ئه‌ڤرۆنيوز:
دچارچۆڤێ ياريێن گه‌را 19 ژ خۆلا عيراقێ يا پلا ناياب، ئه‌ڤرۆ سێشه‌مبى 13/3/2018 يانا زاخۆ مێهڤانداريا يانا ديوانيه كر وشيا سه‌ركه‌فتنه‌كا گرنگ ب ئه‌نجامێ دو گۆلان به‌رامبه‌رى گۆله‌كێ تۆمار بكه‌ت.
گۆلێن يانا زاخۆ ل خۆله‌كێن 53 و61 هاتنه تۆماركرن وگۆلا ئێكانه‌يا يانا ديوانيه ل خۆله‌كا 20 هاته تۆماركرن.
ب ڤى ئه‌نجامێ يانا زاخۆ ب كۆمكرنا 15 خالان ل رێزا 18 دهێت ل رێزبه‌ندا خۆلێ وديوانيه ل رێزا 16 دهێت.
ئه‌ڤرۆ نیوز، نه‌وزاد هلۆرى:
قوتابیه‌كا كچ ل رێزا 12ێ ئاماده‌یى ل شێلادزێ ، كو ب شێوه‌یێ ده‌ره‌كى دخواند، دوهى ئه‌نجامێن ئه‌زموونێن به‌رایى وه‌رگرتن ، به‌لێ ل شوونا نمره و ئه‌نجامێن وێژه‌یى ، نمرێن زانستى وه‌رگرتن.
تازیا جه‌لیل مزیرى، ئه‌و قوتابیا رێزا 12ێ و پشكا وێژه‌یى یه بۆ ئه‌ڤرۆ نیوز گۆت” پشتى چه‌ند رۆژێن بۆرى من پشكدارى د ئه‌زموونێن رێزا 12ێ یێن ده‌ره‌كى دا كرى و دوهى من ئه‌نجامێن خوه وه‌رگرتين ،به‌لێ ل شوونا كو ئه‌ز نمرێن وێژه‌یى وه‌ربگرم ، من نمرێن زانستى وه‌رگرتن”.
زێده‌تر گۆت” من پرسیارا رێڤه‌به‌ریا په‌روه‌ردا قه‌زا ئامێدیێ كر ، وان گوت دڤێت تو داوایه‌كێ بنڤیسى ئه‌م یان تو دڤێت بۆ رێڤه‌به‌ریا گشتى یا په‌روه‌ردا پارێزگه‌ها دهۆك ره‌وانه بكه‌ین ، داكو دووباره پێداچوونێ بكه‌ن بۆ چاره‌سه‌ركرنا ئه‌نجامێن ته”.
تازیایێ دیاركر ژى كو ئه‌و تووشى سه‌رسورمانێ بوویه ژ ئه‌نجامێن خوه و ئه‌وێ روتينا كو د ئه‌زموونان دا دهێته‌كرن و گۆت ” ب هه‌ر شێوازه‌كێ بیت پێدڤیه په‌روه‌رده و لایه‌نێن شوله‌ژێ ب هوورى كار ل سه‌ر ده‌فته‌رێن قوتابیان بكه‌ن، ژبه‌ركو هه‌ر شاشیه‌كا ئه‌و بكه‌ن چاره‌نڤیس و پاشه‌رۆژا قوتابیه‌كى تێكدده‌ن و هه‌موو وه‌ستيان و زه‌حمه‌تا وان به‌ر ئاڤێ دا دچیت)”.
ئه‌حمه‌د زوبێر، به‌رپرسێ راگه‌هاندنا رێڤه‌به‌ریا گشتى یا په‌روه‌ردا پارێزگه‌ها دهۆكێ بۆ ئه‌ڤرۆ نیوز گۆت” گه‌له‌ك جاران شاشیێن ته‌كنيكى د نمره‌یان دا روو دده‌ن و ئه‌ڤ یه‌ك ژى نورماله ، ئه‌ڤ قوتابیه دشێت سه‌ره‌دانا رێڤه‌به‌ریا گشتى یا په‌روه‌ردا پارێزگه‌ها دهۆكێ بكه‌ت و نه‌رازیبوونه‌كێ پێشكێش بكه‌ت و دێ پێداچوون د ئه‌نجامێن وێدا هێته‌كرن”.
ب گوره‌ى به‌لگه‌نامه‌یێن كو قوتابیا ناڤبرى وه‌رگرتین دیاردبیت كو نمرێن زانستى وه‌رگرتینه و ل سه‌ر پێناسا پشكداریا د ئه‌زموونان ژى دا نڤیسایه وێژه‌یى و تازیا د وه‌رگرتنا نمرێن شاش ژى دا شاهنسێ ده‌ربازبوونێ نه‌بوویه و ب زێده‌ترى چار وانه‌یان كه‌فتیه.
ئه‌ڤرۆ نیوز ، هلورى:
به‌رپرسێ ده‌زگه‌هێ پاراستنا ئالایێ كوردستانێ دیاركر كو ب هه‌لكه‌فتا بیره‌وه‌ریێن ئادار و نه‌وروزێ وان ئه‌ڤرۆ سێشه‌مبى 13/3/2018 بۆ جارا هه‌شتێ ئالایێ كوردستانێ ل كێلیا شه‌دا ل دهۆكێ نووژه‌نكر.
