ئەڤرۆ نیوز ، زنار تۆڤی :
مارین ئالسۆب ئەو مایسترۆیا ئه‌مریكی یە کو بۆ جارا ئێکێ وەک ژنەکا میوزیكژه‌ن،وەکو مایسترۆیا ئۆركێسترایێ دهێته ده‌سنیشانكرن.
ئالسۆب وه‌ك سه‌رۆكا ئۆركێسترایا رادیۆ یا سه‌مفۆنی ل ڤییه‌نا هاتە ده‌ستنیشانكرن و ب ڤێ بوونەیێ وێ راگه‌هاندیە:ئەز گەلەک یا دلخۆشم،کو وەک ئێکەمین ژن ببمه مایسترۆ،ئەز هیڤی خوازم ب ڤێ رێکێ درێژیێ ب هونه‌رێ خوە بده‌م.
ئه‌ڤرۆنيوز:
گرۆپا نوجه‌با يا سه‌ر ب حه‌شدا شه‌عبى ڤه گه‌فێن توند ل له‌شكرێ ئه‌مريكى ل عيراقێ دكه‌ت ودبێژيت، هه‌كه له‌شكرێ ئه‌مريكى خوه ژعيراقێ ڤه‌نه‌كێشيت دێ هێرشێ كه‌ينه سه‌ر.
ئه‌بو وارس موسه‌وى، په‌يڤدارێ گرۆپا نوجه‌با بۆ ئاژانسا ده‌نگوباسێن ئيرانى گۆت” هه‌كه ئه‌مريكا خوه ژ عيراقێ ڤه‌نه‌كێشيت، دێ به‌رسڤا مه چه‌ك بيت، چاوان مه ژبۆ سه‌روه‌ريا عيراقێ شه‌ركر، دێ جاره‌كادى ژى روو ب روويێ هێزێن بيانى بين هه‌كه بهێت ونيه‌تا داگيركرنێ هه‌بيت”.
موسه‌وى داخواز ژ حوكمه‌تا عيراقێ ووه‌زاره‌تا ده‌رڤه كر كو هه‌لويسته‌كێ رۆهن ونيشتمانى هه‌بيت به‌رامبه‌ر سه‌روه‌ريا ئاخا عيراقێ، ب تايبه‌ت به‌رامبه‌ر داخۆيانێن به‌رپرسێن ئه‌مريكا”.
گۆت ژى” هيڤيدارم حه‌يده‌ر عه‌بادى په‌يامه‌كا پشت راستكرى بده‌ته وه‌لاتيێن عيراقێ ل دۆر پرسا ڤه‌كێشانا هێزێن ئه‌مريكى ژ عيراقێ”.
ئه‌ڤرۆنيوز:
وه‌زاره‌تا چاندنێ ل عيراقێ، ئاشكراكر كو ژئه‌گه‌رێ كێمبوونا بارانان وئاڤێ، زيانێن عيراقێ ژهه‌ردو به‌رهه‌مێن گه‌نمى وجه‌هى يێن ه‌هشتينه 30% .
مه‌هدى ئه‌لقه‌يسى، بريكارێ وه‌زاره‌تا چاندنێ ل عيراقێ به‌لاڤكر” عيراق يا تووشى كێمبوونا رێژا ئاڤا ژرووبارێن وه‌لاتێن ده‌وروبه‌ر دهێت بووى كو دئه‌نجامدا زيانێن مه‌زن ژێ په‌يدابووينه، ب تايبه‌تى دكه‌رتێ چاندنێ دا”.
مه‌هدى زێده‌تر بۆ ميدل ئيست ئۆنلاين گۆت” زێده‌بارى كێمبوونا بێ وێنه يا بارانان كو ئه‌ڤه ب ده‌هان ساله عيراق تووشى ڤى حاله‌تێ كێم بارانيێ نه‌بووى”.
ده‌سته‌يا سه‌قاى يا عيراقێ ل رۆژا ئێكشه‌مبى 4/2/2018 راگه‌هاندبوو كو ئه‌و بارانێن ل ناڤه‌راست وباشوورێ عيراقێ بارين دهێنه هژمارتن كێمترين رێژه د 70 سالێن بۆرى دا هاتينه تۆماركرن.
