ئه‌ڤرۆ نيوز، لەزگین:
ئێک ژ دامەزرێنەرێن کیانێ سیاسی یێ شەبەکا ل دەشتا نەیتەوا دیارکر کو ئه‌ڤرۆ 6ی کانوونا دویێ 2018 ب پێشکداریا 300 کەساتین کوردێن شەبەک کیانەکێ سیاسی ھاتە دامەزراندن ب ناڤێ “تەڤگەرا ئازادیخوازێن شەبەک” و 9 کەس ھاتنە ھەلبژارتن وەکو دەستەیا رێڤەبرنا ڤی کیانی سیاسی.
غەزوان داودی، ئێک ژ دامەزرێنەرێن کیانێ سیاسی یێ شەبەکان ل دەشتا نەینەوا دیارکر کو ئارمانجا سەرەکی ئەوە پاشەرۆژا خەلکێ خوە یێ شەبەک ل دەشتا نەینەوا مسۆگەر بکەن، چونکو نھا حەشدا شەعبی ھەموو دەڤەرێن کوردێن شەبەک داگیرکرینە”.
زێدەتر گۆت: ” ئەم دێ ب رێیا حزبا خوە یا نوو حزبا تەڤگەرا ئازادی خوزاێن شەبەک دەنگێ خوە گەھینینە ھەموو جیھانێ دا کو مە ژی مافێن خوە ل عیراقی ھەبن و دەڤەرێن شەبەک نە ژ لایێ حەشدا شەعبی ڤە بھێنە رێڤەبرن، بەلکو ئەم خودانێن دەڤەرێن خوە بین، ئەم ئارامیا دەڤەرێن خوە ب پارێزین”.
خۆیا ژی کر کو دوھی کونگرێ تەڤگەرا ئازادی خوازێن شەبەک ل قەزا شێخان ھاتە ئەنجامدان و تێدا دەستەیا مەکتەیا سیاسی ھاتە دانان 9 کەسن ژ وانا ژی سێ ژنن، “ئەم دێ کار کەین پێشکداریێ د ھەلبژارتنێن عیراقی ژی دا بکەین وەکو پارتیەک”.
نووترين نووچه
- بنگەهێ لالش خزمەتەكا بەرچاڤ یا جڤاكێ ئێزدیاتیێ كریە
- مەسرور بارزانی: پێدڤییە بەرپرسێن پارتی زێدەتر خزمەتا خەلكی بكەن
- هیڤیدارین حوكمەتا فیدرال مووچەی نەكەتە پرسەكا سیاسی
- بەغدا مووچەی وەك كارەتەكا فشارا سیاسی بەرانبەر هەرێما كوردستانێ ب كار دئینیت
- مافێ چارەنڤـیس، مافـەكێ سروشتیێ نەتـەوەیا كـوردە
- نێچیرڤان بارزانی ب فەرمی بۆ وەلاتێ قەتەرێ دهێتە ڤەخواندن
- نێچیرڤان بارزانی و مەسرور بارزانی پیرۆزباهیێ ل شیرەتكارێ نوو یێ ئەلمانیایێ دكەن
- سەرۆكێ حوكمەتا هەرێمێ دوپاتیێ ل بهێزكرنا پەیوەندییان ل گەل هندستانێ دكەت
- خسرۆ گۆران: روودانێن دەڤەرێ كاریگەری ل سەر هەلبژارتنێن ئیراقێ نابیت
- نێزیكی 50 هزار تیرۆرست و كەسوكارێن وان مووچەیێ شەهیدان ژ حوكمەتا ئیراقێ وەردگرن
سه‌ره‌كى Facebook
ئەرمەنێن کوردستانێ جەژنا خوە گێرا
ئەڤرۆ نيوز، ئەمیر ئەترووشی:
نوونەرێ ئەرمەنان ل پەرلەمانێ کوردستانێ راگەھاند، کەنیسا ئەرمەنی یا ئەرسودوکسی، سالانە ل 6ی مەھا ئێکێ جەژنا حەزرەتی مەسیح و جەژنا مەعمودیە دگێرن و ڤێ رۆژێ دھژمێرن وەکو جەژنا سالانە.
یەروانت ئەمینیان نوونەرێ ئەرمەنان ل پەرلەمانێ کوردستانێ، بۆ ئەڤرۆ نيوز دیارکر، دوھی ھەموو ئەرمەنێن کوردستانێ ب ناڤێ کەنیسا ئەرمەنی یا ئەرسودوکسی، جەژنا بوونا حەزرەتێ مەسیح و جەژنا مەعموودیە پێکڤە ساخ کر و ئەڤ جەژنە ھەر سال ھەر ژ دەستپێکا پەیدابوونا مەسیحیەتێ ل ناڤ ئەرمەنان دا دھێتە ساخکرن.
