ئه‌ڤرۆ نیۆز،زنار تۆڤى:

محه‌مه‌د محسن ئه‌و چیرۆك نڤیس و به‌رهه‌مهێنه‌رێ سینه‌مایى یه‌ د دیداره‌كێدا بۆ ئه‌ڤرۆ نیۆز دبێژیت:سال بۆ سالێ فلمه‌ فیستیڤالا دهۆكێ دێ پێشڤه‌چوونێ ب خوه‌ ڤه‌ بینیت،هه‌روه‌سا ژ لایێ ره‌وشه‌نبیرى و پێشكه‌فتنا سینه‌مایێ ڤه‌،چه‌ند ده‌م ب بوریت،دێ ئه‌ڤ فیستیڤاله‌ یا ب رێكوپێكتر بیت،هه‌روه‌سا ئه‌م بادینى ده‌ست پێشخه‌رێن سینه‌مایێ بووینه‌ ل كوردستانا باشۆر،دیسا ل سالا 1991 ده‌مێ هونه‌ر سه‌لیم هاتیه‌ كوردستانێ،وى فلمه‌ك ل ده‌ڤه‌را ئامێدیێ وێنه‌كر،كو ل وى ده‌مى ئه‌ز ئێك ژ فه‌رماندێن له‌شكه‌رى بووم ل ئامێدیێ،مه‌ گه‌له‌ك هاریكاریا وى كر،سه‌ره‌راى شیانێن كێم،لێ مه‌ كاره‌كێ گه‌له‌ك باش كر،هه‌روه‌سا بۆ چێكرنا دۆكێلێ و گوریا ئاگرى د وى فلمى دا مه‌ لۆیێن گیاى دكرین و دسوتن،ژ پێخه‌مه‌ت دۆكێل چێببیت و مه‌ گه‌له‌ك زه‌حمه‌ت ب وى فلمه‌ ڤه‌ بر،دیسا بۆ چێكرنا هنده‌ك دیمه‌نان مه‌ خوه‌ ل هیڤیا سه‌قاى دگرت،هه‌تاكو ئه‌م شیاباین ب وان شیانێن كێم وى فلمى چێكه‌ین.

محەمەد محسن زێدەتر گوت:ل سالا 1979 من كارێن شانۆیى ئه‌نجامداینه‌ و من گه‌له‌ك حه‌ز ل سه‌ر سینه‌مایێ هه‌بوو،هه‌ر ل ژیه‌كێ بچووك دا من چیرۆكێن شانۆیێ دنڤێسین و ل سالا 1981 ل باره‌گایه‌كێ پارتایه‌تیێ من شانۆگه‌ریه‌ك ئه‌نجامدایه‌،پشتى سالا 1991 من چیرۆكه‌ك نڤێسى ل سه‌ر ژیانا هه‌ڤاله‌كێ خوه‌ یێ پێشمه‌رگه‌،كو عاشقێ كچه‌كێ بوو،لێ نه‌ گه‌هشته‌ ئارمانجا خوه‌،كو ناڤێ وى فلمى “ئه‌و نێرگز بشكڤین” بوو،دیسا مه‌ خۆ ل هیڤیا وه‌رزان دگرت،ژ پێخه‌مه‌ت ئه‌م ب شێین وى فلمى چێكه‌ین،چونكى مه‌ هند شیانێن باش ل به‌ر ده‌ست نه‌بوون،وى فلمى پشكدارى د چه‌ندین فیستیڤالێن جیهانى دا كریه‌ و خه‌لات ژى وه‌رگرتینه‌.

ناڤهاتى گوت ژى:ل سالا 2014 من چیرۆكه‌كا سینه‌مایى نڤێسیه‌ كو ب شێوێ ئه‌كشن هاتیه‌ چێكرن،كو چیرۆكا وى فلمى ژى ل سه‌ر پێشمه‌رگه‌ى و داعشێ بوویه‌،ئه‌ڤ فلمه‌ ژ ده‌رهێنانا “جوان بامه‌رنیه‌” و ناڤێ وى فلمى ژى”قه‌هره‌مانێ چه‌رخى” یه‌،هه‌روه‌سا ئه‌ڤه‌ دێ ئێكه‌م فلمێ ئه‌كشن بیت،ل سه‌رانسه‌رى كوردستانێ و دڤى فلمى دا قه‌هره‌مانى و خۆراگریا پێشمه‌رگه‌ى دناڤ سینه‌مایێ دا هاتیه‌ دیاركرن.