بريكارێ وه‌زاره‌تا چاندنێ ل عيراقێ ئاماژه دا كو وه‌لاتێ وى 20% هه‌تا 30% ژ به‌رهه‌مێ گه‌نمى وجه‌هى يا ژده‌ستداى.
ئه‌ڤرۆنيوز:
ئه‌ندامه‌كێ مه‌كته‌با سياسى يا پارتى ديموكراتى كوردستان، راگه‌هاند، ب خوه‌شى بيت يان ب رێيه‌كا دى، دێ كارى بۆ وه‌رگرتنا كه‌ركووكێ كه‌ين.
كه‌مال كه‌ركووكێ، ئه‌ندامه‌كێ مه‌كته‌با سياسى يا پارتى ديموكراتى كوردستان، ئه‌ڤرۆ چارشه‌مبى 7/2/2018 ل سه‌نته‌رێ ره‌وشه‌نبيرى وجڤاكى يێ زانكۆيا سه‌لاحه‌دين ل هه‌ولێرێ، سميناره‌كا تايبه‌ت ل دۆر روودانێن 16 ئوكتۆبه‌را 2017 پێشكێش كر وئاماژه ب وێ چه‌ندێ كر، كو نوكه واقعه‌كێ سه‌پاندى يێ ل سه‌ر سه‌ر كه‌ركووكێ وخه‌لكێ وێ هه‌ى، به‌لێ مادێ 140 يێ دستوورێ عيراقى يێ به‌رده‌وام بۆ چاره‌كرنا كێشێن كه‌ركووكێ هاتيه دانان، ئه‌و ماده‌يه نه‌هاته بجهئينان، له‌وما بريارا ريفراندۆمێ هاته دان.
كه‌مال كه‌ركووكێ گۆت ژى”نوكه جڤاتا پارێزگه‌ها كه‌ركووكێ ژى كارێن خوه يێن راوه‌ستاندين وپارێزگه‌رێ وێ كو پارێزگه‌ره‌كێ شه‌رعى يه وب ده‌نگێ ئه‌ندامێن جڤاتا پارێزگه‌ها كه‌ركووكێ يێ بوويه پارێزگه‌ر، نوكه يێ هاتيه دوورخستن ژكارێ خوه، هه‌روه‌سا هه‌كه نوكه ب ده‌ست هێزێن ئه‌منى ل كه‌ركووكێ بكه‌ڤيت، دێ ده‌سته‌سه‌ركه‌ن، له‌وما كه‌ركووكێ پشتى 16 ئوكتۆبه‌رێ يا داگيركريه”.
وى ئه‌ندامێ مه‌كته‌با سياسى يا پارتى گۆت ژى” داخوازيا مه ژلايه‌نێن كوردستانى يێن دى ئه‌وه ب هه‌موو شێوه‌كى پايكۆتا پرۆسا سياسى ل كه‌ركووكێ بكه‌ن، نه‌كو پارتى ب تنێ ومه قوربانيێن مه‌زن بۆ كه‌ركووكێ داينه وئه‌م وه‌كو سومبوول سه‌حدكه‌ينه كه‌ركووكێ ومه بزاڤ كريه ناسناما وى باژێرى كوردستانى بيت ودشێين دووپات بكه‌ين كو كه‌ركووك يا كوردستانى يه وقوربانيه‌كا مه‌زن ژى يا بوويه هاتيه دان ودپشت راستين ئه‌و ره‌وشا نوكه هه‌ى ب وى شێوه‌ى نامينيت، ئێدى ب خوه‌شى بيت يان ب رێيه‌كا دى بيت، هه‌كه نه ب پشت راستى ڤه رێيه‌كا دى دێ گرينه به‌ر بۆ وه‌رگرتنا كه‌ركووكێ”.
ئەڤرۆ نیوز ، زنار تۆڤی :
بەرپرسێ لیژنا ناڤچەیا پارتی دیموکراتی کوردستان ل خورماتوو راگەهاند،میلیشیاتێن حەشدا شەعبی،زالگەهەک و چەند گوندەکێن سنوورێ باژێرکێ زینانە یێ سەر ب کفری ڤە داگیر کرن،هەڤدەم گرووپێ خیانەتکارێ 16 ئۆکتۆبەرێ ب ئەڤێ پلانێ ژی دهێنە تۆمەتبارکرن کو وان ئەو دەڤەری ”فرۆشتینە“.