نوونەرێ ئەرمەنان ل پەرلەمانێ کوردستانێ ئاشکرا کر، د ناڤ ئەرمەنان دا، کەنیسا ئەرمەنی یا ئەرسودوکسی یا ئێکانەیە پاراستن ل سەر ڤێ جەژنێ و ڤی کەلتووری کری و ھەتا نوکە سالانە ئەڤ جەژنە دھێتە ساخکرن.
گۆتژی ھەبوونا ئەرمەنان ل کوردستانێ دەستکەفتەکێ گرنگە و وەرگرتنا ئەرمەنان بۆ پۆستێ ئەندامەتیا پەرلەمانی دەستکەفتەکێ مێژوویی یە.
ئاشکراژی کر ئەرمەنان شەش جەژن ھەنە؛ ژدایکبوونا حەزرەتێ مەسیح، قیامە مەسیح، ڤەگوھاستنا کچینێ، جەژنا خاچێ، جەژنا رەشاش و جەژنا سعود.
دیار کر کو پشتی ئەو ھاتینە کوردستانێ و ئاکنجی بووین، فێری زمانێ کوردی بووینە و ب کرمانجی د ئاخڤن. نوکە 47 خێزانێن ئەرمەنی ل قەزا دھۆکێ دژین. ھەروەسان دو گوندێن ئەرمەنان ل پارێزگەھا دھۆکێ ل قەزا زاخۆ ھەنە. گوندێ ئاڤزریک کو ب 50 خێزانان و گوندێ ھاوریسکێ کو 107 خێزانان ب خۆ ڤە دگریت. ھەروەسا 55 خێزانێن ئەرمەنی ل قەزا سێمێلێ ھەنە. دیسان نێزیکی 90 خێزانێن ئەرمەنان ل پارێزگەھا ھەولێرێ ھەنە، لێ ھەموو دەربەدەرن و ب تنێ سێ تا چوار خێزان ل پارێزگەھا سلێمانیێ ھەنە.
پشتی سالا 1914 تورکان سەرژێگەھەک بۆ ئەرمەنان ل تورکیا چێکری و فەرمانا وان راکرین. ملیون و نیڤ ژ ئەرمەنان ھاتە کوشتن و ھژمارەکا مەزن دەربەدەر بوون و ھەر ھندەک بەرەڤ جھەکی چوون. ھژمارەکا وان بەرەڤ کوردستانێ ھاتن و پتریا وان ژی بەرەڤ دھۆکێڤە، نھا نێزیکی 3200 وەلاتیێن ئەرمەن کو ب زمانێ کوردی دئاخڤن ل کوردستانێ ھەنە و پتریا وان ژی ل دھۆکێ نە.
حه‌شدا شه‌عبى شه‌رێ خوه‌نيشانده‌رێن ئيرانێ دكه‌ت
ئه‌ڤرۆنيوز:
كه‌نالێ العربيه به‌لاڤكر كو حوكمه‌تا كۆمارا ئيسلامى يا ئيرانێ چه‌ند ميليشيێن حه‌شدا شه‌عبى يێن عيراقى برينه ئيرانى بۆ سه‌ركوتكرنا خوه‌پيشاندانان.
كه‌نالێ ناڤبرى ژزارده‌ڤێ چه‌ند ژێده‌رێن تايبه‌ت ل ئه‌هوازێ به‌لاڤكر كو چه‌كدارێن ميليشيێن حه‌شدا شه‌عبى ل جاێن هه‌ردو باژێرێن عه‌بادان وموحه‌مه‌ره يێن عه‌ره‌ب نشينێن ئيرانى، به‌لاڤبووينه.
ئه‌و چه‌كدارێن حه‌شدا شه‌عبى ل گه‌ل هێزێن ئيرانى بزاڤا سه‌ركوتكرنا خوه‌پيشاندانێن وان ده‌ڤه‌رێن عه‌ره‌بى ل باشوورێ ئيرانێ دكه‌ن.
ل رۆژا 28/12/2017 وه‌لاتيێن ئيرانى دژى گه‌نده‌ليا ئابوورى ونه‌بوونا خزمه‌تكاريان وهه‌ژاريێ، ده‌ست ب خوه‌پيشاندانان كر وتوندوتيژى لێ په‌يدابوون، خوه‌نيشانده‌ران ل چه‌ندين باژێرێن ئيرانێ باره‌گايێن حكومى سوتن وداخوازا ژناڤبرنا حوكمه‌تا وه‌لاتێ خوه دكر.
