ئەڤرۆ نیوز، نەوزاد ھلۆری:

سەرۆکێ بوردێ دامەزراندنا دەزگەھێ خێرخوازیێ بارزانی د چارچوڤێ کونفرانسێ سالانە یێ دەزگەھێ بارزانی دیارکر کو ئەو یێ بەرھەڤیان دکەن، ھاریکاریێن خێرخوازیێن دەزگەھێ بارزانی بگەھیننه‌ عەفرینێ.

مەسرور بارزانی گۆتژی: “دەزگەھێ بارزانی مالەکا خێرخوازی یە بۆ ھەموو خەلکێ ھەژار و زیانڤێکەفتی ل ھەموو پارچێن کوردستانێ، بارزانیێ نەمر گەلەک ب گرنگی سەحا رەوشا ژین و ژیارا ھەژاران چوویە و داخوازکریە کو بەردەوام خزمەتا ھەژاران بھێتەکرن، ئەڤە ژ سالا 2005ێ ھەتا نھا ل ژێر رێنمایێن سەرۆک بارزانی دەزگەھێ بارزانی بێی جوداھی خزمەتا ھەموو تەخێن جڤاکی دکەت”.

مەسرور بارزانی د درێژاھیا ئاخفتنێن خوه‌ دا دیارکر ژی کو دەزگەھێ بارزانی ھاریکاری گەھاندینە ھەموو ئه‌و کەسانێن کو ژ بەر شەرێن تیرورستان جھـ و وارێن خوە ھێلاینە و گۆتژی: “دەزگەھێ بارزانی بەرھەڤیان دکەت کو ھاریکاریان بگەھینیتە عەفرین و خەلکێ سڤێل و پێشتر ژی ھاریکاری گەھاندینە زیانڤێکەفتنێن بیڤەلەرزێن دەربەندیخان و دەڤەرێن دن، بەلێ کومارا ئیسلامیا ئیرانێ نەھێلا ھاریکاریێن دەزگەھی بگەھنە زیانڤێکەفتیێن بیڤەلەرزان ل کرماشان و رۆژھەلاتێ کوردستانێ”.

ئه‌ڤرۆ نيوز:

سکرتێرێ حزبا بزاڤا چاکسازی و گەشە دبێژیت، پشکداریا کوردان د پڕۆسا ھەلبژارتنێن عێراقێ ل سنورێ پارێزگەھا کەرکووکێ شاشیەکا مەزنە دھێتەکرن و دبیتە ئەگەرێ شەرعیەتدان ب داگیرکارکرنا کوردستانێ ھەروەسا دیارکر، لبن دەستھەلاتا حاکمەکێ سەربازی و ل جھەکێ داگیرکری ئەنجامدانا ھەلبژارتنان چو رامانەک نینە.

دکتۆر محەمەد بازیانی، سکرتێرێ حزبا بزاڤا چاکسازی و گەشە بۆ رۆژناما ئەڤرۆ گۆت” ئەف رەوشا نوکە ل کەرکووکێ ھەیە حالەتێ داگیرکرنێ یە و ل حالەتێ داگیرکرنێ ھەر ھەلبژارتنەک بھێتە ئەنجامدان ئەڤە کورد سەرکەفتی نابن و بەرۆڤاژی دێ توشی شکەستنەکا مەزن بھێن، ژبەرکو نوکە کەرکووک لبن گڤاشتنا حاکمەکێ سەربازی دایە و ب دیتنامن تنێ کورد د حالەتدا پشکداریێ د پڕۆسا ھەلبژارتناندا بکەن ل سنورێ کەرکووکێ، ئەڤژی رەوش بھێتە تەنا کرن و ئاسایی کرن وەک بەرێ، بێی ئاساییکرنا رەوشا کەرکووکێ دێ زیانێن مەزن بۆ کوردان ھەبن.

