ئەڤرۆ نيوز:
پشتی خوەنیشادانێن سەرێ سالێ کو د ئەنجام دا گەلەک کەس ل ئیرانێ ھاتنە کوشتن و ب سەدان کەسان ژی ھەتا نھا ل زیندانێ دانە خوەنیشادانان بەردەوام نەکرن و چاڤدێرێن سیاسی ژی چەند خالەکان وەکو ئەگەرێن سەرەکی یێن راگرتنا خوەنیشادانان دیار دکەن.
د ڤێ دەربارێ دا د. مەحمود خالدی مامۆستایێ زانکۆیێ ل رۆژھەلاتێ کوردستانێ دیار کر کو چەند خالێن گرنگ ھەنە کو ژ بەر ھندێ ژی خوەنیشادان ھاتنە راگرتن، یا یەکێ ئیرانێ ب ھەموو ھێزا خوە ھێرشی خەلکێ کر و گەلەک کەس ھاتنە کوشتن، تشتێ ئەز دزانم ھژمارا کوشتیان گەلەکێ زێدەیە لێ بەرپرسێن ئیرانێ راستیان بۆ رایا گشتی یا جیھانێ ئاشکرا ناکەن، یا دی ل ئیرانێ راگەھاندنا ئازاد نینە کو بەحسێ راستیان بۆ خەلکی بکەت، ژ بەر ھندێ ژی گەلەک تشت ناھێنە ئاشکرا کرن و گۆت: (خالا دی و یا گرنگ ژی خوەنیشادان رێکخستن کری نەبوون و چ ھێزەک ژی پشتەڤانی ل خوەنیشادەران نەدکر، ھەتا ئەز دشێم بێژم ئەمریکا و وەلاتێن ئورۆپی یێن کو رۆژانە دبێژن ئەم پشتەڤانیێ ل گەلێ ئیرانێ دکەین وان ژی پشتەڤانی نەکر، چونکو رژێما نھا یا ئیرانێ ب کریارێن خوە خزمەتا ئەمریکا و ئورۆپا دکەت و تنێ کەسێن کو دبنە قوربانی ژی گەلێن ئیرانێ نە).
ناڤبری ئەو یەک ژی دیار کر کو کوردان و گەلەک نەتەوێن دی رۆلەکا بەرچاڤ د ڤان خوەنیشادانان دا نەبوون، چونکو کوردان و نەتەوێن دی وەکو بەلۆچ کو نھا گەلەک زۆلم و زۆرداری ل وان دھێتە کرن نەدزانین کا دی ئەنجامێ خوەنیشادانان بەر ب کیڤە بچن، چونکو ئەوێن ب ناڤێ ئۆپۆزسیۆنا ئیرانێ ل ئەمریکا و ئورۆپا پتر ژ رژێما نھا یا ئیرانێ دژبەریا مافێ کوردان دکەن، ژ بەر ھندێ ژی کوردان چو ھێڤیەک ب ڤان خوەنیشادانان نەبوون و رۆلەکا لاواز گێران و ئەو یەک ژی ئەگەرەک گرنگ بوو کو خوەنیشادان پشتی دەمەکێ ھاتنە راگرتن.
چاڤدێرێن سیاسی ل ئیرانێ دیار دکەن کو ھەر چەندە نھا خوەنیشادان ھاتینە راگرتن لێ ئەو یەک رامانا ھندێ نادەت کو خەلکێ ئیرانێ گەھشتیە مافێ خوە و ئێدی خوەنیشادان ناھێنە کرن، چونکو نھا ل ئیرانێ رێژەکا مەزن یا خەلکی بێکارە، رەوشا ژیانا خەلکی ب گشتی خرابە و ئازادی ل ئیرانێ نینە، ژ بەر ھندێ ژی تاخێ گەنجان و ژن نھا ژی ب رەنگێن جودا جودا نەرازیبوونا خوە ل دژی سیستەمی نیشا ددەن و شۆرەشا دەرسۆکێ ل ئیرانێ کو ژن پێشەنگیا وێ دکەن بەردەوامە و ئەو یەک ژی نیشا ددەت کو ھەتا پرسگرێکێن سەرەکی یێن خەلکی نەھێنە چارەکرن رەنگە پشتی دەمەکێ دیسان خوەنیشادان ل ئیرانێ دەستپێ بکەن.
