ئه‌ڤرۆنيوز:

به‌رپرسه‌كێ ده‌سته‌يا ده‌ستپاكيێ ل هه‌رێما كوردستانێ ئاشكراكر كو ده‌سته‌يا وان گۆمان يا ل سه‌ر هنده‌ك باوه‌رنامان ل زانكۆيان يا هه‌ى و هووربينيێ دباوه‌رنامه‌ وبسپۆريا مامۆستايێن زانكۆيان دا دكه‌ن.

موشير ره‌شيد، رێڤه‌به‌رێ گشتيێ كاروبارێن قانوونى ل ده‌سته‌يا ده‌ستپاكيێ ل هه‌رێما كوردستانێ راگه‌هاند” نوكه‌ پرۆسا هووربينيێ دباوه‌رنامێ دكتۆرايێ دا يا ده‌ستپێكرى كو هژمارا وان 2300 باوه‌رنامێن دكتۆرايێ نه”.

 موشيرى زێده‌تر بۆ وشه‌ گۆت” هه‌رچه‌نده‌ مه‌ گۆمان هه‌بوو كو ئه‌و هژمارا باوه‌رنامێن دكتۆرايێ ل زانكۆيێن حكومى هه‌بن، به‌لێ ئه‌و هژماره‌ ژلايێ وه‌زاره‌تا خواندنا بلند يا بۆمه‌ هاتيه‌ هنارتن وئه‌و ژێ دبه‌رپرسن”.  ‌

ئه‌ڤرۆنيوز:

نێچيرڤان بارزانى سه‌رۆك وه‌زيرين هه‌رێما كوردستانێ ئه‌ڤرۆ دوشه‌مبى 29/1/2018، پێشوازى ل جۆن سيليڤان جێگرێ وه‌زيرێ ده‌رڤه‌يێ ئه‌مريكا  وئاندرۆ پێك جێگرێ هاريكارێ وه‌زيرێ ده‌رڤه‌يێ ئه‌مريكا بۆ كاروبارێن رۆژهه‌لاتا ناڤين كر.

دكۆمبوونه‌كێ دا، جێگرێ وه‌زيڕێ ده‌رڤه‌يێ ئه‌مريكى پێگيريا وه‌لاتێ خوه‌ بۆ به‌رده‌وامبوونا په‌يوه‌نديان ل گه‌ل هه‌رێما كوردستانێ وپشته‌ڤانيێكرنێ بۆ گه‌ل وحوكمه‌تا هه‌رێما كوردستانێ دووپاتكر.

سوليڤانى راگه‌هاند ژى” ئه‌مريكا دخوازيت كێشێن دناڤبه‌را به‌غدا وهه‌ولێرێ ل سه‌ر بنه‌مايێ دستوورێ عيراقێ ب رێيا دانوستاندنێن جدى بهێنه‌ چاره‌سه‌ركرن”.

ل دۆر كۆنگرێ ئاڤه‌دانكرنا عيراقێ كو برياره‌ ل هه‌يڤا بهێت ل كوێتێ بهێته‌ گرێدان، وى به‌رپرسێ ئه‌مريكى گۆت” د وى كۆنگره‌ى دا پرۆژێن پێدڤى ژلايێ وه‌لاتێن كۆمه‌ك به‌خش ڤه‌ بۆ ئاڤه‌دانكرنا عيراقێ دێ هێنه‌ دابينكرن وپێدڤيه‌ هه‌رێما كوردستانێ ژى يا مفادار بيت ژوان پرۆژان”.

جۆن سيليڤان هيڤى خواست كو سه‌قامگيريا ئابوورى وسياسى وئه‌منى ل ده‌ڤه‌رێ بنه‌جهبيت وهه‌رێما كوردستانێ ژى جاره‌كادى ببيته‌ خودانا وى پێگه‌هێ ئابوورى يێ گرنگ كو پێشتر هه‌بوو.

ژلايێ خوه‌ڤه‌، نێچيرڤان بارزانى، سه‌رۆك وه‌زيرێن هه‌رێما كوردستانێ سوپاسيا وێ سه‌ره‌دانێ وبزاڤێن ئه‌مريكا ووه‌لاتێن هه‌ڤپه‌يمانێن كوردان بۆ زه‌مينه‌ خوه‌شكرن ب مه‌ره‌ما ده‌ستپێكرنا دانوستاندنێن جدى دناڤبه‌را به‌غدا وهه‌ولێرێ، پێگيريا حوكمه‌تا هه‌رێمێ ژى بۆ به‌رده‌واميدانێ ب وان دانوستاندنان وچاره‌سه‌كرنا كێشان ل سه‌ر بنه‌مايێ دستوورێ عيراقێ دووپاتكر.

سه‌رۆك وه‌زيرێن هه‌رێمێ به‌حسێ ره‌وشا هه‌رێما كوردستانێ وئه‌و گرفتێن ئابوورى يێن تووشى وێ بووين وكونفرانسێ ئاڤه‌دانكرنا عيراقێ ل كوێتێ كر وهيڤى خواست شاندێ هه‌رێما كوردستانێ تێدا پشكداربيت تاكو بشێن مفاى ژێ ببينيت وپێدڤيێن هه‌رێما كوردستانێ ژروويێ ئاڤه‌دانكرنێ ڤه‌ دابين بكه‌ن، ل دۆر پرۆسا سياسى ژى، ئاماژه‌ ب وێ چه‌ندێ كر كو هه‌لبژارتنێن هه‌رێما كوردستانێ دێ هێنه‌ ئه‌نجامدان وپشته‌ڤانيێ ل پرۆسه‌كا ديموكراتى ژى ل عيراقێ دكه‌ن.

ئه‌ڤرۆنيوز:

پشتى زێده‌تر ژ سێ هه‌يڤان ل سه‌ر خستنا دۆرپێچێ ل سه‌ر به‌نكێن هه‌ريما كوردستانێ ژلايێ به‌نكا ناڤه‌ندى يا عيراقێ ڤه‌، جڤاتا نوونه‌رێن عيراقێ ئه‌ڤرۆ دوشه‌مبى 29/1/2018 ئه‌و دۆرپێچ ل سه‌ر به‌نكێن هه‌رێما كوردستانێ راكر.

جڤاتا نوونه‌رێن عيراقێ داخواز ژ به‌نكا ناڤه‌ندى يا عيراقێ كريه‌ كو چاڤدێريا به‌نكێن هه‌رێما كوردستانێ بكه‌ت وهه‌يڤانه‌ ژى راپۆرتێن خوه‌ ل دۆر چاڤدێريكرنا وان به‌نكان پێشكێشى لژنێن تايبه‌ت ب وى بوارى ڤه‌ بكه‌ت.

ل چريا ئێكێ 2017، ژبه‌ر ئه‌نجامدانا ريفراندۆما سه‌ربخوه‌يا كوردستانێ، جڤاتا نوونه‌رێن عيراقێ داخواز ژ به‌نكا ناڤه‌ندى يا عيراقى كر دۆرپێچێ بێخيته‌ سه‌ر به‌نكێن هه‌رێما كوردستانێ.