ئه‌ڤرۆنيوز:
به‌رپرسه‌ك ل جڤاتا وه‌زيرێن هه‌رێما كوردستانێ ئاشكرا دكه‌ت كو چاكسازيێن دمووچان دا دهێنه كرن دێ گۆژمێ 100 مليار ديناران بۆ حوكمه‌تێ ڤه‌گه‌رينيت.
نورى عوسمان، سه‌رۆكێ فه‌رمانگه‌ها هه‌ماهه‌نگيێ ودووڤچوونێ ل جڤاتا وه‌زيران بۆ رووداوێ گۆت” چاكسازى دمووچان دا دێ 150 هزار كه‌سان ڤه‌گريت ونێزيكى 100 مليار ديناران بۆ حوكمه‌تێ ڤه‌گه‌رينيت”.
ئه‌ڤرۆنيوز:
رۆژناما ئه‌كسپرێس يا ئينگليزى ده‌نگوباسه‌كێ نوو ئاشكراكر ل دۆر ڤه‌گۆهاستنا ياريكه‌رێ مسرى محه‌مه‌د سه‌لاح هێرشبه‌رێ لێڤه‌رپۆل بۆ يانا ريال مه‌دريد يا ئيسپانى.
ل دووڤ وێ رۆژنامێ، محه‌مه‌د سه‌لاح بۆ بريكارێ خوه دياركريه كو دخوازيت بۆ ريال مه‌دريد ياريێ بكه‌ت وخه‌ونا خوه ب ياريكرنێ ل گه‌ل كريستيانۆ رونالدۆى بده‌ستڤه‌بينيت.
رۆژناما ئينگليزى به‌لاڤكريه كو محه‌مه‌د سه‌لاح داخواز ژ بريكارێ خوه (رامى عه‌باس) كريه كه‌نالێن په‌يوه‌نديێ ل گه‌ل به‌رپرسێن ريال مه‌دريد ڤه‌كه‌ت بۆ ب دووماهى ئينانا ڤه‌گۆهاستنا وى بۆ ريال.
به‌رى نوكه، هيكتور كوبر راهێنه‌رێ ئه‌جه‌نتينيێ هه‌لبژارتيێ مسرێ دياركربوو كو ريال مه‌دريد دخوازيت محه‌مه‌د سه‌لاح بهێته ڤه‌گۆهاستن بۆ رێزێن وێ.
محه‌مه‌د سه‌لاح سه‌ركێشيا ليستا گولكه‌رێن خۆلا ئينگليزى دكه‌ت ب 15 گۆلان ب يه‌كسانى ل گه‌ل ياريكه‌رێ توتنهام هارى كين.
ئەڤرۆ نیوز، نەوزاد ھلۆری:
وەلاتیەکێ ناحیا شێلادزێ رابوویە ب درۆستکرنا خانیەکێ گەشتیاری ب دووراتیا زێدەتر ٧٥کم ل سەر سنورێ دناڤبەرا باکوور و باشوورێ کوردستانێ ل دەڤەرا نێروە و رێکان کو دەڤەرەکا تەمام مەترسی و شەرە دناڤبەرا پارتا کرێکارێن کوردستانێ و له‌شكرێ تورکیا.
ئازاد ئەحمەد محەمەد ئەمین ئاغا رێکانی خودانێ ئەوی خانی بۆ ئەڤرۆ نیوز گۆت” ئەز بەردەوام دچومە سەر مولک و زەڤیێن خوە ل گوندێ مازیێ يێ سەر ب دەڤەرا نێروە و رێکان کو ئێکە ژ دوورترین گوندێن دەڤەرێ و دکەڤیتە نێزیکێ سنوورێ باکوور و باشوورێ کوردستانێ و دەڤەرەک تمام مەترسیە ژ بەر شەری دناڤبەرا گەریلایێن پارتا کرێکارێن کوردستان و له‌شكر و فروکێن تورکیا ، بەلێ ل گەل ڤێ یەکێ ژی ئەز رابووم ب درۆستکرنا خانیەکى “.
زێدەتر گۆت” ئەو خانى ب شێوێ خانیەکێ گەشتیاری ھاتیە چێکرن و دکەڤیتە سەر پێپکا و ل سەر دارێ ، و پێکدھێت ژ ژۆرەکێ و لێنانگەە و دەستشوو و ئاڤ دەست و پیچەکا حەوشێ کو ل سەر رووبەرێ ١٢×١٠م و ب بلنداھیا ٣م ھاتیە چێکرن و نێزیکێ ١٠ ھزار دولار لێ ھاتینە مەزاختن و ب ئاسن و شێلمان و داری ھاتیە چێکرن”.
