتا مێشكى لێدا و گۆت: “پشتى كێمتر ژ ده‌مژمێره‌كێ ل نه‌خۆشخانا ئازادى ل دهۆك چوو به‌ر دلۆڤانيا خودێ”.
په‌يامێنرێ ئه‌ڤرۆ نيوز ئاشكه‌را ژى كر كو نوكه ته‌رمێ وى به‌ر ب نوشداريا داد ل دهۆكێ بريه بۆ زانينا ئه‌گه‌رێن دروست يێن گيان ژ ده‌سدانا ناڤبرى.
ئەڤرۆ نیوز ،زنار تۆڤی :
سه‌رۆكێ پارتەکا ئیسلامى ل توركیا ره‌خنێ ل ئه‌ردۆغانی دگریت و دبێژیت،هەکە هوسا بچیت، نه كوده‌تا، به‌لکو دێ شۆرەشەک ل دژى ده‌ستهەلاتا وی به‌رپا بیت.
ته‌مه‌ل كه‌رموڵا ئۆغڵو،کو سه‌رۆكێ حزبا سه‌عاده‌ت یا توركییه،د لێدوانەکێدا ئه‌ڤرۆ ره‌خنێن توند ل سه‌رۆكێ توركیا گرتینە و به سه‌ركوتكاریێ تۆمه‌تبار كریه.
رۆژناما زه‌مان یا توركى كه‌رموڵا گوتیە،کو شۆرەش ژ ئه‌نجامێ سه‌ركوتكاریێ دروست دبن،نوکە ده‌ستهەلاتا ئاكپارتی ژی سته‌مكاریێ پەیرەو دکەت و ئه‌ڤە ژی د ئه‌نجامدا دێ بیته ئەگەرێ یاخیبوونا گه‌لێ توركیا ژ ڤێ ده‌ستهەلاتێ و گوتیە ژی، ئه‌ڤ ده‌ستهەلاتا نوکە خەلەتیێن كوژەک ده‌رهه‌قی وەلاتیێن خۆ دکەت.
نەرازیبوونا حزبێن توركیا ژ حالەتێ ئاوارته،پشتی كوده‌تایا ته‌مووزا 2016 ژلایێ حزبا ئه‌ردۆغانی هاتیە راگه‌هاندن.
دوهی ژی پارتیا گه‌ل یا كۆمارى جەهەپێ ل توركیا، داخوازى ژ حزبان كر کو خۆپیشاندانەکێ ساز بكه‌ن بۆ هندێ کو حالەتی ده‌ستهه‌لاتا ئاوارته ژ ڤی وەلاتی هه‌لبوەشینن.
ده‌ستهەلاتا ئاكپارتى كوده‌تایا 2016 كریه مەزنترین هێجەت بۆ لێدانا ئۆپۆزسیۆنێ و نه‌یارێن خۆ،لدووڤ راپۆرتێن نێڤده‌ولەتی ب ده‌هان هزار كه‌س ب تۆمه‌تا ئه‌نجامدانا كوده‌تایێ ل توركیا خستینە گرتیخانان.
ب، ئەڤرۆ:
یانا مانچستەر سێتی یا ئنگلیزی یا چاڤدێریا چارەنڤیسێ یانا پاریس سان جێرمان یا فرەنسی و سزایێن ئێکەتیا تەپا پێ یا ئوروپی دێ ل سەر سەپینت دکەت پێخەمەت ب دەستڤەبرنا یاریزانەکێ وێ ل ڤەگوھاستنێن ھاڤینا ئەف سالە.
یانا پاریس سان جێرمان نوکە یا د مەترسیا کەفتنا بن سزایێن مەزن یێن ئێکەتیا تەپا پێ یا ئوروپی ئەوژی ژبەر بەزاندنا یاسایێن دارای.
