NO IORG
نووترين نووچه
Facebook

ئەڤرۆ نیۆز،زنار تۆڤی:

رێکس تیلەرسن، وەزیرێ دەرڤە یێ ئەمریکا، گەشتەکا فەرمی بەرەف رۆژهەلاتا ناڤین،باشۆرێ ئاسیا و ئورۆپا دەستپێکر، ئارمانج ژڤێ گەشتا دپلۆماسی یا تیلەرسنی گەهاندنا پەیاما ئەمریکایە سەبارەت رەوشا عێراقێ و سووریا و هەروەسا کێمکرنا کاریگەریێن ئیرانێ یە دڤێ دەڤەرێ دا.

تیلەرسن ل بنگەهێ سەربازی یێ ئاندریۆس ل ماریلاند برێکەفت و بریارە سەرەدانا هەر ئێک ژ وەلاتێن سعودیە، پاکستان و هندستانێ بکەت،ل دەمێ ڤەگەریانێ دا بۆ ئەمریکا،ل رۆژا 27 ئۆکتۆبەرێ دێ چیته سویسرا ژی.

تیلەرسن دێ ل ریاز بەشداریێ ل ئێکەمین کۆمبوونا ئەنجوومەن هەماهەنگیێ دناڤبەرا سعودیە و عێراقێ دا کەت،د ڤێ کۆمبوونێدا حەیدەر عەبادی سەرۆک وەزیرێ عێراقێ ژی دێ ئامادە بیت،تیلەرسن دێ هەولدەت کو رێکێن گەشەدانا پەیوەندیێن دناڤبەرا سعودیە و عێراقێ دا بێخیته بەرچاڤ.

ئەمریکا دڤێت ب ڤێ رێکێ کاریگەریێن ئیرانێ ل سەر عێراقێ کێمتر لێ بکەت و پەیوەندیێن دناڤبەرا عێراقێ و سعودیە بهێزتر لێ بکەت.

هەروەسا تیلەرسن دێ ل گەل بەرپرسێن سعودیە بابەتێ هەلمەتا سەربازیی یا وی وەلاتی ل دژی چەکدارێن حوسییان سەر ب ئیرانێ ل یەمەن و بابەتێ قەیرانا قەتەرێ گوتۆبێژ کەت.

پشتی ریاز وەزیرێ دەرڤە یێ ئەمریکا دێ سەرەدانا دەوحە یا پایتەختێ قەتەر و دا ئیسلام ئاباد و نیودەلهی کەت،هەروەسا دێ ستراتیژیا ئەمریکا بۆ باشۆرێ ئاسیا روون کەت و دێ جەخت کەتە سەر روو ب روو بوونا تیرۆریزمێ ل ئەفغانستان و پاکستانێ.

374

ئه‌ڤرۆ نیوز ، نه‌وزاد هلۆرى:
پێشمه‌رگه‌یه‌ك كو نها ل پردێ د ئه‌ركێ به‌ره‌ڤانیكرنێ دایه‌ دژى حه‌شد شه‌عبى و دوهى ژى پشكدارى د شه‌رى دا كر بو و ب هه‌ڤكاریا پێشمه‌رگێن قاره‌مان داستانێن مه‌زن توماركرن ، سوزدا كو هه‌تا مرنێ چه‌كى نه‌دانیت و بو ڤێ مه‌ره‌مێ ژى چه‌كێ خوه‌ ب ده‌ستێ خوڤه‌ كه‌لامچه‌كر.