ئەڤرۆ چارشەمبی 7/2/2018، ئەرسەلان عەلی، بەرپرسێ لیژنا ناڤچەیا پارتی دیموکراتی کوردستان ل خورماتوو راگەهاند:پشتی ئۆپەراسیۆنا میلیشیاتێن حەشدا شەعبی بۆ سەر سنورێ باژێرکێ زینانە یێ سەر ب کفری ڤە،وان میلیشیاتان زالگەها چاریانا (نەوجوول) داگیر کریە،کو دکەڤیتە ناڤەراستا ناڤچەیا داودە و پاشی چووینە بنگەهێ ساخلەمیا نەوجوول و چەند پاسەوانێن وی بنگەهی رەڤاندینە.
هەروەسا گوتیە، میلیشیاتێن حەشدێ چەند گوندەکێن سنوورێ داودە یێ داگیر کرینە،دیسا هژمارەیەکا پێشمەرگەیان کو سەر ب لاهوور جەنگی ڤەنە،دناڤا قوتابخانا گوندێ دوراجی دانە یێ سەر ب باژێرکێ زینانە ڤە.
دەربارەی رادەستکرنا وێ دەڤەرا بەرفرەه بۆ میلیشیاتێن حەشدا شەعبی،ل تۆرێن کۆمەڵایەتی رەخنەیێن زۆر ئاراستەی گرووپێ خیانەتکارێ 16 ئۆکتۆبەرێ هاتینە کرن.
ئەڤرۆ نیۆز ، سەباح زۆهێر:
هژمارەکا خۆبەخشان ل ساخلەمیا قەزا ئاکرێ ل هەر دوو نەخۆشخانێن(تەنگاڤی و گۆلان) چەندین سالە خۆبەش کاردکەن و داخازێ ژ حکومەتا هەرێمێ دکەن کۆ خەمەکێ ژێ بخۆن و وان دابمەزرینن چونکی دەمەکێ درێژە وەک خۆبەخش کاردکەن.
جەمال زێباری ئێک ژ وان خۆبەخشانە کۆ ل نەخۆشخانا گۆلان ماوەکێ درێژە وەک خۆبەخش کاردکەت دیاردکەت کۆ هژمارە گەنجێن خۆبەش ل قەزا ئاکرێ هەنە کۆ ئەڤە چەند سالە کاردکەن و هندەک ژی ژ نۆ هاتینە کۆ ب شێوەکێ دروست ئەم کارێ خۆ دکەین دناڤ نەخۆشخانادا،لێ ئەڤ خۆبەخشی یە گەلەک درێژبوو ژبەر هندێ ئەم وەک خۆبەخش داخازێ ژ حکومەتێ دکەین کۆ مە بکەنە گرێبەست یان هەمیشەیی.
گۆت مە وەکۆ خوبەخشان واژو کومرینە و داخازێ گەهینن جهێن بلند هیڤیا مە ئەوە کۆ حکومەت ل دووڤ داخازیا مە گەنجان بهێت،ئەڤ دمەزراندنە ژی مافێ مەیە و دڤێت ئەم نەهێینە ژبیرکرن.
ئه‌ڤرۆ نیوز، نه‌وزاد هلۆرى:
قه‌یرانا دارایى و گیروبوونا موچه‌یان بوویه ئه‌گه‌ر كو وه‌لاتى جاره‌كا دى ده‌ست ب خودانكرنا ته‌رش و كه‌والى بكه‌ن و داهاتیه‌كێ ب رێیا فرۆتنا به‌رهه‌مێن وان ب ده‌ستخوه‌ڤه بینن، وه‌لاتیه‌كێ عه‌ره‌ب كو نها وه‌كو شڤان ل دێره‌لوكێ كاردكه‌ت دیاركر كو ئه‌و خوه فێرى زمانێ كوردى دكه‌ت داكو زێده‌تر بشێت ل گه‌ل خودانێ ته‌رش و كه‌والى كار بكه‌ت.