یانا سان جێرمان کوژمێ ٢٢٢ ملیون یورویان ژبو ئیمزاکرنا ھەڤبەستا یاریزانێ بەرازیلی نیمار دا سێلڤای و ڤەگوھاستنا وی ژ بەرشەلونە مەزاختینە و دیسان شیانێن یاریزانێ گەنج کیلیان مبابی بەروەخت ژ یانا موناکو ڤەگوھاستیە ب مەرجەکی ل دووماھیا ڤی وەرزی ب فەرمی ب ڤەگوھێزیتە ناڤا رێزێن خوە و ھەڤبەستا وی ب ١٨٠ ملیون یورویان ئیمزا بکەت.
ل دووڤ پەیامەکێ تورا ئیسپان ئاماژەکریە کو پێدڤیە یانا فرەنسی دەستا ژ ھژمارەکا ستێرێن خوە بەردەت پێخەمەت چارەکرنا ڤێ ئاریشێ و خوە دوورکرن ژ سزایێن ئێکەتیا ئوروپی و ھەر وەسا دوپاتکریە کو پیپ گواردیولا راھێنەرێ یانا مانچستەر سێتی یا ئنگلیزی یێ دووڤچونەکا باش بو یاریزانێ وێ مبابی دکەت کو یانا فرەنسی دێ بزاڤێن فروتنا وی کەت ل ھاڤینا ئەف سالە و ل ھاڤینا سالا بوری ژی ڤی راھێنەرێ ئسپانی دخواست ڤی یاریزانێ ١٩ سالی بەتە ناڤا رێزێن تیما خوە، لێ ل دووماھیێ یانا پاریس سان جێرمان شیا ھەڤبەستا وی ئیمزا بکەت کو ل وی دەمی یانا ریال مەدرید ژی گرنگی دا ڤی یاریزانی.
چاڤدرێرەکێ وەرزشی: دەم ھاتیە زاخۆ راھێنەرێ خوە ب گوھوریت
چاڤدێرەکێ وەرزشی: دەستدانا خالان ل دەف کارگێریا زاخۆ بوویە تشتەکێ نورمال
زاخۆ,ھشیار دوبانکی:
پشتی زنجێرەکا ئەنجامێن لاواز تیما تەپا پێ یا زاخۆ دخولا پلا نایاب عیراقێ دا تومارکرین چاڤدێر و جەماوەرێ وەرزشی وەسا ل زاخۆ دبینن تیما زاخۆ کەڤتیە د مەترسیا پاشڤەزفرینێ دا و زوربەیا بوجونا وەسا دبینن راھێنەرێ تیمێ بھێتە گوھورین دێ باشتر بیت و راھێنەرێ نوکە دەمێ وی ب دووماھیی ھات نەشێت چ ل زاخۆ زێدەبکەت.
حەکیم حاجی کو چاڤدرێرەکێ وەرزشی ل زاخۆ وەسا دبینت زاخۆ نوکە ل بەر کەڤێن داکەفتنێ یە و یاری بوو یاریێ رەوشا تیما زاخۆ یا بەر ب لاوازبوونێ ڤە دچیت و راھێنەرێ تیمێ ژی نابینن چ ل یانێ زێدەبکەت لەورا وەسا دبینت زاخۆ دووماھی دەلیڤە ھەیە ئەوژی راھێنەرێ خوە یێ نوکە ب گوھوریت ل جھێ ئەوی راھێنەرەکێ خودان شیان و ئەزمونەما باش ھەبیت دخولا عیراقێ دا بینن داکو بشێت یانا زاخۆ ژ ڤێ رەوشێ قورتال بکەت .
ھەردیسان ناڤبری دیارکر ژی کارگێریا یانێ ژی گونەھا خوە ھەیە ژبەرکو ھەتا نوکە چو ھەلویست بەرامبەر ئەڤان ئەنجامێن لاوازێن راھێنەری نینە و پێدڤی بوو کارگێریا یانێ ھەلویست بەرامبەر ئەڤان ئەنجامێن راھێنەری بەری چەند حەفتیی یە ھەبا .