وه‌لید خورشید ئه‌و پێشمه‌رگه‌یه‌ كو چه‌ك ب ده‌ستێ خوڤه‌ كه‌لامچه‌كرى بو ئه‌ڤرۆ نیوز گۆت: (دوهى من ژى لگه‌ل پێشمه‌رگێن قاره‌مان پشكدارى د شه‌رێ دژى تیرورستێن حه‌شد شه‌عبى و پاسدارێن ئیرانێ دا كر و بو مه‌ وه‌كو پێشمه‌رگه‌ جوداهى نینه‌ كو شه‌رێ داعش بكه‌ین یان حه‌شد شه‌عبى ژ به‌ركو هه‌ردوو دوژمنێن مه‌نه‌ ، و سوپاس بو خودێ ئه‌م شیاین دوهى ب سه‌ركه‌ڤین و دوژمنى بشكێنین ، نها ژى ئه‌ز و هه‌موو پێشمه‌رگه‌ د سه‌نگه‌رێ به‌ره‌ڤانیێ دامه‌ و هه‌تاكو دلوپه‌كا خوینێ دگیانێ مه‌ مابیت ئه‌م سه‌نگه‌رێن خوه‌ چول ناكه‌ین)

زێده‌تر گۆت: ( من خێزان و زاروك و كه‌س و كارێن خوه‌ هێلان و به‌ر ب سه‌نگه‌رێن به‌ره‌ڤانیێ ل كوردستانێ چوم ل پردێ و من چه‌كێ خوه‌ ب ده‌ستێ خوڤه‌ كه‌ملاچه‌كریه‌ و سوزێ ب كوردستانێ ژى دده‌م كو چه‌كێ خوه‌ نه‌دانم هه‌تاكو شه‌هید دبم یان ژى كوردستان رزگار ببیت)

وه‌لیدى پێشتر ژى به‌رامبه‌ر تیرورستێن داعش ل مێحوه‌رێ گوێر – مه‌خمور شه‌ركریه‌ و نها ژى ل پردێ یه‌ ، و خودان شه‌ش زاروكه‌ و ل باژێرێ دهۆكێ ژى ئاكنجیه‌.

22684890_2044249412477727_1338697241_n 22687963_2044124032490265_5868156276249205252_n 22752619_2044249382477730_145514792_n

ئه‌ڤرۆ نیوز ، نه‌وزاد هلۆرى:
پشتى كو هێزێن میلشیاتێن حه‌شد شه‌عبى ل كه‌ركوك و ده‌روبه‌را و شنگاڵ و زمار درۆست بوى ، دماوه‌یێ سێ رۆژێن بورى دا 10 هزار كه‌س ئاواره‌یێ سنوورێ پارێزگه‌ها دهوكێ بوینه‌.

دڤى واریدا” ئیسماعیل محه‌مه‌د ” جێگرێ پارێزگارێ دهوكێ بو كاروبارێن ئاواره‌ و په‌نابه‌ران بو ئه‌ڤرۆ نیوز گۆت: ( ژبه‌ر وان ئالوزیێن كو ل كه‌ركوك و ده‌وروبه‌ر و شنگال و زومار و ده‌وربه‌ر درۆست بوى ، ل ماوه‌یێ سى رۆژێن بورى 10 هزار كه‌س جاره‌ك دن ئاواره‌یێ سنوورێ پارێزگه‌ها دهوكێ بوینه‌ كو پرانیا وان ل شنگال و زمار هاتینه‌ و هنده‌ك خێزان ژى ل كه‌ركوكێ به‌ر ب سنوورێ پارێزگه‌ها دهۆك هاتینه‌)

زێده‌تر گۆت: ( ئه‌م وه‌كو كارگێریا پارێزگه‌ها دهۆك ب نێزیكى هایدارێ روودانێ نه‌ و زانیاریان لسه‌ر وه‌ردگرین و دنڤیسین و پاشان ره‌وانه‌یێ وان جهان دكه‌ین كو په‌یوه‌ند ب بابه‌تى ڤه‌ هه‌یه‌ ، و د نهادا پشكه‌كا زور یا وان ئاواره‌یان چوینه‌ جهێن خوه‌یێن كه‌ڤن و هنده‌ك ژى چوینه‌ مالێن كه‌س و كارێن خوه‌ و هنده‌ك ژى چوینه‌ ده‌رڤه‌یێ كه‌مپان ئاكنجیبووینه‌ ، و دنهادا حكومه‌تا هه‌رێما كوردستانێ ژى كه‌مپا ماملیان بو وان ئاواره‌یان دیاركریه‌ و هه‌موو بو وان كه‌مپان دهێنه‌ ڤه‌گوهاستن)

