ئه‌ڤرۆنيوز:

حوكمه‌تا هه‌رێما كوردستانێ، ئه‌ڤرۆ سێشه‌مبى 2/1/2018 راگه‌هاند كو ئه‌و پێشوازىێ ل هه‌ر بزاڤ وپێنگاڤه‌كا به‌غدا دكه‌ت بۆ ده‌ستپێكرنا دانوستاندنان دگه‌لدا.

ل دۆر وان ده‌نگوباسێن دچه‌ند ده‌زگه‌هێن راگه‌هاندنێ ل عيراقێ وهه‌رێما كوردستانێ ل سه‌ر دووماهى پێشهاتێن دانوستاندنێ دناڤبه‌را به‌غدا وهه‌ولێرێ دا وداخۆيانيێن چه‌ند به‌رپرسێن عيراقى ل دۆر وێ چه‌ندێ دهێنه‌ به‌لاڤكرن، سه‌فين دزه‌يى په‌يڤدارێ فه‌رميێ حوكمه‌تا هه‌رێما كوردستانێ بۆ مالپه‌رێ حوكمه‌تا هه‌رێمێ گۆت” حوكمه‌تا هه‌رێما كوردستانێ پێشوازيێ ل هه‌ر پێنگاڤه‌كا ئه‌رێنى بۆ دانوستاندنێ ل پێناڤى چاره‌سه‌ركرنا كێشێن دناڤبه‌را هه‌رێما كوردستانێ وحوكمه‌تا فيدرالى يا عيراقى دا ل سه‌ر بنه‌مايێ دستوورى دكه‌ت”.

دزه‌يى گۆت ژى” جڤاتا وه‌زيرێن هه‌رێما كوردستانێ ددووماهى كۆمبوونا خوه‌دا دووپاتى ل هه‌لويستێ خوه‌ كريه‌ كو يا به‌رهه‌ڤه‌ بۆ چاره‌سه‌ركرنا هه‌موو كێشان ل سه‌ر بنه‌مايێ دستوورێ عيراقى وحوكمه‌تا هه‌رێمێ پێشوازيێ ل هه‌ر پێنگاڤه‌كێ دكه‌ت كو رێ بۆ ده‌ستپێكرنا دانوستاندنێ دناڤبه‌را حوكمه‌تا هه‌رێما كوردستانێ وحوكمه‌تا فيدرالى يا عيراقى دا خوه‌ش بكه‌ت”.

په‌يڤدارێ فه‌رميێ حوكمه‌تا هه‌رێمێ راگه‌هاند ژى” هه‌ر دڤى چارچۆڤه‌ى دا، حوكمه‌تا هه‌رێمێ پێشوازيێ ل وان ئاماژه‌ وپێنگاڤان دكه‌ت كو ل هه‌فتيا بۆرى ل به‌غدا ده‌ركه‌فتين ومه‌ جۆره‌ك ژنيازپاكيێ ژێ ديت، وه‌كو سه‌ره‌دانا شانده‌كێ حوكمه‌تا عيراقێ بۆ هه‌رێما كوردستانێ وداخوازكرنا پێكئينانا لژنه‌كا هه‌ڤپشك بۆ دانوستاندنێ ده‌رباه‌رى ده‌رگه‌هێن سنورى وفرۆكخانان وبه‌نداڤێن هه‌رێما كوردستانێ وداخوازكرنا ليستا مووچێن هه‌ردو وه‌زاره‌تێن په‌روه‌ردێ وساخله‌ميێ ژلايێ حوكمه‌تا عيراقى يا فيدرالى ڤه‌ ب مه‌ره‌ما هنارتنا مووچان”.

سه‌فين دزه‌يى ل دۆر ڤه‌كرنا ده‌رگه‌هێن سنورى يێن هه‌رێما كوردستانێ ل گه‌ل ئيرانێ گۆت” حوكمه‌تا هه‌رێما كوردستانێ ب ڤێ پێنگاڤێ يا خوه‌شحاله‌ وب پێزانين ڤه‌ پێشوازيێ لێ دكه‌ت، هه‌روه‌سا يا ئاماده‌يه‌ ل دۆر كێشێن ب رێڤه‌برنا ده‌رگه‌هێن سنورى وفرۆكخانان ژى ل گه‌ل حوكمه‌تا عيراقێ دانوستاندنان بكه‌ت وب گۆره‌ى وان ميكانێزمێن  دستوورێ عيراقێ دياركرين، هاريكاريێ وهه‌ماهه‌نگيێ ل گه‌ل به‌غدا بكه‌ت بۆ گه‌هشتن ب چاره‌سه‌ريه‌كا هه‌ڤپشك كو دبه‌رژه‌وه‌نديا هه‌ردو لايه‌نان دا بيت”.