خەلات محەمەد کو ئێک ژ ئەوان کەسانە بەردەوام دیچڤوونا تەپا پێ یا زاخۆ دکەت ژلایێ خوڤە ئەوی ژی گوت: کارگێریا یانا زاخۆ پشکداری دخولێ دا کر بێ پلان و نەخشە ھەردیسان نوکە ژی دەلیڤە ھەیە ل خوە ڤەگەرن لێ ئەوان چو پلان نین ئەنجام ھێلاینە ب ھیڤیا خودێ ڤە و دەست دانا خالان نوکە ل دەف کارگێریا زاخۆ بوویە تشتەکێ نورمال و ب دیتنا من راھێنەرەکێ نافخوی یێ پارێزگەھا دھۆکێ بیت دێ ژ راھێنەرێ نوکە باشتر بیت ژبەرکو ئەڤی راھێنەری چو شارەزا نینە .
ژلایەکێ دویڤە محەمەد فەتحی ئێک ژ حەژێکەرێن تەپا پێ یا زاخۆ یە گوت: راھێنەرێ زاخۆ ھەتا بەری دو سالان یاریزان بوو ل خولا عیراقێ و نوکە ئەم یێ ل چاڤەرێ ئەڤ راھێنەرە تیما مە ژ مەترسیا داکەفتنێ قورتالبکەت و یا دیارو بەرچاڤ راھێنەرەکێ بێ ئەزمون دێ بوو وی گەلەک یا ب زەحمەت بیت ئەو بشێت تیمەکێ ژ مەترسیا داکەفتنێ قورتال بکەت د وەرزێ وی یێ ئێکێ راھێنەری دا لەورا زاخۆ پێدڤی گوھورینا راھێنەری یە .
ل دووماھیێ ناڤبری دیارکر ژی یانا زاخۆ چو ھەیبەت نەمایە ل خولا عیراقێ و پێدڤی گەلەک گوھورینایە کو ھەتا نوکە زاخۆ ھاریکارێ راھێنەری نینە و سەرپەرشتەک ژی نینە زاخۆ پێدڤی گوھورینن مەزنە ل ستاڤێ ھونەری .
ئەڤرۆ نیوز ، زنار تۆڤی :
بریارە ئەڤرۆ سێشەمبی 17.4.2018 پەرلەمانێ عێراق كۆمبوونا خوە یا ئاسایی ساز بكەت و هژمارەکا پڕۆژێن قانوونی یێن ناكۆكی ل سەر خستینە بەرنامێ كاری.
روونشتنا ئەڤرۆ یا پەرلەمانی دوماهی روونشتن نینە و لدووڤ ماوێ درێژكری یێ پەرلەمانی هەتا 30 خزەیرانا بهێت پەرلەمان دشێت كۆمبوونان ئەنجام بدەت و ئەڤ خولا پەرلەمانی ماوێ وی هەتا دەمێ بریار هاتیە دان ب دوماهی ناهێت، لەوما دڤی ماوەی دا دێ شێت روونشتنێن ئاسایی و نە ئاسایی ساز کەت.
بریاره ل روونشتنا ئەڤرۆ یا پەرلەمانێ عێراقێ پرۆژە قانوونا نوونەران ل دادگەها تێهەلچوونێ و هژمارەکا پڕۆژە قانوونێن دیتر بێخنە بەرچاڤ، بەلێ هیچ بەرنامەکێ كاری ل پێگەهێ فەرمی یێ پەرلەمانێ عێراقێ نەهاتیە بەلاڤ كرن.
بریارە ئەڤ خولا پەرلەمانی دوماهی روونشتنا خۆ ئەنجام بدەت،ل رۆژا هەلبژارتنان كو 12ی ئەیارا داهاتی، خولا پێنجێ یا پەرلەمانێ عێراقێ دێ هیێتە هەلبژارتن و خولا چارێ یا پەرلەمانێ دێ ب دوماهی هێت.
