ئه‌ڤرۆنيوز، نه‌وزاد هلۆرى:
كۆچكا شاه (فه‌يسه‌لێ دويێ) دووماهى شاهێ عيراقێ، كو دكه‌ڤيته ناحیا سه‌رسنكێ، چه‌ندین بریار و كۆمبوونێن گرنگ و چاره‌نڤیسازێن عیراقێ لێ ده‌رچووینه ، زێده‌بارى كو هژماره‌كا شاه و سه‌رۆك و سه‌ركرده‌یێن عه‌ره‌بى و بیانى و كوردى سه‌ره‌دانا وێ كریه.
محه‌مه‌د نه‌زیف عه‌لى كو ئێكه ژ نڤیسكارێن سه‌رسنكێ و په‌رتۆكه‌كا تایبه‌ت ل سه‌ر هاڤینگه‌هێن ده‌ڤه‌رێ چێكریه و به‌حس ل كۆچكا شاهێ عيراقێ ژى تێدا دكه‌ت ل دۆر چێرۆكا چا‌وانیا چێكرنا وێ كۆچكێ ل سه‌رسنكێ و گرنترین ئه‌و بریار و كۆمبوون و سه‌ره‌دانێن سه‌ركرده‌یان بو هاتینه‌كرن دبێژیت” پشتى فه‌یسه‌لێ دویێ بوویه شاهێ عیراقێ، بریار هاته‌دان كو كۆچكه‌ك بۆ بهێته چێكرن ، ئه‌و بوو ئه‌ڤ كۆچكه كو نها شینوارێن وێ ل سه‌رسنكێ نه ل سالا 1953 هاته چێكرن و د ڤه‌كرنا كۆچكێ دا، گه‌له‌ك سه‌ركرده‌یێن عه‌ره‌بى و بیانى و كوردى و خه‌لكێ ده‌ڤه‌رێ و هونه‌رمه‌ند و ره‌وشه‌نبیر تێدا پشكداربوون ، كو ل وى ده‌مى چێكرن و ڤه‌كرنا كۆچكا شاهى روودانه‌كا دیروكى و شارستانى بوو ل ده‌ڤه‌رێ”.
زێده‌تر گۆت” جهێ كۆچكا شاهى كو چار دونه‌مێن ئه‌ردى یه، ب كوژمێ 300 دینارێن وى ده‌مى هاتیه كرین و ل سه‌ر ناڤى فه‌يسه‌لێ دويێ هاتیه تاپۆكرن و ژبهركو شاه فه‌یسه‌ل پسمامێ شاهێ ئوردنێ یه ، كۆچك بوویه مولكێ وان و حوكمه‌تا هه‌رێما كوردستانێ ژى ملكیه‌تا وێ بۆ زڤراندیه”.
ل دۆرگرنگیا كۆچكا شاهى و دیزانیا وێ، ناڤبرى گۆت” گرنگى یا كۆچكا شاهى د وێ یه‌كێ دایه كو زێده‌بارى كو شینواره‌ك و جهه‌كێ گه‌شتوگوزاریێ گرنگه ل سه‌رسنكێ و ده‌ڤه‌را ئامێدیێ ، د ده‌مێ خودا گه‌له‌ك بریارێن گرنگ و چاره‌نڤیساز ب عیراقێ ڤه ژێ ده‌رچووینه ، دیسان كۆمبوونه‌كا كۆمكارا عه‌ره‌بى تێدا هاتیه ئه‌نجامدان و وه‌زاره‌ته‌كا نورى سه‌عیدى تێدا هاتیه پێكئینان و گه‌له‌ك سه‌ركرده‌یێن جیهانێ و عیراقى و كوردستانێ ژ نێزیك سه‌ره‌دان بۆكریه ژ وانان كه‌ميل شه‌معون وشاهێ ئوردنێ و مه‌لا موسته‌فا بارزانى ، ل سالا 1989 ده‌ما كو سه‌دام هاتیه ده‌ڤه‌رێ ده‌ست ب سه‌ركۆچكێ دا گرت و ل وى ده‌مى ب كۆچكا وى هاته نیاسین و چه‌ند كۆچكێن دى ژى چێكرن ،ئه‌و كۆچكه ل سه‌ر شێوه و ستایله‌كێ پێشكه‌فتى و بریتانى ب شێوازى هلوفینى ب دو قاتى كو دزڤریت بۆ چه‌رخێ 16و 17ێ هاتیه چێكرن و ئه‌ندازیارێن بریتانى و عه‌ره‌بى سه‌رپه‌رشتیا ئاڤه‌دانكرنا وێ كریه و پشتى دو سالان كارتێداكرن هاتیه راده‌ستكرن بو شاهێ عیراقێ و هه‌تا نها ژىئه‌و كۆچك وه‌كو به‌رێ ب ره‌وش و خه‌مله‌كا ب هێز و جوان هه‌یه و چو شه‌ق و ده‌رز نه‌كه‌فتینێ و نها دهێته نووژه‌نكرن و هه‌كه قه‌یرانا دارایى نه‌مینیت، ره‌نگه نووژه‌نكرنا وێ ب ره‌نگه‌ك باشتر و به‌رفره‌هتر ده‌ست پێ بكه‌ت”.
نيشاندان
