ئه‌ڤرۆ نيوز:
كومبوونا ئه‌ڤرۆ يا په‌رله‌مانێ عيراقێ كو بريار بوو خواندنا ئێكێ بۆ پرۆژه قانوونا بودجا 2018 يا عيراقێ بهێته كرن، ژبه‌ر بايكوتا په‌رله‌مانتارێن كورد و سوننه بۆ سوبه هاته پاشخستن.
مه‌سعود حه‌يده‌ر ئه‌ندامێ لژنا دارايى ل په‌رله‌مانێ عيراقێ دياركر كو كوردان 9 تێبينى ل سه‌ر بودجه‌ى هه‌نه كو ئێك ژ وان پشكا هه‌رێمێ ژ 12% بهێته زێده‌كرن بۆ 17% ێ.
ئەڤرۆ نیۆز،تۆڤی:
مێژوویا سه‌رۆكێن ئهمریكا دیار دکەن،کو گەلەک کێم ژ سه‌رۆكێن وی وەلاتی بێ ئه‌نجامدانا شەرەکێ د ماوێ ده‌ستهەلاتا خۆدا تەمام كریه،پتریا وان د ماوێ ده‌ستهەلاتا خۆدا شەرەک هەلگیرساندیە،لەورا نوکە پرسیار ئه‌وه ئەرێ دۆنالد تره‌مپ سه‌رۆكێ نوو دێ چ شەر کەت؟.
سه‌رۆك بۆشێ باب شەرەکێ مەزن ب هەڤکاریا هەڤپەیمانێن خۆ ل دژى عێراقێ ئه‌نجام دا،کو ب شەرێ دویێ یێ كه‌نداڤی یێ ناسیاره،پشتی جۆرج بوشی بیل كلنتن بوو سه‌رۆكى ئهمریكا، وی ژی دەستپێکا هێرشا خۆ بۆ سه‌ر ئه‌فغانستان هه‌لگیرساند، ره‌نگه راسته‌وخۆ كلینتنی جه‌نگ ل دژى ئه‌فغانستانێ بەرپانەکربیت، به‌لێ ئالۆزی ل سه‌رده‌مێ ویدا ل دژى عێراقێ و ئه‌فغانستانێ گەهشتنە وی رادەی،پشتی كلینتنی ده‌بلیو بۆش هات،وی ژی ب هێجەتا 11 سێپتێمبه‌رێ جه‌نگ ل دژى ئه‌فغانستانێ راگه‌هاند و پاشی ل سالا 2003 ل دژى عێراقێ، باراك ئۆمابامای ژی ب هه‌مان شێوه.
جه‌نگ د مێژوویا سه‌رۆكێن ئهمریكا دا بابه‌تەکێ ئێلاكه‌ره،زۆر جارا جه‌نگ سه‌رۆكی دکەتە قارەمانەکێ نه‌ته‌وه‌یى و جار ژی سه‌رۆك هەیە دڤێ تاقیكرنا سه‌ختدا ده‌رناچیت،ویلسۆنی جه‌نگێ ئێکێ یێ جیهانی،روزفلت جه‌نگێ دویێ یێ جیهانى دیتی، لینكۆلنی جه‌نگێ نافخۆ،نیكسۆنی جه‌نگێ ڤیەتنامێ.
ئەرێ تره‌مپ دێ چ شەری کەت و ووێ ل دژى كێ بیت؟، لێ ترەمپ كه‌سەک نینه،کو باوەی ب بکارئینانا هێزێ هه‌بیت،بەلکی ئاشتیێ ب چاره‌سه‌ر دزانیت بۆ ئێكلاكرنا هندەک بابه‌تان،ژ بلی ڤێ ژی وی مەزنترین بودجه بۆ وەزارەتا بەرەڤانیێ ته‌رخان كریه،هەکە وەسا بریاربیت کو تره‌مپی ب بودجه‌ی و چه‌کێ زه‌به‌لاح ل بەربیت جه‌نگەکێ چێکەت؟،هوون چ خەیال دکەن،ئەرێ ئەو جەنگە دێ ل كۆریاى باكور، پاكستان،وەلاتێن داكۆكیكار ل قودسێ، یان ئیران بیت؟.