ئەڤرۆ نیوز ، زنار تۆڤی :
لدووڤ نووچەیێن فەرمی یێن رژێما سووری ل شەڤا بوری فرۆکخانا شەعیرات ل رۆژهەلاتا پارێزگەها حومسێ ل سووریێ هاتیە بوردۆمان کرن.
پشتی وێ بۆردومانێ ئەمریکا رەتکریە کو سوپایێ وی وەلاتی فرۆکخانا سووریێ بۆردومان کربیت و سوپایێ ئیسرائیلێ ژی راگەهاندیە، ”کو مە هیچ کۆمێنتەک بۆ وی نووچەی نینە“.
ئەو فرۆکەخانا سەربازی ژلایێ میلیشیاتێن ئیرانی و حزبوللا یا لوبنانی،کو ل دەستپێکا شەرێ نافخۆیی یێ سووریێ هاریکاریا رژێما سووریێ دکەن و وەک بنگەهەکێ سەربازی بکارئینایه.
ل هەیڤا ئادارا 2011 شەرێ نافخۆیی ل سووریێ دناڤبەرا گرووپێن ئۆپۆزسیۆنێ و رێکخراوێن تیرۆریستی یێن داعش و قاعیدە و رژێما سووریێ دروست بوویە.
ب ئەگەرێ وی شەری زێدەتر ژ پێنج ملیۆن وەلاتیێن سووری ئاوارە بووینە و پتری نیڤ ملیۆن کەسان ژی گیانێ خوە ژ دەست دایە.
ئەڤرۆ نیوز ، زنار تۆڤی :
ئەندامێن جڤاتا پیرێن ئەمریكا د دوماهی كۆمبوونا خۆ دا،گوتۆبێژان ل پرۆژەیەكێ دكەن بۆ سنوورداركرنا چالاكیێن سوپایێ ئەمریكا د هەلمەتا دژی توندرەوان ل عێراق و سووریێ و دەڤەرێن دیتر،هەڤدەم بزاڤا هندێ ژی ددەن،کو دەستهەلاتا سوپای ژ كۆشكی سپی وەربگرنەڤە.
هژمارەک ژ ئەندامێن جڤاتا پیران ب سەرۆكاتیا سیناتۆر بۆب كرۆكەر سەرۆكێ لیژنا پەیوەندیێن دەرڤه و سیناتۆر تیم كین ئەندامێ لیژنا یاسایێ سنوورداركرنا بكارئینانا هێزا سەربازی یا ئەمریكا د پرۆژێ هەموو هێزێن پێدڤی بۆ دەمەکێ گونجای،کو پشتەڤانیا شەرێ ئەمریكا ل دژی قاعیدە و تالیبان و داعش و رێكخراوێن هەڤشێوێن وان دكەن، بەلێ ل گەل هندێ ژی وان دڤێت جوولەیا سوپای سنووردار بكەن.
ئەڤ پرۆژە قانوونە رێگریێ ژ بكارئینانا هێزێ ل دژی هیچ وەلاتەكێ ناكەت،ماوەیەکێ دیاركری بۆ هەلمەتێن سەربازی ژی دیار ناکەت،بەلێ د خالەكێدا ئاماژێ ب هندێ دکەت،کو پێدڤیە هەموو چار سالان جارەکێ كۆنگرێسێ ئەمریكا ل سەر پرسا هەلمەتا سەربازی یا سوپایێ ئەمریكا رەزامەندیێ بدەت و وێ قانوونێ هەموار بكەتەڤە.
