ئه‌ڤرۆ نيوز:
رێژا باران بارينێ د 24 ده‌مژمێرێن بوورى دا
زاویته ( 15 ) ملم
باتێل ( 10 ) ملم
سه‌رسنك ( 39 ) ملم
چمانكێ ( 36 ) ملم
باتیفا ( 13 ) ملم
ده‌ركار ( 7.7 ) ملم
باعه‌ردێ ( 14 ) ملم
به‌رده‌ره‌ش ( 17.6 ) ملم
دینارته ( 42.5 ) ملم
گه‌رده‌سين ( 20 ) ملم
قه‌سروك ( 19 ) ملم
شێخان ( 19 ) ملم
بجێل ( 16.5 ) ملم
ئه‌ڤرۆ نيوز:
پەیڤدارێ حوکمەتا عێراقێ جارەکادی تەکەست ل سەر ھنارتنا مووچێ فەرمانبەرێن ھەرێما کوردستانێ ژلایێ بەغداڤەکر و دیارکر، دەمەکێ نێزیک دێ لیژنەیەک ل بەغدا گەھیتە ھەرێما کوردستانێ لدۆر پرسا ھژمارا فەرمانبەران، پەرلەمانتارەکێ کورد یێ جڤاتا نوونەرێن عێراقێ ژی دبێژیت، بڕیاربو لیژنەکا بلند ل بەغدا بۆ ئێکلاکرنا پرسێن مووچە و بۆدجێ ھەرێما کوردستانێ بھێتە پێکئینان، بەلێ ھێشتا یا رۆھنینە دێ کەنگی ھێتە پێکئینان و سەرەدانا ھەرێما کوردستانێ بکەت یان ھەر ل بەغدا دگەل نوونەرێن ھەرێمێ دانوستانێ بکەن.
سەعد حەدیسی، پەیڤدارێ حوکمەتا عێراقێ لدۆر ھنارتنا مووچێ فەرمانبەرێن ھەرێما کوردستانێ دداخویانیەکێ دا دیارکر” حوکمەتا عێراقێ لیژنەیەکا تایبەت بۆ دانانا میکانیزمەکی ژبۆی ڤەکۆلین و چاڤدێریکرنا ھژمارا فەرمانبەرێن ھەرێما کوردستانێ پێکئینایە و بڕیارە دەمەکێ نێزیک سەرەدانا ھەرێما کوردستانێ بکەت، ئەف لیژنە دێ دگەل حوکمەتا ھەرێمێ دانوستانێ کەت لدۆر پڕۆسا ھویربینیکرنێ دناڤا ھژمارا فەرمانبەران و رێکەفتن لدۆر ڤێ پرسێ، مەرەم ژ پێکئینانا ئەڤێ لیژنێ تنێ ئەڤە لیستا ناڤێن فەرمانبەرێن ھەرێما کوردستانێ بھێتە شەفافکرن و ئەف مووچێ دھێتە مەزاختن بگەھیتە دەستێ کەسێ خوەدی ماف، ھەر سیستەمەک و میکانیزمەک ھەبیت و باوەریێ بدەتە بەغدا لدۆر پرسا ھژمارا فەرمابنەرێن ھەرێمێ ئەم دێ کار ل سەرکەین، ئەم دخوازین مووچێ فەرمانبەرێن ھەرێما کوردستانێ بمەزێخین پێگیری ب ھنارتنا نانێ وەلاتیان، بەلێ ھەتا پشتڕاستبین ل شەفافیا ناڤێن فەرمانبەران.