خیانه‌تا كوردان و تفكا سه‌رئه‌ڤراز! ((ئه‌ى پرۆتس: هه‌تا توژى…)) یۆلیۆس قه‌یسه‌ر
ته‌حسین ناڤشكى
ره‌نگه پتر ژ 14 خیانه‌تێن دیرۆكى یێن ناڤدار هه‌بن كو كاروانێ دیرۆكێ گوهه‌ڕتبت، لێ كارتێكرنا خیانه‌تا ((پرۆتسێ)) براماكێ ((یۆلیۆس قه‌یسه‌ر))ى رۆمێ ب دیتنا وى لێكرى، ده‌مێ گه‌هشتیه گوپیتكا دكتاتۆریێ و هه‌ڤپه‌یمانى ل گه‌ل جڤاتا پیران كرى و ب ده‌ستێ خوه قه‌یسه‌رێ مام كوشتى مه‌زنترین خیانه‌ته.. دهێته ڤه‌گێڕان كو د وێ گاڤێ دا ده‌مێ ((یۆلیۆس قه‌یسه‌ر)) ب دربێ برازاى كه‌تى، ژێهه‌ل ته‌ماشه‌كر و گۆتێ: ((ئه‌ى پرۆتس: هه‌تا تو ژى..)) مه‌به‌ست ژ وێ ئاخاڤتنا د سه‌كه‌راتێ دا ته‌مام نه‌كرى ئه‌و بوویه كو وى هند باوه‌رى هه‌بوویه، هه‌كه هه‌مى خیانه‌تێ ل وى بكه‌ن ((پرۆتس)) ل وى ناكه‌ت! پاشى خیانه‌تا ((میر جه‌عفه‌ر)) هندستانى ل رێزبه‌ندا دووێ دهێت، ده‌مێ كورسى بۆ خوه ڤیاى و ل جه‌نگا ب ناڤێ ((پلاسى)) ناڤدار، لناڤبه‌را هندستانا رۆژهه‌لات كو بریتانییا هینگێ ئه‌و ده‌ڤه‌ر داگیر كربوو و مه‌غۆلێن بوسرمان، وى میرى خوه دایه دگه‌ل بریتانیا و خیانه‌تكرى، پشتى هینگێ بریتانیا 200 سالان حوكم ل وان ده‌ڤه‌رێن ب ناڤێ به‌نگال ـ سند و هندستانێ كرى.
هه‌كه خیانه‌تا هنده‌ك گه‌لێن جیهانى جاره‌ك بت یان دوسێجاربن، واته رێژه‌یه‌كا كێمه، هه‌كه ئه‌م هه‌ڤبه‌رى خیانه‌تا كوردان بكه‌ین كو د درێژیا دیرۆكێ دا، تایبه‌ت ل ده‌مێ مێرنشینێن كوردى ل ژێر ده‌ستهه‌لاتا ئمپراتۆریێن ئۆسمانى و سه‌فه‌وى دژى هه‌ڤدو كرى، ره‌نگه رێژه‌یا وێ پتر خیانه‌تبت و ئه‌گه‌ره‌كى سه‌ره‌كیبت كو كورد د ناڤ جیۆگرافیا ده‌ڤه‌رێ دا هه‌تا نها بێ وه‌لاته‌ك سه‌ربه‌خۆ و هه‌رده‌م دووڤه‌لانكێن بیانى و داگیركه‌ران ماین. واته هه‌ر د ئه‌زلدا خیانه‌ت و ئه‌زینى و (ته‌فشۆیێ به‌رێ خوه) ژ ره‌فتارێن سه‌ره‌كى یێن كوردان بووینه دگه‌ل هه‌ڤدو كرین.