هەروەسا گەلەک ژ ئەندامێن كۆماری و دیموكراتی ل كۆنگرێس د هەڤرابوون،کو پشتی هێرشا 11 سپتێمبەرێ، ژلایێ كۆنگرێس و جڤاتا پیران ڤە گەلەک دەستهەلات ب قانوونێ و سوپای هاتیەدان، بۆ نوکە پێدڤی نینە و پێدڤیە ب قانوونێ وان دەستهەلاتان ژ سوپای وەربگیریت.
لدووڤ دەستوورێ ئەمریكا،كۆنگرێسی مافێ سنووداركرنا شەری و درێژكرنا وی ماوەی هەیە،نەكو سەرۆكێ وەلاتی،بەلێ پشتی 2001 سەرۆكی ئەو دەستهەلاتە ل جهێ كۆنگرێسی ب کار ئینایە و شەرێ ئەفغانستانێ و عێراقێ و تیرۆرستێن داعشێ راگەهاندیە.
ئەڤرۆ:
ستێرا ھێلا ناڤینا ئیسپانی و یانا بەرشەلۆنا ئەندرێس ئەنیستا پشتی بورینا ١٦ سالان ل گەل یانا بەرشەلۆنا ل دووماھیێ بریارا چوونا خوە ژ یانا کەتەلونی دا کو بریارە ل ھاڤینا ئەڤ سالە پێکھاتیێ یانا خوە ب جە بھێلت پشتی کرنا یاریێ ل گەل پێکھاتیێ بەرشەلۆنا ل ١٦ سالێن بوری و شیای چەندین دەستکەفتان ل گەل ئەڤێ یانێ ب دەستخوڤە بینت .
رۆژناما مارکا ئیسپانی دیارکریە ئینیستا ژی وەکو ھەڤالێ خوە یاریزانێ بەرێ یێ بەرشەلۆنا خافیر ماسکێرانوی بریارە بەر ب خولا چینێ ڤە بچیت و دووماھیا ژیانا خوە یا تەپا پێ ل وی وەلاتی ب دووماھیی بینت ھەردیسان پشتی یانێن ئەوی وەلاتی ھەڤبەستەکا بلند پێشکێشی کابتنێ بەرشلۆنا کرین .
ئەوێ رۆژنامێ ناڤێ دو یانان ئاشکراکریە کو دبیت کابتنێ بەرشەلۆنا ھەڤبەستا ئێک ژ ئەوان یانان ئیمزا بکەت کو پێشبینیەکا مەزن دھێتەکرن ئینیستا بەر ب یانا تیانگین گوتنگین بچیت کو یاری ل گەل ھەر ئێک ژ یاریزانان باتو یێ بەرازیلی و ئکسایل فیتسل یێ بەلجیکی یاری ل وێ یانێ دکەن و ھەردیسان وەسا ژی ھاتیە دیارکرن دبیت ھەڤبەستا یانا شونجکینگ ئیمزا بکەت کو ڤێ یانێ ژی کوژمەکێ مەزن پێشکێشی ئینیستا کریە
ھەردیسان مارکا دیارکریە ژی ئینستا دێ پێکھاتیێ بەرشەلۆنە ب جە ھێلیت داکو یاریزانێ بەرازیلی و یێ یانێ نوو فلیب کوتینھو پتر دەلیڤەیا خوە وەربگریت ل ھێلا ناڤین ھەردیسان یاریزانێ ناڤبری پشتی یاریا بەرامبەر روما بوو دەزگەھێن راگەھاندنێ دیارکر بوو یاریا بەرامبەر رۆما دێ دووماھی یاریا ئەوی بیت ل قارەمانیا چامپیونیز لیگ .