ژلایێ خۆڤەژی ئەمین بەکر،پەرلەمانتارێ کورد جڤاتا نوونەرێن عێراقێ بۆ رۆژناما ئەڤرۆ گۆت” ھێشتا ئاریشەیێن ئابووریێن ناڤبەرا ھەرێما کوردستانێ و حوکمتا عێراقێ نەھاتینە سەر مێزا دانوستانێ، چونکە پێدڤیە بزاڤێن لەز بھێنەکرن بۆ چارەسەرکرنا پرسا مووچە و بۆدجێ ھەرێما کوردستانێ ل بەغدا، راستە بڕیاربو لیژنەیەک ژلایێ بەغداڤە بھێتە پێکئینان و پێداچوونێ ب مووچە و بۆدجێ ھەرێما کوردستانێ دا بکەن، بەلێ گۆرەی زانیاریێن من ھێشتا ئەندامێن لیژنێ نەھاتینە دیارکرن و چو دانوستانێن راستەوخۆ رێڤەنەچووینە دناڤبەرا ھەرێم و بەغدا، ئەڤا تێتە گۆتن رۆژانە ل داخویانیێن ھەردوولا بەردەوام گۆھڕین بسەردا دھێن، بەلێ یا ئەنجامێ دوماھیێ دێ ئەڤەبیت کو ھەردوو حوکمەت پێکڤە بگەھنە رێکەفتنێ بۆ ئێکلاکرنا ئەڤێ پرسێ.
ئه‌ڤرۆ نيوز:
سەرۆکێ جڤاتا پارێزگەھا دھۆکێ ئاشکراکر کو ل سەر بابەتێ خرابکرنا ئاڤاھیێ ئێکەم قوتابخانا ل دھۆکێ کو ب ئاڤاھیێ بەرێ یێ پەیمانگەھا ھونەرێن جوان دھێتە نیاسین ل گەل فەرھاد ئەمین پارێزگەرێ دھۆک ئاخفتیە و گەھشتینە وێ باوەریێ کو نابیت ئاڤاھی بھێتە خرابکرن.
فەھیم عەبدوللا حەمو سەرۆکێ جڤاتا پارێزگەھا دھۆکێ بۆ رۆژناما ئەڤرۆ گۆت: ئاڤاھیێ ئێکەم قوتابخانە ل دھۆکێ ناھێتە خرابکرن، لێ ئەڤ ئاڤاھیێ ل تەنشت ڤێ دووماھیێ ھاتیە دروستکرن و چ پەیوەندی ب شینواران ڤە نە ئەو دێ ھێتە خرابکرن، لێ ئاڤاھی یێ ب بەرێ بازی ھایتە دروستکرن دێ وەک خومینت، ل گەل فەرھاد ئەمین پارێزگەرێ دھۆکێ ل سەر ڤێ چەندێ ئاخفتیمە و ئەو ژی ل گەل مانا ئاڤاھی یە کو نەھێتە خرابکرن و بگشتی ناھێـتە خرابکرن.
زێده‌تر گۆت: فەرھاد ئەتروشی پارێزگەرێ دھۆکێ ژی ل گەل خرابکرنا ڤی ئاڤاھی نینە، ئەگەر بیڤەلەرزێن بھێزنەبن ئەڤ ئاڤاھی یە چ جارا چلێ ناھێت، چونکە ھەموو بەرێن بازی نە و ھەر دەم مرۆڤ دشێت ژناف دا دەست کاریا تێدا بکەت، رۆژناما ئەڤرۆ کارەکێ باش کر بابەت ئازراند و دیسا گەلەک ژ خەلکێ دھۆکێ ژی گەل خرابکرنا ڤی ئاڤاھی نەبوون و دنەرازیبوون، خرابکرنا ب ساناھی یە لێ پەشێمان بوون چ فایدە ناکەت وەک پێشتر ل خرابکرنا دێرابەرانی پەشێمان بووین.
فەھیمی ئاشكه‌را ژى كر كو ئه‌وان ل گەل پارێزگەرێ دھۆکێ گەنگەشە ل سەر وێ چەندێ کر کو ئاڤاھی وەک موزەخانەکێ بمینت و تێدا ژیانا کەڤن یا خەلکێ دھۆکێ و دەڤەرێ تێدا بھێتە نیشادان، “کەرستێن پێشترێن ڤی خەلکی ژیان پێ دەرباز دکر تێدا بھێنە پاراستن و ھەر ژورەک بۆ تشتەکی بھێـتە تەرخانکرن و ئەڤە ل وەلاتێن پێشکەفتی ھەیە”.
