فوتو و زانیارى ، نه‌وزاد هلۆرى:

وه‌رزێ زستانێ نێزيك بوو و هه‌تا نها چو دیار نینه‌ بو دابه‌شكرنا نه‌فتا مالان ، ئه‌ڤ یه‌ك بویه‌ سه‌ده‌م كو وه‌لاتى قه‌ستا ده‌ڤه‌رێن چیایى بكه‌ن بو كومكرنا داران ، و د نهادا ده‌ستكه‌فتنا سوپان ژى بویه‌ سرا.

دڤى واریدا” تێلى رزه‌یى” هوستایێ چێكرنا سوپاێن داران ل شێلادزێ دیاركر كو ده‌ستكه‌فتنا سوپێن داران ل شێلادزێ ب سرایه‌ و بۆ ئه‌ڤرۆ نیوز گۆت: ( پشتى كو وه‌رزێ زستانێ هاتى و وه‌لاتى بێ ئومێد بوى ژ وه‌رگرتنا پشكا نه‌فتا مالان د نهادا ب ره‌نگه‌كێ زور قه‌ستا ده‌ڤه‌رێن چیایى دكه‌ن بو كومكرنا داران و ئه‌ڤ یه‌ك ژى بویه‌ سه‌ده‌م كو سوپێن داران بده‌ن چێكرن ، به‌لێ د نهادا ده‌ستكه‌فتنا سوپان ب زه‌حمه‌ت كه‌فتیه‌ ژ به‌ركو ده‌ستكه‌فتنا سوپان ب سرایه‌ و دڤێت چه‌ند روژان د سرایێ دا بمینى هه‌تاكو بكارى سوپه‌كێ بكرى)

زێده‌تر گۆت: (نها سوپه‌ دناڤبه‌را 25 بو 30 هزار دیناران دهێنه‌ چێكرن و هه‌ر سوپه‌ك ژى دكاریت هه‌تا سێ سالان خوه‌ بگریت ، و ئه‌م چوار هوسا ل شێلادزێ كاردكه‌ین و هه‌ر ئێكێ ژ مه‌ سالانه‌ هه‌تا 300 سوپان ژى چێدكه‌ن و ئه‌ڤ ساله‌ ره‌نگه‌ پتر بهێنه‌ چێكرن ، و ژبلى كو خه‌لكێ گوندا و ده‌ڤه‌رێن چیایى سوپان دكرن د هه‌مان ده‌م دا هژماره‌كا زور یا سوپان ژلایێ خه‌لكێ سه‌نته‌رێ باژێران ژى دهێنه‌كرین)

تێلى د درێژاهیا ئاخفتنێن خودا دیاركر ژى كو ئه‌وان به‌رى نها بتنێ ب روژ كاردكر به‌لى َنها ب شه‌ڤ ژى كاردكه‌ن و گۆت: ( هه‌موو كارێن خوه‌ مه‌یێن راگرتى مینا چێكرنا تانكا و حه‌لیمێ ، ودنهادا ب چێكرنا سوپان ڤه‌ مژیلین و هندى داخوازى لسه‌ر هه‌یه‌ ئه‌م ژى دێ لسه‌ر به‌رده‌وام بین)

ئه‌ڤرو نیوز، نه‌وزاد هلۆرى:
ته‌خه‌كا زورا تاكێن جڤاكى ژ كور و كچان به‌را بچنه‌ د هێلینا زێریندا دوو دلن و هزر دكه‌ن دێ په‌شیمان بن لسه‌ر ڤێ یه‌كێ ، و ژلایه‌كى َدنڤه‌ زور شه‌یدایێن هندێ نه‌ كو هه‌ڤژینیێ پێك بینن ، و لسه‌ر ڤى بابه‌تى ئه‌م دكارین پرسیار بكه‌ین بوچى كه‌سێ ژنێ ئینایى په‌شیمانه‌ و یێ نه‌ئینایى حه‌ز دكه‌ت بینیت؟

یاسین محه‌مه‌د شاره‌زایێ جڤاكى دیاركر كو هه‌ڤژینى شوره‌ش و پرۆژه‌یه‌كێ ستراتیجیه‌ و پێدڤى یه‌ بنه‌مایه‌كێ موكوم و بهێز بو بهێته‌دانان و گۆت : ( هه‌ڤژینى ئه‌وه‌ یا كو دژیه‌كێ دیاركرى د ده‌م و وه‌خته‌ك و دگه‌ل كه‌سه‌كێ دیاركرى دهێته‌كرن و شیان هه‌بن پێكڤه‌ خۆه‌ برێڤه‌ ببه‌ن ب ماددى و مه‌عنه‌وى كو ئه‌و ژى پێگه‌هشتنا عه‌قلێ مرۆڤى یه‌ و ژێرخانا ئابوورا خێزانێ یه‌ ، و ژلایه‌كێ دنڤه‌ ئه‌ڤ هه‌ڤژینیه‌ك هنده‌ك ئه‌رك و مافان لسه‌ر هه‌ردوو كه‌سان دروست بكه‌ت كو یاسا و شه‌ریعه‌ت به‌رگریێ ژ ئه‌وان ماف و ئه‌ركان بكه‌ت هه‌تا كو ئه‌ڤ هه‌ردوو هه‌ڤژینه‌ دساخن )

