ئه‌ڤرۆنيۆز:

به‌رپرسه‌كێ وه‌زاره‌تا پێشمه‌رگه‌ هوشدارى دا ل دۆر بزاڤێن به‌غدا بۆ هه‌لوه‌شاندنا وه‌زاره‌تا پێشمه‌رگه‌ وكێمكرنا هژمارا هێزێن پێشمه‌رگه‌ى.

عه‌ميد (هه‌لگورد حكمه‌ت) رێڤه‌به‌رێ راگه‌هاندنا وه‌زاره‌تا پێشمه‌رگه‌ بۆ راديوا ده‌نگێ ئه‌مريكا گۆت( ل ده‌ستپێكێ هێزێن عيراقى دخوازت بهێنه‌ سنۆرێن سالا 2014 ونوكه‌ دڤێن بهێنه‌ ده‌ڤه‌رێن مه‌ ودخوازن  هه‌بوونا پێشمه‌رگه‌ى ل گه‌ل  له‌شكرێ عيراقى ب شێوێ مه‌فره‌زان و ب چه‌كێ سڤك بيت وئه‌وان دڤێت بهێن بۆ سنۆرێن به‌رى سالا 2003، به‌لێ هه‌رێما كوردستانێ ڤێ چه‌ندێ ره‌ت دكه‌ت).

گۆت ژى( هه‌رێما كوردستانێ پێشنيازا هه‌بوونا له‌شكرى يا هه‌ڤپشك ل ده‌رگه‌هێ ئيبراهيم خه‌ليل يێ سنۆرى كر زێده‌بارى چه‌ندين ده‌ڤه‌رێن دى يێن كو عيراق دخوازيت هه‌بوون لێ هه‌بيت، به‌لێ شاندێ له‌شكريێ عيراقى ژ وه‌زاره‌تا به‌رگريێ ل سه‌ر وێ پێشنيازێ رازى نه‌بوو).

ب ديتنا هه‌لگوردى، ئه‌و پێشنيازێن لايه‌نێ عيراقى داين، بزاڤه‌كه‌ بۆ هه‌لوه‌شاندنا وه‌زاره‌تا پێشمه‌رگه‌ى و هێزێن وێ و گۆت( ئه‌و پێشنيازێن شاندێ عيراقى بۆ هێزێن پێشمه‌رگه‌  پێشكێشكرين دوى لۆژيكى دايه‌ وچو شرۆڤه‌كرنه‌كا دى بۆ نينه‌).

ئەڤرۆ نیۆز،زنار تۆڤی:

بانکا ناڤەندیا عێراقێ هەموو بانکان ل عێراقێ ئاگەهدار دکەت کو کارێ لقێن خۆ ل هەرێما کوردستانێ رابگرن، هۆشداریێ ژی ددەتێ، ئەگەر ل ماێ حەفتیەکێدا کارێن خۆ رانەگرن،دێ وان سزا دەت.

بانکا نافەندیا عێراقێ د نڤێسینەکا فەرمیدا کو ئاراستەی بانکان کریە، راگەهاندیە:کو ب بریارا ئەنجومەنێ نوونەران یا هژمارە 58 ل 12-10-2017 دەربارەی نە فرۆشتنا دراڤێ بیانی ب وان بانکان یێن کو لقێن وان ل هەرێما کوردستانێ هەین،هەروەسا بۆ بەردەوامیا بەشداربوونا هەوە د مەزادا فرۆشتنا دراڤێ بیانی دا، داخواز دکەین مە ئاگەهدار بکەن دەربارەی هەلپەساردنا کارێ لقێن خۆ ل هەرێمێ تا ماوەیەکێ دیار نەکری،ل ماوێ حەفتیەکێ ژ رێککەفتنا دەرچوونا ڤێ نڤێسینێ.

ئەڤ نڤێسینە ژ 7-11-2017 دەرچوویە ژ لایێ جێگرێ پارێزگارێ بانکا ناڤەندی یا عێراقێ و هاتیە ئیمزاکرن.