ناڤبری دیارکر ژی کو ژبەر شه‌رێن دناڤبەرا گه‌ريلايێن په‌كه‌كێ وله‌شكرێ توركى، ئەوی نھا ئه‌و خانيێ خوه ھێلایە و گۆت” هه‌كه چو مەترسی ل سەر خانی نەبان، ھەتا مرنێ دا تێدا ژیم ژ بەرکو ئەز خودان مولک و زەڤی مە و دا زەڤیێن خوە چینم و ل سەر ژیم و ب ژیانەک ئارام و خوه‌ش، ژبەرکو ئەڤ دەڤەر یا ئارام و خوه‌شە ژلايێ دەرونی ڤە ، بەلێ ھەبوونا شەر و ئالوزیێن ئەوان ھێزا چو تام و خوشی بۆمە نەھێلایە و نه‌شێن بچینە سەر مولک و زەڤیێن خوە “.
ئەڤرۆ نیوز، نەوزاد ھلۆری:
دوھی پارتا کرێکارێن کوردستانێ ھەرێما قەندیل ، ل بنارێ چیایێ قەندیل راگەھاند ، کو ئەڤ یەک ژی دبیتە ھەرێما پێنجێ ل دەڤەرێن چیایی ل سنوورێن ھەرێما کوردستانێ ژلایێ پەکەکێ ڤە دھێتە راگەھاندن ، چاڤدێر ژی وەسا دبینن کو ئەڤ یەک دێ بیتە بھانە بۆ تورکیا و عیراقێ کو زێدەتر بھێنە دناڤا ئاخا ھەرێما کوردستانێ دا و دەست ب ھێرشان بکەن.
پەکەکێ د راگەھاندنەکا ئاشکرا دا ب بەرھەڤبوونا ٣٠٠ کەساتیێن سیاسی ھەرێما قەندیل ل ناودەشت و سورد و قەلاتوکا و ماردوو راگەهاند و قۆناغا ددوڤ دا دێ ھەلبژاردنێن یەکەیێن کارگێری بۆ وان جھان ھێنە درۆستکرن.
ئێک ژ پشکدارێن کۆنگرەی یا ھەرێما قەندیلێ گوت” رێڤەبەریا ھەرێما قەندیل دێ وەکو رێڤەبەریا ھەرێما کوردستانێ بیت و رێزێ ل ھەموو قانوونان گریت و خەلکێ دەڤەرێن چیایی ب حەزا خوە دێ رێڤەبەریا دەڤەرێن خوە ھەلبژێرن”.
ھەر چەنده نھا پەیوەندیێن دناڤبەرا ھەرێما کوردستان و عیراقێ د ئالۆزن و تورکیا ژی یا رژدە کو هێرشێن خوە بۆ سەر پەکەکێ ل باکورێ عیراقێ و سووریێ زێدەتر بکەت، چاڤدێر وەسا ددەن دیارکرن کو ئەڤ پێنگاڤا پەکەکێ دێ بیتە ئه‌گه‌ر کو تورکیا و عیراق ژی زێدەتر بھێنە دناڤا ھەرێما کوردستانێ دا و بو وان ببیتە بھانە و دەست ب ھێرشان بکەن، د بەرامبەر دا چو مفایەک بۆ ھەرێما کوردستانێ نینە”.
چیایێن ھەرێما کوردستانێ بوینە جھـ و بارەگایێن پەکەکێ و چەندين بارەگا و جھێن مەشق و راھێنانێن پەکەکێ لێ ھاتینە درۆستکرن كو ئه‌ڤه ژى بوويه ئه‌گه‌ر ژیانا خەلکێ وان دەڤەران بکەڤیتە د مەترسیێ دا و جار جار ژی خەلکێ وان دەڤەران ببنە ئارمانجا فرۆکێن تورکیا و بھێنە کوشتن و زیانێن مه‌زن يێن مادی بگه‌هيته رەز و بیستان و چاندنا وان.