ژ دیرۆكا درێژا كوردان دیار دبت كو هه‌ر ده‌مێ ئالییه‌كێ ئالیێ دى ب خیانه‌تكاریێ تاوانباركرییه؛ هینگێ تفا وى ئالى سه‌رئه‌ڤراز چۆیه و جاره‌ك دى ب ناڤچاڤێن وى ئالى كه‌تییه و هه‌تا نهاژى ئه‌ڤ دیمه‌نه به‌رده‌وامه؛ ژ به‌ر كو ژ پارچه‌كرنا كوردان د ناڤبه‌را چار وه‌لاتان دا خویا دبت كو چو ئالى ژ خیانه‌تێ بێبه‌هر نه‌بووینه. ئاڕیشه ئه‌وه كو هه‌ر ئالییه‌ك فه‌توایان بۆ حه‌لالكرنا خیانه‌تا خوه لێدده‌ت و بۆ خوه حه‌لال دكه‌ت و خوه ب نه‌ته‌وه‌پارێز و وه‌فادار و نوونه‌رێ كوردان دیار دكه‌ت و ئالیێ دى ب خائین و خوه‌فرۆش دده‌ته نیاسین! ئه‌ڤه ل ده‌مه‌كى كو هه‌ر گرۆپه‌كێ سیاسى یێ كوردى ل هه‌ر ده‌ڤه‌ره‌كا كوردستانێ بت؛ هه‌كه دگه‌ل ئالییه‌كى یان پتر ژ ئالییه‌كێ دژمن و داگیركه‌رێن كوردستانێ نه‌بت نه‌شێت خوه خودان بكه‌ت و كێمترین ئیمان دێ ئاواره بته ده‌وله‌ته‌ك دوور و كوردینییا خوه ل ده‌ربه‌ده‌ریێ برێڤه‌بت. ئانها ژى ئه‌و گرۆپێ سیاسى، چ چه‌كدارى یان مه‌ده‌نى ل هه‌ر ده‌ڤه‌ره‌كا كوردستانێ بت په‌یوه‌ندى دگه‌ل داگیركه‌رێ پارچه‌یا دى یا كوردستانێ یان پتر نه‌بت، نه‌شێت خه‌باتا خوه د كوردستانێ دا بكه‌ت. به‌رى سه‌رهلدانێ، هه‌كه حزبێن هه‌رێما كوردستانێ په‌یوه‌ندى دگه‌ل ئیرانێ و سۆریێ و ره‌نگه تركیا ژى نه‌بان نه‌دكارین خه‌باتا خوه دژى رژێما سه‌ددامى بكه‌ن. هه‌ر وه‌سا حزبێن باكور ژى هه‌كه په‌یوه‌ندى دگه‌ل ئیرانێ و ئیراقێ و سۆریێ نه‌بان نه‌دكارین خه‌باتا خوه دژى تركیا بكه‌ن. نها ژى هه‌ر ئه‌و بازاڕه، هه‌رێما كوردستانێ پارتى و هنده‌ك حزبێن دى دگه‌ل تركیانه و ئێكه‌تى و گۆڕان و هنده‌ك حزبێن دى، دگه‌ل ئیرانێ و ئیراقێ و سۆریێنه. ل ره‌خێ دى ره‌نگه په‌كه‌كه و حزبێن دى دگه‌ل ئیرانێ و ئیراقێ و سۆریێنه… هتد.
ئاڕیشه‌یا حزبێن كوردى ئه‌وه كو هه‌ر ئێك یێدى ب خیانه‌تێ تاوانبار دكه‌ت و ره‌نگه هه‌ر ئێك ژ یێدى پتر (مماره‌سا) خیانه‌تێ دكه‌ت. ره‌وشا ڤى ژیوارێ كه‌ڤن و نوو بیرا من ل په‌ندا پێشیان دهینت ((قڕێ گۆته كه‌وى تۆكه‌كا ره‌ش یا ل ستۆیێ ته)) راستیا وێ قڕ یان (قه‌ل) ب خوه یا ره‌شه، تنێ كه‌وى ب وێ تۆكا ره‌شا ل حه‌فكێ ب ره‌شاتیێ تاوانبار دكه‌ت! ڤێجا مه‌سه‌لا كوردان ژى ئه‌ڤه‌یه، هه‌ر ده‌مێ ئالییه‌كى شكه‌ستنخوار دێ ب دووربین و هووربینێن خیانه‌تكاریێ و تیۆرییا پیلانگێریێ گرۆپێ دى یێ نفشێ خوه ل قه‌له‌مده‌ت. نێزیكترین هه‌لوه‌ست هه‌لوه‌ستێ 16 ئوكتۆبه‌رێ بوویه كو هه‌تا نها هه‌ردو ئالیێن سه‌ره‌كى ل هه‌رێما كوردستانێ كو ((پارتى و ئێكه‌تینیه)) پشتى ژ ده‌ستدانا پتر 50% ژ ئاخا كوردستانا باشوور هه‌ڤدو ب خیانه‌تێ تاوانباردكه‌ن، بۆ زانین هه‌تا نها نه پارتى و نه ئێكه‌تى به‌رهه‌ڤ نینن به‌رامبه‌ر په‌رله‌مانى یان ل هه‌ر جهه‌كێ دهى روونن و راستیێ بۆ دیرۆكێ دیار بكه‌ن، كانێ كیژ وان خائینه و كیژ وان وه‌فاداره یان چو ئالى ژ خیانه‌تێ بێ به‌هر نینن؟!