زێده‌تر گۆت : ( ژ ده‌ستپێكا دروستبوونا مروڤاتیى َهه‌تا نها چوو توخمێن مرۆڤان بێى هه‌ڤژینى درۆست نه‌بووینه‌ بتنێ ب ره‌زامه‌ندیا خودایێ مه‌زن نه‌بیت ، بو نموونه‌ ئاده‌م خودێ بێى دایباب دایه‌ ، و حه‌وا ژ په‌راسیوویا ئاده‌مى هاتیه‌ درۆستكرن و دیسان پێغه‌مبه‌رێ خودێ ( عیسا – سلاڤ لێ بن) بێى دایك هاتیه‌ درۆستكرن ، ژبلى ئه‌ڤانه‌ سه‌رجه‌م چێكریێن دن ژ مرۆڤ و ئه‌جنه‌ و دار و بار و گیانه‌وه‌ران هه‌موو ژ ئه‌نجامێ هه‌ڤژینیه‌كێ درۆست بووینه‌ د ناڤبه‌را كچ و كوره‌كێ یان دناڤبه‌را نێر و مێ یه‌كێ )

شاره‌زایێ جڤاكى د درێژاهیا ئاخفتنێن خودا خویاكرى كو ئه‌و هه‌ڤژینیا په‌شیمانى دووڤدا نه‌بیت لسه‌ر چوار بنه‌مایێن سه‌ره‌كى دهێته‌ درۆستكرن و لدوور وان بنه‌مایان گۆت : ( ئه‌گه‌ر هه‌ڤژینیى لسه‌ر بنه‌ما و شه‌نگسته‌كێ ب هێز و ژیر بهێته‌دانان چوو په‌شیمانى تێدا دروست نابن كو ئه‌و ژى ئه‌و هه‌ڤژینیى یه‌ یا كو لسه‌ر ڤێ فه‌رموودا پێغه‌مبه‌رى سلاڤێت خودێ لسه‌ر بن هاتیه‌ چێكرن ده‌ما كو دبێژیت ” تنكح المرأة لاربع ، مالها و لحسبها و لجمـالها و لدينها ، فاظفر بذات الدين تربت يداك ” ئانكو ” ژن بو چوار تشتان دهێته‌ به‌ترمه‌كرن و گرێدان و خواستن ب مه‌ره‌ما هه‌ڤژینیێ ئه‌و ژى مال و بنه‌ره‌ه و جوانى و دینداری یه‌ ، و ئه‌گه‌ر كه‌سه‌كێ كچا هه‌وه‌ بوڤێ مه‌ره‌مێ ل هه‌وه‌ ڤیا و دیندار و ره‌وشت ل گه‌ل بوون ژ ده‌ست نه‌ده‌ن ” ، و ئه‌گه‌ر ب رامانه‌كا دن ئه‌م شلوڤه‌ بكه‌ین ، هه‌ر هه‌ڤژینیه‌كا به‌روڤاژى ڤێ یه‌كێ بهێته‌كرن ئانكو لسه‌ر سێ بنه‌مایێن ده‌ستپێكێ ” مالــها و لــحـسبـهـا و لـجـمـالـهـا ” هه‌ڤژینى بهێته‌ درۆستكرن مسوگه‌ر دێ په‌شیمانى دوڤدا دروست بیت ژ به‌ركو ب درێژاهیا ده‌مى مروڤێ زه‌نگین هه‌ژار دبیت و مروڤێن ب خودان مروڤ ، مروڤێت وان دێ مرن و ژ ناڤ دچن و مروڤێت جوان ژى كرێت دبن ، به‌لێ ئه‌گه‌ر لسه‌ر بنه‌مایێ دیندارى و ره‌وشتى بهێت درۆستكرن چوو جاران ئه‌ڤ هه‌ڤژینیه‌ ناهێته‌ هه‌لوه‌شاندن و ژ ناڤچوون و په‌شیمانى دروست نابیت )