په‌هله‌وان شێخ مه‌مى ، به‌رپرسێ ده‌زگه‌هێ پاراستنا ئالایێ كوردستانێ بۆ ئه‌ڤرۆ نیوز گۆت”ل سالا 1999 ئالایێ كوردستانێ ل كێلیا شه‌دا هاتیه چێكرن كو به‌رى وى ده‌مى ئالایێ پارتى دیموكراتى كوردستان بۆ ، پاشى ژ ئالایێ پارتى هاته گوهۆرین بۆ ئالایێ كوردستانێ و ئه‌ڤه جارا هه‌شتێ یه ئالایێ كوردستانێ ژلایێ ده‌زگه‌هێ مه‌ڤه دهێته نووژه‌نكرن”.
زێده‌تر گۆت”ئالایێ كوردستانێ ل كێلیا شه‌دا بوويه سومبۆله‌كێ نه‌ته‌وى و نیشتمانى ل دهۆكێ و نێزیكێ 500 مه‌تران يێ بلنده و 12كم ژدوورڤه دهێته دیتن و ل ئه‌سمانى ژى ل سه‌ر هێلا ئه‌سمانى یا هاتنوچۆنا فروكان دهێته دیتن و ژبلى ئالایێ كوردستانێ ل سه‌ر كێلیا شه‌دايێ دێ هه‌موو ئه‌و ئالایێن كو ل سه‌ر دیوار و چیا و جهێن بلند هاتینه چێكرن جاره‌كا دى سه‌ر ژنوو هێنه نووژه‌نكرن ڤه”.
ئالایێ كوردستانێ ل سه‌ر كێلیا شه‌دا ب رووبه‌رێ 30×28م هاتیه چێكرن.
ئه‌ڤرۆنيوز:
پشتى ئه‌ڤرۆ سێشه‌مبى 13/3/2018 حه‌يده‌ر عه‌بادى سه‌رۆك وه‌زيرێن عيراقێ بريار داى ب ده‌ستپێكرنا گه‌شتێن نێڤده‌وله‌تى ل فرۆكخانێن هه‌رێما كوردستانێ، سه‌رۆك وه‌زيرێن هه‌رێما كوردستانێ پێشوازى ل وێ بريارێ كر.
نيچيرڤان بارزانى، سه‌رۆك وه‌زيرێن هه‌رێما كوردستانێ ئه‌ڤرۆ سێشه‌مبى دكۆنگره‌كێ رۆژنامه‌ڤانى دا راگه‌هاند” سوپاسيا سه‌رۆك وه‌زيرێن عيراقێ حه‌يده‌ر عه‌بادى دكه‌ين كو بريارا ده‌ستپێكرنا گه‌شتێن نێڤده‌وله‌تى ل فرۆكخانێن هه‌رێمێ داى”.
نێچيرڤان بارزانى گۆت ژى” ئه‌ڤه پێنگاڤا ئێكێ يه بۆ چاره‌كرنا هه‌موو كێشێن دى يێن هه‌رێمێ وبه‌غدا وكێشه تنێ فرۆكخانه وبودجه نينه، دخوازين هه‌موو كێشێن دى ژى چاره‌سه‌ر ببن”.
سه‌باره‌ت هنارتنا مووچێ فه‌رمانبه‌رێن هه‌رێما كوردستانێ، سه‌رۆك وه‌زيرێن هه‌رێمێ راگه‌هاند” وه‌لاتيێن هه‌رێما كوردستانێ وه‌لاتيێن عيراقى نه وپێدڤيه ل سه‌ر سه‌رۆك وه‌زيرێن عيراقێ مووچه‌ى بۆ دابين بكه‌ت وهيڤيدارين ئه‌و مووچێ دهنێريت بێ پاشكه‌فت بيت”.
نێچيرڤان بارزانى گۆت ژى” دبابه‌تێ بودجێ هه‌رێمێ دا، به‌غدا سته‌مه‌كا مه‌زن ل وه‌لاتيێن هه‌رێمێ كريه وپشكا هه‌رێمێ دپرۆژه قانوونا بودجێ 2018 دا گه‌له‌ك كێمتره ژ هه‌ژيبوونا هه‌رێمێ”.
دياركر ژى” دبوارێ ئه‌منى وتيرۆرى ژى دا، په‌يوه‌نديێن هه‌رێمێ وبه‌غدا به‌رده‌وامى يا هه‌ى ودوى چارچۆڤه‌ى دا، هه‌رێما كوردستانێ هژماره‌كا تيرۆرستێن داعشێ راده‌ستى حوكمه‌تا ناڤه‌ندى كرن”.
ئه‌ڤرۆنيوز:
حوكمه‌تا هه‌رێما كوردستانێ برياردا دو رۆژ بێهنڤه‌دانا فه‌رمى بيت ل هه‌موو داموده‌زگه‌هێن حوكمه‌تێ.
