ئه‌ڤرۆ نيوز:

شانده‌كێ حوكمه‌تا هه‌رێما كوردستانێ ل گه‌ل سه‌رۆكاتيا په‌رله‌مانى يێ د كۆمبوونێ دا. حوكمه‌ت دێ پلانا نوو بۆ به‌لاڤكرنا مۆچه‌ى و كاودانێن سياسى و دارايى و ئابۆرى و كارگێرى و ب رێڤه‌برنێ ل هه‌رێما كوردستانێ بۆ په‌رله‌مانى به‌رچاڤ كه‌ت. ب گۆره‌ى پێزانينێن ل به‌ر ده‌ست ژى حه‌فتيا بهێت دێ ده‌ست ب به‌لاڤكرنا مووچه‌ى هێته‌ كرن.

 ئەڤرۆ نیوز، نەوزاد هلۆری:

ژ ئه‌گه‌را  قه‌یرانا دارایى و گیروبوونا موچه‌یان ، ئاڤه‌دانكرنا خانیان ژلایێ وه‌لاتیان ڤه‌ و پرۆژێن حوكمه‌تا هه‌رێمێ هاتینه‌ راگرتن ، خودانێ ئێك ژ كارگه‌هێن خیزى وحه‌صوى ل دێره‌لوكێ دیاركر كو كارێ وان 99% هاتیه‌ راگرتن و ئه‌ڤه‌ سه‌ره‌راى كو بهایێ وان كه‌ره‌ستان ب نیڤى بوویه‌.

سه‌میع سه‌دیق وه‌لاتیه‌كێ ده‌ڤه‌رێ یه‌ دیاركر كو ژبه‌ر قه‌یرانا دارایى و گیروبوونا موچه‌یان ئه‌و نكارن ده‌ست ب درۆستكرنا خانیێ خوه‌ بكه‌ن و بۆ ئه‌ڤرۆ نیوز گۆت” ئه‌ڤه‌ نێزیكێ چار سالایه‌ به‌رده‌وام بزاڤان دكه‌م كو خانیێ خوه‌ درۆست بكه‌م ، به‌لێ من‌ شیان نینن درۆست بكه‌م، ژ به‌ركو نه‌ كار هه‌یه‌ و نه‌ژى موچه‌ و رۆژ بۆ رۆژێ ره‌وشا كوردستانێ به‌ر ب خراپتر دچیت، و دنهادا هه‌كه‌ پاره‌ هه‌بان، مرۆڤى دشیا ب پاره‌‌كێ كێم خانیه‌كێ باش درۆست بكه‌ت، چونكى كه‌رستێن ئاڤاهیان ئه‌رزان بووینه‌ ب تایبه‌تى خيز وحه‌صو”.

شوكرى حه‌جى خودانێ ئێك ژ كارگه‌هێن خیزى وحه‌صويه‌ ل دێره‌لوكێ دیاركر كو كارێ وان 99% هه‌مبه‌ركرن ل گه‌ل  به‌رى قه‌یرانێ يێ كێمبووی‌ و بۆ ئه‌ڤرۆ نیوز گۆت” قه‌یرانا دارایى و گیرووبوونا موچه‌یان و راگرتنا پرۆژێن حوكمه‌تێ و درۆست نه‌كرنا خانیان ژلایێ وه‌لاتیان ڤه‌، بویه‌ ئه‌گه‌ر كو ئه‌م ژى كارێ خوه‌ رابگرین  و د نهادا رۆژانه‌ هه‌موویێ قه‌لابه‌كا خیزى وحه‌صوى ناهێته‌ فرۆتن”.

زێده‌تر گۆت” به‌رى نها قه‌لابا حه‌صوى ب 220 هزار دیناران دهاته‌ فرۆوتن و نها ب 150 هزار دیناران دهێته‌ فرۆتن، ديسا قه‌لابا خیزى به‌رى نها ب 245 هزار دیناران بوو، به‌لێ نها ب 160 هزار دینارایه‌ ، ئانكو بهایێ قه‌لابا خیزى وحه‌صوى بۆكێمتر ژ نیڤیێ هاتیه‌ خوار و هه‌ر ناهێته‌ فرۆتن”.

ل هه‌موو ده‌ڤه‌رێن كوردستانێ بهایێ خیزى وحه‌صوى ئه‌رزانتره‌ ژ ده‌ڤه‌را ئامێدیێ ، بۆ نموونه‌ قه‌لابا خیزى وحه‌صوى ل سنورێ به‌رده‌ره‌ش ب 60 هزار دینارایه‌ و ل رانیايێ ب 70 هزار دینارانه‌، به‌لێ ل سنورێ قه‌زا ئامێدیێ هێشتا ب 160 هزار دیناران و زێده‌تر دهێته‌ فرۆتن، دڤى واریدا شوكرى گۆت” ده‌ڤه‌را ئامێدیێ ئێكه‌ ژ ده‌ڤه‌رێن چیایى و ڤه‌گۆهاستنا خیزى وحه‌صوى ئاسته‌نگێن زۆر هه‌نه‌،  دیسان پتريا  كارگه‌هێن كو ل سنورێ ئامێدیێ كاردكه‌ن ب شێوه‌یێ هه‌ڤپشكى كاردكه‌ن ، ئه‌ڤه‌ سه‌ره‌راى كو سالانه‌ باجێ دده‌ن حوكمه‌تێ و دیسان بهایێ گازوایلێ و حه‌ق ده‌ستێ كرێكاران ژى به‌رامبه‌ر ده‌ڤه‌رێن دن گرانه‌، ئه‌ڤه‌ هه‌موو بووینه‌ ئه‌گه‌ر كو كارتێكرن ل بهایێ خیزى وحه‌صوى بهێته‌ كرن”.