ئه‌وا ژ هه‌میێ مه‌نده‌هۆشتر! ئه‌وه كو رۆژانه هه‌ردو ئالى وه‌ك هێزێن سه‌ره‌كى یێن ده‌ستهه‌لاتا فیڤتى – فیڤتى ل هه‌رێمێ پێكهیناى پێكڤه كۆمبوونان دكه‌ن و رادبن و دروون كو وه‌سا خوه دیار دكه‌ن ئه‌و كاره‌ستا وان ب ده‌ستێن خوه ب سه‌رێ ڤى ملله‌تى هیناى دێ چاره كه‌ن، هه‌ر وه‌كى چو نه‌بوویى و خوه د ڤێ مژارێ ناگه‌هینن؛ وه‌سا هزر دكه‌ن كو خه‌لكه‌ك ده‌به‌نگه و راستیێ نزانن كو هه‌ر ئێك ژ وان ب نهێنى یێ كار بۆ به‌رژه‌وه‌ندیێن به‌رته‌نگێن حزبا خوه كاردكه‌ن و په‌یوه‌ندییان ب هێزێن ئه‌قلیمى و ناڤخوه‌یى دكه‌ن دا كو برایێ خوه بشكێنت و رسوا بكه‌ت. پرسیار ئه‌وه: كێ دێ باوه‌رى ب ڤان ئالییان هه‌بت كو وان بپارێزت و كیانێ سیاسى یێ ده‌وله‌تێ ب ده‌ستڤه بینن؟
کۆسرەت رەسۆل عەلی ڤەگەریا کوردستانێ
به‌رپرسه‌كێ هه‌رێما كوردستانێ به‌حسێ كۆنفيدراليێ ل گه‌ل به‌غدا دكه‌ت
ئه‌ڤرۆنيوز:
به‌رپرسه‌كێ حوكمه‌تا هه‌رێما كوردستانێ دبێژيت، سيسته‌مێ كۆنفيدرالى باشترين بژارده‌يه بۆ چاره‌سه‌ركرنا كێشێن عيراقێ.
فه‌لاح مسته‌فا، به‌رپرسێ په‌يوه‌نديێن ده‌رڤه يێن حوكمه‌تا هه‌رێما كوردستانێ دگۆتاره‌كێ دا كو ل مالپه‌رێ (زه هێل) يێ ئه‌مريكى به‌لاڤكرى، دبێژيت” حوكمه‌تا هه‌رێمێ ب چه‌سپاندنا فيدراليه‌تێ ل عيراقێ گه‌شه كر وپه‌يوه‌نديێن باش ل گه‌ل وه‌لاتێن جيهانێ دروستكرن، به‌لێ ژبه‌ر سياسه‌تا تائيفى يا به‌غدا، ده‌ڤه‌رێن دى يێن عيراقێ نه‌شيان هه‌رێمان دروست بكه‌ن وگه‌شێ بكه‌ن”.
فه‌لاح مسته‌فاى دياركر كو باشتره كورد وعه‌ره‌بێن شيعه هزر ددارێشتنا سيسته‌مێ خوه يێ په‌يوه‌نديان دا بكه‌ن وكۆنفيدرالى باشترين بژارده‌يه بۆ چاره‌سه‌ركرنا كێشێن دناڤبه‌را به‌غدا وهه‌ولێرێ دا هه‌ين.
گۆت ژى” هه‌كه حوكمه‌تا عيراقێ بڤێت هه‌رێما كوردستانێ دچارچۆڤێ عيراقێ دا بمينيت، پێدڤيه سياسه‌تا خوه يا نوكه ب گوهۆريت، چونكى بێ به‌شكرنا مه ژمافێن مه به‌رده‌وام نابيت”.
دياركر” سه‌پاندنا سزايێن ئابوورى ل سه‌ر گه‌لێ كوردستانێ وداخستنا فرۆكخانان زيانه‌كا مه‌زن ب گه‌لێ كوردستانێ وزێده‌تر ژ دو مليۆن و500 ئاوارێن ل كوردستانێ گه‌هانديه”.
وى به‌رپرسێ حوكمه‌تا هه‌رێمێ داخواز ژ جڤاكێ نێڤده‌وله‌تى كر كو هاريكاريا عيراقێ نه‌كه‌ت ل سه‌ر كيستێ كوردستانێ وگۆت” ب هێزبوونا هه‌رێما كوردستانێ دێ بيته ئه‌گه‌رێ سه‌قامگيريێ وبه‌رقه‌راربوونا ئاشتيێ ل هه‌موو عيراقێ”.
فه‌لاح مسته‌فا هوشدارى دا هه‌كه ره‌وشا نوكه يا عيراقێ يا به‌رده‌وام بيت ومافێن گه‌لێ كوردستانێ وپێكهاتێن دى نه‌هێته دان، بارودۆخێ عيراقێ سه‌قامگير نابيت ودێ نێزيكى ژناڤچوونێ بيت كو دبه‌رژه‌وه‌ندا چو لايه‌نه‌كى دا نينه.
