ئەڤرۆ نیوز ، زنار تۆڤی:
وەسا بریاره ئەڤ شەڤە فراكسیۆنێن كوردستانی ل مالا سه‌رۆك كۆمارێ عێراق كۆم ببن و تێدا دوماهی بریار دەربارهی پرۆژه قانوونا بودجەی بده‌ن و دوماهی هه‌لویستێ خوە رابگه‌هینن،ژبەرکو كۆمبوونا هەر سێ سه‌رۆكاتیێن عێراقێ هیچ ئه‌نجامەک نه‌بوو،لەوما كورد دێ هه‌لویستی خوە دیار کەن.
عه‌ره‌فات كه‌ره‌م سه‌رۆكێ فراكسیۆنا پارتی دیموكراتی كوردستان ل په‌رله‌مانێ عێراقێ راگه‌هاندیە: کۆمبوونا دوهی یا په‌رله‌مانی 13مادە ژ پرۆژێ قانوونا بودجەی په‌سه‌ند كرینە و ل دووڤدا كۆمبوونا هه‌ر سێ سه‌رۆكاتیان یا بێ ئه‌نجام بوو،لەوما بریاره ئەڤ شەڤە ل سه‌ر داخوازیا سه‌رۆك كۆمارێ عێراقێ فراكسیۆنێن كوردستانی كۆم ببن و تێدا دێ هه‌لویستێ خوە دەربارەی پرۆژه قانوونا بودجەی ده‌ربرن و دێ دوماهی بریارا خوە ده‌ن، چونكی ده‌نگدانێ ده‌ست پێكریه و مە چو ده‌رفه‌ت نه‌مایه.
عه‌ره‌فات كه‌ره‌می گوتیە ژی، سوبەهی دێ په‌رله‌مان درێژیێ ب كۆمبوونا خوە ده‌ت بۆ هندێ کو پڕۆژه قانوونا بودجەی بهێته په‌سه‌ند کرن،لێ هەتاکو نوکە داخوازیێن کوردان ل به‌رچاڤ نەهاتینە وەرگرتن و نەهاتینە جێبه‌جێ کرن،لەوما ئەم ژی دێ هه‌لویستێ خوە ده‌ربرین.
هەروەسا سه‌رحان سلێڤانه‌یی ئه‌ندامێ لیژنا دارایی ل په‌رله‌مانێ عێراقێ گوتیە، كۆمبوونا سێ سه‌رۆكاتیێن عێراقێ ب پشکداریا پشکەک ژ ئه‌ندامێن لیژنا دارایی هاتیە ئه‌نجامدان،هیچ ئه‌نجامەک نه‌بوو، چونكی هیچ رێككه‌فتنەک نه‌هاتیە کرن و ب تنێ سه‌رۆك وه‌زیرێن عێراقێ سۆزەک دایە،کو ئه‌و ژی پشكا هه‌رێما كوردستانێ ژ شه‌ش ترلیۆنان بۆ حه‌فت ترلیۆنان زێدە بكەت،لێ ئه‌ڤێ ژی پێدڤی ب هندێ هه‌یه کو ب نڤێسین بێخیته ناڤ پرۆژه قانوونا بودجەی نه‌كو ب ئاخفتن و سۆزان بیت، چونكی پێشتر ژی،گەلەک سۆز داینە،لێ چو ژ وان جێبەجێ نەکرینە.
ئه‌ڤرۆ نیوز:
حه‌فت سالێن شه‌رێ ناڤخۆ ل سووریێ پرانییا باژێرێ حه‌له‌بێ كو ئێك ژ مه‌زنترین باژارێن رۆژهه‌لاتا ناڤین بوو وێران كر، لێ پشتی رژێما ئه‌سه‌دی ئه‌و باژێر ژ گرۆپێن ئۆپۆزسیۆنێ و توندره‌و كۆنترۆل كری، ژیان ب ره‌نگه‌كی ژ ره‌نگان ڤه‌گه‌ریایه.
پشتی رژێما سووریێ ل كانوونا ئێكێ یا 2016ێ كۆنترۆلكرنا حه‌له‌بێ راگه‌هاندی و ب هزاران كه‌س تێدا هاتینه كوشتن و هه‌تا نها 200 هزار ژ ئاوارێن حه‌له‌بێ ڤه‌گه‌ریانه رۆژهه‌لاتی وی باژاری كو ده‌مه‌كێ درێژ بن كۆنترۆلا گرۆپێن ئۆپۆزسیۆنێ بوو.