ئێک:هەکە ژ ئاسیا ده‌ست پێ بكه‌ین:كۆریا باكۆر،وەلاتەکە ئەڤە 70 سالە ململانێ ل گه‌ل ئهمریكا هه‌یه،ل سه‌رده‌مێ دۆناڵد تره‌مپی،ڤی وەلاتی مووشه‌كا بالیستى تاقیكریه و هێرشێن توند ل ئهمریكا دکەت. ئهمریكا ژی هێزا خۆ ل هەمبەری ڤی وەلاتی نمایش دکەت،چه‌كێن خۆژی ل به‌رامبه‌ر وی وەلاتی نمایش دکەت،چەندین سزا ژی خستینە سه‌ر وی وەلاتی،مانۆرێن سه‌ربازى ل‌گه‌ل (كۆریا باشۆر) ئه‌نجام ددەت.
دو:بابه‌تێ قودسێ:ل سالا بوری دۆنالد تره‌مپی بریار دا قودسێ وه‌ك پایته‌ختێ ئیسرائیلێ بهێتە ناساندن،هەر چەندە چاڤەرێ شەرەکێ دهاتەکرن،به‌لێ ئه‌گه‌رێ تێوه‌گلانا ئهمریكا د جه‌نگەکێ مەزندا ب دووری دهێتە زانین،ژبەر ڤان خالان.
. داكۆكیكارێن قودسێ (توركیا، مسر، سعوودیه) دوورن،ژ ئەگەرێ په‌نابرنێ بۆ هێزا سه‌ربازی،ژ پێخەمەت داكۆكیكرنێ ل قودسێ و فلستینیان.
.ئەڤ كێشه به‌ره‌ف رێكخراوێن كۆمه‌لگەهێ نێڤده‌وله‌تى ڤەچوو،جڤاتا ئاسایشێ و كۆمه‌لا گشتی یا نه‌ته‌وەیان.
.هه‌رسێ وەلاتێن مەزن یێن ڤێ دەڤەرێ (توركیا و مسر و سعوودیه)،ز رەنگەکێ ژ رەنگان نێزیکی ئه‌مریکانە: توركیا ئه‌نداما ناتۆیه، مسر و توركیا هه‌ردو هاریكاریێن سه‌ربازى ژ ئهمریكا وه‌رد‌گرن، سعوودیێ ژی پەیوەندیەکا بهێز ل گه‌ل ئه‌مریكادا هه‌یه.
پاكستان:ماوێ چه‌ند هەیڤانه به‌رپرسێن ئهمریكا هێرش بۆ سه‌ر پاكستانێ راگەهاندینە، پاكستانێ ب هندێ تۆمه‌تبار دكه‌ن،کو هاریکاریا گرووپێن تیرۆریستی یێن ناڤ ئه‌فغانستانێ دکەت،لێ پاكستان خودان سوپایه‌کێ مەزنە، چاڤدێرێن ئه‌مریكى دبێژن هەکە پاكستان ب ڤی شێوازی رەفتارا سیاسى بكەت، سه‌قامگیرى ل ئه‌فغانستانێ به‌رپا نابیت،ل‌گه‌ل كه‌فتنا داعشێ ل سووریێ و عێراق گرووپێن تیرۆریستی یێ داعش چووینە ئه‌فغانستانێ و بزاڤان ل وێرێ دکەن، ئه‌ڤەژی وە دکەت دووباره ئه‌فغانستان بكه‌ڤیتە ستۆیێ ئهمریكا و ئهمریكا ژی هه‌موو دەما ژ كێشێن ئه‌فغانستانێ دۆستێ كەڤنێ خۆ پاکستانێ تۆمه‌تبار دکەت.
ئیران:ئیران ئێکە ژ وان وەلاتان کو ئهمریكا ل سه‌رده‌مێ تره‌مپێ به‌رئێككه‌فتن و جه‌نگەکی ل گه‌ل ئه‌نجام بدەت. ئیران دوژمنەکێ 30 سالا یێ ئه‌مریكایه،نوکە ب دیتنا ئهمریكا ئیران ژێدەرێ ئالۆزیێن هەموو رۆژهه‌لاتا ناڤینە، ئیرانێ ملیشیات ل لوبنانێ و عێراقێ و سووریێ و یه‌مه‌نێ هه‌نە،دۆنالد تره‌مپ دانێ ب رێككه‌فتنا ئه‌تۆمى ل گه‌ل ئیرانێ ناکەت،گۆره‌پانا به‌رئێکكه‌فتنێ ل عێراقێ یا نزیكه،ئەڤ هوکارە هەموو وە دکەن ب ئاسانى تره‌مپ هزرێ ل لێدانا ئیرانێ بكەت.