خودانا درێژترين پێ ل جيهانێ ببينه
ئه‌ڤرۆنيوز:
ژنه‌كا رووسى ب ناڤێ ئيكاترينا (29 سال) چو د په‌رتۆكا گينيس يا هژمارێن پيڤانى دا وه‌كو خوادانا درێژترين پێ ل جيهانێ.
درێژيا پێ چه‌پێ يێ ئيكاترينايێ 138،8 سم ودرێژيا پێ وێ يێ راستێ 132،2 سم ودرێژيا وێ ب خوه‌ژى دگه‌هيته 2 متران وپێنج سم وپێلاڤێن هژمار 47 دكه‌ته پێ خوه.
ئيكاترينا ياريكه‌را هه‌لبژارتيێ رووسى يێ باسكتبۆلێ بوو دناڤبه‌را سالێن 2006 و2009.
عيراق وئيران دخوازن ده‌ڤه‌رێن كوردستانى راده‌ستى په‌كه‌كێ بكه‌ن
ئه‌ڤرۆنيوز:
مالپه‌ره‌كێ عه‌ره‌بى دراپۆرته‌كا خوه‌دا به‌لاڤ دكه‌ت كو پارتيا كاركه‌رێن كوردستانێ (په‌كه‌كه) باشترين ده‌ستكه‌فت ژگرژيێن ڤێ دووماهيێ دناڤبه‌را هه‌ولێرێ وبه‌غدا بده‌ست كه‌فتيه، دده‌مه‌كى دا به‌غدا ب ناڤێ هه‌وا سه‌پاندنا قانوونێ ده‌ست پێكر ل 16 ئوكتۆبه‌رێ، به‌لێ ده‌ڤه‌رێن ناكۆكى ل سه‌ر نوكه دده‌ستێ هه‌رێما كوردستانێ دا كو قه‌واره‌كێ دانپێدان كريێ دستوورى يه نه‌ماينه وپشكا مه‌زن ژوان ده‌ڤه‌ران يێن كه‌فتينه دبن ده‌ستێ په‌كه‌كێ دا ب تايبه‌تى ل شنگالێ وده‌شتا نه‌ينه‌وا، ئه‌ڤه ژى وێ چه‌ندێ دگه‌هينيت كو ناكۆكيێن دناڤبه‌را توركيا وبه‌غدا كوورتر لێ بهێن.
ل دووڤ وى مالپه‌رێ (العربى الجديد)، ئه‌و پرۆسا له‌شكرى يا كو هێزێن عيراقێ وميليشيێن حه‌شدا شه‌عبى شياين كه‌ركووكێ و28 باژێر وناحيێن بچووك ده‌ست ب سه‌ردابگرن، هنده‌ك ژوان ده‌ڤه‌ران بێ چه‌ك هاتن راده‌ستكر بۆ وێ چه‌ندێ شه‌ر وخوينرێژى روو نه‌ده‌ت، ل ده‌ڤه‌رێن شنگالێ وده‌شتا نه‌ينه‌وا، ميليشيێن حه‌شدا شه‌عبى رێ ب هێزێن په‌كه‌كێ دا كو به‌رى نوكه ژى ل شنگالێ هه‌بوون، نوكه ژى ب حه‌زا خوه ل ده‌ڤه‌رێ ره‌فتارێ دكه‌ن وباره‌گا وسه‌ربازگه‌هان ڤه‌دكه‌ن، ڤێ چه‌ندێ ژى گرفته‌كا نوو دناڤبه‌را به‌غدا وئه‌نقه‌ره دروست دكه‌ت، ب تايبه‌تى راپۆرت وپێزانينێن هوور يێن هه‌ين كو پتريا په‌كه‌كێ ل ده‌ڤه‌رێن دبن ده‌ستێ حه‌شدێ وله‌شكرێ عيراقێهه‌ماهه‌نگى وپه‌يوه‌نديه‌كا ب هێز دكه‌ن.
هنده‌ك ژێده‌ران ژ عيراقێ بۆ (العربى الجديد) راگه‌هاند كو په‌كه‌كێ پشتى 16ئوكتۆبه‌رێ 20 باره‌گايێن نوو ل چيايێ شنگالێ وده‌ڤه‌رێن دى يێن ڤه‌كرين كو هنده‌ك ژوان سه‌ربازگه‌هێن مه‌شق وراهێنانێ نه وهنده‌ك ژى نه‌خوه‌شخانه‌نه كو ژ قه‌نديلى ورۆژئاڤايێ كوردستانێ نه‌خوه‌ش وبرينداران بۆ ڤه‌دگۆهێزن وهه‌موو باره‌گا وسه‌نگا په‌كه‌كێ يا ل ده‌ڤه‌رێن دبن ده‌ستێ له‌شكرێ عيراقێ دا، ئه‌ڤێ چه‌ندێ ژى ئه‌نقه‌ره ب تمامى دلگران كريه، ژبلى وێ چه‌ندێ رێككه‌فتن يا هه‌ى بۆ چوونا دهۆكێ وكرينا كه‌لوپه‌لێن خوارنێ وپێدڤيان.
