ئه‌ڤرۆ نيوز:

رێگری(مانع) یان رێکخستنا خێزانێ ئەوە نەھێلی ب دوگیان بکەڤی بۆ ماوەیەکێ دەستنیشان کری بۆ ڤێ یەکێ چەندین رێ ھەنە ژن و زەلام بکار بینن.

د. ئەمەل عەبدولحەکیم مستەفا نوشدارا تایبەتمەندا ژن و زارۆ بوونێ بۆ نوش نیوز دا دیار کرن ل ڤی سەر دەمی گەلەک رێ ھەنە ژن و زەلام بکار دئینن دا زارۆ نەبن بۆ ماوەیەکی و ژ دو سالا کێمتر نەبیت دا کو دایک بشێت زارۆیێ خۆ خودان بکەت و دلوڤانیێ ب دەتێ و لاشێ وێ ژی ئامادە بیت، ساخلەمیا وێ د ماوێ ڤان دو سالان دا باشتر لێ بێت بۆ زارۆیێ دووڤ دا، چونکو ساخلەمیا دایکێ یا باش نەبیت یا زارۆی ژی یا باش نابیت.

ئەمەل خانێ دا دیار کرن کو ئەو زارۆیێ دایکێن وان رێگری بکار ئیناین و چاڤێ خۆ دایە زارۆیێ خۆ، ئەو زارۆ یێ سەرکەفتی یە و دەروونێ وی باشترە ژ وان زارۆیێن دایکێن وان ل دووڤ ئێک دا ئیناین، نە گەھشتینە تێر دلوڤانیێ بدەنێ.

گەلەگ جورێن رێکخستنا خێزانێ یێن ھەین بۆ ژن و زەلامان ژ وان ژی:

• رێیا ئێکێ رێگرێ سروشتی: ژن و زەلام بکار دئینن، لێ دڤێت ب شێوەکێ زانستی بھێتە بکار ئینان چ پێزانینا ژ نوشدارەکی یان ژ سایتەکی وەربگریت، لێ دڤێت یێ باوەر پێکری بیت، چونکو 80% ئەوێ رێگرێ سروشتی بکار دئینن ب دوگیان دکەڤن، دیسان نابیت بۆ ماوەکێ درێژ بکاربینن چونکو ئالوزی دکەڤیتە پەیوەندیا ھەڤژینێ دا بێ ژن و مێر ھەست پێ بکەن دیسان بارگرانیێ دئێخیتە سەر ساخلەمیا وان.

• رێیا دووێ فلاش یان (کوندوم): پێک ھاتیە ژ کیسەکێ مەتاتی ژن و زەلام بکار دئینن کو باشترین رێیە ژن ب دوگیان نەکەڤیت دیسان ئالاڤەکێ ب ھێزە بۆ ڤەنەگوھاستنا ئێشێن ڤەگر و نابیت کیسەک دوجا بێتە بکارئینان.

• رێیا سیێ حەبێن نەزاروبونێ: ژن دشێت ل مال بکار بینیت پشتی نوشدار رەزامەندیێ ل سەر بدەت، ھەر دەستەکی 21 حەب تێدا ھەنە دێ ل ھەرسێ رۆژێن دەست پێکێ یێن خولا ھەیڤانە خوت د ئێک دەم دا و ناڤێ رۆژا ژی یێل سەر ئەگەر رۆژەکێ نەخار دێ دیار بیت کیش روژە دێ یا بەردەوام بیت ھەتا حەبێن وێ تمام دبن ھەیڤانە دێ ڤێ پروسێ دوبارە کەت، لێ جارجار دڤێت سەرەدانا نوشدارێ خۆ بکەت چونکو ھەردەرمانەکی باشی و خرابیێن خۆ یێن ھەین.

ڤان حەبا ژبلی رێگریێ بۆ دوگیانیێ ھندەک باشیێن خۆ بۆ کچ و ژنێ ھەنە:
1. خولا ھەیڤانە رێک دئێخیت.
2. دوور دئێخیت ژ نەخۆشیا پەنجەشێرێ.
3. میێن زێدە یێن ژ ئەگەرێ کیسان پەیدا دبن کێم دکەن.

• جۆرێ چوارێ (لولب) یان حەلەقە کو ئامیرەکێ بچیکە وەکو پیتا “T”یە ب رێیا نشتەرگەریەکا ب ساناھی ل ھەموو کلینیکا و نەخۆشخانا دھێتە دانان.

• پێک ھاتیە ژ دو جورا:

1. حەلەقا ھورمونی کو ھورمونێ (البروجسترون) بەردەت ناھێلیت د یوارێن مالبچووکیێ ستوور ببن، بارا پتر بۆ وان ژنا دھێتە بکار ئینان یێن خوین بەربوون ل دەف پەیدا دبیت ئەڤ حەلەقە بۆ ماوێ پێنج سالا دھێتە دانان.

٢. حەلەقا سفری(نحاسی) یا ئارامە بۆ ماوێ پێنج ھەتا 8 سالا دھێتە دانان.

• رێیا پێنجێ شرینقە: دھێتە دانان بۆ زەبلەکا ملی، لێ کارتیکرنێ ل خولا ھەیڤانە دکەت کو چپکێن خوینێ دھێنە دیتن و ژڤانێ خولا ھەیڤانە تێک ددەت بۆ پاش و پێش.

• رێیا شەشێ کەپسۆل: کەپسولەکا درێژە دکەنە دبن چەرمی دا ل ملی بێ بەنج دھێتە دانان بۆ ماوێ سێ سالان.

• رێیا حەفتێ (عقد انابیب) یان قولباندنا مالبچووکیێ: بۆ وان دھێتە بکار ئینان یێن نەخۆشیێن گران ل دەف ھەین زارۆ کارتێکرنێ بکەنە سەر ژیانا وان ڤێ نشتەرگەریێ بۆ دکەن بوریێن ھێکا دگرن ب کوردەواری دبێژن مال بچووکیێ وان دھێتە قولپاندن.

• دیسا بۆ زەلامان ژی (عقد انابیب) دروست دکەن: بوریێن سپێرم ژێ دەردکەڤن دگرن.