ئەڤرۆ نیوز، نەوزاد ھلۆری:
بکارئینانا ھەموو جوێن تورا و بومبە و ماددێن ژەھراوی و کارەب بوویە سەدەم کو ماسی ژ رووبارێن سنوورێ دەڤەرا ئامێدیێ و بارزان کێم بن و ماسیگرەک ددەتن دیارکرن کو ئەو بەرامبەر سالێن بوری گه‌له‌ك كێم ماسيان دگرن.
سەمیع سەدیق ماسیگرەکێ دەڤەرێ یە ددەتن دیارکرن کو بەری نھا ئەوان ھەتا 30 کیلویێن ماسیان دگرتن بەلێ نھا ئەو ھەتا پێنج کیلویێن ماسیان دگرن و بو ئەڤرۆ نیوز گۆت: (ئەم رۆژانە ب تورا دچینە ماسیان ل رووبارێن شین و رووبارێ زێ، بەلێ ماسی گەلەک کێم بوینە، ئەگەر ژی دزڤریت بۆ بکارئینانا ھەموو جورێن تورا و بکارئینانا بومبە و ماددێن ژەھراوی ژ بۆ گرتنا ماسیان).
زێدەتر گۆت: (ئەم ب دو شێوازان تورا بو گرتنا ماسیان بکاردئینین وەکو دانانا تورا و د رووباری بەردانا تورا و قەیرانا دارایی بوویە ئەگەر کو بھایێ ماسیان گەلەک کێم بیت و نھا کیلو د ناڤبەرا چوار بۆ ھەشت ھزار دیناران دھێتە فروتن).
ژ لایەکێ دن ڤە بکرەکێ ماسیان ل بازارێن شێلادزێ ب ناڤێ دلوڤان سیتەیی بۆ ئەڤرۆ نیوز گۆت: (ماسیگرێن دەڤەرێن بارزان و سنوورێ ئامێدیێ دچنە ھەردو رووبارێن زێ مەزن و رووبارێ شین و ئەم ژی ڤێرە ل وان دکرین و دفروشین، کیلویا ماسیان د ناڤبەرا پێنج بۆ 12 ھزار دیناران دھێتە فروتن).
ئەڤرۆ نیوز، نەوزاد ھلۆری:
دەما چەند رۆژایە ل چەند باژێرێن ئیرانێ و رۆژھەلاتێ کوردستانێ، دژی رژێما ئیرانێ وەلاتیان دەست ب خوه‌نیشاندانان کری و حوکمەتا ئیرانێ ژی ب تۆندرین ره‌نگ بەرساڤا خوه‌نیشاندانان ب کوشتن و بریندارکرن و گرتنێ ددەت. چاڤدێرەکێ سیاسی ددەته دیارکرن کو ئەڤ یەک ھەموو بۆ نەدادپەروەریا ئیرانێ دزڤریت و شکەستنا ئیرانێ ل گەل خوه‌نیشاندانان دێ بیتە سەدەم کو دەستێوەردانێن ئیرانێ ل عیراق و ھەرێما کوردستانێ دووماھی بھێن.
چاڤدێرێ سیاسی، عەبدوللا خالد، دیارکر کو شکاندنا ئیرانێ گەلەک گرنگە بۆ رۆژھەلاتا ناڤەراست ب گشتی و دەڤەرێ ب تایبەتی و بۆ ئەڤرۆ نیوز گۆت: (رەنگە شکەستنا ئیرانێ زیانێ ب چەند وەلات و کەس و لایەنان بگەھینیت، بەلێ ل گەل ڤێ یەکێ ژی بۆ کوردان گەلەک گرنگە ب تایبەتی د وارێ مافێ مرۆڤی و ئازادیێن رادەربرین و ھزری دا کو دەمەکێ زورە ب ھندەک ھزر و بیرێن بەرتەنگ پەردەکرینە، ئیران ھەتا سەر ھەستیا دەستڤەدانێن خوە کرینە سەر کاروبارێن ھەرێما کوردستانێ و عیراقێ، دووماھی جار ژی سیناریویا 16ێ ئوکپوتەرا سالا بوری بوو، کو رولەکێ زۆر نەرێنی ھەبوویە بۆ کەفتنا کەرکووک و دەڤەرێن سەر ب وێ ڤە و ھەموو ئەوان سزایێن ئابووریێن کو نھا ھەرێم تێدا دنالیت ئیران ژێ بەرپرسیارە، د کەڤکێشا ھەولێر بۆ بەغدایێ ژی دا ئیرانێ رولەکێ خراپ ھەیە و بێلایەن نەبوویە).