ل مه‌ها نيسانا 2017 دا، فرۆكێن توركى بۆ جارا ئێكێ باره‌گا وبنگه‌هێن په‌كه‌كێ ل چيايێ شنگالێ توپبارانكرن كو بۆ ئه‌گه‌رێ ژناڤبرنا باره‌گايێن وان وبرينداربوونا ب ده‌هان چه‌كدارێن په‌كه‌كێ، به‌رپرسه‌كێ له‌شكرى ل فه‌رمانده‌يا ئۆپه‌راسيۆنێن نه‌ينه‌وا گۆت، وان قه‌واره‌كێ سه‌ربخوه بۆ خوه يێ دروستكرى وبه‌رده‌وام مژوولى دروستكرنا چال وسه‌نگه‌رانه ل چيايێ شنگالێ تاكو خوه ژ مه‌ترسيا توپبارانكرنا فرۆكێن توركى بپارێزن، ژئه‌گه‌رێ شه‌ر وتوپبارانكرنا فرۆكان ژى، چو ئاواره نه‌وێرن بزڤرن بۆ ده‌ڤه‌رێن خوه.
ئه‌و به‌رپرسێ له‌شكرێ عيراقێ ل دۆر ئه‌گه‌رێ رێدانێ ب په‌كه‌كێ ژلايێ عيراقێ ڤه بۆ دروستكرنا قه‌واره‌كى ل ده‌ڤه‌رێ، دبێژيت” ئه‌ڤ چه‌نده ژئه‌گه‌رێ هه‌بوونا په‌يوه‌نديێن باش يێن په‌كه‌كێ نه ل گه‌ل ئيرانێ ، ئيرانێ ژى كاريگه‌رى يا ل سه‌ر به‌غدا هه‌ى، ژبلى وێ چه‌ندێ ژى ئه‌ڤه بزاڤه‌كه بۆ فشارخستنێ ل سه‌ر توركيا تاكو هێزێن خوه ژباشيكێ ب ڤه‌كێشيت، له‌وما رۆژ ل دووڤ رۆژێ چه‌كدارێن زێده‌تر يێن ب سه‌ر په‌كه‌كێ ڤه وخێزانێن وان كو هه‌موو هه‌لگرێن ره‌گه‌زناما توركى وسوورى نه دگه‌هنه وان ده‌ڤه‌رێن نوكه په‌كه‌كه يا ل سه‌ر زاله”.
ماجد شنگالى په‌رله‌مانتارێ كورد ل جڤاتا نوونه‌رێن عيراقێ بۆ مالپه‌رێ ناڤبرى دبێژيت” ل ڤێ دووماهيێ پێگه‌هه‌كێ به‌رفرهه ل ده‌ڤه‌رێ يێ بده‌ست په‌كه‌كێ كه‌فتى، نوكه باژێركێ سنوونێ يێ بوويه باره‌گايێ سه‌ره‌كى يێ په‌كه‌كێ وچيايێ شنگالێ ژى ب هه‌ما شێوه، ژبلى وێ چه‌ندێ په‌كه‌كێ ده‌ست ب سه‌ر گوندێن ده‌ڤه‌رێ دا يێ گرتى وب شێوه‌كێ نه‌قانوونى ژى رێڤه‌به‌رێ باژێركى وبه‌رپرسێن كارگێرى ل ده‌ڤه‌رێ ددانن، دده‌مه‌كى دا رازيبوون ژلايێ جڤاتا باژێركى يان پارێزگه‌هێ ڤه ل سه‌رچو ژوان به‌رپرسان نه‌هاتيه دان”.
ماجد شنگالى زێده‌تر دبێژيت”زێده‌بارى وێ چه‌ندێ چه‌كدارێن په‌كه‌كێ هێزێن گه‌رۆك وبازگه ل ده‌ڤه‌رێ يێن هه‌ين وب حه‌زا خوه بازگان ددانن ورێ ل خه‌لكى دگرن وبازرگانيێ دكه‌ن وخه‌لكى ئازار وئه‌شكه‌نجه دده‌ن”.
مالپه‌رێ ناڤبرى دبێژيت” ل دووڤ هنده‌ك ژێده‌ران، هژمارا چه‌كدارێن په‌كه‌كێ ل وێ ده‌ڤه‌رێ ب هزار و500 چه‌كداران دهێنه خه‌ملاندن”.