ئه‌ڤ وێنێن ل خارێ یێن ئه‌ڤرۆ نه ل باخچێ گشتی یێ سه‌ره‌كی ل حه‌له‌بێ.
ئامێدیێ، مه‌حمود نهێلى
ژ ئه‌نجامێ روودانه‌كا هاتن و چونێ ل سه‌ر رێكا ناڤبه‌را سه‌رسنك قه‌دش حه‌فت كه‌س بريندار دبن كو ژن زارۆك ژى دناڤ دا هه‌نه.
راید به‌یار ئیبراهیم ئه‌فسه‌رێ پولیسێن هاتن و چونێ ل ئامێدیێ بۆ ئه‌ڤرۆ نیوز دیار كر، كو ل ده‌مژمێر 6 ێ ئیڤاریا ئه‌ڤرۆ 3/3/2018 ئه‌ڤ روودانه دروست بوویه و گۆت: ( ئه‌ڤ روودانه ژ ئه‌نجامێ ژ ئه‌نجامێ لێكدانا دوو ترۆمبێلێن ژ جورێن قه‌مه‌ره دروست بوویه كو بوویه ئه‌گه‌رێ بریندار بوونا حه‌فت كه‌سان).
ناڤبرى ئه‌و یه‌ك ژى دیاركر كو ئێك ژ وان ترۆمبێلان ژن و زارۆ تێدا بوونه و یه‌كسه‌ر گه‌هاندینه نه‌خوشخانا هه‌وارهاتنا دهوكێ .
ناڤبرى داخاز ژى كر كو ل ده‌مێ باران و مژێ دا پێدڤیه شوفێر گه‌له‌ك یێن هشیار بن و له‌زاتیا خوه گه‌له‌ك كێمتر لێ بكه‌ن ژ رۆژێن خوه‌شى چونكه پرانیا روودانان ژ ئه‌نجامێ ته‌راتیا جاده‌یێ و هه‌روه‌سا مژێ دروست دبن.
ئەڤرۆ نیوز، نەوزاد هلۆری:
شەڤا بۆری وه‌لاتيه‌كێ خه‌لكێ قه‌سرۆكێ ژئاليێ چەند کەسێن نەنياس ڤه هاتە رەڤاندن و ئەڤرۆ ئه‌ينيێ 2/3/2018 بەری نیڤرۆ تەرمێ وی ل دەروروبه‌رێن قەسروكێ هاڤێتیە و رەڤینە و کوژمەکێ مه‌زن يێ پارێن وی ژی ل گەل خوە برینە.
ئیسکان رەمەزان، وەلاتیەکێ قەسروکێ یە ل دۆر روودانێ بۆ ئەڤرو نیوز گۆت” شەڤا بۆری هندەك کەسان پەیوەندى ب وەڵاتیەکێ قەسروکێ بناڤێ (خەلیل محەمەد) كر و دبێژنێ وەرە دوكانا خوە ڤەکە مە دڤێت هندەك پارێن خوە بگوهرین ژ بەرکو وی دوکانەکا گوهۆرینا پارەی هەبوو ، پشتی ئەو دچیتە دوکانا خوە ، ژلایێ وان کەسان ڤە دهێتە رەڤاندن و پاشى دکوژن ، ئەڤرۆ دەمژمێر 11ێ سپێدێ تەرمێ وی ل نێزیك قەسروکێ دهاڤێژن و خوە بەرزە دکەن”.
زێدەتر گوت” وان کەسان کوژمێ 30 هزار دۆلار ل گەل ترومبێلەکا پیکئاب ل گەل خوە بريه و ره‌ڤينه و هەتا نها چو پێزانين ل سەر وان کەسان نینن”.
هێمن سلێمان، په‌يڤدارێ رێڤه‌به‌ريا پۆليسێن پارێزگه‌ها دهۆكێ بۆ ئەڤرو نیوز گوت”هەتا نها چو پێزانين ل سەر روودانێ نەگەهشتینە مە ، بەلێ ئەم دێ دووڤچوونێ ل سەر کەین و پاشى هوورکارێن روودانێ بەرچاڤ کەین”.
ب گۆرەی ئاخڤتنێن وەلاتیێن دەڤەرێ، د ده‌مێ حه‌فت رۆژێن بۆری دا، سێ روودانێن كوشتنێ ل دەڤەرێ رووداینە.