زێدەتر گۆت: (ھەر ژ دەستپێکا شورەشا گەلێن ئیرانی و دامەزراندنا کومارا ئیسلامیا ئیرانێ، ئیرانێ سل نەبوویە ژ شکادنا کەرامەت و پێگەھێ کوردان ل ھەموو پارچێن کوردستانێ ب تایبەتی روژھەلاتا کوردستانێ ئەو ژی ب رێیا ئاگر و ئاسن و کوشتن و گرتن و سێدارەدانێ ھەتا خوە سەرکردەیێن کوردان ل ئوروپا و جیھانێ ژی تیرور دکەت، ئیرانێ سالا 1979 دەست ب بنپێکرنان بەرامبەر مافێن کوردان و ئازادیێن وان يێن ھزری و نەتەوەی و ھەتا خوە ئاینی ژی کریە، نھا ژی ئیران ئێکە ژ مەترسیدارترین وان وەلاتێن کو مافێ مرۆڤی تێدا دھێتە بنپێکرن و ب ئاشکرا خەلکەکێ بی َتاوان و ل سەر کێمترین تشت سێدارە ددەن و زیندانێن وان پربوینە ژ خەکێ بێ گونەهـ و برسی، پرانیا وان ژی ل سەر ئازادیێن رادەربرین و ھزری ھاتینەگرتن).
چاڤدێرێ سیاسی د درێژاھیا ئاخفتنێن خودا دیارکر ژی کو ئیرانێ روەکێ کارا ھەیە د دروستکرنا عەبایێن رەش و تیرور ل دەڤەر و ئاسایشا نەتەوەی ھەموو جیھانێ و گۆت ژی: (ئەگەرێ سەرەکی یا دروست بوونا شەر و ئالوزیێن پرانیا وەلاتێن جیھانی ب تایبەتی عەرەبی دزڤریت بۆ ئیرانێ مینا وەلاتێن سوریا، یەمەن، بەحرین، سعودى، کوێت و عیراق و چەندان وەلات و جھێن دن، ئانکو ئیران خەکێ خوە برسی دکەت و ئالوزی و شەرا بو خەکێ دن دروست دکەت، دیسان پەنابرن بۆ بکارئینان و دروستکرنا چەکێ ئەتومی و دەستوەردان کاروبارێن جیھانی ئێکا دنە ژ مەترسیێن سەر ئاسایشا نەتەوەی و مرۆڤایەتی ل جیھانێ ئیران بەرامبەر خەلکی دکەت ژ بەر ڤێ دروستکرنا ھەڤپەیمانی و بەرەیەکێ ب ھێز دژی شکاندنا ئیرانێ ئەگەر کارەک ب زەحمەت ژی بیت ئێکە ژ پێدڤیێن گرنگ دا کو جارەک دن ئازادی و ئەرک و ماف بۆ خەلکی بزڤرنه ڤە).
ئه‌ڤرۆ نيوز:
نیڤەک ژ مرۆڤان پشتی 50 سالیێ تووش دبنێ، ڤەخوارنا کحولی و کێمیا ڤیتامین دی و جگارەکێشان و بەدخوارن و نەبزاڤکرن و خوارنا دەرمانان و نەخۆشیێن دومدرێژ ھەموو پێکڤە دبنە ئەگەرێ نەخۆشیا پێتیبوونا ھەستیان.ھەستی ب سروشتێ خۆ بھێزن، بەلێ دەمێ چاڤدێری بۆ نەبیت دێ ھەلوەریان و پێتیبوون ژێرا پەیدابیت و ل دووماھیێ ئەو ھێز نامینیت ھەتا گرانیا لەشێ مرۆڤی ژی رابکەن و پتریا تووشبۆیێن ڤێ نەخۆشیێ ژ رەگەزێ مێ نە، ئاریشا ھەرە مەزن ئەوە نەخوشی ل قۆناغێن دووماھیێ پەیدادبیت، بەلێ پێدڤیە ژن بزانن کو راوەستیانا عادەیا ھەیڤانە و زەعیفی و کێم بزاڤکرن نیشانێن سۆرن.