جێگرێ پارێزگارێ دهوكێ دیاركر ژى كو ئه‌وان بانگ ل رێكخراوێن مرۆڤایه‌تى و خێرخوازى و لایه‌نێن په‌یوه‌ندیدار یێن نافخوه‌ و جیهانى كرینه‌ و گۆت ژى: ( پێدڤى یه‌ ب زوترین ده‌م لایه‌نێن شوله‌ژێ كار بكه‌ن بو دابینكرنا پێدڤیێن ژیانا رۆژانه‌ بو وان ئاواره‌یان)

ئه‌ڤرۆ نیوز ، نه‌وزاد هلۆرى:
رێكخراوا هیومان رایتس وچ یا جیهانى راپورته‌كا تایبه‌ت لسه‌ر ئه‌وان بنپێكر و هێرشێن كو ژلایێ حه‌شد شه‌عبى ل كه‌ركوك و قه‌زا و ناحیێن سه‌ر ب وێڤه‌ به‌لاڤكر و ل گوره‌ى راپورتا وان هژماره‌كا وه‌لاتیان هاتیه‌ كوشتن و برینداركرن و چه‌ندان هاتینه‌ وێرانكرن و سوتن.

راپورتا وان دیاركر كو ژ ئه‌گه‌را ته‌قه‌كرنا ژ هه‌مه‌ره‌كا هێرشان یا هێزێن عیراقێ ل ناحیه‌كا نێزیك كه‌ركوكێ دناڤبه‌را پێشمه‌رگه‌ى و هێزێن عیراقى پێنج وه‌لاتیێن مه‌ده‌نى هاتینه‌ كوشتن و 51 كه‌س ژى برینداربووینه‌ و ئاماژه‌ ب وێ یه‌كى ژى كریه‌ كو پێدڤى یه‌ هێزێن عیراق و كوردستانێ ئاریشه‌یێن خوه‌ ب رێیه‌ك دن چاره‌سه‌ر بكه‌ن كو تێدا رێزێ ل مافێن مرۆڤى بهێته‌گرتن و ئازادیێن مه‌ده‌نى و سه‌ر و مالێ وه‌لاتیان بهێته‌ پاراستن.

د پشكه‌كا دن یا راپورتێ دا ل ناحیا خورماتو ل تاخێ كومار كو پرانیا وان كوردن زێده‌ترى 10 بازارێن كوردان هاتینه‌ سوتن و هژماره‌كا زور یا ترومبێل و مالێن كوردان هاتینه‌ سوتن و تالانكرن و تێله‌ڤزیوون و كومپیوته‌ر و ئامیرێن ئه‌لیكترونى هاتینه‌ دزین ، ئه‌ڤ سه‌ره‌راى كوپ ولیسێن ته‌نگاڤیان هه‌بوون به‌لێ تنێ بینه‌ربوون.

ل داویا راپورتێ ژى هاتیه‌: (پێدڤى یه‌ ده‌ستهه‌لاتدارێن عیراقێ خوه‌ ژ سوتن و وێرانكرنا مالێن خه‌لكێ مه‌ده‌نى بپارێزن و دادگه‌ها هه‌موو وان كه‌سان ژى بكه‌ نكو تاوانبارین ب وان ده‌ستدرێژیان ، هێزێن ته‌ناهیێ ژى دڤێت ب رولێ خوه‌ رابن)

ئەڤرۆ نیۆز،زنار تۆڤی:

کۆمپانیا رووسنەفت یا رووسی راگەهاند،کو ئەو دێ رێککەفتنا خۆ ل گەل حوکمەتا هەرێما کوردستانێ جێبەجێ کەت.