ئه‌ڤرۆنيوز:
ژبه‌ر كاره‌كێ حوكمه‌تێ عيراقێ، نێزيكى 40 رۆژه كارێ رێڤه‌به‌ريێن كارتا نيشتمانى وناسنامه وناسناما بارێ شارستانى وپاسپۆرت ل هه‌رێما كوردستانێ وكه‌ركووكێ ژى يێ راوه‌ستاى.
عه‌ميد (غوفران سه‌ليم) رێڤه‌به‌رێ كارتا نيشتمانى ل پارێزگه‌ها هه‌ولێرێ راگه‌هاند” نێزيكى 40 رۆژه به‌غدا تۆر يا برى، ئه‌گه‌رێ راگرتنێ ژى ئه‌وبوو كو بۆرجێ مه ل گه‌ل بورجێ كۆمپانيا نه‌ورۆز تليكۆم يێ گريداى بوو، به‌لێ ل باژێرێ كه‌ركووكێ ئه‌و بورج ل ده‌مێ داگيركرنا باژيرێ يێ ژكاركه‌فتى”.
ناڤبرى زێده‌تر بۆ باسنيوز گۆت” رۆژا ئێكشه‌مبيا بهێت لژنه‌ك ژ به‌غدا دێ سه‌ره‌دانا هه‌ولێرێ كه‌ت ول گه‌ل وه‌زاره‌تا ڤه‌گۆهاستنێ وگه‌هاندنێ دانوستاندنان ل سه‌ر وى بابه‌تى كه‌ت ب مه‌ره‌ما ديتنا چاره‌كا گونجاى”.
ژبه‌ر راگرتنا وێ هێلێ، ده‌مێ 40 رۆژايه چو مامه‌له‌كا وه‌لاتيێن هه‌رێما كوردستانێ ل وان رێڤه‌به‌ريان نه‌هاتيه ب رێڤه‌برن.
ئه‌ڤرۆنيوز:
دبه‌ياننامه‌كێ دا وه‌زاره‌تا په‌ترۆلا عيراقێ ئاشكراكر كو جه‌بار لعێبى وه‌زيرێ په‌ترۆلا عيراقێ دچارچۆڤێ ديداره‌كێ دا ل گه‌ل جێگرێ سه‌رۆكێ كۆمپانيا (روس نه‌فت) يا رووسى، ئاماژه ب وێ چه‌ندێ كريه كو ده‌رگه‌هێن وه‌زاره‌تا په‌ترۆلا عيراقێ دڤه‌كرينه ل به‌رامبه‌ر كۆمپانيێن په‌ترۆلى يێن جيهانى بۆ پشكداريێ وهه‌ماهه‌نگيێ بۆ پێشڤه‌برنا كه‌رتێ په‌ترۆلى ل عيراقێ وبۆ به‌رهه‌ڤيا راكێشانا بۆريا په‌ترۆلى ودروستكرنا پالاوگه‌ه وپێشڤه‌برنا كه‌رتێ غازێ.
دوێ ديدارێ دا، لعێبى دياركر كو وه‌زاره‌تا په‌ترۆلا عيراقێ دخوازيت پێشبه‌رنا زێده‌تر دبوارێ په‌ترۆلێ دا بكه‌ت وگۆت” وه‌زاره‌تا په‌ترۆلى يا به‌رهه‌ڤه بۆ برنا په‌ترۆلا كه‌ركووكێ، ب رێككه‌فتن ل گه‌ل هه‌رێما كوردستانێ، ب رێيا راكێشانا بۆريێ بۆ به‌نده‌رێ جيهان يێ توركى په‌ترۆلێ ب هنێريت”.
ئه‌ڤرۆنيوز:
چه‌ندين رۆژه مالپه‌رێن ئه‌لكترۆنى مژوولى ده‌نگوباسێ نيشانيا هونه‌رمه‌ندێ عيراقى يێ ناڤدار كازم ساهرى نه ژ كچه‌كا تونسى ب ناڤێ ساره.
ئه‌و مالپه‌ر دياردكه‌ن كو كازم ساهرى به‌رى چه‌ند سالان ئه‌و كچا تونسى ل ئاهه‌نگه‌كا پێكئينانا هه‌ڤژينيێ ل له‌نده‌ن ديتبوو وپه‌يوه‌نديه‌كا هه‌ڤالينى دناڤبه‌را وان دا دروست په‌يداببوو وپاشى نيشانيا خوه كر، ئه‌ڤ چه‌نده ژدهێت پشتى 20 سالان ژ به‌ردانا كازم ساهر بۆ هه‌ڤژينا خوه ودايكا هه‌ردو كورێن خوه (ويسام وعومه‌ر).