ئه‌ڤرۆنيوز:
دپه‌يامه‌كێ دا ب هه‌لكه‌فتا هاتنا جه‌ژنا ژدايكبوونا عيسايێ مه‌سيح، سه‌رۆك بارزانى ئه‌ڤرۆ دوشه‌مبى 25/12/2017 راگه‌هاند، هه‌بوونا وێ هژمارا مه‌زن يا ئاواره ولێقه‌وميان ژهه‌موو پێكهاتێن نه‌ته‌وى وئايينى يێ عيراقێ كو هاتينه هه‌رێما كوردستانێ، به‌لگێ بهايێ بلندێ پيكڤه‌ژيانێ يه دناڤ گه‌لێ مه‌دا وپێشمه‌رگه‌ى ب خوينا خوه به‌رگرى ژهه‌موو پێكهاتان كريه. دووپات ژى دكه‌ت كو كوردستان ژى به‌رده‌وام دێ مينيت په‌ناگه‌ه وپشته‌ڤانا خووشك وبرايێن كريستيان وهه‌موو پێكهاتێن دى.
سه‌رۆك بارزانى دپه‌ياما خوه دا دبێژيت” ب هه‌لكه‌فتا هاتنا جه‌ژنا ژدايكبوونا حه‌زره‌تا مه‌سيح (سلاڤێن خوه‌دێ لێ بن)، گه‌رمترين پيرۆزباهيان ئاراسته‌ى هه‌موو خووشك وبرايێن خوه‌شتڤى يێن كريستيان ل كوردستانێ وعيراقێ وجيهانێ دكه‌م وهيڤيا جه‌ژنه‌كا پر خوه‌شى وشادى بۆ دخوازم”.
بارزانى زيده‌تر دبێژيت” ل گه‌ل هاتنا تيرۆرستێن داعشێ، سه‌ر ومالێن پشكه‌كا مه‌زن يا خووشك وبرايێن مه يێن كريستيان كه‌فتنه به‌رمه‌ترسيێ ومال وحالێ خوه بجه هێلا وهاتن ده‌ڤه‌رين ئارام يێن دبن ده‌ستهه‌لاتا هه‌رێما كوردستانێ دا، پاشى هێزا پێشمه‌رگه‌ى شيا تيرۆرستان بشكێنيت وده‌ڤه‌رين كريستيانان ئازاد بكه‌ت، ل وان جهان ژگه‌فێن تيرۆرستان دوور بوون، پشكه‌ك ژئاواران زڤرين، به‌لێ مخابن پشتى 16 ئوكتۆبه‌رێ، جاره‌كا دى ژبه‌ر په‌لاماردانا ده‌شتا نه‌ينه‌وا ژلايێ هيزێن حه‌شدا شه‌عبى ڤه كريستيان تووشى ئاواره‌يێ بوونه ڤه”.
سه‌رۆك بارزانى دياركر” هه‌بوونا هزرا توندره‌ويێ وجوداكارى ئه‌ڤجا دبن هه‌ر ناڤه‌نيشانه‌كێ دابيت، گه‌فه‌كا جدى يه ل سه‌ر پێكڤه‌ژيانێ وئاسايش وئاراميێ، هه‌بوونا وێ هژمارا مه‌زن يا ئاواره ولێقه‌وميان ژهه‌موو پێكهاتێن نه‌ته‌وى وئايينى يێن عيراقێ كو هاتينه هه‌رێما كوردستانێ، به‌لگێ بهايێ بلند يێ پێكڤه‌ژيانێ يه دناڤ گه‌لێ مه دا وپێشمه‌رگه‌ى ب خوينا خوه به‌رگرى ژهه‌موو پێكهاتان كريه وكوردستان ژى به‌رده‌وام دێ مينيت په‌ناگه وپشته‌ڤانا خووشك وبرايێن كريستيان وهه‌موو پێكهاتێن دى”.
سه‌رۆك بارزانى دپه‌ياما خوه دا، كريستيان پشت راستكرن كو دكوردستانێ دا چو جاران جهێ هزرا تيرۆرێ وجوداهيا ئايينى وتائيفى نابيت وگۆت” ئه‌م هه‌موو دمرۆڤايه‌تيێ دا برا وهه‌ڤپشكين وچو هێز وهزره‌كا شه‌رخواز نه‌شێت برايينى وپێكڤه‌ژيانا مه تێكبده‌ت”.
ئه‌ڤرۆ نيوز:
ئه‌ندامه‌كێ په‌رله‌مانێ كوردستانێ ل سه‌ر فراكسيۆنا ئێكگرتوو ئيسلامى كوردستان راگه‌هاند كو نێچيرڤان بارزانى سه‌رۆكێ حوكمه‌تا هه‌رێما كوردستانێ گۆتيه وه‌زيرێن خوه كو دێ كێشا خانه‌نشينێن نه‌يێن قانوونى هێته چاره‌كرن و گۆت: “سووند يا خوارى كو دێ چاره كه‌ت”.