د راگەهاندنەکێدا، کۆمپانیا رووسنەفت یا رووسی راگەهاندیە،کو پشکا رووسنەفت د وێ رێککەفتنێدا دێ %60 بیت و د قۆناغا ئێکێ دا، نەفتا کوردستانێ دێ هنێریته پالاوگەهێن رووسیا.

وێ کۆمپانیا رووسی ئاماژە ب هندێ ژی دایە،کو رێککەفتنا وان،کوو ل 2 هەیڤا بوری ل گەل حوکمەتا هەرێما کوردستانێ ئیمزاکریە،دێ جێبەجێ کەن،کو ل دووڤ وێ رێککەفتنێ،رووسنەفت دێ نەفتێ ب رێیا بۆریا نەفتا کوردستانێ ڤرێکەتە بازارێن جیهانی.

جێبەجێکرنا وێ رێککەفتنێ ژلایێ کۆمپایا رووسنەفت، کو ئێکە ژ مەزنترین کۆمپانیانیێن نەفتێ د جیهانێدا،د دەمەکێ دایە، کو حوکمەتا عێراقێ گەمارۆیا ئابووریی و ئەسمانی ئێخستیە سەر هەرێما کوردستانێ.

ئه‌ڤرۆ نیۆز،عه‌زیز هه‌ورامی:

دەمێ ل 16.10 هێزێن ئێکەتیێ چەپەرێن خۆ بەرداین و ده‌سته‌یه‌كا دناڤ وێ حزبێدا پێشوه‌خت رێککەفتن له گه‌ل حه‌شدا شه‌عبی كری،ل‌ سنورێ پارێزگەها كه‌ركوكێ ئه‌و باژێره‌ كه‌فته‌ ژێر ده‌ستێ حه‌شدا شه‌عبی،د ماوێ ڤان چه‌ند رۆژان دا حه‌شدێ مال و دوكانێن وەلاتیان دسووژیت و گه‌نجێن وی باژێری ده‌ستگیر دکەن و سڤکاتیێ ب ‌خێزانێن وان د‌كه‌ن،جێگرێ به‌رپرسێ ئه‌نجومه‌نێ سه‌ركردایه‌تیا پارتی ل كه‌ركوكێ دیاردکەت،کو حه‌شدا شه‌عبی کارێن هۆڤانە هەمبەری وەلاتیێن كه‌ركوكێ دکەت.

دیاری حوسێن جێگرێ به‌رپرسێ ئه‌نجومه‌نێ سه‌ركردایه‌تا پارتی دیموكراتی كوردستان بۆ ئه‌ڤرۆ نیۆز دبێژیت:نوکە ل كه‌ركوكێ رەوش زۆر ئالۆزبوویە و هێزێن حه‌شدا شه‌عبی مال و دوکانێن خەلکێ تالان دکەن و سڤکاتیێ ب خەلکێ وی باژێری دکەن،لەورا هژمارەکا مەزن یا خەلکێ ئاواره‌ بووینە.

هەروەسا گوت ژی:نوکە حەشدا شەعبی لایه‌نگرێن حزبێن كوردستانی و ل گه‌ل ئه‌و توركمانێن کو ل گەل کوردان بووینە دگرن و مولک و مالێن وان تالان د‌كه‌ن و هەروەسا خانی دوکانێن وان ژی دسووژن،نوکە سوپایێ ئێرانێ حوکمی دکەت ب پشتەڤانیا حه‌شدا شه‌عبی و كۆمه‌کا به‌رپرسێن ئێکەتیا نیشتیمانی یا كوردستانێ.

ئه‌و چەند ژی گوت:دوهی چەندین خێزان ڤەگەریانە كه‌ركوكێ،لێ جارەکادی ژ کەرکوکێ دەرکەفتن‌،چونکی نوکە حەشدا شەعبی لایەنگر و كادرێن پارتی ده‌ستگیر دکەن.