كورێ كازم ساهرى، ويسام، ده‌نگوباسێ نيشانيا بابێ خوه ووێ كچا تونسى پشت راستكر .
ئه‌ڤرۆنيوز:
سترانبێژه‌كێ مللى ل ده‌مێ پشكداريێ دئاهه‌نگه‌كا خێزانى دا ب ته‌قا خوه‌شيێ ل سنورێ قه‌زا چه‌مچه‌مال گيانێ خوه ژده‌ست دده‌ت.
ل دره‌نگيا شه‌ڤا بۆرى، ل گونده‌كێ قه‌زا چه‌مچه‌مال ول ده‌مێ ب رێڤه‌چوونا ئاهه‌نگه‌كا خێزانى، ته‌قا خوه‌شيێ هاته كرن ودئه‌نجامدا گوله‌يه‌ك ب سينگێ سترانبێژێ مللى( محه‌مه‌د ته‌قته‌قى) دكه‌ڤيت وگيانێ خوه ژده‌ست دده‌ت.
ئه‌ڤرۆنيوز:
ژبه‌ر جهنه‌ئينانا داخوازيێن كوردان دپرۆژه قانوونا بودجا عيراقێ دا، سه‌رۆكێن فراكسيۆنێن كوردستانى ل جڤاتا نوونه‌رێن عيراقێ پێشنيازا ڤه‌كێشانا كوردان ب ئێكجارى ژ پرۆسا سياسى ل عيراقێ دكه‌ن.
ئه‌شواق جاف ئه‌نداما جڤاتا نوونه‌رين عيراقێ ژ فراكسيۆنا پارتى راگه‌هاند”ژبه‌ر بجهنه‌ئينانا داخوازيێن كوردان دپرۆژه قانوونا بودجا عيراقێ دا، سه‌رۆكێن فراكسيۆنێن كوردستانى ل جڤاتا نوونه‌ران پێشنيازه‌ك راراسته‌ى سه‌رۆك كۆمارێ عيراقێ كر سه‌باره‌ت ڤه‌كێشانا كوردان يا ئێكجارى ژ پرۆسا سياسى ل عيراقێ وئه‌ڤرۆ ژى هه‌موو سه‌رۆك فراكسيۆنێن كوردستانى ل به‌غدا دێ ل گه‌ل فوئاد مه‌عسووم سه‌رۆك كۆمارێ عيراقێ كۆمبن”.
دوهى پێنجشه‌مبى 1/3/2018، فراكسيۆنێن كوردستانى روونشتنا جڤاتا نوونه‌رێن عيراقێ بايكۆت كر كو ئه‌و روونشتنه يا تايبه‌ت بوو ب ده‌نگدانێ ل سه‌ر پرۆژێ قانوونا بودجا عيراقێ يا سالا 2018 وپشتى په‌سه‌ندكرنا 12 مادان ژ پرۆژێ وێ قانوونێ، ژبه‌ر تێكچوونا رێژه‌يا قانوونى يا په‌رله‌مانتاران، روونشتن بۆ سوباهى شه‌مبيێ 3/3/2018 هاته پاشخستن”.
ئه‌شواق جاف ل دۆر هه‌لويستێ سه‌ركردايه‌تيا سياسى يا كوردى ل به‌رامبه‌ر ئه‌گه‌رێ بجهنه‌ئينانا داخوازيێن كوردان دپرۆژه قانوونا بودجا عيراقێ دا، بۆ باسنيوزگۆت” مه گازنده ژ سه‌ركردايه‌تيا سياسى وبه‌رپرسێن حزبێن كوردستانى يا هه‌ى كو هه‌تا نوكه كۆم نه‌بووينه سه‌باره‌ت وى بابه‌تێ گرنگ وچاره‌نڤيسساز كو يێ گرێدايه ب ژيانا وه‌لاتيێن هه‌رێما كوردستانێ وپێدڤيه ب زووترين ده‌م به‌رپرسێن بلند يێن هه‌موو حزبێن كوردستانى كۆمببن وبرياره‌كێ بده‌ن وهه‌لويسته‌كى وه‌ربگرن”.
ئه‌شواقێ داخوازكر كو حزبێن سياسى يێن كوردى ناكۆكى وجياوازيا بيركرنا خوه وبابه‌تێ هه‌لبژارتنان لابده‌ن وب جدى كارى ل سه‌ر پرسا پشكا كوردستانێ دبودجا عيراقێ دا بكه‌ن.
نيشاندان