ئه‌ڤرۆ نیوز ، زنار تۆڤى:
پشتى كو شانده‌كێ هه‌ڤبه‌ش یێ بزاڤا گۆران و كۆمه‌لا ئیسلامى و هه‌ڤپه‌یمانیا دیمۆكراسى و دادپه‌روه‌ریێ سه‌ره‌دانا به‌غدا كرى،په‌رله‌مانتاره‌كێ كورد ل په‌رله‌مانێ عێراقێ راگه‌هاندیه كو ئه‌و شانده بۆ به‌رژه‌وه‌ندیا كوردان نه‌چووینه به‌غدا،چونكى نوكه ب تنێ به‌رژه‌وه‌ندیا كوردان د هندێ دایه كو كورد ئێكگرتى بن و خودان ئێك هه‌لویست بن.
شاخه‌وان عه‌بدوللا ئه‌ندامێ فراكسیۆنا پارتى دیمۆكراتى كوردستان ل په‌رله‌مانێ عێراقێ بۆ ئه‌ڤرۆ نیوز دیاركریه:كو ئه‌و شاندێ هه‌ڤبه‌ش یێ كۆمه‌لا ئیسلامى و بزاڤا گۆران و هه‌ڤپه‌یمانیا دیمۆكراسیێ و دادپه‌روه‌ریێ یێن كو سه‌ره‌دانا به‌غدا كرین و ل گه‌ل سه‌رۆك وه‌زیرێن عێراقێ كومبووین،ژبۆ به‌رژه‌وه‌ندیا خه‌لكێ كوردستانێ نه‌چووینه به‌غدا،چونكى هه‌كه ئه‌و شاندێ هه‌ڤبه‌ش ژبه‌ر مووچه‌ى و قه‌یرانێن هه‌رێمێ چو بن،چو مفا تێدا نینه و عێراق چو ب ده‌ستێ وان ڤه نابه‌رده‌ت،چونكى بۆ مه‌ره‌ما دانا مووچه‌ى و چاره‌كرنا قه‌یرانان دڤێت حوكه‌تا هه‌رێما كوردستانێ سه‌ره‌دانا به‌غدا بكه‌ت و ئه‌ڤ چه‌نده كارێ حوكمه‌تا هه‌رێما كوردستانێ یه،دیسا چوونا حزبێن سیاسى ژ هه‌رێمێ بۆ به‌غدا،ب تنێ دڤێت ل گه‌ل حزبێن سیاسى ل به‌غدا دانیشن و كارێ وان نینه ل گه‌ل حوكمه‌تا عێراقێ دابنیشن و دانوستاندنان بكه‌ن.
هێشتا گوت ژى:هه‌كه هه‌موو پاریتێن سیاسى یێن كوردستانێ پێكڤه نه‌چنه به‌غدا،بزاڤا گۆران و كۆمه‌لا ئیسلامى و هه‌ڤپه‌یمانیا دیمۆكراسى و دادپه‌روه‌ریێ نه‌شێن چو بۆ خه‌لكێ كوردستانێ بكه‌ن و چو ب ده‌ستێ وان ژى ڤه ناهێت ل به‌غدا،دیسا نوكه ئه‌و هه‌ردو حزب ل گه‌ل هه‌ڤپه‌یمانیا دیمۆكراسى و دادپه‌روه‌ریێ دناڤا حوكمه‌تا هه‌رێمێ ژى دا نینن،له‌ورا نه‌شێن چو بكه‌ن ل به‌غدا.
شاخه‌وان عه‌بدوللا هه‌روه‌سا دبێژیت ژى:خالا سه‌رنجراكێش ئه‌وه بۆچى به‌غدا پێشوازیێ ل وان حزبان دكه‌ت و بۆچى پێشوازیێ ل حوكمه‌تا هه‌رێما كوردستانێ ناكه‌ت،دیسا چوونا شاندێن حزبى د نوكه دا یا پێدڤى نینه ب چنه به‌غدا،له‌ورا ب تنێ د نوكه دا ئه‌م پێدڤى هندێ نه كو شاندێ حوكمه‌تا هه‌رێمێ سه‌ره‌دانا به‌غدا بكه‌ت،دیسا شاندێ وان حزبان نه‌شێن چو هه‌ڤپه‌یمانى و رێككه‌فتنان ژى ل گه‌ل لایه‌نێن عێراقى دا بكه‌ن،چونكى حزب و لایه‌نێن عێراقى هه‌رده‌م رێككه‌فتان ل گه‌ل حزبێن مه‌زن دكه‌ن.
نيشاندان
