ئه‌ڤرۆ نیوز:
دادگه‌ها ئسپانیا بریار دا كارلێس پۆجدیمۆنت، سه‌رۆكێ به‌رێ یێ كه‌ته‌لۆنیا ماف نه‌بیت ب چ ره‌نگان ڤه‌گه‌ریته ده‌ستهه‌لاتێ.
ئه‌ڤه د ده‌مه‌كی دا یه پارتییا پۆجدیمۆنت د هه‌لبژارتنێن پشتی رێفرندۆما سه‌رخوه‌بوونێ دا ده‌نگێن باش بده‌ستڤه ئینان، ناڤهاتی ل به‌لجیكایه و دخوازیت ڤه‌گه‌ریته وه‌لاتێ خوه لێ ده‌ستهه‌لاتا ئسپانیا ب سووچا جوداخوازیێ بزاڤا ده‌سته‌سه‌ركرنا وی دكه‌ت.
ئەڤرۆ نیوز، زنار تۆڤی :
ئەندامەکێ شاندێ دانوستاندكارێ هەرێما كوردستانێ ل گەل وێ لیژنا کو هاتیە هەرێما كوردستانێ ب مەرەما هووربینیێ د مووچێ فەرمانبەرێن بەغدا و هەولێرێ دا، ئاشكرا دکەت كو وێ لیژنا بەغدا هیچ دەمەک دیار نەكریە.
ئەڤرۆ شەمبیێ 27.1.2018 یوسف ئوسمان رێڤەبەرێ بەشێ پلانێ ل وەزارەتا پەروەردێ و ئەندامێ وی شاندێ چووە بەغدا بۆ گفتوگۆکرنێ ل سەر مووچەی،دیارکریه،کو ئەو لیژنا ل بەغدا یا کو نوکە هووربینیێ دكەن.د لیستا مووچێ فەرمانبەرێن هەرێما كوردستانێ دا،هێشتا چو دەم بۆ دوماهی ئینان ب كارێن خوە دیار نەكریە و د بەردەوامن.
ئەو بەرپرسێ وەزارەتا پەروەردێ دبێژیت ژی،ئە لیژنە دبێژێت، كارێن هووربینیێ د بەردەوامن و دبیت ب تنێ نەمیننە ل هەولێرێ،بەلکو دێ سەرەدانا باژێرێن دهۆك و سلێمانیێ ژی كەن،لەوما هەتا نۆکە چو دەمەک دیار نەكریە بۆ دوماهی ئیننان بۆ کارێن خوە،ژ پێخەمەت ڤرێکرنا مووچێ فەرمانبەرێن ڤان هەر دو وەزارەتان.
ل دەستپێکا مانگا بوری لیژنەکا تایبەتمەند ژ هەردو وەزارەتێن پەروەردە و ساخلەمیا هەرێما كوردستانێ ب مەبەستا گفتوگۆكرنێ ل سەر لیستا مووچێن فەرمانبەران،سەرەدانا بەغدایان كریە و هەتا نوکە ب شێوەکێ فەرمی بەغدا بریار نەدایە،کادێ مووچێ فەرمانبەرێن هەرێما كوردستانێ هنێریت یان ژی نە.
ئەڤرۆ نیوز ، زنار تۆڤی :
ئەندامەکێ كوردی د لیژنا دارایی یا پەرلەمانێ عێراقێدا دبێژیت،هاتنا حەیدەر عەبادی سەرۆك وەزیرێن عێراقێ بۆ پەرلەمانی،ژ بۆ چارەسەركرنا كێشێن بودجێ گشتی یێ 2018 چو ژ بابەتی ناهێتە گوهۆرین و ڤێ كێشێ چارەسەر ناكەت.
كێشا بودجێ 2018 یێ عێراقێ هەتا نوکە یا بەردەوامە،هەر چەندە حوکمەتێ پرۆژەک بۆ بودجەی پێشكێشی پەرلەمانی كریە، بەلێ بزاڤ بۆ خواندنا وی سەرنەگرتن،ب ئەگەرێ نەتەمامبوونا نیسابێ قانوونی،ب ئەگەرێ هەبوونا تێبینیان ژلایێ كورد و سوننەیان ڤە،لەوما دهێتە چاڤەرێ کرن،و ل ڤێ حەفتیێ عەبادی بچیته پەرلەمانی بۆ ئێكلایکرنا پرۆژە قانوونا بودجەی.