دکتۆر محەمەد بازیانی گۆت” پێشبینی دکەم ھەموو کورد پشکداری ھەلبژارتنێن پارێزگەھا کەرکووکێ دا بکەن چوار کۆرسیان بدەستڤە بینن، ئەڤە ددەمەکیدایە د ھەلبژارتنێن بۆری دا کوردان لسەر جەمێ دوازدە کۆرسیێن پارێزگەھا کەرکووکێ بۆ جڤاتا نوونەرێن عێراقێ ھەشت کۆرسی کوردان بدەستڤە ئینابوون، دڤێ رەوشا داگیرنا کەرکووکێ دا، ھەتا نوکە سێ لایەنێن کوردی بایکۆتا ھەلبژارتنێن عێراقێ ل کەرکووکێ کرینە، ئەوژی پارتی دیموکراتی کوردستان و بزاڤا چاکسازی و گەشە دگەل بزاڤا ئیسلامیا کوردستانێ، من بخوە ژبەر ڤێ چەندێ بایکۆتا ھەلبژارتنان ل کەرکووکێ کریە، ناخوازین شەرعیەتێ بدەینە داگیرکاریا عێراقێ بۆسەر دەڤەرێن کوردستانی یێن دەرڤەی ئیدارەیا حوکمەتا ھەرێما کوردستانێ، بەرپرسیاربین ھەمبەر خودێ و مللەتێ خوە، ھەتا ئەمژی نەبینە پشکەک ژ دووڕاندنا کوردان لڤی باژێڕی و دان پڤێ چەندێ بکەین کەرکووک باژێَڕەکێ کوردستانی نینە.

 ئه‌ڤرۆنيوز:

هژماره‌كا ئه‌ندامێن په‌رله‌مانێ كوردستانێ ژفراكسيۆنێن جودا جودا، پرۆژه‌ برياره‌ك بۆ فلته‌ركرنا مالپه‌رێن سيكسى ل سه‌ر ئه‌نترنێتێ ئاراسته‌ى سه‌رۆكاتيا په‌رله‌مانى كريه‌.

حه‌يات مه‌جيد په‌رخى ئه‌نداما په‌رله‌مانێ كوردستانێ وئێك ژوان په‌رله‌مانتارێن ئيمزا ل سه‌ر وى پرۆژه‌ بريارى كرى راگه‌هاند” ئه‌و پرۆژه‌ برياره‌ ل هه‌فتيا بۆرى 18 په‌رله‌مانتارن يا ئيمزا كرى وژ هه‌شت ماده‌يان پێكدهيت ل گه‌ل ئه‌گه‌رێن ده‌ركرنا وى پرۆژه‌ى”.

حه‌ياتێ دداخۆيانيه‌كا رۆژنامه‌ڤانيدا گۆت ژى” ل هه‌موو وه‌لاتان قانوونه‌كا وه‌سا يا هه‌ى وقانوونه‌كا ب وى شێوه‌ى بۆ هه‌رێما كوردستانێ ژى يا گونجايه‌، چونكى نابيت تۆرێن ئه‌نترنێتێ ب شێوه‌كى بن كو ل هه‌موو ژيه‌كى بشێن ب ساناهى بچنه‌ دناڤ هه‌موو مالپه‌ران دا، ژبه‌ركو گه‌له‌ك جاران كێشێن جڤاكى ژێ په‌يدا دبن”.

خوياكر” ده‌ركرنا ڤێ قانوونێ ب گرنگ دزانين بۆ پاراستنا ئاسايشا خێزانێ وجڤاكى ودابونه‌ريتێن جڤاكى، هه‌روه‌سا بۆ پاراستنا لاوان ژ لادان ونه‌خوه‌شيێن جڤاكى” .

ئه‌ڤرۆنيوز:

ئه‌ندامه‌كێ لژنا دارايى ل جڤاتا نوونه‌رين عيراقێ راگه‌هاند، هه‌رچه‌نده‌ برياربوو ئه‌ڤرۆ ل سه‌ر داخوازا سه‌رۆك وه‌زيرێن عيراقێ، ل گه‌ل بريكارێ وه‌زيرێ دارايێ عيراقێ ل دۆر زێده‌كرنا پشكا كوردستانێ دپرۆژه‌ قانوونا بودجه‌ى دا كۆمبين، به‌لێ بريكارێ وه‌زيرێ دارايى به‌رهه‌ڤ نه‌بوو بهێته‌ دكۆمبوونێ دا.