جھێ ئاماژەکرنێ یە کو بەری چەند رۆژان دەنگۆیێ خرابکرنا ئاڤاھیێ ئیکەم قوتابخانە ل دھۆکێ ھەبوو، پشتی رۆژناما ئەڤرۆ دوڤچوون ل سەر بابەتی کری و بۆچوونێن چەندین کەسانێن گرێدایی بابەتی ڤە وەرگرتین ئاڤاھیێ ئیکەم قوتابخانە ل دھۆکێ ژ خرابکرنێ رزگار بوو.
ئه‌ڤرۆ نيوز:
ئەندازیار عوبەیدوللا سلێمان، رێڤەبەرێ بەلاڤکرنا کارەبا قەزا شێخان بۆ رۆژناما ئەڤرۆ دیار کر کو ژ ئەگەرێ وێ قەیرانا ب سەر ھەرێما کوردستانێ دا ھاتی خەلکەکی بۆ خوە ب دەلیڤە دیتیە کو پارێ کارەبا گشتی ل قەزا شێخان نەدەن.
ئەندازیار عوبەیدوللا سلێمان، رێڤەبەرێ بەلاڤکرنا کارەبا قەزا شێخان ئاشکرا ژی کر، ھەیڤانە ئەو قەرە زێدەتر لێ دھێت، ژ بەرکو د رەوشا نھا دا لاوازی کەفتیە کاری، دیسا خەلکەک ژی ژ بەر نەبوونا کاری یێ مایە بەتال و دبێژیت: د نھا دا قەرێن کارەبا گشتی ل مالان، جھێن پیشەسازی، فەرمانگەھێن میری، چاندن و جھێن بازرگانی و ئاینی گەھشتیە ھەشت ملیار و 590 ملیۆن و 300 ھزار و 180 دیناران.
ئەندازیار عوبەیدوللا سلێمان ئاماژە ب وێ چەندێ ژی کر کو د 11 ھەیڤێن بۆری دا ل سنوورێ قەزا شێخان 946 کەس ب کۆژمێ 38 ملیۆن و 500 و پێنج ھزار دیناران ھاتینە سزادان، ژ بەرکو ھێلا کارەبێ ب شێوەکێ نەیاسایی گرێدابوون بێ کو رێڤەبەریا کارەبێ ئاگەھدار بکەن.
سەرۆکێ فڕاکسیۆنا یەکگرتوویا ئیسلامی لپەرلەمانێ عێراقێ ئاماژە بوێ چەندێ دکەت، بزاڤێن سزادانا ھژمارەک پەرلەمانتارێن کورد ب تۆمەتا پشکداریکرن د پڕۆسا ریفڕاندۆما سەرخۆبوونا کوردستانێ ژلایێ پەرلەمانتارێن شۆڤێنی ئەڤەژی بەرۆڤاژی دستوور و قانوونێن عێراقێ یە و ھەردەمێ ئەم بخوازین دێ ڤەگەڕین پەرلەمانی و چو کەس و لایەنەکژی نەشێت رێگریێ لمە بکەت.
