ئەڤرۆ نیوز:
دەزگەھێن راگەھاندنا ئەمریکا و ئورۆپا بەحسێ سەرکەفتنا ئیرانێ د ئاڤاکرنا ھیلالا شیعی دا دکەن کو 38 سالن بەرپرسێن ئیرانێ خەونا ھندێ دبینن و نھا ئەو یەک بجە ھات، لێ ئەمریکا بێدەنگە و سعوودیا و ئیسرائیل ژ ھەلویستێ ئەمریکا دلگرانن و پاشەرۆژا رۆژھەلاتا ناڤین ژی دیار نینە.

دەزگەھێن راگەھاندنا ئەمریکا و ئورۆپا بەحسێ سەرکەفتنا ئیرانێ د ئاڤاکرنا ھیلالا شیعی دا دکەن و دبێژن ئیرانێ شیا خەون و خەیایا خوە یا 38 سالێن بۆری بجە بینیت و قاسم سلێمانی وەکو کەسێ ئێکێ شیا دەستھەلاتا ئیرانێ ژ عیراقێ ھەتا سووریا و لوبنانێ بەرفرەە بکەت و نھا مەترسیەکا راستەوخوە ل سەر ئیسرائیلێ و سعوودیێ دروست بوویە، لێ خالا سەیر ھەتا نھا ژی ئەمریکا ل ھەمبەر زێدەگاڤیێن ئیرانێ بێدەنگە و ھەر دو وەلاتێن ھەرێمێ ئانکۆ سعوودیا و ئیسرائیل ژ سیاسەتا ئەمریکا دلگرانن و دخوازن ب رێیا روسیا سنورەکێ بۆ ئیرانێ دانێن.

رۆژناما واشنتۆن پۆست ل دۆر بابەتی د راپۆرتەکێ دا دیار دکەت کو ھەکە ئەمریکا ب رەنگەکێ جدی گوە نەدەتە داخوازیێن سعوودیا و ئیسرائیلێ ھەر دو وەلات دێ پتر خوە نێزیکی روسیا کەن، چونکو نھا روسیا ژ ب ھێزبوونا ئیرانێ دلگرانە و بەری نھا پوتینی ھوشداری دابوو ئیرانێ کو دڤێت ھەموو ھێزێن خوە ژ سووریا دەرخینن، ھەرچەندە د گەلەک بابەتان دا روسیا و ئیران ھەڤپەیمانن لێ روسیا ب چو رەنگەکێ ناخوازیت ئیران ب ھێز کەڤیت و روسیا دخوازیت ئیرانەکا لاواز ل دەڤەرێ ھەبیت کو پێدڤی ب روسیا بیت، ژ بەر ھندێ ژی پشتی تەمامبوونا پرۆژێ ئیرانێ یێ ھیلالا شیعە روسیا ژی دلگرانە.

ئاژانسا جیھان یا نووچەیان ژی دیار کریە کو بەری نھا چەندین جاران دەزگەھێ ھەوالگێریا ئەمریکا ل دۆر شەرێ ل دژی داعشێ و پیلانێن ئیرانێ راپۆرتێن نھێنی داینە ئیدارا ترامپی لێ ترامپ پتر گرنگیێ ب پێشڤەچوونێن ئابووری ددەت و ژ بەر ھندێ ژی خەمساری د بابەتێ ئیرانێ دا ھاتیە کرن، چونکو ئیرانێ شیا مفایەکا باش ژ شەرێ ل دژی داعشێ وەربگریت و پێگەھێ خوە ل عیراقێ و سووریا ب ھێز کەت و نھا بەرپرسێن ئیرانێ خوە وەکو قارەمانێن شەری دبینن و دبێژن کەس نەشێت شەرێ مە بکەت.

ل ئالیێ دی دوھی سەرۆک کۆمارێ ئیرانێ حەسەن رۆحانی ل دۆر ھەلویستێ کۆمکارا عەرەبی ل ھەمبەر ئیرانێ ژی راگەھاند کو دەمێ داعشێ ل عیراقێ و سووریا سەرێ خەلکێ مەدەنی دبڕی وی دەمی کۆمکارا عەرەبی ل کیڤە بوو؟ بۆچی خوەدان ژ موسولمانان دەرنەکەڤن و نھا ژی گەفان ل ئیرانێ دکەن.

چاڤدێرێن سیاسی دیار دکەن کو سیاسەتا شاش یا ئەمریکا ل رۆژھەلاتا ناڤین وەسا کر کو ئیرانێ شیا مفایەکا باش ژ روودانێن ٢٠ سالێن دووماھیێ ببینیت و پرۆژێ خوە یێ ھیلالا شیعە تەمام کەت، نھا ئیران ب رێیا ئەردی دشێت ب ساناھی خوە بگەھینتە سنۆرێ ئیسرائیلێ و سعوودیا ژی ژ ئالیێ ھێزێن سەر ب ئیرانێ ڤە ھاتیە دۆرپێچ کرن و ھەتا نھا ژی ئەمریکا ل دژی ئیرانێ چو نەکریە، تشتێ ئەمریکا دکەت تنێ گەف و ئاخڤتنن و د پراکتیکێ دا ھەتا نھا ئەمریکا ئێک پێنگاڤ ژی ل دژی ئیرانێ نەھاڤێتیە و ژ بەر ھندێ ژی ئیرانێ شیا پرۆژێ خوە تەمام کەت و نھا ئیران بوویە وەلاتەکێ زلھێز ل رۆژھەلاتا ناڤین و دێ مەترسیەکا مەزن بۆ ئەمریکا و وەلاتێن عەرەبی یێن سوننی دروست کەت.

ئەڤرۆ نیۆز ، زنار تۆڤی:

ئەڤ شەڤە ل خالا گۆمرکا سەرزێری ل دەڤەرا بەرواری بالا و هەروەسا چەندین گوندێن ڤێ دەڤەرێ بەفر یا دباریت و تا نوکە رێژەکا بەفرێ باریە و هەروەسا سەقایێ ڤێ دەڤەرێ گەلەک ساربوویه و پلا گەرماتیێ ژی چوویە دبن سفرێ دا.