ئەڤرۆ نيوز:

ل گۆرەی وان داتایێن ئەڤرۆ ب دەستخۆڤە ئیناین، د ماوێ 30 رۆژێن بۆری دا، ل ‏پارێزگەھا دھۆکێ 1000 گەنجێن پارێزگەھا دھۆکێ و 500 خێزانان ب رێیا ‏رێکخراوێن نێڤدەولەتی ناڤێ خۆ بۆ چوونا دەرڤەی وەلاتی تۆمارکریە و 90% ژ وان ‏گەنجان ژی دبێ خێزانن.‏
ل پارێزگەھا دھۆکێ دوو جھێن ناڤ نڤیسینێ بۆ چوونا دەرڤەی وەلاتی ھەنە و بۆ ھەر ‏کەسەکی 16000 دۆلار دھێنە وەرگرتن و بۆ ھەر خێزانەکێ 32000 دۆلار دھێنە ‏وەرگرتن و ل بەرامبەر پێدڤیە ب گەرەنتی وی کەسی یان وێ خێزانێ بگەھیننە جھێ ‏پێدڤی ل وەلاتەکێ دەرڤە.‏
ل دووڤ پلانا وەلاتێ کەنەدا یا کۆچبەریێ، ژ سالا 2018 ھەتا سالا 2020، وەلاتێ ‏کەنەدا یێ بەرھەڤە 980 ھزار کەسان وەکو پەنابەر ل وەلاتێ خۆ وەربگرن و دێ بنە ‏ئاکنجیێن ھەردەمی یێن کەنەدا، ھەروەسا کەنەدا دێ 242 ھزار پەنابەران ب رێکا ‏پرۆگرامێ ئێکسپرێس وەگریت وەکو پەنابەرێن ئابووری بۆ کارکرنێ ل وەلاتێ کەنەدا، ‏ھەروەسا 184 ھزار پەنابەر دێ ب رێک پرۆگرامێ بەربژارێن پارێزگەھا ھێنە ‏وەرگرتن، ھەروەسا ب تنێ د سالا 2018 دا وەلاتێ کەنەدا بەرھەڤیا دکەت بۆ ‏وەرگرتنا 310 ھزار پەنابەران، ل سالا 2019 ژی دێ 330 ھزار پەنابەران ‏وەرگریت، ل سالا 2020 دێ 340 ھزار پەنابەران وەرگریت.‏
حسێن سەبری، رێڤەبەرێ پلێتێن ئاھێن خوارنێ ل پارێزگەھا دھۆکێ، بۆ ئەڤرۆ ‏راگەھاند، ھەر خێزانەکا بچیتە دەرڤەی وەلاتی، پێدڤیە سەرەدانا رێڤەبەریا مە ‏بکەت، بۆ ھندێ دا ئاھێن وان یێن خوارنێ ژێ بھێنە بڕین و گۆت: ل رێڤەبەریا مە ‏‏2500 خێزان ھەنە چوونە ژ دەرڤەی وەلاتی و ئاھێن وان یێن خوارنێ ھاتینە بڕین، ‏بەلێ پلێتێن وان یێن ئاھێن خوارنێ ماینە، ژ بۆ ھندێ دەمێ ڤەدگەرن بۆ ب رێڤەبرنا ‏مامەلان یان ژی دەنگدانا ھەلبژارتنان و ھەیڤانە بریکارێن ئاھێن خوارنێ مە ئاگەھدار ‏دکەن کو فلان خێزان چوویە دەرڤەی وەلاتی و ئاھێن خۆ یێن خوارنێ وەرناگرن. ‏
رێڤەبەرێ پلێتێن ئاھێن خوارنێ ل پارێزگەھا دھۆکێ ئەو یەک ژی ئاشکرا کر کو ب ‏تنێ د سالا 2017 دا و ھەتا نوکە مە 200 خێزان ھەنە ب ئێکجاری پلێتێن خۆ یێن ‏ئاھێن خوارنێ راگرتینە و چووینە دەرڤەی وەلاتی.‏