حه‌مدو عیاده، شڤانه‌كێ عه‌ره‌به و ل گوندێ گوهه‌رزێ یا سه‌ر ب ناحیا دێرۆكێ ڤه وه‌كو شڤان ل به‌ر ته‌ش و كه‌والێ یه بۆ ئه‌ڤرۆ نیوز گۆت” ئه‌ز ل گونده‌كێ سه‌ر ب مووسلێ ڤه هاتیمه كه‌مپه‌كا ئاواران پاشى ل كه‌مپا ئاواران هاتیمه گوندێ گوهه‌رزێ و كارێ شڤانیێ دكه‌م وبۆ من ل ڤێره و كوردستانێ گه‌له‌ك خوه‌شه و هندى خودانێ په‌زێ بهێلیت، ئه‌ز دێ ل ڤێره ل سه‌ر كارێ خوه به‌دره‌وام بم”.
زێده‌تر گۆت” ژ روویێ زمانێ ڤه هنده‌ك كێشه هه‌نه ، به‌لێ ئه‌ز خوه فێرى زمانێ كوردى دكه‌م و نها هێدى هێدى فێر دبم”.
مێهڤان نهێلى خودانێ ته‌رش كه‌والێ ل ده‌ڤه‌رێ بۆ ئه‌ڤرۆ نیوز گۆت” قه‌یرانا دارایى بوویه ئه‌گه‌ر كو ئه‌م دووباره ڤه‌گه‌رینه خودانكرنا ته‌رش و كه‌والى و ده‌ڤه‌را مه ئێكه ژ وان ده‌ڤه‌رێن كو سرۆشته‌كێ باش هه‌یه بۆ ب خودانكرنا ته‌رش و كه‌والى و ئه‌م ل وه‌رزێ بوهارێ به‌رهه‌مێن سپیاتیێن ته‌رش و كه‌والى دفرۆشین كو داخوازیێن زور ل سه‌ر هه‌یه و ئه‌م كیلۆیێ ب دو هزار دیناران دفرۆشین و ل وه‌رزێن دى ژى ئه‌م كاڤركان دفرۆشین ب تایبه‌تى د جه‌ژنا قوربانێ دا گه‌له‌ك خه‌لك دكریت”.
گۆت ژى” نه‌بوونا ئاڤێ بوویه كێشه كو كاروبارێن مه وه‌كو پێدڤى ب رێڤه نه‌چن و نه‌چارین كو ب تانكان ، ئاڤێ بۆ ته‌رش و كه‌والێ خوه دابین بكه‌ین”.
ئه‌ڤرۆنيوز:
مالپه‌ره‌كێ جيهانى يێ تايبه‌ت ب سه‌قاى ڤه، به‌لاڤكر كو پێله‌كا باران بارينى دێ هه‌موو پارێزگه‌هێن هه‌رێما كوردستانێ ڤه‌گريت ودێ بۆ ده‌مێ هه‌فتيه‌كێ به‌رده‌وامبيت.
مالپه‌رێ (accuweather) يێ ئه‌مريكى كو مالپه‌ره‌كێ تايبه‌ته ب سه‌قاى ڤه، ئاماژه كريه كو ل رۆژێ دوشه‌مبيا بهێت 12/2/2018، پێله‌كا باران بارينێ دێ هه‌موو پارێزگه‌هێن هه‌رێما كوردستانێ ڤه‌گريت.
دياركريه ژى كو پشتى ب دووماهى هاتنا وێ پێلا بارانێ، بۆ ده‌مێ چه‌ند رۆژان دێ ئه‌سمان ساهى بيت وپاشى بۆ ده‌مێ چه‌ند رۆژان دێ باران بيت، هه‌روه‌سا ل ده‌مێ ده‌ستپێكرنا پێلا بارانێ، پلێن گه‌رمێ ب رێژه‌كا كێم دێ هێنه خوار.
هه‌روه‌سا مالپه‌رێ (ياهوو) يێ ئه‌مريكى ژى ئاماژه ب وێ چه‌ندێ كريه كو ل رۆژا دوشه‌مبيا داهاتى، پێله‌كا باران بارينێ دێ هه‌رێما كوردستانێ ڤه‌گريت ب ڤى شێوه‌ى:
ئه‌ڤرۆنيوز:
سه‌رۆك وه‌زيرێن هه‌رێما كوردستانێ، نێچيرڤان بارزانى، ره‌تكر حوكمه‌تا عيراقێ پاره بۆ به‌لاڤكرنا مووچێ فه‌رمانبه‌رێن هه‌رێما كوردستانێ هنارتبيت.
