ئەڤرۆ نیۆز،زنار تۆڤی:

دلاوەر ئاژگەیی نوونەرێ حوکمەتا هەڕێما کوردستانێ ل ئێکەتیا ئورۆپا دبێژیت:پشتی کو د ماوێ بوری دا گروپەک ژ پەرلەمانتارێن دۆستێن کوردستانێ نامەیەک ئاراستەی (فێدریکا مۆگەرینی) بەرپرسا سیاسەتا ئاسایشێ و دەرڤە یا ئێکەتیا ئورۆپا کری و تێدا داخواز ژ دارشتنا سیاسەتەکا هەڤسەنگی یا ئێکەتیا ئورۆپا ژێ کربوو بەرامبەر عێراقێ و هەرێما کوردستانێ،دیسا دیتنا رۆەکێ زێدەتر ژ ئێکەتیا ئورۆپا ژ لێک نێزیککرنا بەغدا و هەولێرێ و هەروەسا گرەنتی کرنا مافێن ھەرێما کوردستانێ ل چارچۆڤێ دستووری دا.

هەروەسا دلاوەری گوتیە:د پێنگاڤەکو نوودا، گروپەکێ پەرلەمانتارێن ئورۆپی،ژ هەموو فراکسیۆنێن پەرلەمانێ ئورۆپی، نامەیەک ئاڕاستەی حەیدەر عەبادی کریە و تێدا نیگەرانیا خۆ سەبارەت ب دانانا ئابلووقێ و داخستنا فرۆکخانان و کێمکرنا بەشە بودجێ هەرێما کوردستانێ د بودجێ عێراقێ دا دەربرینە،هەروەسا گوتیە، پەرلەمانتار دخوازن حوکمەتا عەبادی دانوستاندنێن ئەرێنی و بونیادنەر ل گەل حوکمەتا هەرێما کوردستانێ دەست پێبکەت،هەروەسا داخواز دکەن وەک نیەتەکا پاقژ حەیدەر عەبادی بەیاننامەکێ بەلاڤ بکەت و تێدا جەخت ل سەر کیانێ حوکمەتا هەرێما کوردستانێ بکەت،دیسا دلاوەر ئاژگەیی نوونەرێ حوکمەتا هەرێما کوردستانێ ل ئێکەتیا ئورۆپا سەرەرای پێشوازیکرنێ ل وێ ناما پەرلەمانتارێن ئورۆپی، راگەهاندیە کو د ماوێ بوریدا و ل چارچۆڤێ چالاکیان دا، بەردەوام کار ل سەر هندێ کریە کو پەرلەمانتارێن پەرلەمانێ ئێکەتیا ئورۆپا هەولێن خۆ بێخنە کار بۆ دروستکرنا فشاران ل سەر لایەنێ بریار بدەستێ ئێکەتیا ئورۆپا ژلایەکێ ڤە و ل سەر حوکمەتا فیدرالا عێراقێ ژ لایەکێ دیتر ڤە،دێ ھەولێن وان د بەردەوامبن بۆ ب دەستڤەئینانا پالپشتیا زێدەتر یا ئورۆپا بۆ ھەرێما کوردستانێ.

ئەڤرۆ نیۆز،زنار تۆڤی:

وەزارەتا بەرەڤانیا ئوسترالیا دوماهی هاتنا بەشداریکرنا وەلاتێ خۆ ل شەرێ دژی رێکخراوا تیرۆریستیا داعش ل عێراق و سووریێ راگەیاند.

ئەڤرۆ ئەینیێ 22/12/2017 ماریز باین وەزیرا بەرەڤانیا ئوسترالیا بۆ میدیایێن وەلاتێ خۆ راگەیاند،کو بریارا ڤەکێشانا وان ژ هەڤپەیمانیا نێڤدەولەتی ل دژی داعشێ،پشتی دانوستاندنێ بوویە ل گەل عێراقێ و هەڤپەیمانان.

ماریز باین هەروەسا دبێژیت، ئەرکێ ئوسترالیا ل شەرێ دژی داعشێ یێ ”درێژ و ب وەستیان بوو“،نوکە حوکمەتا وەلاتێ وێ بریار دایە کو شەش فرۆکێن خۆ ژ وێ هەڤپەیمانیێ ڤەگەرینیتە ئوسترالیا.

وەزیرا بەرگرییا ئوسترالیا ئاماژە ب هندێ ژی دایە،کو پشتی راگەهاندنا سەرکەفتنێ ب سەر داعشان دا ژلایێ حەیدەر عەبادی سەرۆک وەزیرێن عێراقێ ڤە، وان ئەڤ بریارە دایە.
هەر چەندە عەبادی داماهی هاتنا داعشێ راگەهاندیە، بەلێ نوکە چەکدارێن داعشێ ل سنوورێ پارێزگەهێن نەینەوا، دیالە و ئەنبار ماینە و ناڤبەین ناڤبەین گورزان ل هێز و میلیشیاتێن عێراقی ددەن.