د.محەمەد تاھر رەسول، تایبەتمەندێ چارەسەریا سروشتی و نەخۆشیێن دلی و ھناڤان دیارکر کو پێتیبوونا ھەستیان ئانکو پەیدابوونا ھەر گوھۆرینەکا فسیولوجی یە ل سەر لەشێ مرۆڤی ژ ئەنجامێ دانعمربوونێ و ئەو سەربارکێن ژێ پەیدادبن کو کارتێکرنێ ل ژیانا نەخۆشی یا سروشتی و جڤاکی دکەن و نەخۆش نەشێت لڤینێ بکەت و ئەڤ چەندە نوکە گەلەک یا بەربەلاڤ دبلیت ل سەر ئاستێ جیھانێ و ب گرانی ژلایێ دارایی ڤە ل سەر دەولەتێ ژی رادوەستیت و گۆت: ئەگەرێن نەخۆشیێ دو رەنگن ھندەک ژوان ناھێنە گوھارتن وەکو ژیێ مرۆڤی ھەکە یێ مەزن بیت، یان رەگەز و ئەسلێ نەخۆشی و دیسان فاکتەرێن زکماکی و ھندەک ژی دشیاندایە بھێنە کونترولکرن وەکو نەخۆشیێن دومدرێژ و چاڤدێریا بەردەوام یا مرۆڤی و خوارن و ڤەخوارنێن مرۆڤی و جگارەکێشان و ..ھتد، 50% ژ کەسێن ژیێ وان ژ 50 سالیێ پێھەلتر نەخۆشیا خوە ژ پێتیبوونا ھەستیان دبینن و پتریا وان ژنن.
د.محەمەد تاھر دیارکر ژی کو گەلەک ڤەخوارنا مەی ژی دبیتە ئەگەرێ کێمبوونا ڤیتامین دی دلەشیدا و دیسان جگارەکێشان دبیتە ئەگەر کو کارتێکرن ل ئاڤاکرنا ھەستیان ببیت و ھەر خوارنەکا ڤیتامینێن باش دناڤدا نەبن یان پرۆتینێن باش دناڤدا نەبن دیسان کارتێکرنێ ل لەشی و ھەستیان ب تایبەتی دکەن، و داکو پتر ژ سەنگێ مرۆڤ پێ ھزر دکەت رابگرن، پێدڤیە راھێنانێن وەرزشی ئەنجام بدەین، دیسان خوارنێن تژی کلس بخوین داکو لەشێ مە ب شێوەیەکێ باش و نورمال ئاڤا ببیت.
د.محەمەد تاھر گۆت: پتریا نەخۆشان نزانن ئەڤ نەخۆشیە ھەیە، لەورا ب سەدەھان نەخۆشێن دھێنە لایێ مە دێ بێژن مە چ کارێن گران نەکرینە، یان مە خۆ چەماندە موجەمیدێ یان مە دەستنڤێژا خۆ دشووشت و مە ھەستکر کو ھەستیەکێ مە شکەست. و ب ڤی رەنگی دگەھیتە قوناغێن داویێ ژنوو نەخۆش دزانن.
ل گەل ڤێ چەندێ تایبەتمەندێ چارەسەریا سروشتی گۆتژی کو گەلەک نەخۆشی ھەنە ژی دشیاندایە ببنە ئەگەرێ نەخۆشیا پێتیبوونا ھەستیان ژوانژی کێم لڤین و ئەو نەخۆشیێن کارتێکرنێ ل ھورمونان دکەن. ھەروەسان دیارکر ژی کو ھندەک جورێن دەرمانان ئەوێن توشبوویێن نەخۆشیێن دومدرێژ وەکو نەخۆشیێن ( شەکرێ و فشارا خوینێ و پەریزادێ و دلی) دخون و دیسان نەخۆشیێن پەنجەشێرێ و ھەروەسان دەرمانێن شلکرنا خوینێ و ئەو کەسێن قەلەو لەشێ وان پتر بەرئاتافی پێتیبوونا ھەستیان دبیت.