سەرحان سلێڤانەیی گوتیە، باشترین رێک بۆ چارەسەركرنا كێشا بودجێ ئەڤ سالە راكێشانا ڤی پڕۆژەیە ژلایێ حوکمەتێ ڤە و هەموارکرنا وی یە،پاشی دوبارە بۆ پەرلەمانی بهێتە رەوانە کرن،هەروەسا گوتیە،کو مێهڤانداریكرنا عەبادی د نوکەدا هیچ مفایەک نابیت،لەورا پێدڤیە پشتس هەمواركرنا ڤێ قانوونێ بهێته پەرلەمانی.
هەروەسا دیارکریە،کو هاتنا عەبادی نوکە بۆ پەرلەمانی چو تشتێ نوو روونادەت و وی دێ هەمان بەرسڤێن پێشتر هەبن،کو حوکمەتێ بەرسڤا بارستێت سیاسی داینە و دووپات كریە،کو داخوایێن پێكهاتێن سیاسی بۆ هەلبژارتنان نینە وەك حوکمەت بەحس لێ دکەت.
ل سێشەمبیا بوری حەیدەر عەبادی سەرۆك وەزیرێن عێراقێ راگەهاند بوو،کو یێ ئامادەیە بچیتە پەرلەمانی،بۆ و دانوستاندنێ ل سەر قانوونا بودجێ عێراقێ،دیسا د كۆنگرێ خوە یێ حەفتانەدا گوتبوو، هیڤیدارم کو بودجە نەبیتە قوربانی ململانێن سیاسی یێن پەرلەمانتاران.
ئه‌ڤرۆ نیوز، سه‌باح زوهێر:
كریستیانۆ رونالدۆیێ پرتوگالى ل گێمێ ئێكێ یێ یاریێ ل هه‌مبه‌ر یانا ڤالنسیا دوو هژمارێن پیڤانەیى تۆماركرن.
ئه‌ڤرۆ ل یاریا ناڤبه‌را ریال مه‌درید و ڤالێنسیا ل حه‌فتیا 21ێ یا لالیگایێ دا ب دوو گولا كریستیانۆ رۆنالدۆ كو ب لێدانا سزایێ توماركربوون ب سه‌ركه‌فتنا ریالێ یارى ب دوماهى هات ، ب ڤان هه‌ردوو گۆلا كریستیانۆ رونالدۆ ژمارا لێدانێن سزای گه‌هشته 72 لێدانا ،ب ڤێ چه‌ندێ كه‌فته پێش (هۆگۆ سانچێز)ى كو پێشتر 71 و ئێك لێدان جێبه‌جێكربوون.
رونالدۆ ل ڤان 72 لێدانا سه‌ركه‌فتى بوویه ل توماركرنا 61 گۆلا،لێ هۆگۆ سانچێز ل 71 لێدانا 56 گۆل توماركرینه،ب ڤێ چه‌ندێ رۆنالدۆ ژماره‌یه‌كا پیڤاى توماركر كو ئێكه‌مین یاریزانه زورترین لێدانێت سزای د لالیگایێ دا جێبه‌جێكربن.
لیونێل مێسێ ئه‌رژه‌نتینى ستێرا یانا به‌رشه‌لۆنا ل پلا سێ دایه ل 59 لێدانێت سزای 48 گۆل توماركرینه.
ل گۆره‌ى هه‌واله‌كا جیهانى رونالدۆ تا نها 101 لێدانێت سزایى جێبه‌جێكرینه كو 94دگه‌ل یانان بوون و 7 ژى دگه‌ل پۆرتۆگال جێبه‌جێكرینه.
ئه‌ڤرۆنيوز:
عه‌لى شه‌مخانى سكرتێرێ جڤاتا ئاسايشا نه‌ته‌وى يا ئيرانى راگه‌هاند، دديدارا هه‌فتيا بۆرى ل گه‌ل نێچيرڤان بارزانى سه‌رۆك وه‌زيرێن هه‌رێما كوردستانێ، بريارێن گرنگ هاتينه دان.
ئاژانسا (ته‌سنيم) يا ده‌نگوباسان يا ئيرانى، ل دۆر سه‌ره‌دانا نێچيرڤان بارزانى بۆ ته‌هرانێ، ژ شه‌مخانى ڤه‌گۆهاستيه كو دوێ سه‌ره‌دانێ دا بريارێن گرنگ هاتن دان.