پشتی ئەنجامدانا پڕۆسا ریفڕاندۆمێ لرۆژا 25ی ئەیلوولا بۆری ژلایێ ھندەک پەرلەمانتارێن عێراقێ لیژنەیەک ھاتیە پێکئینان ھەتا ڤەکۆلینێ دگەل ئەڤان پەرلەمانتاران بکەت یێن پشکداری ریفڕاندۆمێ دا کرین و بادەکا چواردە پەرلەمانتاران ھاتیە بەرھەڤکرن ھەتا پەرلەمان پنێریت دادگەھێ، دکتۆر موسەنا ئەمین سەرۆکێ فڕاکسیۆنا یەکگرتوویا ئیسلامی لپەرلەمانێ عێراقێ بۆ رۆژناما ئەڤرۆ گۆت”دەستەکێ مەزھەبی یێ توندڕەو ل بەغدا ھەنە دژی خەلکێ کوردستانێ و دناڤا پەرلەمانیژی ھندەک ژوان کەسێن دەروون نەساغ ھەنە دخوازن مللەتێ کورد سزا بدەن ب رێیا سزادانا نونەرێن وانا لپەرلەمانێ عێراقێ، ئەڤەژی بەرۆڤاژی دستوور و قانوون و پێکڤەژیانێ یە، بەلێ بزاڤێن لێپرسینێ دگەل 14 پەرلەمانتارێن کورد بەردەوامە و بەری نوکە ھەتا رادەیەکی شیان پیلانا خوە رێڤەببەت و ھندەک راسپاردە ئیناینە پەرلەمانی و ڤەخواندن بۆھاتیەکرن ھەتا پەرلەمانتارێن پشکداری ریفڕاندۆمێ کری بچنە دادگەھێ و پارێزبەندی لسەر بھێتە راکرن،ھەتا رێگری ل ئەڤان پەرلەمانتاران بھێتەکرن کارێ پەرلەمانی نەکەن ھەتا وی دەمی دادگەە بادەکا وان ئێکلا بکەت،سێجارا بزاڤ ھاتینەکرن لپەرلەمانی دەنگ لسەر ئەڤێ پرسێ بھێتەدان و بھێتە فڕێکرن بۆ دادگەھێ، بەلێ رێژەیا قانوونی یا پەرلەمانتاران تەمام نەبوویە بۆ دەنگدانێ.
لدۆر ڤەگەڕیانا ئەڤان چواردە پەرلەمانتارێن کورد بۆ پەرلەمانی سەرۆکێ فڕاکسیۆنا یەکگرتوویا ئیسلامی دیارکر” ئەز بخوە جارەکێ پشتی ریفڕاندۆمێ ڤەگەڕیامە بەغدا و ھەردەمێ ئەز بخوازم دێ ڤەگەڕم بەغدا،سەرۆکایەتیا پەرلەمانیژی داخوازکریە ڤەگەڕین بەغدا، ئەگەر ئەم بخوازین ڤەگەڕین بەغدا ل کەسێ ناترسین و زەلام نینە رێگریێ لمە بکەن ئەگەر بچینە پەرلەمانی، بەلێ ئەم ناخوازین ببیتە شەڕ و ئالۆزی بکەڤیتە ناڤا پەرلەمانی دوڤدا تشتەک بھێتەکرن لایەقی کارێ پەرلەمانتاری و مللەتێ مەنەبیت، بەلکۆ دخوازین قانوون رۆلێ خوە ببینیت و گورەی پەیڕەوێ نافخۆیێ پەرلەمانی کار بھێتەکرن بۆھەر پرسەکێ،ئەم دگەل شەڕ ە دەڤ و ئاخفتنێن بلند و نەڤی نینە ئەم دگەل سەروەریا قانوونێ کار دکەین.