د.محەمەد تاھر رەسول، ئەو چەند ژی نەڤەشارت کو ژنێن دچنە د قوناغێن ژیێ بێھیڤیبوونێ دا و دەمێ ل عادەیا ھەیڤانە رادوەستن و ژنێن گەلەک زەعیف کو سەنگێ وێ گەلەک یێ کێم بیت و ئەوا کێم بزاڤێ دکەت، پێدڤیە ھشیاربیت و بزانیت ئەڤە نیشانێن سۆر و ئاگەھلێبوونێ نە بۆ ڤێ نەخۆشیێ و پێدڤیە پشکنینێن دەوری بۆ بھێنە کرن، ب تایبەت بۆ کەسێن ژیێ وان ژ 60 سالیێ بۆری.
بۆ چارەسەریێ د.محەمەد تاھر رەسول گۆت: باشترە دەزگەھێن راگەھاندنێ گەلەک گرنگیێ ب نەخۆشیێ بدەن و بزانن ئەڤە ژ قەوارێ خۆ یا دەرباز دبیت و دیسان پێدڤیە جگارەکێشان بھێتە کێمکرن و خو دوورکرن ژ کحولی و خوارنەکا باش بھێتە ئامادەکرن و ھەروەسان پێدڤیە دەرمان بۆ چارەسەریێ بھێنە دان و دیسان دەرمانێن ھێزێ و ڤیتامین بۆ بھێنە دان و بزاڤا خو یا وەرزشی زێدەبکەن و دیسان دەرمانێن ئێشکێمکرنێ ژی ھندەک دەمان ژپێدڤیانە.
ئه‌ڤرۆ نيوز:
نوشدار و تایبەتمەندێن خوراکیێ ئیشارەتێ ب وێ چەندێ ددەن کو خوارنێ ڤەرێژێن خۆ ل سەر وەرارا مرۆڤی د قووناغێن جودا جودا یێن ژیانێ دا ھەنە، ھندەک جورێن خوارنێ بەرھنگاریا پیراتیێ دکەن، سیسیتەمێ خوارنا ھەڤسەنگ ئەوا مرۆڤ ل دووڤ دچیت ددرێژیا ژیانا خۆ دا کارتێکرنێ ل ساخلەمیا لەشی و سلامەتیا شانەیێن لەشی دکەت، نوشدار و بسپورێن ساخلەمیێ دەە رێیان دەست نیشا دکەن کو دبنە ئەگەر نیشانێن پیراتیێ ل دەڤ مرۆڤی گیرو ببن ئەوژی ئەڤەنە:
1- پێدڤیە مرۆڤ رۆژانە بەری دەمژمێر نەھێ سپێدێ ژ خەو راببیت و ب نیڤ دەمژمێرێ پشتی ژ خەو رابوونێ پێدڤیە دەست ب خوارنا تێشتێ بکەت و باشترە تێشت یا پێکھاتی بیت ژ پەنیری و ھنگڤینی و حەفتیێ رۆژەکێ ژی باشترە مرۆڤ ھێکان بخوت.
2- دناڤبەرا دانێن خوارنێ دا گەلەک پێدڤیە مرۆڤ دانێن سڤک وەکو فێقی و زەرزەواتی بخوت.
3- ھەر چ نەبیت رۆژانە مرۆڤ ھندەک راھێنانێن وەرزشی بۆ دەمێ نیڤ دەمژمێرێ بکەت داکو باشی بکەڤیتە خولا خوینێ و زەوقێ مرۆڤی ب شێوەیەکێ گشتی خوش ببیت.
4- دڤیا خوارنا شیڤێ بەری دەمژمێر نەھێ شەڤێ بیت، داکو بشێین زوو بنڤین ژبەرکو نڤستن رێیەکە بۆ ساخلەمیا مێشکی و پیستی و ئەندامێن ناڤیا لەشی.
5- گەلەک فێقی بخوین ب شێوەیەکێ گشتی و ب تایبەت تری و ھژیر و سێڤ و فراولایان ژبەرکو دژە تەن و ڤیتامین ب ئاستەکێ مەزن دناڤدا ھەنە.
6- دێ باش بیت ماسکێن فێقی ل سەر دێمی بھێنە دانان بەلێ ئەڤە دێ ب رێکا راوێژکاریا نوشدارێ پیستی بیت داکو ئەو ماسکێ پێدڤی ل دووڤ گونجاندنا وی بۆ شێوێ دێمێ مرۆڤی دەست نیشان بکەت.
7- زەرزەواتی ب ھەموو رەنگانڤە بخو، ب تایبەت سپیناغ و جەرجیر و خەس و گێزەر و باجانسۆرک و فاسولیا و سیر و پیڤازان، ژبەرکو گەلەک ڤیتامین و کانزا دناڤ ڤان زەرەواتان دا ھەنە.