نووترين پێزانين ل دۆر هنارتنا مووچێن په‌روه‌ردێ وساخله‌ميێ ژلايێ به‌غدا ڤه
ئه‌ڤرۆنيوز:
رێڤه‌به‌را گشتى يا پلاندانانێ ل وه‌زاره‌تا ساخله‌ميێ ل هه‌رێما كوردستانێ ئه‌ڤرۆ شه‌مبيێ 6/1/2018 راگه‌هاند، رۆژا پێنجشه‌مبيا بۆرى 4/1/2018 ل گه‌ل يوسف سورچى رێڤه‌به‌رێ گشتيێ پلاندانانێ ل وه‌زاره‌تا په‌روه‌ردا هه‌رێمێ مه پشكدارى دكۆمبوونا وه‌زاره‌تا پلاندانانا عيراقێ دا كر ل به‌غدا كو بريكارێ وه‌زاره‌تا پلاندانانێ سه‌رۆكێ شاندێ وه‌زاره‌تا پلاندانانا عيراقێ بوو.
ڤيان زێده‌تر بۆ باسنيوز گۆت”ب به‌رچاڤكرنا ليستێن مووچێن فه‌رمانبه‌رێن هه‌ردو وه‌زاره‌تێن ساخله‌ميێ وپه‌روه‌ردێ يێن هه‌رێمێ ده‌ست ب كۆمبوونێ هاته كرن كو پێشتر ژى ب رێا ئێمه‌يلێ ليستا مووچێن هه‌ردو وه‌زاره‌تان ل دووڤ سيسته‌مێ بايۆمه‌ترى هاتبوونه هنارتن.
دياركر” دكۆمبوونێ دا به‌رپرسێن عيراقى ب مه راگه‌هاند ئايا ئه‌م دبه‌رهه‌ڤين بۆ هه‌ر پرسياره‌كێ كو وان هه‌بيت، مه ژى گۆتێ به‌لێ وهوون دشێن پێداچوونێ ب ليستێن مووچان دا بكه‌ن ومه ئاگه‌هداركرن كو هه‌رێمێ چو رێگرى نينن ل به‌رده‌م هنارتنا لژنا هووربينيا به‌غدا بۆ كوردستانێ”.
دياركر ژى كو وان به‌رپرسێن عيراقى ئه‌و ئاگه‌هداركرن كو ب زووترين ده‌م دێ لژنا هووربينيا به‌غدا سه‌ره‌دانا هه‌رێمێ كه‌ت، گۆت ژى” به‌رپرسێن عيراقى بۆمه دياركر هه‌كه مووچه بهێنه هنارتن، دێ بێ پاشكه‌فتكرن هێنه هنارتن”.
هه‌ڤپه‌يمانيا شيعى: دزووترين ده‌م دا كێشێن به‌غدا وهه‌رێمێ دێ چاره‌سه‌ربن
ئه‌ڤرۆنيوز:
ژێده‌ره‌كى ژ هه‌ڤپه‌يمانيا نيشتمانى يا شيعى يا حوكمران راگه‌هاند، ئه‌گه‌ر يێ هه‌ى كێشێن دناڤبه‌را به‌غدا و هه‌رێما كوردستانێ دا ب زووترين ده‌م دا بهێنه چاره‌سه‌ركرن.
رۆژناما (شه‌رقولئه‌وسه‌ت) يا له‌نده‌نى ژزارده‌ڤێ “ژێده‌ره‌كێ ئاگه‌هدار” دناڤ هه‌ڤپه‌يمانيا نيشتمانى يا شيعى دا به‌لاڤكر” حوكمه‌تا عيراقێ وحوكمه‌تا هه‌رێما كوردستانێ نه‌رمى يا دياركرى بۆ چاره‌سه‌ركرنا كێشێن دناڤبه‌را واندا هه‌ين”.
وى ژێده‌رى، كو نه‌ڤيايه ناڤێ وى بهێته به‌لاڤكرن، گۆت ژى”هه‌ولێر وبه‌غدا مژوولى دروستكرنا لژنه‌كا هه‌فت كه‌سى نه كو پێنج كه‌س ژوان عيراق دێ دياركه‌ت ودو كه‌سێن دى دێ نوونه‌راتيا هه‌رێما كوردستانێ كه‌ن”.
ئاماژه دا ژى”لژنا ناڤبرى دێ به‌حسێ ل هه‌موو كێشێن سياسى وئابوورى يێن دناڤبه‌را به‌غدا وهه‌ولێرێ دا كه‌ت” دياركر ژى” ئه‌گه‌ر يێ هه‌ى دزووترين ده‌م دا كێشه بهێنه چاره‌سه‌ركرن”.
نيشاندان
WP Facebook Auto Publish Powered By : XYZScripts.com