حاجى كاروان ئه‌ندامێ فراكسيۆنا ئێكگرتوو ئيسلامى كوردستان ل په‌رله‌مانێ كوردستانێ بۆ دوارۆژ گۆت: “كارتێكرنا فشارا ميديايى و جه‌ماوه‌رى ل سه‌ر حوكمه‌تا هه‌رێمێ نه‌بوويه، به‌لێ پشتى ڤه‌كێشانا ئێكگرتوو دێ كێشه بۆ حوكمه‌تا هه‌رێمێ دروست بن”.
ئه‌ڤى ئه‌ندامێ په‌رله‌مانێ كوردستانێ زێده‌تر گۆت: “هه‌كه ئێكگرتوو خوه ڤه‌كێشيت ژ روويێ ئيدارى ڤه يا باوه‌رپێكرى نابيت”.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو سوبه‌هى رۆژا سێشه‌مبى رێكه‌فتى 26ى كانوونا ئێكێ 2017 دهێته پێشبينيكرن ئه‌سمان ساهى بيت ل گه‌ل هنده‌ك هنده‌ك ئه‌ورێن كێم.
پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د نڤيساره‌كێ دا راگه‌هانديه كو ژ ئه گه‌رێ هاتنا فشارێن نزمێن ده‌ريا سپى ناڤه‌راست و هاتنا فشارێن بلندێن وه‌لاتێ ده‌ريا ناڤه‌راست ئه‌سمان دێ ساهى بيت ل گه‌ل هنده‌ك هنده‌ك ئه‌ورێن كێم.
پشكا پێشبينيان خۆيا ژى كريه كو نزمترين پلا گه‌رما پێشبينيكرى دێ 6 پله بيت و بلندترين پله ژى دێ 15 پله بيت.
هه‌ر ب گۆره‌ى ڤێ راپۆرتا رێڤه‌به‌ريا ناڤبرى له‌زاتيا باى دێ گه‌له‌ك زێده‌كه‌ت و ل هنده‌ك جاران دێ گه‌هيته 5 بۆ 10 كم بيت د ده‌مژمێره‌كێ دا و ماوێ ديتنێ ژى دێ 10كم بيت.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو د ماوێ 24 ده‌مژمێرێن بۆرى دا ل ويستگه‌هێن جودا يێن هه‌رێما كوردستانێ رێژێن جودا يێن باران بارينێ هاتينه تۆماركرن.
ب گۆره‌ى راپۆرتا رێڤه‌به‌ريا گشتى يا سه‌قاناسى و بيڤه‌له‌رزێ ل پارێزگه‌ها دهۆكێ د ئه‌ڤ ساله دا هه‌تا نوكه 55.7 ملم بارانێ بارينه و خشتێ هه‌موو ده‌ڤه‌ر و پارێزگه‌هێن هه‌رێمێ ژى ب ڤى ره‌نگێ ل خوارێ يه:
ئه‌ڤرۆ نيوز:
پاولۆ جێنتيلۆنى، سه‌رۆك وه‌زيرێن ئيتاليا، راگه‌هاند كو پرۆژه‌يه‌ك دايه په‌رله‌مانێ وه‌لاتێ خوه بۆ ڤه‌كێشانا له‌شكرێ خوه ژ عيراقێ.
د كۆنگره‌كێ رۆژنامه‌ڤانى دا، سه‌رۆك وه‌زيرێن ئيتاليا، ته‌كست ل سه‌ر وێ چه‌ندێ كر داعش ل عيراقێ ژ ناڤ چوويه، “به‌لێ گه‌فا تيرۆرێ هێشتا ژ ناڤ نه‌چوويه” ئاماژه بۆ وێ چه‌ندێ ژى كر كو ئه‌و له‌شكرێن وان يێن نوكه ل عيراقێ دێ بۆ ناجيريا هێنه ره‌وانه‌كرن ژ بوو ژناڤبرنا قاچاخچى و تيرۆرستێن وێ ده‌ڤه‌رێ.
پاولۆ جێنتيلۆنى گۆت: “سۆپاس بۆ وێ پشكداريا گرنگ و كاريگه‌ر يا ئيتاليا و ب ده‌ستڤه‌ئينانا ده‌سكه‌فتێن 2017ێ، داعش ژ ناڤ چوو، به‌لێ گه‌فا تيرۆرێ ژ ناڤ نه‌چوويه”.