ئەڤرۆ نيوز:
عەبدولمەلیک حوسەینی، رێڤەبەرێ نڤیسینگەھا راگەھاندنا سەلیم جبووری، سەرۆکێ جڤاتا نوونەرێن عیراقێ راگەھاند” سەلیم جبووری حوکمەتا تورکیا ئاگادار کریە کو بەغدا یا بەرھەڤە بۆ ئەنجامدانا ئوپەراسیونا سەربازی دژی پارتا کرێکارێن کوردستانێ، ل دەڤەرێن چیایی یێن کوردستانێ و دەڤەرێن دی ھەڤکاریا ئەنقەرە بکەت”.
سەلیم جبووری ھەبوونا گەریلایێن پەکەکێ ل ئاخا عیراقێ رەت کریە کو ببیتە گەف بۆ سەر ئاسایشا دەڤەرێ.
ئەڤرۆ:
کۆمپانیا ھێلا ئاسمانی یا ئوردنی راگەھاند، دەستپێکا مەھا بھێت، دێ گەشتێن خوە یێن ئاسمانی بۆ فرۆکخانێن ھەرێما کوردستانێ دەستپێکەت.
کۆمپانیا ھێلا ئاسمانی یا ئوردنی بەلاڤکریە کو ئێکی مەھا 4 دێ گەشتێن ئاسمانی ژ فرۆکخانا عەمانا پایتەخت بۆ ھەردو فرۆکخانێن ھەولێر و سلێمانیێ دەستپێکەن و ھەفتیانە دێ 10 گەشت بۆ ھەولێرێ و 4 ژی بۆ سلێمانیێ ھەبن.
پشتی رێفراندۆمێ، حکومەتا ئیراقێ کۆمەکا سزا و دۆرپێچان دانانە سەر ھەرێما کوردستانێ و ئێک ژ وان ژی داخستنا فرۆکخانان بوو، بەلێ بەری چەند رۆژان جارەکا دی فرۆکخانە ھاتنە ڤەکرن.
ئه‌ڤرۆنيوز:
ئه‌ڤرۆ شه‌مبيێ 17/3/2018 ل قه‌زايێ چه‌مچه‌مال هێرش ل سه‌ر شاسوار عه‌بدولواحد هاته كرن وقايمقامێ وێ قه‌زايێ دياركر كو شاسوارى به‌رى هێرشكرنێ ب وان راگه‌هاندبوو كو ئه‌و پێدڤى هێزێن ئه‌منى نينه بۆ پاراستنا وى.
ره‌مه‌ك ره‌مه‌زان، قايمقامێ چه‌مچه‌مال راگه‌هاند” ئێڤاريا ئه‌ڤرۆ شه‌مبيێ، شاسوار عه‌بدولواحدى سميناره‌ك ل چه‌مچه‌مال ئه‌نجامدا، به‌لێ گرژى دناڤبه‌را به‌رهه‌ڤبوويان دا په‌يدابوو وشاسوارى سمينار راگرت”.
ناڤبرى زێده‌تر بۆ باسنيز گۆت” ئه‌و هه‌رده‌م هيزێن ئه‌منى دهنێرنه چالاكيێن ب وى شێوه‌ى، به‌لێ به‌رى سمينارێ شاسوارى قه‌بوول نه‌كر ئه‌م هيزێن ئه‌منى ب هنێرين وب مه راگه‌هاند كو وان پێدڤى ب هيزێن ئه‌منى نينه”.
ئاشكراكر ژى” خه‌لكى شاسوار وستافێ وى ئازار نه‌دانه، به‌لێ زيان گه‌هاندنه ترومبێلێن وان هومه هێزێن خوه هنارتن بۆ كونترۆلكرنا ره‌وشێ”.
ئه‌ڤرۆنيوز:
به‌رى نيڤرۆيا ئه‌ڤرۆ شه‌مبيێ 17/3/2018 ل گونده‌كێ قه‌زا پشده‌ر ژ ئه‌گه‌رێ لێدانا بريسيه‌كێ وه‌لاتيه‌كى گيانێ خوه ژده‌ستدا.
عوسمان محه‌مه‌د، جێگرێ رێڤه‌به‌رێ نه‌خوه‌شخانا شه‌هيدێن قه‌لادزێ دداخۆيانه‌كا رۆژنامه‌ڤانى دا راگه‌هاند” ئه‌ڤرۆ وه‌لاتيه‌كێ 63 سالى ژ گوندێ شينێ ل قه‌زا پشده‌ر هاته ڤه‌گۆهاستن بۆ نه‌خوه‌شخانا مه كو بارێ وى يێ ساخله‌ميێ دمه‌ترسيێ دابوو ژئه‌گه‌رێ لێدانا بريسيێ ده‌مێ دناڤ ره‌زێ خوه دا كاردكر “.