دیاری حسێن خویاکر ژی:هەموو مال و دوكانێن كوردان ل دووز خورماتۆ هاتینە سووتن،ئەوا نوکە حه‌شدا شه‌عبی دکەت،هەما كریارێن تیرۆرستێن داعشن و ئەڤە ژ وان خرابترن ژی.

ئه‌ڤرۆ نیوز ، هلورى:
سه‌رۆكێ هه‌رێما كوردستانێ مه‌سعود بارزانى په‌یامه‌ك به‌لاڤكر و د په‌یاما خوه‌ دا داخوازێ ل هه‌موو گه‌لێن جیهانێ و كوردستانیێن ده‌رڤه‌ دكه‌ت كو خوه‌ نیشاندانێن ئاشتیانه‌ ل وه‌لاتێن ئه‌و تێدا بكه‌ن و تێدا داخواز بكه‌ن كو ئه‌و وه‌لات ریێ ل كوشتن و دورپێچا لسه‌ر هه‌رێمى بگرن و ژبه‌ركو گه‌لێ كوردستانێ كه‌فتیه‌ ل به‌ر دورپێچ و سزادانێن بكوم
ئه‌ڤا لخوارێ ده‌قا وێ یه‌

بناڤێ خودێ مه‌زن و دلوڤان
جه‌ماوه‌رێ سه‌ر بلندێ كوردستانێ
كوردستانیێن ده‌رڤه‌یێ وه‌لاتى
رایا گشتى یا جیهانێ

پشتى كو گه‌لێ كوردستانێ ب ره‌نگه‌كێ ئاشتیانه‌ ته‌عبیر ل رایا خوه‌ كرى د دیاركرنا چاره‌نڤیسێ خوه‌ دا ، كو مافه‌كێ ئاسایى و سرۆشتیێ هه‌ر گه‌ل و نه‌ته‌وه‌یه‌كێ یه‌ ، نها گه‌لێ مه‌ كه‌فتیه‌ ل به‌ر هه‌ره‌شه‌ و ئابلوقه‌ و سزادانا ب كوم ، حكومه‌تا عیراقێ ژى ب ناڤێ فه‌رزكرنا قانونێ مژولێ سزادانا گه‌له‌كێ یه‌ كو تنێ رایا خوه‌ ده‌ربریه‌ و چوو تاوان ژى نه‌كرینه‌ ، ئه‌ڤ سزادانه‌ كو ل دژى گه‌لێ مه‌ هه‌یه‌ بنپێكرنا هه‌موو سنوور و قانون ده‌ستوورێ عیراقێ یه‌ ، هه‌ڤده‌م وان دڤێت ئیرادا خوه‌ ب چه‌ك و شه‌رى ب سه‌ر گه‌لێ مه‌دا ب سه‌پینن و شكویا گه‌لێ مه‌ بشكێنن ، ئه‌ڤ یه‌ك ژى بویه‌ سه‌ده‌ما تێكدانا ژیانا خه‌لك و ئاواره‌بوونا زێده‌تر ژ 150 هزار كه‌سان.

ل ڤێره‌ موخاته‌با وژدانا گه‌لێن جیهان و رایا گشتى و ئازادیخواز و ره‌وشه‌نبیرێن سه‌رانسه‌رێ جیهانێ دكه‌م كو پشته‌ڤانیا گه‌لێ كوردستانێ بكه‌ن و رێى ل به‌ر جینوساید و كاره‌ساته‌كا نوو بگرن كو ب سه‌ر گه‌لێ مه‌دا دهێته‌كرن ، و فشارێ بێخنه‌ سه‌ر حكومه‌تێن خوه‌ و ناڤه‌ندێن بریارێ داكو بهێنه‌ ده‌نگ و لسه‌ر ئه‌وێ سته‌ما كو هه‌مبه‌رى گه‌لێ كوردستانێ دهێته‌كرن ، ژ به‌ركو حكومه‌تێن هه‌وه‌ ل به‌ر به‌ژه‌وه‌ندیێن خوه‌ ، قوربانیدانا خه‌لكێ كوردستان و پێشمه‌رگه‌یان ژ بیركریه‌ كو د شه‌رێ تیرورستێن داعشێ دا و ل شوونا هه‌موو جیهانێ به‌رسینگێ رێكخراوا تیرورستیا داعشێ گرتیه‌ و هزاران شه‌هید و بریندار ژى مه‌ داینه‌ ، ژبه‌رڤێ داخوازێ دكه‌م رێى ل به‌ر فروتنا شه‌رى و كوشتن و بنپێكرن و ئاواره‌كرنا خه‌لكى بگرن كو حكومه‌تا عیراقێ ل رێیا میلشیا و هێزێن خوه‌ ب هه‌ڤكاریا و رێنمایێن ده‌ره‌كى ل دژى كوردستانێ ئه‌نجام دده‌ت.