ھەژی گوتنێ یە ئەندریس ئینیستا یێ ٣٤ سالی بتنێ یاری د ژیانا خوە یا وەرزشی دا ل یانا بەرشەلۆنا کریە دەستپێکا خوە ل گەل قوتابخانا لاماسیا یا تایبەت ب یانا بەرشەلۆنا دەستپێکریە و پاش بوو تیمێن پێگەھشتی و لاوان و تیما دوێ کریە و ھەتا سالا ٢٠٠٢ ب فەرمی ھاتە سەرێخستن ژ تیما دوێ بوو تیما ئێکێ و ل گەل بەرشەلۆنا ھەر ژ سالا ٢٠٠٢ ھەتا نوکە ٦٦٩ یاری کریە و شیای یە ٥٦ گولان توماربکەت و ١٤١ گول بوو ھەڤالێن خوە دروستکرینە و دخولا لالیگا دا ٤٣٨ یاری کرینە و شیایە ٣٥ گولان توماربکەت و ٨٧ گول دروستکرینە و ل گەل ھەلبژارتیا ئیسپانیا ١٢٩ یاری کرینە و یاریزانێ ناڤبری د ژیانا خوە دا شیا چەندین ناسناڤان ب دەستخوڤە بینن کو ھەشت جاران ناسناڤێ لالیگا ھەردیسان چار ناسناڤێن چامپیونیز لیگ ل گەل سێ سوپەر ئورۆپا و سێ جاران موندیالا یانان و پێنج ناسناڤێن کاسا مەلەک ئیسپانیا ل گەل شەش سوپەرێن ئیسپانیا .
ئەڤرۆ نیوز ، سەباح زۆهێر :
ژبه‌ر هاتنا هرو بایه‌كێ بهێزل ده‌ڤه‌را نه‌هلێ زه‌ره‌رو زیانه‌كا زور گه‌هانده به‌رهه‌مێ حلیکان و رێژه‌كا زور وه‌راندینه، ئه‌ڤه ژى دێ بیته ئه‌گه‌ر كو بهایێ وان ژى بهێته خوار، ژبه‌ر كو گه‌له‌ك خراب بووینه
محه‌مه‌د سه‌عید تاهر جوتیاره‌كێ ده‌ڤه‌را نه‌هلێ یه بۆ روژناما ئه‌ڤرۆ دده‌ته دیاركرن كو ئه‌ڤ ساله به‌رهه‌مێ حلیکان گه‌له‌ك یێ باشه و رێژه‌كا زور پێڤه هاتینه، لێ هاتنا هه‌وایه‌كێ بهێز زه‌ره و زیانه‌كا زور گه‌هانده به‌رهه‌مێ وان و رێژه‌كا زور ژ حلیکان وه‌راندینه.
گۆت حلیک به‌رهه‌مه‌كێ بهارى و نازكه زوى زیان پێدكه‌ڤیت، ژبه‌ر هندێ هه‌تا كو به‌رهه‌مێ بمینیت زور زه‌حمه‌ته، ئه‌ڤ هه‌وایه ژى گه‌له‌كێ بهێزبوو له‌وما زیانه‌كا زور گه‌هاندێ. گۆت ژى ئه‌و حلیکێن وه‌ریایى مه هه‌مى خرڤه‌كرینه و دێ فروشین، لێ ئه‌ڤ حلیکا كه‌فتى ب بهایێ وێ ناچیت ئه‌وا ب ده‌ست دهێته لێڤه‌كرن، ژبه‌ر كو قه‌یسی یا نازكه زوى دكه‌ڤیت و زیان پێدكه‌ڤیت، له‌وما بهایێ دهێته ئێكسه‌ر دهێته خوار ل به‌ر وێ زیانا پێ كه‌فتى، ئه‌ڤه ژى دبیته ئه‌گه‌ر كو زیانه‌كا ئابورى ب جوتیاران ژى بكه‌ڤیت و هنده‌كا دبیت ب ملیونا زیانه‌كا ئابورى پێ بكه‌ڤیت، ژبه‌ر كو رێژه‌كا زور ژ خه‌لكێ نه‌هلێ ژین و ژیارا وان ل سه‌ر چاندنێ یه پشت به‌ستنێ لسه‌ر چاندنێ دکەن.
نيشاندان