دکتۆر موسەنا ئەمین گۆت” گورەی پەیڕەوێ نافخۆیێ پەرلەمانی رێک ناھێتەدان چو پەرلەمانتارەک سزایێ پەرلەمانتارەکێ دیکە بدەت، ھەر گورەی پەیڕەوێ پەرلەمانی تشتا وەسا دنیایێ دا نەبوویە پەرلەمانتا ر پارێزبەندیێ لسەر پەرلەمانتارەکێ دی راکەت و بدەتە دادگەھێ، ھەلویستێ قانوونیێ مە زۆر یێ خویایە نوکەژی ئەم ریفڕاندۆمێ ب مافێ مللەتێ خوە دزانین و لێوەرگرتنا مافێ ریفڕاندۆمێ واتە ستاندنا کەڕامە ت و دەنگێ مللەتی، پێدڤیە مافێ ریفڕاندۆمێ وەک مافەکێ نەگۆڕ بۆ ھەر مللەتەکی ھەبیت، پێنج جارا ناڤێ ریفڕاندۆمێ دناڤا دستوورێ عێراقێ دا ھاتیە بۆ مەرەمێن جودا، ھەگەر دەنگدان بۆ ریفراندۆمێ تاوانبیت ئەڤە سێ ملیۆن وەلاتیێن ھەرێما کوردستانێ دەنگێ خوەدایە ریفڕاندۆمێ و بەغدا بلا شیان ھەبن ھەر سێ ملیۆن کەسان دەستەسەربکەن ئەگەرژی نەشێنو تایبەتکریە ب چەند کەسێن دیاریکری ئەڤە دیارە مەرەمێم سیاسی لپشت ھەنە.
ئه‌ڤرۆ نيوز:
فەھیم تاشتەکین رۆژنامەڤان و نڤیسەرێ تورک راگەھاند کو ب سەرۆکاتیا ئەردۆگانی تورکیا رۆژ ب رۆژێ لاواز دبیت و گۆت: (تورکیا ژ بەر سیاسەتا خوە یا شاش ل رۆژھەلاتێ ناڤین ب تنێ مایە و نھا نە ئەمریکا و نە ژی روسیا تورکیا وەکو ھەڤپەیمانێ خوە نابینن و ھەر دو دەولەتێن مەزن ل دووڤ بەرژەوەندیێن خوە تورکیا بکار دھینن، بۆ چارەکرنا پرسا سووریێ و ژ نوو ڤە دیزاینکرنا رۆژھەلاتا ناڤین د گەلەک خالان دا رێککەڤتینە و ئەڤە دھێتە واتەیا بنکەڤتنا تورکیا و سەرۆک کۆمار و حوکمەتا تورکیا ژ بەر یەکێ دترسن و رۆژانا گەفا لێدانا کانتۆنا عەفرینێ دکەن).
د بەردەوامیا ئاخڤتنا خوە دا نڤیسەرێ ناڤدارێ تورکیا راگەھاندیە ژی کو سیاسەتا تورکیا ل سەر بنەمایێ ئاڤاکرنا دوژمنێن ئاشوپی ھاتیە دارێتن و د رەوشا نھا دا ھەموو ئاخڤتن و کریارێن دەستھەلاتدارێن تورکیا ل سەر ھێرشکرنا کوردێن رۆژئاڤا ئانکۆ پەیەدێ یە و گۆت: (تورکیا ب سەرۆکاتیا ئەردۆگانی گەلەکا لاواز بوویی و نھا ل سەر بنەمایێ دوژمناتیا کوردان و دووربوونا ژ چارەکرنا پرسگرێکا کوردی وەسا کریە کو ئێدی نەشێت بزاڤێ بکەت و ھەکە تورکیا بکەڤیتە شاشیەکا وەسا ھێرشێ عەفرینێ بکەت نە دوورە کو تورکیا بکەڤیتە رەوشەکا گەلەکا مەترسیدار و تووشی شەرێ ناڤخوەیی ببیت، چونکو ئەمریکا ب رێیا فەرماندارێن شەری یێن ل مەیدانا سووریێ خوەدان ل کوردان دەرکەڤت و راگەھاند کو یەپەگە و ھێزێن سووریا دیمۆکرتیک ھەڤپەیمانێن مە نە).
ئەڤرۆ نیوز:
ئاژانسەکا بریتانی دیار دکەت کو ھێزێن سووریا دیموکراتیک رازی نەبوون کو چەکدارێن داعشێ ژ رەققە دەرکەڤن، وان دخواست ھەموو چەکداران ژناڤ ببەن لێ ژ ترسا کوشتنا مرۆڤێن مەدەنی و ل سەر داخوازا ئەمریکا و بریتانیا ئەو رازی بوون چەکدارێن داعشێ ب ترۆمبێلێن مەدەنی ژ رەققە دەرکەڤن.