یاسین محه‌مه‌د شاره‌زایێ جڤاكى لدور مه‌ره‌مێن هه‌ڤژینیێ گۆت : ( ئه‌گه‌ر ئه‌م ب شێوه‌یه‌كێ زانستیانه‌ سه‌حا هه‌ڤژینیێ بكه‌ین بێگومان دێ مه‌ره‌مێن وێ بومه‌ دیاربن كو ئه‌و ژى یا ئێكێ ” ئاڤاكرنا جڤاك و خێزانان “ ئه‌گه‌ر ئه‌م سه‌حا ژیانا نها بكه‌ین دێ بینین كو جیهان هه‌موو هاتیه‌ دابه‌شكرن بو چه‌ند ده‌ڤه‌ره‌كێن كارگێرى وه‌كو وه‌لات و باژێر و گوند یان بێژین خێزان خێزان ژ به‌ركو كه‌س نه‌شێت دژیانا جیهانێ دا بتنێ بژیت و ئه‌گه‌ر بو مرۆڤان تنێ برێڤه‌چووبا دا نها مالێن هه‌ر ئێكێ ژ مه‌ لسه‌رێ چیایه‌كێ بیت ، و داكو ئه‌ڤ پێكڤه‌ ژیان یا به‌رده‌وام بیت خودێ هه‌ڤژینى دناڤبه‌را مروڤان درۆستكریه‌ ، و هه‌تاكو هه‌ڤژینى نه‌هایته‌كرن ژیان ژى دناڤبه‌را مرۆڤان دا درۆست نه‌بوو و ژ ئه‌نجامێ هه‌ڤژینیێ نها ترلیوونان مرۆڤ هاتنه‌ جیهانێ و خودێ د زانیت كا دێ چه‌ند مرۆڤێن دن ژى هێنه‌ جیهانێ ، و مه‌ره‌ما دوویێ یا هه‌ڤژینیێ ” به‌خته‌وه‌ریا دلانه‌ “ و بێگومان به‌خته‌وه‌ریا دلان ب كه‌سه‌كێ بتنێ درۆست نابیت به‌لكو دبێت چه‌ند كه‌س پێكڤه‌ بژین هه‌تا به‌خته‌وه‌رى درۆست ببیت ، و ب ساناهیترین رێك بو ب ده‌ستڤه‌ ئینانا به‌خته‌وه‌ریێ هه‌ڤژینیه‌ لسه‌ر بنه‌مایه‌كێ تێكگه‌هشتى ، و دیسان خالا سێیى ” پاراستنا ره‌وشتێن مرۆڤان “ ئانكو ب رێكا هه‌ڤژینێ ره‌وشت و باوه‌رییا مرۆڤى ته‌مام دبیت و به‌رێ مروڤان ژ حه‌رامى دهێته‌ وه‌رگێران و باشترین رێكه‌ كو چاڤ و گوه و ده‌ڤ و دلێ مرۆڤى بهێت پاراستن ژ دیتن و گوهلێبوون و گوتن و حه‌زێن خراب به‌رامبه‌ر تاكێن جڤاكى ، و مه‌ره‌ما چوارێ یا هه‌ڤژینیێ ” زێده‌بوونا خزماتیێ “ واته‌ زور جاران ده‌ما كچ و كوره‌ك هه‌ڤژینێ درۆست دكه‌ن دبیته‌ سه‌ده‌ما وێ یه‌كێ كو پتر خزمایه‌تى درۆست ببیت دناڤبه‌را جڤاكى و هنده‌ك بنه‌مال و خێزانێن نوو دبن خزم و كه‌س و كاردروست دبن كو به‌رى ڤێ هه‌ڤژینیێ نه‌بوویه‌ ، و مه‌ره‌ما دوماهیێ یا هه‌ڤژینیێ كو ژ هه‌مووان گرنگتره‌ ” درۆست بوونا ئه‌رك و مافان “ ئانكو هه‌ڤژینى دبیته‌ سه‌دم كو هنده‌ك ئه‌رك و مافان بوو هه‌ڤژینێن نوو درۆست دكه‌ت كو بڤێ یه‌كێ هه‌ردوو هه‌ڤژین ئه‌ڤرۆ وێڤه‌ ب جوانترین و دلخوشترین شێوه‌ ژیانا خو لسه‌ر وان ئه‌رك و مافان درۆست بكه‌ن كو ئه‌و ژى ئه‌رك و مافن مافێن هه‌ڤپشكن دناڤبه‌را هه‌ردووان و دیسان ئه‌رك و مافێن ژنێ لسه‌ر زه‌لامى و یا سێیێ ئه‌رك و مافێن زه‌لامى لسه‌ر ژنێ و به‌هرا پتریا ئه‌ڤان ئه‌رك و مافان ل ده‌ما نافسالدا چوونا هه‌ڤژینان دیاردبن واته‌ مروڤ هه‌وجه‌دار دبیتێ و ژ وان زارو )

ل دوماهیێ گۆت : ( ئه‌و كه‌سانێن كو په‌شیمانێ هه‌ڤژینیێ نه‌ هه‌موو ئه‌و كه‌سن كو لسه‌ر بنه‌مایێ سێكسى هه‌ڤژینى دروستكرى و بێگومان حه‌زێن مروڤان ژى زورن و چوو جاران هه‌موو حه‌ز ده‌ست ناكه‌ڤن ژ به‌رڤێ گه‌له‌كێ ب ده‌ڤ گازنده‌یه‌ و په‌شیمانه‌ هه‌ڤژینى دروستكرنى و هه‌ر ژ به‌رڤێ دهێته‌ گوتن ئه‌و كه‌سانێن ژن ئینایى په‌شیمانه‌ و یێ نه‌ینایى حه‌ز دكه‌ت بینیت )