ئەڤرۆنیۆز، سالار دۆسكی:

بوخاری عەبدوللا خدر چاڤدێرێ سياسى ومامۆستایێ‌ زانستێن سیاسی ل زانكۆیا سەلاحەدین بۆ ئەڤرۆ نیۆز گۆت: هێزەكا شوفینی ل عیراقێ‌ هەیە، عەبادی هزر دكەت كو سەركەفتیێ‌ شەری یە، دیسا ژ بەرهەلبژارتنان جادا عیراقی هوسا تێ دگەهیت یێ‌ دژاتیا كوردان بكەت دێ‌ پتر دەنگان ئینيت و هه‌كه‌ ل گەل كوردان رێككەفتنێ‌ ئەنجام بدەت دێ‌ شكەستنێ‌ ئینيت، ئەڤە ئەگەرن عەبادی مەرجان دانیت بۆ دانوستاندنان ل گەل هەرێما كوردستانێ‌.

بوخارى عه‌بدوللا گۆت ژى: دڤێت فشارەكا دەرڤە بۆ سه‌ر سەرۆك وەزیرێن عیراقێ‌ هه‌بيت بۆ ڤی هەلویستێ‌ بێ‌ رامان و دانوستاندنێ  ل سەر بنیاتێ‌ دەستوری بكه‌ن، دیسا عەبادی پێدڤی ب سەنگا كوردان هەیە ل هەلبژارتنان بۆ سەركەفتنێ‌ چونكى دناڤا خوە دا  شیعان ململانێ‌ هەیە و ب ڤی رەنگی كورد دێ‌ سەركەفتنێ ئێكلاكەن و دبینم دێ‌ ئەڤ هەلویستە بەردەوام بیت.

خوياكر ژى: هەلویستێ‌ هەرێما كوردستانێ‌ بەرامبەر بەغدا كو دێ‌ چنە بەغدا دانوستاندنان كەن ل سەر بنیاتێ‌ دەستورێ‌ عیراقێ‌ ئەفە كارەكێ‌ باشە، دا كو كوردان ژی فشار ل سەر بەغدا هەبیت، دڤێت كورد ئێكگرتی بن و ئەڤە راستیە حوكمەتەكا ئێكگرتی دروست بكەین و هه‌كه‌ ململانێ‌ ژی هەبیت به‌لێ‌ ل سەر بنیاتێ‌ دانوستاندن ل گەل بەغدا دڤێت ئێكگرتی بن و ئێك هەلویست و گوتار مە هەبیت، دیسا ئێكگرتنا كوردان دێ‌ سەنگا وان ل دەرڤە ژی باشتر نیشا دەت و ئەڤە پشتگيریەكا ب هێزه‌ ل ناڤخوه‌ و دەرڤە كو ل سەر بنیاتێ‌ دەستوری ل گەل بەغدا دانوستاندنان بكه‌ن.

بوخاری ئەو ژی گۆت: پاشه‌رۆژا‌ دەڤەرێ‌ دكەڤیتە سەر ستراتیژیەتا ئەمریكا و رۆسیا ل سالا نوو دا كا چ بەرنامێ نوو هەیە و چ پلان هەیە و ب مخابنی ڤە ئەم كەتینە ژێر كاریگەریا ڤان پرۆژێن وەلاتێن زلهێز ل  دەڤەرێ‌، دیسا پێشبینی دكەم ل سالا داهاتوو ئەمریكا فشارەكێ‌ بێخیتە سەر دەستهەلاتدارێن عیراقێ‌ كو ل گەل سەركرداتیا كوردستانێ‌ رێككەفتنەكێ‌ ئەنجام بدەن و كێشە ب دیالوكێ‌ بهێنە چارەسەركرن و ئەڤە دبەرژوەندا هەموو خەلكێ‌ عیراقێ‌  و كوردستانێ‌ دایە.

بوخاری دياركر: ب مخابنی ڤە ب شێوەكێ‌ ئەرزان فرۆش ئەمریكا مامەلە ل گەل مللەتێ‌ كورد كر، ئەم هەڤپەیمانێن ئەمریكا بووین دژی داعشێ و مە قوربانی داینە و دڤیابا ئەڤە ل بەرچاڤ هاتبا وەرگرتن، مە ریفراندۆم ئەنجام دا مە بۆچوونا خوە دیاركر و ئەڤە ئاسانە و بتنێ‌ مه‌ گۆتیە سەربەخوه‌ بین یان نە، مە نە گۆتیە دڤێت ئەم سەربەخوه‌ بین، دیسا مە گۆتیە خەلكێ‌ كوردستانێ‌ پاشه‌رۆژا خوە ل گەل عیراقێ‌ چەوا بڤێـت و بتنێ‌ بۆچوونا خوە دیاركەت، باشە چەوا ئەڤ بۆچوونە بەرامبەر سزایەكێ‌ هوسا گران بیت، ئەڤە داگیركرنا كوردستانێ‌ یە وژناڤبرنا دستووری یە و خەون وهیڤێن خەلكێ‌ كوردستانێ‌ یە و هەموو دچارچۆڤێن دستوورێ‌ عیراقێ‌ دانە.