رۆژا پێنجشه‌مبيا بۆرى، فراكسيۆنێن كوردستانى دناڤ جڤاتا نوونه‌رين عيراقێ دا ل گه‌ل سه‌رۆك وه‌زيرێن عيراقێ كۆمبوون ودوێ كۆمبوونێ دا لژنه‌ك هاته‌ دروستكرن بۆ وێ چه‌ندێ ل گه‌ل وه‌زاره‌تا دارايى يا عيراقێ كۆمبيت ودانوستاندن ل سه‌ر پشكا هه‌رێما كوردستانێ دپرۆژێ قانوونا بودجه‌ى بۆ سالا 2018 بهێته‌ كرن، به‌لێ ئه‌ڤرۆ وه‌زاره‌تا دارايى يا عيراقێ به‌رهه‌ڤى وێ كۆمبوونێ نه‌بوو.

سه‌رحان ئه‌حمه‌د، ئه‌ندامێ جڤاتا نوونه‌رێن عيراقێ ژفراكسيۆنا پارتى ديموكراتى كوردستان وئه‌ندامێ لژنا دارايى يا جڤاتا نوونه‌ران راگه‌هاند” برياربوو ئه‌ڤرۆ ل گه‌ل بريكارێ وه‌زاره‌تا دارايى يا عيراقێ ل سه‌ر راسپاردا حه‌يده‌ر عه‌بادى كۆمبين، به‌لێ ئه‌م هاتينه‌ ئاگه‌هداركرن كو بريكارێ وه‌زيرێ دارايى كاره‌كى دى يێ هه‌ى وبه‌رهه‌ڤ نينه‌ ل گه‌ل فراكسيۆنێن كوردستانى كۆمبيت”.

سه‌رحانى دداخۆيانيه‌كا رۆژنامه‌ڤانيدا زێده‌تر گۆت” حوكمه‌تا عيراقێ نه‌ڤێت پشكا هه‌رێما كوردستانێ دپرۆژێ قانوونا بودجه‌ى دا زێده‌ بكه‌ت ودخوازيت ب ڤى شێوه‌ى پرۆژێ ناڤبرى بهێته‌ په‌سه‌ندكرن كو دبه‌رژه‌وه‌نديا هه‌رێما كوردستانێ دا نينه‌”.

خوياكر ژى”برياره‌ سوباهى دوشه‌مبى، خواندنا دويێ بۆ پرۆژێ قانوونا بودجه‌ى بهێته‌ كرن وكورد بايكۆتا روونشتنا جڤاتا نوونه‌ران بكه‌ت”.

ل دووڤ گۆتنا سه‌رحان ئه‌حمه‌د، دپرۆژێ قانوونا بودجێ گشتيێ عيراقێ دا، دو ترليۆن و400 مليار دينار بۆ هه‌رێما كوردستانێ هاتيه‌ دانان وفراكسيۆنێن كوردستانى ژى داخوازكريه‌ بهێته‌ زێده‌كرن بۆ 10 ترليۆن ديناران.

ل دۆر بودجا سالا 2018 يا عيراقێ كو نوكه‌ پرۆژه‌يه‌ ل جڤاتا نوونه‌ران، كوردان تێبينى هه‌نه‌ ژبه‌ركو پشكا كورجان ژ17% كريه‌ 12% ، ديسا وه‌كو پارێزگه‌ه ره‌فتار ل گه‌ل هه‌رێما كوردستانێ هاتيه‌ كرن.

ئه‌ڤرۆنيوز:

هنارتيێ تايبه‌ت يێ سكرتێرێ گشتيێ نه‌ته‌وێن ئێكگرتى بۆ عيراقێ، يان كۆبيش، ل گه‌ل نێچيرڤان بارزانى سه‌رۆك وه‌زيرێن هه‌رێما كوردستانێ كۆمبوو وراگه‌هاند، نه‌ته‌وێن ئێكگرتى دێ هاريكاربيت بۆ چاره‌كرنا كێشێن به‌غدا وهه‌ولێرێ ب تايبه‌تى پرسا مووچه‌ى.