دياركر” ژ ئه‌گه‌رێ كاريگه‌ريا بريسيێ، پشتى نيڤ ده‌مژمێرێ ژ گه‌هاندنا وى بۆ نه‌خوه‌شخانێ، گيانێ خوه ژده‌ستدا”.
ئه‌ڤرۆنيوز:
ل گونده‌كێ سنورێ ناحيا رۆڤيا ل قه‌زا به‌رده‌ره‌ش، كه‌سه‌كى هه‌ڤژينا خوه وكۆرێ خوه كوشتن وبۆ جهه‌كێ نه‌ديار ژى ره‌ڤى.
قاسم عه‌بدولسه‌مه‌د، رێڤه‌به‌رێ ناحيا رۆڤيا راگه‌هاند” وه‌لاتيه‌كێ گوندێ ئيسماوا ل سنورێ ناحيا رۆڤيا ب ده‌ست درێژيا گوله‌يان هه‌ڤژين وكۆره‌كێ خوه كوشتن وبۆ جهه‌كێ نه‌ديار ره‌ڤى”.
قاسمى زێده‌تر بۆ رووداو دياركر” ژئه‌نجامێ شه‌ره‌ده‌ڤه‌كێ، وى وه‌لاتى گوله ئاراسته‌ى خێزانا خوه كرن ودئه‌نجامدا هه‌ڤژينا خوه وكۆره‌كێ خوه كوشتن وكۆره‌كێ دى ژى برينداركر”.
گۆت ژى” وى كه‌سى سێ هه‌ڤژين يێن هه‌ين، پۆليسێن رۆڤيا ژى ده‌ست ب ڤه‌كۆلينێ دوێ روودانێ دا كريه”.
ئەڤرۆ نیوز،نەوزاد هلوری:
وەلاتیەکێ قەزا زاخۆ داکو جهێ سەیرانێ ب دەست بکەڤیت ، هەر ژ نها جهەکێ تایبەت بۆ خوە دەستنیشانکریە ، ديار دكه‌ت ژى هه‌كه بەفر و باران و لەهی ژی دروست بن ئەو دێ هەر چیتە نەورۆزێ.
وەلات سالح، بۆ ئەڤرۆ نیوز گۆت” ل سەیرانگەها شیناڤا ل زاخۆ ل رۆژانێن نەورۆزێ گەلەک قەرەبالغە ، ژبەر ڤێ هەر ژ نها من جهەکێ تایبەت بۆ خوه بۆ نەورۆزێ دەستنیشانکریە”.
زێدەتر گۆت” من جهێ خوە ب دروستکرنا پەژانێن جوان و دانانا گولان و ب هەلدانا خیڤەتەکا تایبەت نەخشاندیە و هەرسێ رۆژێن نەورۆزێ دێ ل ڤی جهی مینم خوە هه‌كه بەفر و باران ولەهی ژی بهێن”.
گۆت ژى كو دەرکەفتن ل رۆژانێن نەورۆزێ تامەکا تایبەت و جودا ژ رۆژێن دى هەیە و نەورۆز رزگارکەرا کوردان بوویە وپێدڤیە گەلێ کوردستانێ ل ڤان رۆژان ب کەیف و خوه‌شی و ئازادێ سەیرانان بکەت.
ئه‌ڤرۆنيوز:
پشتى ب دووماهى هاتنا كۆمبوونا مه‌كته‌با سياسى يا ئێكه‌تيێ ل سلێمانيێ، په‌يڤدارێ وێ حزبێ ناڤێن ئه‌ندامێن مه‌كته‌با سياسى يا نوو واندن وهه‌ر ئێك ژ به‌رهه‌م سالح وئازاد جونديانى ونه‌جمه‌دين كه‌ريم هاتنه دوورخستن.