گۆتژى: “پێدڤيه بزاڤێن مه ژ بوو ژ ناڤبرنا گه‌فێن تيرۆرێ و روو ب رووبوونا وان قاچاخچيێن بازرگانيێ ب مرۆڤان دكه‌ن ل ئه‌فريقيا د به‌رده‌وام بن. بۆ وێ مه‌ره‌مێ ژى هێزێن خوه دێ ژ عيراقێ ڤه‌گوهێزينه ناجيريا”.
دا زانين ژى كو ئه‌ڤه پرۆژه‌كێ حوكمه‌تێ يه و دێ ده‌ته په‌رله‌مانى دا كو بهێته په‌سه‌ندكرن، “مه‌ره‌م ژى پێ روو ب رووبوونا قاچاخچى و تيرۆرستانه ل ئه‌فريقيا”.
ئه‌ڤرۆ نيوز:
پشتى سه‌رۆكێ ئه‌مريكا داخوازا ڤه‌گوهاستنا بالوێزخانا خوه بۆ قودسێ كرى، سه‌رۆكێ وه‌لاتێ گواتيمالا جيمى موراليس ژى رۆژا ئێكشه‌مبى راگه‌هاند كو ئه‌و ژى دێ بالوێزخانا خوه ڤه‌گوهێزنه قودسێ.
بڕيارا سه‌رۆكێ وه‌لاتێ گۆتاتيمالا د ئاهه‌نگێن جه‌ژنا ژدايكبوونێ داهتن كو د ده‌مه‌كى دا ژى بوون، سێ رۆژان به‌رى وێ پتريا ئه‌ندامێن نه‌ته‌وێن ئێكگرتى بڕيارا وه‌لاتێ ئه‌مريكا بۆ ناساندنا قودسێ وه‌كو پايته‌ختێ ئسرائيل ره‌تكربوو، به‌لێ گواتيمالا ئێك ژ وان وه‌لاتان بوو يێن ل گه‌ل حه‌فت وه‌لاتێن دى ده‌نگ د به‌رژه‌وه‌ندا ئه‌مريكا دا دايى.
پشتى دانوستاندنا ل گه‌ل سه‌رۆك وه‌زيرێن ئسرائيل بنيامێن نه‌ته‌نياهۆ، موراليس ل سه‌ر لاپه‌رێ خوه يێ فه‌يسبۆكى نڤيسيه: “ئێك ژ گرنگترين بابه‌تێن دانوستاندن ل سه‌ر هاتيه كرن، ڤه‌گوهاستنا بالوێزخانا گواتيمالا بوو، ژ تل ئه‌بيب بۆ قودسێ”.
مورايس دبێژيت: “ژ به‌ر ڤێ چه‌ندێ ژى من دڤێت هوون بزانن كو من پێرابوونێن پێدڤى بۆ وه‌زاره‌تا ژ ده‌رڤه ده‌ركرينه كو هه‌ماهه‌نگيا پێدڤى بكه‌ن بۆ بجهئينانا ڤێ بڕيارێ”.
د هه‌مبه‌ر ڤێ چه‌ندێ دا، ئاخفتنكه‌رێ ب ناڤێ وه‌زاره‌تا ژ ده‌رڤه يا ئسرائيل ئيمانوێل نه‌حشۆن سۆپاسيا خوه بۆ گواتيمالا ل سه‌ر “ڤێ بڕيارا گرنگ” ديار كر و ل سه‌ر تويته‌رى نڤيسى: “نووچه‌كێ خۆشه و هه‌ڤالينيه‌كا راسته‌قينه‌يه”.
گواتيمالا دكه‌ڤيته سێگۆشا باكورى يا ئه‌مريكا ناڤه‌راست ل گه‌ل هه‌ردو وه‌لاتێن هندوراس و سلڤادۆر و پشته به‌ستنا وان ب ره‌نگه‌كێ ئێكسه‌ر ل سه‌ر وه‌لاتێ ئه‌مريكايه ژ به‌ر ره‌وشا وان يا خراب يا ئابوورى و هه‌بوونا گه‌نده‌ليێ د وان وه‌لاتان دا كو ئه‌مريكا سالانه هه‌ر وه‌لاته‌ك ژ ڤان 750 مليۆن دۆلاران وه‌كو هاريكارى دده‌تێ.
نيشاندان