8- پێدڤیە زەیتێن رووەکان ب کاربینین وەکو زەیتا زەیتینا و کونجیا ژبەرکو گەلەک ترشیێن روونی دناڤدا ھەنە کو مرۆڤ دشێن بۆ ماسکێن دێمی ژی ب کاربینیت.
9- باشترە ھنگڤینێ شانەیان ئەوێ دبێژنێ ھنگڤینێ سپی بخوبن ژبەرکو ئەوژی یێ پێکھاتیە ژ سەدەھان ژێدەرێن سەرەکی بۆ ئاڤاکرنا لەشی.
10- باشترە گەلەک گرنگیێ ب دەینە دەمێن خوارنێ و ھندێ نەخوین کو ببیتە ئەگەرێ قەلەوبوونا لەشێ مە و دگەلدا گرنگی ب ڤەخوارنا ئاڤێ بھێتە دان ئەوژی رۆژانە ب کێماتی ھەشت کوپێن ئاڤێ ڤەخوین.
ئه‌ڤرۆ نيوز:
بێگومان پیتەدان ب شێوازو چاوانیا رێکخستنا سیما و روخساری یا گرنگە،لێ ئەڤە بتنێ بەس نینە،چونکی جوانیا رەفتارا گرنگترە و رەنگە کەسەک خودان جوانترین روخساربیت،لێ بتنێ رەفتارەکا نەدروست بەسە بۆ ھندێ ئەو زەلامێ تە خوش دڤێت کەرب ژ تە ڤەبن،چونکی زەلام بتنێ ب سیماو جوانیا روخسارێ ئافرەتێ داخبار نابیت،بەلکو ب کەسایەتی و رەفتارێن ئافرەتان داخبار دبن.
1.گوھداریکرنا ئافرەتان بۆ زەلامی ئێکە ژ وان رەفتارا کو سەرنجا زەلامان رادکێشیترامان ئەوە گرنگیێ ب ھەڤژینێ خوە ددەت،ب تایبەتی د چارەسەرکرنا کێشە و گرفتاندا.
2.سەرنجا زەلاما بو ئافرەتێن سادە دچیت و ئەو ئافرەتێن خودان لێبورین و خوە بلند نەبینن.
3. ئافرەتدشێت باشترین رێک بۆ ب دەستڤەئینانا دلێ زەلامی خوە بکار بینیت ئەوژی دروستکرنا خوارنێت ب تام و جورا و جورە.
3. ئافرەتێن خودان دێمەکێ گەش روحەکا پاقژ ب تایبەتی ئەو ئافرەتێن بەردەوام دگرنژن و دکەنن کێشە و گرفتان ب ساناھی وەردگرن و ئەڤە ئێکە ژوان رەفتارا یێن کو زەلام ب دووڤدا دگەریێن و سەرنجا وان بۆ دچیت.
5.ئافرەتێن ب ھێزو خودان باوەری،بەرگیریێ ل خوە دکەن د ھەموو دەمەکی دا و ب وێرەکانە رووی ب رووی ھەموو کێشە و گرفتان دبن.
ئه‌ڤرۆ نيوز:
پارێزەرەکێ دادگەھا دھۆکێ راگەھاند کو کەسەک چوو نک خەزوورێ خوە گۆتێ وەرە خانیێ خوە بۆ من رەھنکە بۆ کومپانیێ دێ بۆ خوە ترومبێلەکا تەکسی ب قست کرم ب کوژمێ 250 ھزار دولاران داکو بۆ خوە پێ کار بکەم و گۆت:خەزوورێ وی قەبوول کر، بەلێ نەزانی زاڤایێ وی یێ فێلکاریێ لێ دکەت و دێ غەدرێ ل وی و کچا وی کەت، ژبەرکو زاڤایێ وی کچا وی ژی بەردا و خانیێ وی ژی کرە رەھینە بۆ کومپانیێ.