ئه‌ڤرۆ شه‌مبيێ 17/3/2018، سه‌عدى ئه‌حمه‌د پيره په‌يڤدارێ ئێكه‌تيێ دكۆنگره‌كێ رۆژنامه‌ڤانى دا دياركر كو كۆسره‌ت ره‌سول دێ ب ئه‌ركێ سكرتێرێ گشتيێ ئێكه‌تيێ رابيت تاكو ئه‌نجامدانا كۆنگره‌ى، ناڤێن ئه‌ندامێن مه‌كته‌با سياسى يا نوو يا ئێكه‌تيێ ژى خواندن كو ژ 15 كه‌سان پێكدهێن ئه‌وژى هه‌ر ئێك ژ، هيرۆ ئيبراهيم ئه‌حمه‌د ومه‌لا به‌ختيار وحاكم قادر وعومه‌ر فه‌تاح وشۆره‌ش ئيسماعيل ورفعه‌ت عه‌بدوللا وشێخ جه‌عفه‌ر وقادر عه‌زيز وعيماد ئه‌حمه‌د وئاسۆ ئه‌لمانى ورزگار عه‌لى وسه‌عدى ئه‌حمه‌د پيره ومه‌حموود سه‌نگاوى وعه‌دنان موفتى وئه‌رسه‌لان بايز.
ئەڤرۆ نیۆز، سالار دۆسكی:
بەرپرسێ پەیوەندی و راگەهاندنێ ل سەرۆكاتیا باژێرڤانیا دهۆكێ راگه‌هاند ، بەری هاتنا نەوروزێ دێ ب هەوا كومكرنا تایران رابن ژ بەر وێ چەندێ دا كەسەك تایرێن ئاگری نەسۆژیت و ژینگەه پیس نەبیت.
ئيسماعیل مستەفا بەرپرسێ پەیوەندی و راگەهاندنێ ل سەرۆكاتیا باژێرڤانیا دهۆكێ، بۆ ساخكرنا بیرەوەريێن ئادار ونه‌وروزێ لژنەك ل سەر ئاستێ پارێزگەها دهۆكێ هاتیە پێكئینان، سەرۆكاتیا باژێرڤانیا دهۆكێ، رێڤەبەریا گشتی یا رەوشەنبیری و هونەری و چەندین فەرمانگەهێن پەیوەندار ب وێ مەبەستێ ئەڤ بیرهاتنە بلند بهێنە نرخاندن.
مستەفای ئەو ژی ئاشكراكر كو بۆ جارا ئێكێ ئەڤ بیرهاتنە دێ ل پاركا ستی سەنتەر نافا سەنتەرێ بازاری دا هێتە ساخكرن كو ئەڤ جهە نێزیكی بیست هزار كەسان ب خوە ڤەدگریت، جهەكێ تایبەت بۆ ئاگر هەلكرێ هاتیە دروستكرن و رێورەسم دێ هێنە دەسپێكرن وێرێ.
بەرپرسێ پەیوەندى و راگەهاندنێ خویاكر كو هەر فەرمانگەهەك ل گۆرەی بسپوریا خوە دێ بكارێ خوە رابیت بۆ ساخكرنا ڤێ بیرەوەریێ وەكو سەرۆكاتیا باژێرڤانیا دهۆكێ دێ ب ئەركێ خەملاندنێ رابین و ئەڤە دێ ل جهێن بزاڤێن هونەری دهێنەكرن دێ هێته ئه‌نجامدان و دێ رێورەسمێن هه‌لكرنا ئاگری هێنە برێڤەبرن، دیسا مە پلانەك هەیە بۆ جهێن گەشتیاری وەكو چیایێ زاوە و پشت سكرێ دهۆكێ و گەلی كۆرتكێ هەوێن پاقژیێ بەری رۆژێن نەوروزێ دێ ل وان جهان هێنە دەسپێكرن ورۆژانە تیمێن بسپور سەر ب باژێرڤانیێ ڤە دێ وان جهان گەرن بۆ راكرنا بەرمایكێن وه‌لاتيان، پشتی ب دووماهی هاتنا جەژنا نەوروزێ دیسا دێ هەوێن پاقژكرنێ ده‌ستپێكه‌ن.
بەرپرسێ پەیوەندی و راگەهاندێ ئەو ژی گۆت: چونكى رێيا مووسل يا هاتیە ڤەكرن، پێشبینی دكەین ئەڤ سالە رێژا گەشتیاران بۆ پارێزگەها دهۆكێ زێدەتر لێ بهێت ژ سالێن بوری، لەوما جهێن گەشتیاری بەری و پشتی نەوروزێ دێ پاقژ هێنە راگرتن.
نيشاندان