ئاژانسا بەرنیاس یا بریتانی BBCد راپۆرتەکێ دا بەحسێ چاوانیا دەرکەفتنا چەکدارێن داعشێ ژ رەققە دکەت کو ب چاڤدێریا ئەمریکا و بریتانیا ئەو یەک ھاتیە کرن و د راپۆرتێ دا ئەو یەک ھاتیە دیار کرن کو چەندین کەسایەتیێن عەرەب ب رێیا ئەمریکا و بریتانیا داخواز ژ ھێزێن سووریا دیموکراتیک کرن کو رێ بدەن چەکدارێن داعشێ یێ مایی ل رەققە برەڤن دا خەلکێ مەدەنی پتر نەھێنە کوشتن، د دەستپێکێ دا ھێزێن کوردی رازی نەبوون چونکو وان دگۆت ھەتا ئێک چەکدار ژ مابیت دێ مەترسیا خوە ھەبیت لێ پاشی ئەمریکیان ئەو رازی کرن.
د بەردەوامیا راپۆرتێ دا ئەو یەک ژی ھاتیە دیار کرن کو شاندەکێ ئەمریکی و بریتانی ل گەل ھێزێن سووریا دیموکراتیک کۆمبوون و بۆ وان دیار کرن کو ھەکە ئەو رێ نەدەن چەکدارێن مایی ژ رەققە برەڤن دێ گەلەک کەسێن مەدەنی ھێنە کوشتن و د ئەنجام دا ھێزێن کوردی رازی بوون کو چەکدارێن داعشێ ب ترۆمبێلێن مەدەنی بچن و قەبوول نەکرن کو ل سەر ترۆمبێلان ئالایێ داعشێ بھێتە راکرن و د ئەنجام دا چەند ھزار چەکدارێن داعشێ یێ مایی ل گەل خێزانێن خوە ژ رەققە دەرکەڤتن.
ئاژانسا بریتانی ل دۆر وان چەکداران و خێزانێن وان ژی دبێژیت کو ھەتا نھا ئەمریکا ناھێلیت زانیاریێن تەمام ل دۆر چارەنڤیسێ وان چەکدارێن داعشێ بەلاڤ ببن، لێ ھندەک ژێدەرێن نێزیکی رەققە دبێژن کو ئەو کەسە ل سەر سنۆرێ د ناڤبەرا عیراقێ و سووریا دا بجە بووینە و ئەمریکی ناھێلن کەس نێزیکی وێ دەڤەرێ ببیت، ژ بەر ھندێ ژی رەنگە ئەو چەکدار ل ژێر ناڤەکا دی شەری بکەن لێ ئەو یەک دێ چاوا و کەنگی ھێتە کرن جارێ دیار نینە.
ئەو یەک د دەمەکێ دایە کو بەری نھا ژی چەندین بسپۆرێن رۆژئاڤایی دیار کربوون کو دڤێت ھەڤپەیمانیا نێڤدەولەتی ل دۆر چارەنڤیسێ چەکدارێن داعشێ یێن ژ رەققە و موسلێ رەڤینە داخۆیانیان بدەنە رایا گشتی، لێ ھەتا نھا نە ئەمریکا و نە ژی چو سازیەکا دی ل دۆر وان چەکدارێن داعشێ چ داخۆیانی نەداینە و گەلەک کەس ژی دبێژن رەنگە ئەمریکا جارەکا دی وان کەسان بۆ بەرژەوەندیێن خوە ل ژێر ناڤەکا دی بکار بینیت.
