ئه‌ڤرۆ نيۆز:
رۆژناما (الأخبار) يا نێزيك ژ حزبوللا لوبنانى، به‌لاڤكر كو ئه‌ميندارێ گشتيێ رێكخراوا به‌در هادى عامرى دێ سه‌رۆكاتيا هه‌ڤپه‌يمانيا(مجاهين) كه‌ت كو ژ هه‌شت گرۆپێن حه‌شدا شه‌عبى پێك دهێت.
رۆژناما لوبنانى ئاماژه دا كو هه‌ر ئێك ژ (رێكخراوا به‌در، عه‌سائب ئه‌هلولحه‌ق، بزاڤا نوجه‌با، ره‌وتێ ريسالى وكه‌تائب جوندولئيمام) ديارترين گرۆپێن حه‌شدا شه‌عبى نه دناڤ وێ هه‌ڤپه‌يمانيێ دا ودبيت كه‌تائيب حزبوللا ژى بچيته دناڤدا.
به‌لاڤكر ژى كو هنده‌ك هێزێن سونى يێن هه‌ڤسۆز ل گه‌ل حه‌شدا شه‌عبى دێ چنه دناڤ هه‌ڤپه‌يمانيا ناڤبرى دا زيده‌بارى حه‌شدێن عه‌شائيرى ئه‌وين شه‌رِێ داعشێ كرى ل ده‌ڤه‌رێن رۆژئاڤايێ عيراقێ.
ل دووڤ وێ رۆژنامێ، مالكى يێ نێزيك بوو هه‌ڤپه‌يمانيێ ل گه‌ل (موجاهدين) بكه‌ت، به‌لێ دنوكه دا نه‌بووينه هه‌ڤپه‌يمان، به‌لێ ل دووڤ چه‌ندين ژێده‌رێن دناڤ هه‌ڤپه‌يمانيا( موجاهدين) دا، دێ مالكى وئه‌و هه‌ڤپه‌يمانيێ پشتى هه‌لبژارتنان گرێده‌ن.
ئاماژه كر، هه‌كه ڤێ هه‌ڤپه‌يمانيێ هه‌بوونه‌كا باش ل جڤاتا نوونه‌ران په‌يداكر، زێده‌بارى هه‌بوونا پشته‌ڤانيا ئيرانێ، وى ده‌مى دێ هادى عامرى به‌ربژار بيت بۆ سه‌رۆكاتيا وه‌زيران.
ل دووماهيێ رۆژناما لوبنانى پرسيار دكه‌ت، ئايا ئه‌مريكا دخوازيت سيناريۆيا نورى مالكى ل عيراقێ دووباره بيت؟
نيشاندان