عه‌لى شه‌مخانى راگه‌هاند ژى كو ئيرانێ په‌يوه‌نديه‌كا ديرۆكى وستراتيژى ل گه‌ل كوردان ل عيراقێ يا هه‌ى وژڤێ چه‌ندێ ژى نيگه‌رانى ژ ريفراندۆمێ ده‌ربرى بوو.
سكرتێرێ جڤاتا ئاسايشا نه‌ته‌وى يا ئيرانى ئه‌وژى گۆت كو ل ديدارا ل گه‌ل نێچيرڤان بارزانى وشاندێ دگه‌لدا، هه‌ست ب وێ چه‌ندێ كريه كو وان هاريكاريا جدى دڤێت ل گه‌ل به‌غدا، له‌وما پێدڤيه جاره‌كادى په‌يوه‌ندى ل سه‌ر بنه‌مايێ باوه‌ريێ بهێته دروستكرن.
شه‌مخانى دياركر ژى كو ل گه‌ل شاندێ حوكمه‌تا هه‌رێما كوردستانێ يێن گه‌هشتينه چه‌ندين بريارێن باش دبوارێن هه‌ڤكاريا ئه‌منى وچاره‌سه‌ركرنا كێشان ل گه‌ل عيراقێ.
ل رۆژا 21/1/2018، سه‌رۆك وه‌زيرێن هه‌رێما كوردستانێ و سكرتێرێ جڤاتا ئاسايشا نه‌ته‌وى يا ئيرانى ل ته‌هرانێ كۆمببوون.
ئه‌ڤرۆنيوز:
ئه‌ڤه ده‌مه‌كه يانا ريال مه‌دريد تووشى ئه‌نجامێن نه‌باش دبيت دخۆلا ئيسپانى دا كو چار جاران هاتيه دوراندن و3 ژوان دوراندنان ل سه‌ر ياريگه‌ها خوه يێن داين ونوكه ل رێزا چارێ دهێت ب جوداهيا 19 خالان ژ يانا به‌رشه‌لونا وئه‌ڤ چه‌نده بجه هێلانا ئه‌ركێ راهێنه‌ريا ريال ژلايێ زه‌ينلدين زێدانى ڤه نێزيك دكه‌ت.
رۆژنامێن ئيتالى به‌لاڤكر كو ريال مه‌دريد گرنگيێ ب گرێدانا گرێبه‌ستێ ل گه‌ل ماوريسيۆ سارى راهێنه‌رێ نوكه يێ يانا ناپۆلى يا ئيتالى دده‌ت كو پشتى ب دووماهى هاتنا خۆلا ئه‌ڤ ساله بهێته جهێ زێدانى.
تۆرا (سپۆرت ميدياست) يا ئيتالى به‌لاڤكر كو ريال مه‌دريد گه‌له‌ك گرنگيێ دده‌ته ئينانا ماوريسيۆى ل جهێ زێدانى ئه‌وێ پاشه‌رۆژا وى ل گه‌ل ريال بۆ جهێ گۆمانێ پشتى وان ئه‌نجامێن نه‌باش.
راپۆرتێن رۆژنامه‌ڤانى يێن ئورۆپى ئاماژێ دده‌ن كو چه‌ندين راهێنه‌ر دبه‌ربژارن بۆ وه‌رگرتنا ئه‌ركێ راهێنه‌ريا ريال مه‌دريد ئه‌وژى ههر ئێك ژ يواخيم لوف راهێنه‌رێ هه‌لبژارتيێ ئه‌لمانيا وماوريسيۆ بوكيتينۆ راهێنه‌رێ يانا توتنهام يا ئێنگليزى.
دياردكه‌ن ژ كو يانێن شيلسي يا ئينگليزى وپاريس سان جيرمان يا فه‌ره‌نسى گرنگيێ ب ئيمزاكرنا گرێبه‌ستێ ل گه‌ل ماوريسيۆ سارى راهێنه‌رێ ناپۆلى دده‌ن.
ئه‌ڤرۆنيوز:
رێڤه‌به‌ريا پۆليسێن قه‌زا سۆران ئه‌ڤرۆ شه‌مبيێ 27/1/2018، راگه‌هاند، ته‌رمى پێشنڤێژ وخوتبه‌خوينێ مزگه‌فته‌كا وى باژێرى هاته ديتن وشوونوارێن گوله‌يان ل سه‌ر له‌شى وى هه‌بوون.