ئه‌ڤرۆنيۆز:
شڤێدى هه‌شت يارى ژگه‌را پێنجێ وبه‌رى دووماهيێ ژقۆناغا گرۆپان ل خۆلا قاره‌مانێن ئورۆپا هاتنه ئه‌نجامدان كوتێدا يانا ريال مه‌دريد يا ئيسپانى مه‌زنترين ئه‌نجام تۆماركرى ب سه‌ركه‌فتنا خوه ل سه‌ر يانا ئه‌بويل نيقوسيا يا قوبرسى ب شه‌ش گۆلان بێ به‌رامبه‌ر ويانا سڤيليا يا ئيسپانى ژى شيا دوراندنا خوه دگێمێ ئێكێ دا ل گه‌ل يانا لێڤه‌رپۆل يا ئينگليزى ب 3-0 بكه‌ته وه‌كهه‌ڤى ل گێمێ دويێ پشتى شياى سێ گۆلان تۆماركه‌ت كو گۆلا سيێ ووه‌كهه‌ڤيێ ل خۆله‌كا دويێ ژ ده‌مێ زێده‌كرى تۆماركرى.
ئه‌نجامێن دى يێن ياريان ب ڤى شێوه‌ى بوون:
مانشسته‌ر سيتى يا ئينگليزى – فينورد روتردام يا هوله‌ندى 1-0
پشكتاش يا توركى – پورتۆ يا پورتۆگالى 1-1
ناپۆلى يا ئيتالى – شاختار يا ئوكرانى 3-0
سپارتاك موسكۆ يا رۆسى- ماريبۆر يا سلوڤينى 1-1
بوروسيا دورتموند يا ئه‌لمانى – توتنهام يا ئينگليزى 1-2
موناكۆ يا فره‌نسى – لايبزيگ يا ئه‌لمانى 1-4
ئه‌ڤرۆنيۆز:
وه‌زاره‌تا ده‌رڤه‌يا ئه‌مريكى راگه‌هاند، ئه‌م دبه‌رده‌وامين ل فشارێن خوه بۆ ڤه‌كرنا فرۆكخانێن هه‌رێما كوردستانێ، دياركر ژى كو وه‌زيرێ ده‌رڤه‌يێ ئه‌مريكى ل گه‌ل حه‌يده‌ر عه‌بادى ونێچيرڤان بارزانى ئاخڤتيه وداخواز ژێ كريه ب دانوستاندنێ كێشێن خوه چاره بكه‌ن.
هێزه‌ر ناويرت، په‌يڤدارا وه‌زاره‌تا ده‌رڤه‌يا ئه‌مريكا، ئه‌م دێ دبه‌رده‌وامبين ل سه‌ر فشارێن خوه بۆ ڤه‌كرنا هه‌ر فرۆكخانه‌كا هه‌تا نوكه يا گرتى بيت.
ل دۆر بزاڤێن ئه‌مريكا بۆ ده‌ستپێكرنا دانوستاندنێ دناڤبه‌را به‌غدا وهه‌ولێرێ، گۆت، مه دانوستاندن ل سه‌ر ڤێ چه‌ندێ يێن كرين كو رێككه‌فتنه‌ك دناڤبه‌را هه‌ردولا بهيته كرن، برێت ماكگۆرك ل هه‌فتيا بۆرى ل عيراقێ بوو ول گه‌ل هه‌ر ئێك ژ حه‌يده‌ر عه‌بادى سه‌رۆك وه‌زيرێن عيراقێ و نێچيرڤان بارزانى سه‌رۆك وه‌زيرێن هه‌رێما كوردستانێ كۆمببوو، وه‌زيرێ ده‌رڤه تيلرسونى ژى ب رێيا ته‌له‌فۆنێ ل گه‌ل عه‌بادى ونێچيرڤان بارزانى ئاخڤتيه، ئه‌ڤه پشته‌ڤانيه‌كا دئاسته‌كێ بلند دا كو ئه‌م پشته‌ڤانين كو تشت ل عيراقێ به‌ر ب پێشڤه بچن.
نيشاندان