ل ڤێره‌ داخوازێ ل هه‌موو كوردستانیێن ئه‌وروپا و ئه‌مریكا دكه‌م كو ب ره‌نگه‌كێ قانونى و ئاشتیانه‌ بو پشته‌ڤانیا گه‌لێ مه‌ ، خوپێشاندان و چالاكیێن مه‌ده‌نى ئه‌نجام بده‌ن و داخوازێ ل گه‌لێن وان وه‌لاتان بكه‌هن كو تێدا ئاكنجینه‌ كو شه‌ر و دورپێچا لسه‌ر گه‌لێ مه‌ ب زوترین ده‌م رابگرن ، دخوازم ده‌نگێ مه‌زلومیه‌تا كوردستانیان و په‌یاما ئاشتیخوارى یا گه‌لێ مه‌ بگه‌هینه‌ جیهانێ.
سه‌رۆكێ هه‌رێما كوردستانێ 20 چریا ئێكێ 2017.

ئه‌ڤرۆ نیوز ، هلورى:
فه‌رمانده‌یا هێزێن پێشمه‌رگه‌ى ل مێحوه‌رێ رۆژئاڤایێ كه‌ركوك – پردێ دیاركر كو د شه‌رێ ئه‌ڤرو دا كو دناڤبه‌را میلشیاتێن حه‌شد شه‌عبى و پێشمه‌رگه‌ى روودابوو 150 چه‌كدارێن حه‌شد هاتینه‌ كوشتن و برینداركرن و هه‌موو هێرشێن وان ژى هاتینه‌ شكاندن.

فه‌رمانده‌یا هێزێن پێشمه‌رگه‌ى ل مێحوه‌رێ رۆژئاڤایێ كه‌ركوك – پردێ راگه‌هاندنه‌ك به‌لاڤكر و ل گوره‌ى راگه‌هاندنا وان ئه‌ڤرۆ سپێدێ هێزێن حه‌شد شه‌عبى ب چه‌ك و توپخانه‌ و تانكێن ئه‌مبرامزێن ئه‌مریكى هێرشه‌كا مه‌زن و به‌ربه‌لاڤكر سه‌ر هیزێن پێشمه‌رگه‌ى ل پردێ به‌ر ب جادده‌یا پردێ بو هه‌ولێر دهاتن ، به‌لێ هێزێن پێشمه‌رگه‌ى ب قه‌هره‌مانانه‌ هاته‌ ده‌نگ و به‌ره‌ڤانى ل كوردستانێ و گه‌لێ سه‌ربلندێ كورد كر ، د شه‌ره‌كێ گران دا پێشمه‌رگه‌یان ب قه‌ره‌مانانه‌ هه‌موو هێرشێن وان ئێك ل دوڤ ئێكێ يێن داگیركه‌رێن حه‌شدا نه‌ شعبى ب هه‌مو هه‌ڤكاریێن وان یێن پاسدارێن ئیرانێ و خوفروشان ڤه‌ ژ ناڤبرن و پاشڤه‌ زڤراندن.