ئه‌ڤرۆ ئێكشه‌مبى 4/2/2018، مالپه‌رێ فه‌رميێ حوكمه‌تا هه‌رێما كوردستانێ به‌لاڤكر” سه‌رۆك وه‌زيرێن هه‌رێمێ، نێچيرڤان بارزانى، پێشوازى ل يان كۆبيش هنارتيێ تايبه‌ت يێ سكرتێرێ گشتيێ نه‌ته‌وێن ئێكگرتى بۆ عيراقێ وجێگرێ وى كر”.

يان كۆبيش دوێ كۆمبوونێ دا خوه‌شحاليا خوه‌ ده‌ربرى ب دانوستاندنێن ڤێ دووماهيێ يێن دناڤبه‌را به‌غدا وهه‌ولێرێ ب تايبه‌تى ئه‌و كۆمبوونين ل سه‌ر ئاستێ بلند دناڤبه‌را هه‌ردوسه‌رۆك وه‌زيرێن عيراقێ وسه‌رۆك وه‌زيرێن حوكمه‌تا عيراقى يا فيدرال هاتينه‌ ئه‌نجامدان.

كۆبيش ، به‌رهه‌ڤيا خوه‌ بۆ هه‌ر هاريكاريه‌كێ پشته‌ڤانيه‌كێ ب مه‌ره‌ما ئه‌نجامدانا كۆمبوونێن ته‌كينيكه‌ يێن زێده‌تر دناڤبه‌را هه‌ردولا وچاره‌سكرنا كێشان ب تايبه‌تى ل سه‌ر پرسا هنارتنا مووێ مووچه‌خۆرێن هه‌رێما كوردستانێ وڤه‌كرنا فرۆكخانه‌يان، نيشاندا.

ژلايێ خوه‌ڤه‌ نێچيرڤان بارزانى سوپاسيا بزاڤ وپشته‌ڤانيا يان كۆبيشى بۆ دانوستاندنا ڤێ دووماهيێ دناڤبه‌را به‌غدا وهه‌ولێڕێ كر وراگه‌هاند” هه‌رچه‌نده‌ پێنگاڤێن گه‌له‌ك مه‌زن يێن مه‌ين بۆ چاره‌كرنا كێشان، به‌لێ ده‌ستپێكرنا دانوستاندنان دناڤبه‌را هه‌ولێرێ وبه‌غدا ده‌ستپێكه‌كا باشه‌ بۆ ده‌ستپێكرنا گفتوگۆيێن جدى تر دناڤبه‌را هه‌ردولا دا”.

ئه‌ڤرۆنيوز:

ئه‌ندامه‌كێ ليستا ده‌وله‌تا قانوونێ يێ نێزيك ژ حه‌يده‌ر عه‌بادى، ئاشكراكر كو ئه‌مريكا نيازه‌ك يا هه‌ى بۆ دانانا بنگه‌هه‌كێ له‌شكرى ل كوردستانێ بێ ئاگه‌هدارى وزانينا حوكمه‌تا عيراقێ.

جاسم محه‌مه‌د جه‌عفه‌ر، په‌رله‌مانتارێ ده‌وله‌تا قانوونێ گۆت” ئه‌مريكا دێ چه‌ندێن بنگه‌هێن له‌شكرى ل عيراقێ، ژوان ژى ل كوردستانێ، دێ دانيت”.

ناڤبرى زێده‌تر بۆ مالپه‌رێ ئه‌لمه‌علومه‌ گۆت” ئه‌مريكا بزاڤا دانانا بنگه‌هه‌كێ له‌شكرى ل هه‌رێما كوردستانێ، بێ ئاگه‌هدارى وزانينا به‌غدا، دكه‌ت”.

دياركر ژى” ئه‌و بنگه‌هێ له‌شكريێ ئه‌مريكى ل كوردستانێ وه‌كو قه‌بارێ بنگه‌هێن له‌شكرى يێن ئه‌مريكى ل وه‌لاتێن كه‌نداڤى نابيت، به‌لكو دێ ل ده‌ڤه‌ره‌كا بچووك بيت كو بشێت تێدا لڤين وئوپه‌راسيۆنێن خوه‌ بكه‌ت”.