په‌يڤدارێ پۆليسێن قه‌زا سۆران، هه‌وار ئه‌رگوشى دبه‌ياننامه‌كێ دا گۆت” پشتى هاتينه ئاگه‌هداركرن ب هه‌بوونا ته‌رمه‌كى ل نێزيك گوندێ سێتكانى ل ناحيا ديانا، تيمێن پۆليسێ وئاسايشێ گه‌هشتنه وى جهى ودياربوو كو ته‌رمى يێ وه‌لاتى (سامان حسێن ميرۆ) يه كو دژيێ 35 ساليێ دايه ويێ خێزانداره وئاكنجيێ ناحيا خلێفانه وكارێ وى پێشنڤێژ وخوتبه‌خوينێ مزگه‌فتا (ئيمام شافعى) يه ل خلێفان”.
هه‌وارێ دياركر” شوونوارێن دو گوله‌يان ل سه‌ر ته‌رمى هه‌بوون ول دووڤ رێڤه‌به‌ريا ئه‌وقافا سۆران وێ مه‌لاى ئێشه‌كا ده‌روونى هه‌بوو”.
گۆت ژى” ئه‌نجامێن ڤه‌كۆلينێن ده‌ستپێكى ئاماژێن ب هيز دده‌ن كو حاله‌تێ خوه‌كوشتنێ يه وته‌رم يێ هاتيه هنارتن بۆ نوشداريا داد وڤه‌كۆلين يا به‌رده‌وامه بۆ زانينا راستيا روودانێ”.
ره‌وان نهێلى
دیدارا ڤێ دوماهیێ یا سه‌رۆك وه‌زیرێن هه‌رێمێ و سه‌رۆك وه‌زیرێن عیراقێ ئه‌و په‌یامه گه‌هاند كو كورد بێ پشته‌ڤان نینن و كورد جاره‌كا دى دێ بهێز بن ڤه، پشتى روودانێن 16 ئوكتوبه‌رێ، هه‌می لایه‌نان ئه‌و هزر دكر كو كیانێ كوردى دێ ژ ناڤ چیت، لێ سه‌ره‌راى خوه‌ڤه‌كێشانا گۆران، كومه‌ل و یه‌كگرتوو و فشارێن به‌غدا بۆ نه‌هێلانا ڤى كیانێ، پێنگاڤێن سه‌رۆك وه‌زیرێن هه‌رێمێ بۆ پاراستن و مانا ڤى كیان و ئه‌زموونا هه‌رێما كوردستانێ د به‌رده‌وام بوون و ژ سه‌ره‌دانا فره‌نسا ده‌ستپێكر كو فره‌نسا د مێژوویێ دا هه‌رده‌م پشتا كوردان به‌رنه‌دایه، ئانكو دیدارا فره‌نسا پێنگاڤه‌كا باشا نێڤده‌وله‌تى بوو كو پشته‌ڤانیه‌كا نێڤده‌وله‌تى بۆ هه‌رێما كوردستانێ په‌یدا ببیت كو هه‌رێم نه‌كه‌ڤیت و ئه‌زموونا وێ سه‌ربگریت، پاشان سه‌ره‌دانێن سه‌رۆك وه‌زیران بۆ ههر ئێك ژ ئه‌لمانیا و ڤاتیكان بوونه ئه‌گه‌ر پتر پشته‌ڤانى بۆ كوردان دروست ببیت و پرانیا وه‌لاتێن ئوروپى و ئه‌مریكا ژى رژدى ل وێ یه‌كێ كرن كو پێدڤیه هه‌رێمه‌كا بهێز د چارچووڤێ عیراقه‌كا ئێكگرتى دا بمینیت، نێچیرڤان بارزانى د كۆنگرێ خوه یێ رۆژنامه‌ڤانى یێ دوهى ژى دا پشتى ل ته‌هران ڤه‌گه‌ریاى رژدى ل سه‌ر وێ یه‌كێ كو كو دیدارێن وان ل گه‌ل