پارێزەر ئومێد محەمەد دێرگژنیکیل دادگەھا دھۆکێبۆ ئەڤرۆ دیار کر کوکەسەکێ نە باش بو و رەفتارێن وی دخراب بوون کچەکا ھەر ل کومەڵگەھا خوە نیاسی و بۆ خوە خاست و گۆت: ھەر دو دنەخویندەوار بوون پشتی دەواتا خوە کری چوو نک خەزوورێ خوە و گۆتێ خانیێ خوە بۆ من رەھنکەبۆ کومپانیێ دێ بۆ خوە ترومبێلەکا تەکسی ب قست کرم ب کوژمێ 250 ھزار دولاران داکو بۆ خوە پێ کار بکەم، خەزوورێ وی رازی بۆ داکو ژیارا کچا وی پیچەکێ خوەش بیت، لێ خەزوورێ وی نەزانی کو زاڤایێ وی یێ فێلکاریێ لێ دکەت و دێ غەدرێ ل وی و کچا وی کەت.
پارێزەری گۆتژی: رۆژ ھاتن و چوون وان ھند یت رۆژەکێ زاڤایێ وان یێ ھێجەتا دگریت رابوو پشتی سالەک و چەند ھەیڤ ژ دەواتا وان بورین و خودێ کورەک دایێ ھەڤژینا خوە بەردا ل دادگەھێ بێ کو ئەو بزانیت و مافێن ژنکێ ھەموو بۆ کەتن ھەکە ھاتوو ژ دەرڤەی وەلاتی زڤری ئەڤ ژنە دشێت داخازا مافێن خوە بکەت.
پارێزەری دیار کر ژی کو ئەڤی کەسی ترومبێلا خوە فروت و رەڤیو چوو دەرڤەی وەلاتی، ئانکو ژ دو رەخاڤە غەدرە ل خەزوورێ خوە کر کچا وی ژی بەردا و خانیێ وی ژی کرە رەھینە بۆ کومپانیێ ئەڤجا ئەڤ کەسە یان دڤێت 250 ھزار دولاران بدەتە کومپانیێ پێش خانی ڤە یان دێ کومپانی خانیێ وی فروشیت داکو بھایێ ترومبێلا خوە راکەن.
پارێزەری ئەو چەندە ژی گۆت: ئەڤ دربێ مەزن ل خەزوورێ خوە دا و رەڤی بێ کو ووژدانا وی ب لڤلڤیت یان دلێ وی بمینتە پێڤە،ئەڤ کەسێ ھەنێ رابوو قەستا مالێن مەزن و ئاغایا کر داکو ئاریشا وی چارە کەن.
پارێزەری زێدەرتر گۆت: ئەڤ جورە کێشە گەلەک کێم ل دادگەھێ دھێنە تومارکرن چۆنکی بابەت ب ووژدانا مرۆڤی ڤە یێ گرێدایە و ھەموو کەس نەشێن ووژدانا خوە ھوسا خراب بکەن.
دێرگژنیکی دوپاتی ل سەر ھندێ کر کو دڤێت ھەر کەسەکێ بەری خانیێ خوە بکەتە رەھن بزانیت رەھن چیە بۆ خوە پرسیار بکەت ئانکو باوەریا خوە زوو ب زوو ب کەسێ نە ئینیت خوە بلا کورێ وی ژی بیت پاشی قەبوول بکەت و ئیمزا بکەت داکو سوباھی پەشێمان نەبیت و بێژیت ئەڤە من چ کر و مالا خوە ب دەستێن خوە خراب کر.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو سوبه‌هى رۆژا پێنجشه‌مبى رێكه‌فتى 4ى كانوونا دويێ 2018 دهێته پێشبينيكرن دێ هنده‌ك ئه‌ورێن كێم ل ئه‌سمانى هه‌بن.
پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د نڤيساره‌كێ دا راگه‌هانديه كو ژ ئه گه‌رێ هاتنا فشارێن بلندێن وه‌لاتێ توركيا دهێته پێشبينيكرن هنده‌ك ئه‌ورێن كێم ل ئه‌سمانى هه‌بن.
پشكا پێشبينيان خۆيا ژى كريه كو نزمترين پلا گه‌رما پێشبينيكرى دێ 4 پله بيت و بلندترين پله ژى دێ 11 پله بيت.
هه‌ر ب گۆره‌ى ڤێ راپۆرتا رێڤه‌به‌ريا ناڤبرى له‌زاتيا باى دێ گه‌له‌ك زێده‌كه‌ت و ل هنده‌ك جاران دێ گه‌هيته 5 بۆ 15 كم بيت د ده‌مژمێره‌كێ دا و ماوێ ديتنێ ژى دێ د ناڤبه‌را 8 بۆ 10كم دا بيت.
نيشاندان