د راگه‌هاندنا وان دا زێده‌تر هاتیه‌: ( و د ئه‌نجامێ شه‌رى دا دوو ده‌بابه‌ كو ئێك ژ وان ئه‌مبرامز یا ئه‌مریكى بو ل گه‌ل موده‌ره‌عه‌كێ و زێده‌ترى 12 هه‌مه‌ر و ئامیرێن دن ژ ناڤبرن و هژماره‌كا زور ژى ژ چه‌كدارێن داعش كوشتن و برینداركرن كو ئه‌و ژى 150 چه‌كداربوون و پرانیا وان گه‌هاندینه‌ نه‌خوشخانه‌یێن كه‌ركوكێ ، ب مخابنیڤه‌ پێشمه‌رگه‌ى ژى شه‌ش شه‌هید و چه‌ند پێشمه‌رگه‌یه‌كێن بریندار هه‌نه‌ )

راگه‌هاندنا فه‌رمانده‌یا پێشمه‌رگه‌ى ل مێحوه‌رێ رۆژئاڤایێ كه‌ركوك ل پردێ سوپاسیا هه‌موو وان پێشمه‌رگه‌یان دكه‌ین ئه‌ڤێن كو پشكداربووین و سوپاسیا خه‌لكێ كوردستانێ و داخوازا بحه‌شتێ بو شه‌هیدان و سلامه‌تیێ بو برینداران ژى كر)

ئەڤرۆ نیۆز،زنار تۆڤی:

موقەدەمێ مافپەروەر ئازاد تاها بەرپرسێ پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیۆز دیارکر:ئەڤرۆ د روودانەکا ترافیکێ دا ترۆمبێلەک وەرگەریا و کەیەکێ گیانێ خۆ ژ دەستدا.

ناڤهاتی دیارکرژی:ئەڤرۆ ئەینیێ 20.10.2017 ل دەمژمێر (14:45 ) پشتی نیڤرۆ د روودانەکا هاتنوچوونێ دا ل سەر جادا گشتی یا زاویتە بۆ کۆمەلگەها باگێرا و ل گەلیێ قەنتارا ترومبێلەکا دهوک تایبەت ژ جورێ (نیسان_سەنی ) ژبن کونترۆلا شوفێری دەرکەفتیە و خۆ ب پەرجانێ نیڤا جادێ دایە و د ئەنجامدا کەسەکێ گیانێ خۆ ژ دەستدایە و سێ کەسێن دی ژی بریندار بووینە و ئەو هەر سێ کەس هاتینە ڤەگۆهاستن بۆ نەخۆشخانا تەنگافیا ل دهۆکێ.

ناڤهاتی گوت ژی:ئەگەرێ ڤێ روودانێ ڤەدگەریت بۆ نەپێگریا شۆفێری ب رێنمایێن هاتنوچوونێ.

1319

ئه‌ڤرۆ نیوز ، نه‌وزاد هلۆرى:

نیاسینا چه‌كێ ئه‌مبرامز ( M1 Abrams) یێ ئه‌مریكى ره‌نگه‌ ل كوردستان و عیراقێ تشته‌كێ نوو بیت ، به‌لێ ئه‌ڤه‌ چه‌ند ساله‌كه‌ هاتیه‌ چێكرن ، به‌لێ بكارئینانا وێ گه‌له‌ك یا كێمه‌ ، ب تایبه‌تى ل عیراقێ ، ژ به‌ركو ئه‌ڤرۆ د شه‌رێ دناڤبه‌را حه‌شد شه‌عبى و پێشمه‌رگه‌ى هاتیه‌ بكارئینان ، مه‌ ڤیا چه‌ند زانیاریه‌كان بو هه‌وه‌ دیار بكه‌ین.

چه‌كێ ئه‌مبرامز ( M1 Abrams) یێ ئه‌مریكى ، بو ئێكه‌مین جار ل عیراقێ ل سالا 2003 ل سه‌رده‌مێ رژێما به‌عس ژلایێ ئه‌مریكا هاتیه‌ بكارئینان ، و ل سالا 2014 ئه‌مریكا ژ بو ناڤبرنا داعشێ دایه‌ عیراقێ ، سه‌ره‌راى كو د چه‌ندین شه‌ران دا هاتیه‌ بكارئینان به‌لێ هه‌تا نها چو هێزان نه‌شیایه‌ ژناڤ ببه‌ت ، به‌لێ لسه‌ر ده‌ستێ پێشمه‌رگه‌ى هاته‌ ژناڤبرن.