دوستێن وان ئه‌نجام هه‌بووینه و عه‌بادى ژى ژبه‌ر ئێك ژ وان فشاران به‌رهه‌ڤ بوویه پێشوازیێ ل شاندێ كوردى بكه‌ت، خاله‌كا دى گرنگ بۆ مانا كیانێ كوردى، راگه‌هاندنا ستراتیژیه‌تا ئه‌ڤرۆ یا ئه‌نجوومه‌نێ ئوروپا بوو كو په‌یامه‌كا دى یا دلخوشكه‌ر بوو كو قه‌راوێ هه‌رێما كوردستانێ دێ مینیت و دڤێت بمینیت، ژبه‌ر كو ئێكه‌تیا ئوروپا رژدى ل سه‌ر وێ یه‌كێ كر كو دڤێت دانوستاندنێن حوكمه‌تا هه‌رێما كوردستانێ و حوكمه‌تا عیراقێ د به‌رده‌وام بن و دستوورێ عیراقێ بهێته بجه ئینان و رژدى ل سه‌ر وێ یه‌كێ كر كو دڤێت قه‌وارێ هه‌رێما كوردستانێ بمینیت، ئانكو نوكه حوكمه‌تا هه‌رێما كوردستانێ سه‌ره‌راى وان ئاخافتنێن دهێته گوتن كو شه‌رعیه‌تا خوه یا ژ ده‌ست داى، به‌لێ یێ بوویه ناڤ و نیشانه‌ك كو ده‌وله‌تێن زلهێز پشته‌ڤانیێ لێ دكه‌ن كو كه‌فیته سه‌ر پێن خوه‌ڤه، ژبه‌ر كو گه‌له‌ك یا ئاشكرایه كو خوه‌ڤه‌كێشانا گۆران و كۆمه‌ل و یه‌كگرتوو ژ حوكمه‌تێ و نه پشته‌ڤانیكرنا حوكمه‌تێ چ تشته‌كى ناگوهریت، ژبه‌ر كو چار ساله د حكومه‌تێ دا، چه‌ند هه‌یڤ ماینه بۆ هه‌لبژارتنان، ته‌كتیكه‌كا وانه بۆ هه‌لبژارتنان و چو دى نه، ئانكو ل چاڤ وان زیانێن كو دهاتنه پێشبینى كرن پشتى ریفراندومێ به‌ر ب كوردستانێ بكه‌ڤن، هێدى هێدى هه‌رێم یێ ب كێمترین زیان ژێ ده‌ردكه‌ڤیت و ڤێ قوناغێ ژى ده‌رباز دكه‌ت، نموونه ژى ڤه‌بوونا ده‌ریێ سنورى یێ حاجى ئومران ل گه‌ل ئیرانێ و ڤه‌كرنا فرۆكخانێن هه‌رێمێ ل ده‌مه‌كێ نێزیك و هنارتنا مووچێ فه‌رمانبه‌رێن هه‌رێمێ ژ ئالیێ به‌غدا ل ده‌مه‌كێ نێزیك، هه‌مى دێ ئه‌و فاكته‌ر بن كو هه‌رێم سه‌قامگیریه‌كا دى بخوه‌ڤه ببینیت و نیازێن دوژمنان یێن وان لایه‌نێن دژى ریفراندومێ و مافێ چاره‌نڤیس و نوكه ژى دژى نه‌مانا كیانێ هه‌رێما كوردستانێ سه‌رناگرن، له‌وا پاراستنا ڤى كیانێ كوردى د كه‌ڤیته سه‌ر ملێ ههر تاكه‌كى و لایه‌نه‌كێ و ئه‌گه‌ر ئه‌م د ناڤ خوه‌ییا خوه‌دا د ئێكگرتى نه‌بین، هه‌رده‌م دێ ئه‌ڤ كیانه كه‌ڤیته دبن مه‌ترسیێ دا، هه‌روه‌كى چاوا ل 16 ئوكتوبه‌رێ كه‌تیه به‌ر مه‌ترسیا ژ ناڤچوونێ.