ئەڤە د دەمەکێ دایە،کو پشتی ئەنجامدانا گشتپرسیا باشۆرێ کوردستانێ بۆ جۆدابوونێ ژ عێراقێ ل 25-9-2017 دا، حوکمەتا عێراقێ چەندین رێوشوێنێن سیاسی و سەربازی و ئابووری بۆ فشار خستنەسەر هەرێما کوردستانێ گرتینە بەر و یا رژدە ل سەر هندێ کو ئەنجامێن گشتپرسیێ بهێنە هەلوەشاندن.

ئه‌ڤرۆ نیوز، نه‌وزاد هلۆرى:

شيره‌تكارێ جڤاتا ئاسایشا هه‌رێما كوردستانێ پێشوازى ل هنارتیێ تایبه‌تێ وه‌لاتێ نه‌رویج بۆ رۆژهه‌لاتا ناڤه‌راست و شانده‌كێ دگه‌لدا كر ، دكۆمبوونه‌كێ دا دوپاتى ل وێ یه‌كێ هاته‌ كرن ئاریشێن دناڤبه‌را هه‌رێمێ و عیراقێ ب شه‌رى ناهێنه‌ چاره‌كرن، به‌لكو ب دانوستاندنێ.

مه‌سرور بارزانى شيره‌تكارێ جڤاتا ئاسایشا هه‌رێما كوردستانێ د چارچوڤێ پێشوازیا “كنوت لێن ” هنارتیێ تایبه‌تى وه‌لاتێ نه‌رویج بۆ رۆژهه‌لاتا ناڤه‌راست دیاركر كو پێدڤیه‌ هه‌موو ده‌ستوورێ عیراقێ بهێته‌ بجهئينان نه‌ تنێ چه‌ند ماده‌ و برگه‌ و گۆت: ( كارڤه‌دانێن عیراقێ هه‌مبه‌رى ریفراندۆما سه‌ربخوه‌ یا كوردستانێ  د ده‌ستوورى نه‌بوون و به‌لگه‌بوو‌ ل سه‌ر نیازێن خراپ یێن هنده‌ك گروپ و لایه‌نێن عیراقى ‌ به‌رامبه‌ر ده‌ستوور و سیاسه‌تا نوكه‌ ياعیراقێ د به‌رژه‌وه‌ندیا لایه‌نه‌كێ دیاركرى دا، هه‌ر پێرابوون و گرتنه‌به‌ره‌كا له‌شكرى دێ ئالۆزیان زێده‌تر كه‌ت و چو ئه‌نجام ژى نابن ، له‌وما پێدڤیه‌ به‌غدا دانوستاندنێن بێ مه‌رج ل گه‌ل هه‌رێما كوردستانێ بكه‌ت و ئاریشێن دناڤبه‌را هه‌ردولا ژى تنێ ب دانوستاندنێ دێ چاره‌بن ).

د كۆمبوونێ دا به‌حس ل په‌یوه‌ندیێن نه‌رویج و كوردستانێ و دووماهى گوهۆرين و پێشهاتێن عیراق و هه‌رێما كوردستانێ و ده‌ڤه‌رێ و دانوستاندنێن دناڤبه‌را هه‌ولێرێ و به‌غدا هاتنه‌ به‌حسكرن ، هه‌ڤده‌م شاندێ نه‌رویجى پشته‌ڤانیا وه‌لاتێ خوه‌ بۆ دانوستاندنێن دناڤبه‌را هه‌ردو لايه‌نان ل دووڤ ده‌ستوورى كر بۆ چاره‌كرنا ئاریشێن خوه‌  و خواست ژى هه‌وڵێر و به‌غدا بۆ قۆناغا پشتى داعشێ و ئاڤه‌دانكرنا ده‌ڤه‌رێ خوه‌ به‌رهه‌ڤ بكه‌ن.