ژێدەرەکی ژ کۆمپانیا (کەنەدا تۆریزم) ل وەلاتێ کەنەدا دیارکر، ئەو ب رێکا دەعوێ ‏مامەلا بۆ ھاوولاتیێن ھەرێما کوردستانێ چێدکەن و پێشکێشی سەفارەتا کەنەدا دکەن ‏و وان شارەزاھیەکا باش یا ھەی ل سەر ڤیزێن کەنەدا، بەلێ ل سەر ڤێ ھەموویێ را ‏ئەم گرەنتیا ڤیزا کەنەدا نادەین، ژبەر کو ڤیزە د دەستێ مە دا نینە. ‏
ئەڤ کۆمپانیە، ئاگەھداریەکێ و ھۆشداریەکێ بۆ ئاکنجیێن ھەرێما کوردستانێ فرێ ‏دکەت و تێدا دبێژیت: (مە دڤێت ئاگەھداریا ھەوەیێن بەرێز بکەین کو ھەر کەسێ ‏بڤێت بگەھتە کەنەدا ھشیاڕ بن نوکە گەھشتنا کەنەدا گەلەک ب زەحمەتە. گەلەک ‏نڤێسێنگەھێن گەشت و گوزارێ ھوسا دیاردکەن کو دشێن ڤێزا کەنەدا پەیدا کەن، ئەم ‏یێ ل کەنەدا و چو راستی بۆ گۆتنا وان نینە، باوەر ژ خودێ بکەن وان تشتەک پێ ‏چێنابیت بکەن و نەشێن ڤیزا کەنەدا مسوگەڕ بکەن و راستی بۆ ئاخفتنا وان نینە ‏ئەڤجا د ھشیار بن).‏
ڤێ کۆمپانیێ زێدەتر ئاشکرا کریە (گەلەک پەیجێن فێسبوکێ ئاگەھداریا بەلاڤ دکەن ل ‏سەڕ گەھشتنا کەنەدا .. ئەم ھەوە پشت راست دکەین کو چ راستی تێدا نینە و کەس ‏ھوسا بسانەھی نەشێت بگەھتە کەنەدا. گەلەک خەلکێ سوریێ و عیراقێ ئەڤێن ب ‏درۆستی ئاوارەبوین و کەس وکارێن وان ھاتێنە کوشتن ئەڤە پتر ژ ٣ سالانە یێ ل ‏ترکیا و ئوردن و لۆبنان و ب رێکا رێکخراوا نەتەوێن ئێکگرتی ناڤێن خوە یێن ‏نڤێساین وھەتا نوکە ناڤێت وان نە دەرکەتینە و ئەو گەلەک د رەوشەکا نە باش دا ‏دژین).‏
کۆمپانیا (کەنەدا تۆریزم) ل وەلاتێ کەنەدا زێدەتر دبێژیت (مە دڤێت ووژدانا خوۆ ‏ئارام کەین کو ئەو نڤێسینگەھێن گەشت و گوزارێ و گەلەک پەیجێن فێسبوکێ ‏ئاگەھداریا ل سەڕ گەھشتنا کەنەدا بەلاڤ دکەن بۆ مسوگەرکرنا ڤیزا کەنەدا، بەلێ ‏ھوسا نینە، ب تنێ سەردابرنا خەلکی یە و خاپاندنە و نە زێدەتر. ھەر ھوسا دبێژینە ‏وان کەسێن قەیرانا کوردستانێ ب خوە بدەلیڤە دبینن).‏
‏——————-‏

حکوومەت شتلێن داران دچینیت و فەرمۆش دکەت

ل ناحیا شێلادزێ یا سەر ب قەزا ئامێدیێ ڤە شتلێن دارا دچینن و پشتی ھینگی ‏خزمەتێ بۆناکەن و ب رەنگەکێ باش نائاڤدەن و ناپارێزن و پرانیا وان ھشک دبن و ‏ژناڤ دچن.‏
ھەر سال ھەرێما کور دستانێ چەندین ھەوێن چاندنا شتلێن داران ژلایێ رێکخراو و ‏وەلاتیان و دام و دەزگەھێن حزبی و حکومی ب رەنگێن جیاواز دھێنە ئەنجام دان، ‏بەلێ ژبەر نە پاراستن و خزمەت نەکرنا وان ژناڤ دچن و نامینن.‏

شێلادزێ، ئێقبال عومەر: ‏