سه‌فين دزه‌يى، په‌يڤدارێ حوكمه‌تا هه‌رێما كوردستانێ راگه‌هاند” سوباهى چارشه‌مبى 14/3/2018 ب هه‌لكه‌فتا ساليادا ژدايكبوونا سه‌ركردێ نه‌ته‌وێ كورد مسته‌فا بارزانيێ نه‌مر، ل هه‌موو داموگه‌زگه‌هێن حوكمه‌تا هه‌رێما كوردستانێ دێ بێهنڤه‌دانا فه‌رمى بيت”.
سه‌فين دزه‌يى گۆت ژى” رۆژا پێنجه‌شمبى 15/3/2018 ژى دێ بيته بێهنڤه‌دان ل هه‌موو داموده‌زگه‌هێن هه‌رێما كوردستانێ”.
ئه‌ڤرۆنيوز:
ب مەرەما خوه ئامادەكرن ژبۆ هەلبژارتنێن داهاتی یێن جڤاتا نوونەرێن عيراقێ و مسوگەركرنا ب دەستخستنا دەنگێن خەلكی و سەرئێخستنا لیستا (184) یا پارتی دیموكراتی كوردستان، ئەڤرۆ سێشه‌مبى 13/3/2018 سەربەست تروانشی، بەرپرسێ لقێ ئێكێ پارتی سەرەدانا هەردو لژنێن ناوچێن ئازادی و ئالا كر.
د سەرەدانا خوه‌دا بۆ هەردو لژنێن ناڤهاتی، سەربەست تروانشی ئاماژە دا نووترین پێشهاتێن سیاسی ل سەر ئاستێ عيراقێ و هەرێما كوردستانێ و دیاركر كو هەلبژارتن تاكە رێيا چارەسەریا پتریا قەیران و كێشێن سیاسی یە ل هەر وەلاتەكێ دیموكراتی.
د كومبوونێن خوه‌دا ل گەل ستافێ هەردو لژنێن ئازادی و ئالا، بەرپرسێ لقێ ئێك دا زانین كو به‌رهه‌ڤيێن پێشوەخت شەنگستێ سەركەفتنێ یە د هەر كارەكی دا نەخاسمە د پروسێسا هەلبژارتنان دا و مسوگەركرنا سەركەفتنەكا مەزن.
سەربەست تروانشی دیاركر، چونا خەلكی بۆ بنگەهێن كۆمسیۆنێ و وەرگرتنا كارتا بایۆمەتری ئەركەكێ نشتیمانی یە و دهەمان دەم دا مافەكێ قانوونى یێ هەر وه‌لاتیەكی یە و بڤێ چەندێ خەلك دێ بشكدار بیت د سیاسەت و دەستهەلاتا وەلاتی دا و ژ كادرێن پارتی خواست هاندانا خەلكێ سنورێن خوه بكەن بۆ وەرگرتنا كارتا بایۆمەتری و كار ژبۆ ئاسانكاریان د رێيا خەلكی دا بكەن.
ئه‌ڤرۆ نیوز:
دۆنالد ترامپ، سه‌رۆكێ ئه‌مریكا بریار دا رێكس تیله‌رسۆن، وه‌زیرێ ده‌رڤه ژكار لاده‌ت ژبه‌ر ناكۆكیێن هه‌ردو ئالییان ل دۆر هنده‌ك مژارێن نێڤده‌وله‌تی.
ل گۆری زانیاریێن میدیا ئه‌مریكی ترامپی و تیله‌رسۆنی د مژارێن مینا ئیرانێ دا جیاوازییا بۆچوونان هه‌بوو و ناڤهاتی دێ مایك پۆمپیۆ، سه‌رۆكێ هه‌والگیرییا ئه‌مریكا سی ئای ئه‌ی ل شوونا تیله‌رسۆنی دانیت، جینا هاسپێل ژی كو جێگرا سی ئای ئه‌یه دێ بیته سه‌رۆكا وێ سازیێ كو دێ بيته ئێكه‌م جار ژنه‌ك وی پۆستی وه‌ربگریت.
ئه‌ڤرۆ نيوز:
رێڤه‌به‌ريا چاڤدێريا بازرگانى راگه‌هاند كو ئه‌ڤرۆ رێكه‌فتى 13ى ئادارا 2018ێ بهايێ دراڤى ل بازارێن پارێزگه‌ها دهۆكێ ب ڤى ره‌نگێ ل خوارێ يه:
| 1 دولارێ ئه‌مريكى | 1221 |
| 1 يۆرۆيێ ئه‌ورۆپى | 1490 |
| 1 ليرێ توركى | 320 |
بۆ وه‌رگرتنا نووترين پێزانينان ل سه‌ر ره‌وشا دراڤى ژماره “2” بۆ شورتكودێن “KOREK “2279 يان “Asiacell “4593 يان ژى ب ره‌نگه‌كێ به‌رده‌وام سه‌ره‌دانا مالپه‌رێ ئه‌ڤرۆ نيوز www.evronews.net بكه.
نيشاندان