نێچيرڤان بارزانى، سه‌رۆك وه‌زيرێن هه‌رێما كوردستانێ دكۆنگره‌كێ رۆژنامه‌ڤانێدا پشتى ب دووماهى هاتنا كۆمبوونا هه‌ڤپشك دناڤبه‌را سه‌رۆكاتيا په‌رله‌مانى وحوكمه‌تێ وكۆمسيۆنا هه‌لبژارتنان، ره‌تكر پاره ژلايێ حوكمه‌تا عيراقێ بۆ هه‌رێما كوردستانێ هنارتبيت.
رۆهنكر ژى”به‌نكا ناڤه‌ندى يا عيراقێ هنده‌ك پاره خستينه دلقێ خوه‌دا ل هه‌ولێرێ”.
گۆت ژى” چو پاره بۆ مووچێ فه‌رمانبه‌رێن هه‌رێما كوردستانێ بۆ هه‌ولێرێ وچو باژێره‌كى دى نه‌هاتيه”.
ئه‌ڤرۆنيوز:
ل دووڤ نڤيساره‌كا پشكا په‌يوه‌نديێن توركيا ل فه‌رمانگه‌ها په‌يوه‌نديێن ده‌رڤه يێن حوكمه‌تا هه‌رێما كوردستانێ، ئاماژه ب ئاسانكاريا بۆ دانا ڤيزا توركيا ب هاولاتيێن هه‌رێما كوردستانێ دكه‌ت.
دوێ نڤيسارێ دا هاتيه” پشتى كۆمبوونا مه ل گه‌ل هاريكارێ كونسۆلێ گشتيێ توركيا، سه‌باره‌ت ب ئاسانكاريێن دانا ڤيزا توركيا، ئه‌م ئاگه‌هداركرين كو ميكانيزمه‌كا پێدڤيه هاتيه دانان بۆ دابينكرنا ڤيزا توركيا، هه‌موو وه‌لاتى دشێن ب ساناهى ڤيزێ وه‌رگرن، بێ پشتگيريا فه‌رمانگه‌ها په‌يوه‌نديێن ده‌رڤه”.
فه‌رمانگه‌ها په‌يوه‌نديێن ده‌رڤه دووپات كريه كو پێشتر ڤيزا توركيا تنێ ئاسانكارى بۆ شاندێن فه‌رمى وبه‌رپرسێن بلند يێن حوكمه‌تێ ونه‌خوه‌شيێن ب زه‌حمه‌ت دهاته دان، به‌لێ نوكه بۆ هه‌موو هاولاتيان ئاسانكارى دهێنه كرن.
دياركر گر ژى كو گوهۆرين ب سه‌ر رێيێن پێدانا ڤيزا توركيا بۆ وه‌لاتيێن هه‌رێما كوردستانێ هاتينه، ب جۆره‌كى هه‌موو وه‌لاتى دشێن ب ساناهى ڤيزێ وه‌رگرن.
رۆهنكر ژى، بۆ بده‌ستڤه‌ئينانا ڤيزا توركى، وه‌لاتى دشێن ل سه‌نته‌رێ ڤيزا ل گۆلان تاوه‌ر (سه‌نته‌رێ بازرگانيێ جيهانى) داخوازى ومامه‌لێن خوه پێشكێش بكه‌ن وپێدڤى ب وێ چه‌ندێ ناكه‌ت ئه‌و مامه‌له ب رێيا فه‌رمانگه‌ها په‌يوه‌نديێن ده‌رڤه بهێته‌كرن.
جڤاتا وه‌زيرێن هه‌رێما كوردستانێ ب نڤيساره‌كێ ل 14/1/2018، ئه‌ڤ نڤيسارا فه‌رمانگه‌ها په‌يوه‌نديێن ده‌رڤه بۆ هه‌موو وه‌زاره‌ت وفه‌رمانگه‌هان هنارتيه، بۆ ئاگه‌هداربوون وكاركرنێ ب وێ.
نيشاندان