عەلی ئاغا بیری ئێک ژ وەلاتیێن ناحیا شێلادزێ یە بۆ ئەڤرۆ دیار کر، سالانە د ‏چالاکیێن جۆراو جۆر دا ھەوێن چاندنا شتلێن دارا دھێنە ئەنجام دان ژلایێ رێکخراو و ‏دامو دەزگەھێن حزبی و حکومی و وەلاتیان ڤە دھێنە ئەنجام دان، بەلێ پشتی وێ ‏ھەوێ خزمەتکرنێ ژبیر دکەن، ژ بەر ھندێ نیڤەکا وان شتلا ھشک دبن و دشکێن و ‏ئاژەل ژی خاردکەن و دخۆن، ژبەر نە پاراستن و خزمەت نەکرنێ ژناڤ دچن و نامینن.‏
گۆت ژی: پرانیا وان چالاکیێن بۆ شتل چاندنێ دھێنە ئەنجام دان بۆ خوە دەرئێخستن ‏و دیارکرنا رێکخراو و دەزگەھێن حزبی و حکومی یان کەسایەتی بۆ ھندێ یە کو بۆ ب ‏چالاکی بھێتە ھژمارتن و ئەنجام دان و قەبوولکرن، پشتی ھینگی گرنگیێ ب پاراستن ‏و چاڤدێرکرنا وان شتلێن دارا نادەن ژ بۆ ھندێ کو ژناڤ نەچن و ھشک نەبن، لایەنێن ‏پەیوەندیدار وەکو باژێرڤانی و گەشت و گوزار وەکو پێدڤی ناپارێزن و د کێم خەمن ژ ‏بۆ ئەرکێ پاراستنا وان ب ستویێ خوەڤە بگرن، ب ھەر ھێجەتەکا بیت خوە ب ‏ئاگەھدار نابینن و ھەماھەنگی یا کێمە بۆ وێ ھندێ کو ب کارێ خوە راببن.‏
ژلایێ خوە ڤە سەرۆکێ باژێرڤانیا شێلادزێ سەربەست حسێن ب وەکالەت بۆ رۆژناما ‏ئەڤرۆ گۆت: ل سالێن بۆری مە ھەوێن چاندنا داران دەستپێ دکر، مە چو بەرنامێن ‏تایبەت نەبوون بۆ سەرپەرشتیکرن و پێنگاڤێن پشتی چاندنێ، لەوما مە ب تنێ جە ‏دەستنیشان دکر و بێ کو گوە ل چو پرەنسیپ و ل جۆرێ شتلا یان تەمەن و بلندی و ‏نزمی یا شتلا کە ئایا دگەل کەش و ھەوایێ دەڤەرێ دێ گونجیت، شتل ھەما دچاندن ‏و ل دووماھیێ وەک پێدڤی خزمەت بۆ نەدھاتەکرن و پرانیا وان ھشک دبوون و ژناڤ ‏دچوون، چاندنا وان ژی گەلەک جاران یا بێ پلان بوو، ژ بەر کو ھەماھەنگی دگەل ‏رێڤەبەریا ئاڤێ و یا کارەبێ و کۆمپانیێن ئەنترنێت و تێلەفون و گەلەکێن دی د ‏ئاستەکێ باش دا نەبوون، چونکو گەلەک جاران شتلێن دارا دا ھێنە چاندن و پشتی ‏ھینگی ئێک ژ ڤان لایەنێن مە ناڤ لێ ئینای دا ئێن کارەکی ل ڤی جھێ شتل لێ چاندی ‏دا ئەنجام دەن ئێکسەر دا بیتە ئەگەرێ ھشک کرنا یا دەرئێخستنا ڤێ شتلا دارێ ژناڤ ‏ئاخێ.‏
زێدەتر گۆت ژی: د ڤی دەمی دا مە بەرنامە و پلانەکا باش و ستراتیجی مە یا دانای ‏کو ئاڤ دانا وان ب بوری کێشیبیت کو ب رەنگێ چپک چپک بھێنە ئاڤدان، نە ب ‏تانکەران و ھەر ژ گەلیێ بالنداتا کو شیف چنارکێ د ناڤ بەرا جوتسایدی دا دار بھێنە ‏چاندن ب رەنگەکێ جوان و ب رێکوپێک.‏
‏ ‏