چه‌كێ ناڤبرى ل سالا 1980 هاتیه‌ چێكرن و ئه‌مریكا بو ئێكه‌مین جار ل شه‌رێ كه‌نداڤێ عه‌ره‌ب یێ دوویێ و شه‌رێ ئه‌فغانستان و شه‌رێ عیراقێ لسه‌ر ده‌مێ سه‌دامى و دیسان دژى هاتنه‌ ناڤا سوپایى بو یه‌مه‌نێ بكارئینایه‌ و هه‌تا نها ژى دهێته‌ بكارئینان ، به‌لێ بكارئینانا وێ یا سنوورداركریه‌ و هه‌موو وه‌لات نكارن بكاربینن ، و ل سالا 2014 ئه‌ڤ جوره‌ چه‌كه‌ ب مه‌ره‌ما ژ ناڤبرنا داعش دایه‌ عیراقێ ، به‌لێ شوونا دژى داعش بهێته‌ بكارئینان دژى پێشمه‌رگه‌ى دهێته‌ بكارئینان.

بهایێ ئێك تانكا ئه‌مبرامز 8 ملیون 92 هزار دولارێن ئه‌مریكى یه‌ ، و دژى میلانویایه‌ ، ئانكو ده‌ما كو میلانو بو ئه‌ڤان جوره‌ تانكان دهێته‌ ئاراسته‌كرن ب دوراتیا 25م به‌رى بگه‌هیته‌ ئه‌وێ تانكێ ئێكسه‌ر ئاراسته‌یێ گوله‌یێ میلانویێ دگوهریت.

چه‌كێ ئه‌مبرامز ژلایێ جه‌نه‌رال (ریسلر دفاع) هاتیه‌ دیزاینكرن و به‌رهه‌مێ (لیما ئه‌رمى تانك بلنت)ێ یه‌ و و چه‌ند جوره‌ك هه‌نه‌ سه‌نگا وێ 63،086 ته‌نه‌ و 9،83مه‌تران درێژه‌ و هزار 907 لیترێن به‌نزینێ هه‌لدگریت و له‌زاتیا وێ ژى 67،6كم د ده‌مژمێره‌كێ دا.

هه‌ردیسان ئه‌ڤ چه‌كه‌ قازیفه‌كا عه‌یار 120ملم تێدایه‌ و 10 هزار گوله‌یێن عه‌یار 7،62ملم یێن ره‌شاشێ دهه‌لگریت و هزار و 400 گوله‌یێن عه‌یار 12،7ملم یێن ره‌شاشێ د هه‌لگریت و دیسان هزار گوله‌یێن 0،5 یێن ره‌شاشێ دهه‌لگریت ، هه‌شت بومبه‌یێن ده‌ستى و 24 بومبه‌یێن دوكێلێ و 96 گوله‌یێن 9ملم و 220 گوله‌یێن عه‌یار 7،62ملم دهه‌لگریت ، ئارمانجا پیڤه‌رێ سه‌ره‌كى بو جهه‌كێ تایبه‌ت ب زریپوشه‌كا نافخوه‌ى ل ده‌ما پێدڤى بوونێ بكاردئینیت و چه‌ند ئامیره‌كێن چاڤدێریێ ژ وانان ئامرێ پیڤه‌رێ گه‌رمایێ و ئامیرێ لێزه‌رى تێدا هاتیه‌ بكارئینان و ئامیره‌كێ پێشكه‌فتى یه‌ د هه‌ڤسه‌نگى یا تانكێ دا.

website security
WP Facebook Auto Publish Powered By : XYZScripts.com