((ئه‌م ناخوازن شۆرشه‌كێ مینا شۆرشا لۆته‌رى هه‌لكه‌ین، مه‌به‌ستا مه ئه‌وه كو شۆڕشه‌كێ د ده‌روونا ده‌ستهه‌لاتداران دا هه‌لكه‌ین))
ڤۆلتێر
ته‌حسین ناڤشكى
ره‌نگه ههر دیتنه‌كا ره‌شبینى و گه‌شبینى ب رێژه تێدا نه‌بت و راستیا ههر تشته‌كێ نه‌ئێخته د گومانێ دا، ئه‌و دیتن بهتر نوونه‌ریا هزره‌كا به‌رته‌نگ بكت؛ ژبه‌ر هندێ بیرمه‌ندێن مینا بیرۆیێ گریكى، دیكارتێ فه‌ره‌نسى سپینۆزایێ هۆله‌ندى ب فیلۆسوف و زانایێن گوماندار و ره‌نگه گه‌شبین ژى هاتینه نیاسین و یێن وه‌ك ڤۆلتێرى و شۆبنهاورى ب كه‌سانێن ره‌شبین هاتینه لقه‌لمدان و ههر ئالیه‌كى به‌هانه و به‌لگه‌یێن خوه هه‌بووینه و تیۆریێن خوه یێن فه‌لسه‌فى پێ دسه‌لماندن و په‌یاما وان خزمه‌تا مرۆڤایه‌تێ كریه.
ره‌نگه هه‌كه كوردان ژى مینا وان جڤاكێن هشیار و خودان ئیراده زانا و فیلۆسۆفێن خوه هه‌بانه بهتر دیتنا وان زانا و فیلۆسۆفان دیتنه‌كا گوماندار، ره‌شبین و ره‌خنه‌یا ئاڤاكه‌ر بایه ل سه‌ر ژیوارێ وه‌لاته‌كى ب ناڤێ كوردستانێ، نها ره‌وش ب ره‌نگه‌گ دى بایه؛ لێ مخابن ئه‌و لاپه‌رێن ژ دیرۆكا ره‌وشه‌نبیریا ملله‌تێ كورد گه‌هشتینه مه، ژبلى هنده‌ك هزرێن ره‌خنه‌یى یێن ((ئه‌حمه‌دێ خانى)) كو ب بابێ ئه‌قلێ ره‌خنه‌یى دهێته نیاسین، وه‌ك دى پرانیا بێده‌را ره‌وشه‌نبیریا كوردان، تایبه‌ت ره‌وشه‌نبیریا كلاسیكان ره‌وشه‌نبیریه‌ك شعرى و سۆزانه بوویه و ژ كارتێكرنا ره‌وشه‌نبیریا داگیركه‌ران رزگار نه‌بووینه. واته پرانیا شعرا كلاسیكى یا كوردى وه‌ك نوونه‌را ره‌وشه‌نبیریا كه‌ساتیا كوردى ده‌ربڕین ژ په‌سنا میر و حاكمان، ئه‌ڤینى، گازنده كرن ژ فه‌له‌كێ و بێشه‌نسیێ بوویه. ژ ئالیێ رۆخساریڤه تێكستێن ئه‌ده‌ب و ره‌وشه‌نبیریا كوردى ههر پرانییا مژار و قالبێن وان ژ هونه‌رى ره‌وشه‌نبیریا ئه‌ره‌بان و فارسان و خه‌لكه‌ك دى ده‌رنه‌كه‌تنه، هه‌تا قاره‌مانێن قورتالكه‌رێن چیرۆك و چیڤانۆكێن كوردى ژى ژ هزرا داگیركه‌رانه، مینا (میرزا موحه‌ممه‌د و خاجه عه‌لى) و گه‌له‌كێن دى د روودانێن تێكستێن وان دا دیار دبن.
واته به‌هرا پتر دیتنا ئه‌و شاعر و تێگه‌هشتیێن ب ناڤێ ره‌وشه‌نبیرێن كورد دهاتنه نیاسین دیتنه‌كا گه‌له‌ك گه‌شبین بوویه و رێژه‌یا ره‌شبینیێ یان نه‌بوویه یان گه‌له‌كا لاواز بوویه و چاڤێن خوه ژ شاشیێن جڤاك و میر و حاكمێن كوردان گرتینه و بهتر په‌سنه و ستایشێن میرێن كوردان ب دیتنه‌كا سۆزانه ل سه‌ر دیتنا ئه‌قلى كریه. دێ بینین هه‌تا شاعره‌ك وه‌ك مه‌لایێ جزیرى كو ئه‌و د ناخێ خوه دا شاعره‌ك سۆفى بوویه و عشقا خودێ د عشقا دلبه‌رێ دا ئێخستیه د گومانێ دا، لێ ده‌مێ باسێ میرێن كوردان دكه‌ت به‌رامبه‌ر داگیركه‌ران، تنێ په‌سنا وان دكه‌ت و به‌رژه‌وه‌ندیێن خوه ب ههر پالده‌ره‌كى ه‌ه‌یى دپارێزت.
روودانێن دیرۆكا جڤاكێ كوردى ژ ره‌وشه‌نبیریا وى دیاردبت كو جڤاكه‌ك سۆزانه‌یه و گه‌له‌ك جاران ل بن كارتێكرنا گه‌له‌ك ئه‌گه‌ران ده‌ست نه‌دانایه سه‌ربرینێ و گۆتارا جڤاكێ وى گۆتاره‌ك په‌سنه‌یى و خه‌ملاندى ب درووشمێن ته‌یسۆك بوویه؛ ژبه‌ر هندێ هه‌رده‌م باجا خوه یا دۆڕاندنێ دایه و نه‌شیایه كاروانێ ره‌وشه‌نبیریا خوه ب كاروانێ ره‌وشه‌نبیریا دراوسییان را بگه‌هینت و بوویه دووڤه‌لانك و چاڤلێكه‌رێ ره‌وشه‌نبیریا وان داگیركه‌ران.
راسته ل ڤان 25 سالێن دووماهیێ دیتنا ره‌خنه‌یى یا هنده‌ك ره‌وشه‌نبیرێن كورد تایبه‌ت ل كوردستانا باشۆر سه‌رهلدایه و شیاینه ب رێژه‌یه‌ك باش خوه ژ قالبێن به‌رته‌نگێن سۆزا ئه‌شیرێ و مالباتێ رزگار بكه‌ن، لێ ههر نه‌كارینه وه‌ك پێدڤى كارتێكرنێ ل گۆتارا په‌سنه‌یى، ستایش و سۆزى یا جڤاكێ كوردى بكه‌ن كو پرانیا وى هێشتا ل دووڤ گۆتارا ته‌یسۆكا سیاسى دله‌یزن و تنێ درووشمێن ڤالا و هه‌ره‌مه‌كى (عشوائى) د مه‌ژیێن وان دا گه‌شه دكه‌ن. شكه‌ستنا 16ى ئوكتۆبه‌را سالا به‌ۆرى مینا سه‌دان شكه‌ستنێن دى د دیرۆكێ دا بهرههمێ وێ گۆتارا گه‌نى و ژ سۆزێ و په‌سنێ باركرى بوویه و باجدانا وێ ژى وه‌ك ههر باجدانه‌كا دى ب ده‌هان سالان كاروانێ خه‌باتا كوردان پاشڤه زڤڕاندیه.
ئاریشه‌یا مه‌زن ئه‌وه، مینا ههر سه‌ركرداتیه‌كا رۆژهه‌لاتا ناڤین، سه‌ركرداتیێن كوردى ل ده‌ڤه‌ره‌كێ ب ناڤێ هه‌رێمێ كوردستانێ دانپێدانێ ب شه‌كه‌ستنێن خوه یێن بهرههمێ بێده‌را دره‌وان، خوه‌خاپاندنێ، سۆزێ و سه‌رگه‌رمیێ ناكه‌ن داكو سه‌ر ژنووڤه ب دیتنه‌كا لۆژیكى و ئه‌قلانه ده‌ست ب خه‌باتا خوه بكه‌ن و مفاى ژ شاشیین خوه یێن كوژه‌ك ببینن، ههر به‌رده‌وامن ل سه‌ر دیتنێن خوه یێن ئێكسپایر و ههر ئێك یێ دى ب هاریكاریا دژمن و داگیركه‌رێن كوردستانێ ب خیانه‌تێ تاوانباردكه‌ت، ههر وه‌ك چو چێنه‌بوویى، ئه‌ڤه ل ده‌مه‌كى كو بێده‌را وێ گه‌شبینیا وان ل سه‌ر گه‌هشتنا ئارمانجێن ژ ده‌ستداى و خه‌ونا ده‌وله‌تێ دئاخڤت كو ئه‌قلێ سه‌ركرداتیێن كوردان ژ كیستێ خه‌لكه‌ك بیانى و سۆز و په‌سنه‌یێن گه‌شبینیه‌كا د كیستێ وان مایه.
نيشاندان