محه‌مه‌د محسن هێشتا دبێژیت:وه‌زاره‌تا ره‌وشه‌نبیرى هه‌تاكو نوكه‌ نه‌ شیایه‌ ب دروستى كارێ خوه‌ ئه‌نجام بده‌ت،چونكى كه‌سێ ژ وان چو شاره‌زایى د وارێ سینه‌مایێ دا نینه‌،له‌ورا داخوازا مه‌ ئه‌وه‌ كو كه‌سێن شاره‌زا دڤێ وه‌زاره‌تێ دا كار بكه‌ن،ژ پێخه‌مه‌ت هندێ بشێن پێشكه‌فتنه‌كێ بێخنه‌ هه‌موو وارێن سینه‌ما كوردى،له‌ورا دڤێت وه‌زاره‌تا ره‌وشه‌نبیرى یا بێلایه‌ن بیت و كه‌سێن ره‌وشه‌نبیر دڤێ وه‌زاره‌تێ دا بهێنه‌ دانان،هه‌روه‌سا دڤێت قانوون و فلته‌رێن تایبه‌ت بۆ كارێن سینه‌مایى ل كوردستانێ بهێنه‌ دانان،ژ پێخه‌مه‌ت پاراستنا فلمێن نافخۆیى ل كوردستانێ،داكو ئه‌و كه‌سێن د وى فلمى دا كار دكه‌ن دا پێ بژین و داهاتیه‌ك بگه‌هیتێ،دیسا هه‌كه‌ بابه‌تێن هزر و ئاسایشا نه‌ته‌وه‌یى د فلمێن كوردى دا نه‌بن،پێدڤیه‌ ئه‌و فلم نه‌هێنه‌ به‌رهه‌م ئینان،لێ مخابن هه‌تاكو نوكه‌ مه‌ ئه‌ڤه‌ ل كوردستانێ نینه‌.

هێشتا دبێژیت:من باوه‌رى هه‌یه‌ كو دێ سینه‌ما ل دهۆكێ ژ هه‌موو جهێن دیتر یێن كوردستانێ پتر پێشكه‌ڤیت،ئه‌ز دخوازم كو بازرگانێن مه‌ پتر رۆلێ خوه‌ د كارێن سینه‌مایى دا ب گێرن،داكو ئه‌م ب شێین فلمێن باش یێن سینه‌مایى به‌رهه‌م بینین و ب شێین سینه‌ما كوردى ب گه‌هینینه‌ ئاستێن بلند،هه‌روه‌سا هه‌كه‌ قانوونه‌ك ل وه‌زاره‌تا ره‌وشه‌نبیرى ده‌ركه‌ڤیت و بێژیت نابیت ئێدى فلم و زنجیرێن بیانى ل تیڤیێن مه‌ بهێنه‌ په‌خشكرن،هنگێ دێ سینه‌ما كوردى رۆلێ خوه‌ بینیت و دێ سینه‌ما بازرگانى ل كوردستانێ په‌یدا بیت،هه‌روه‌سا مه‌ گه‌له‌ك سه‌رهاتى و چیرۆكێن كورده‌وارى هه‌نه‌،هه‌كه‌ ئه‌و چیرۆك و سه‌رهاتى ببنه‌ فلمێن سینه‌مایى،ب ڤى ره‌نگى دێ سینه‌ما كوردى باش رۆلێ خوه‌ بینیت.

ناڤهاتى ئه‌و چه‌ند ژى دیاركر:من پشكدارى وه‌ك ئه‌كته‌ر د فلمێ” قه‌هره‌مانێ چه‌رخى” دا كریه‌،هه‌ر چه‌نده‌ ئه‌ز نه‌ ئه‌كته‌رم،لێ ب تنێ وه‌كو پشته‌ڤانیه‌ك بۆ كور و كچێن كورد و ژبۆ سینه‌ما كوردى من ئه‌ڤ كاره‌ كریه‌،هه‌روه‌سا ئه‌م دشێین ب رێیا سینه‌مایێ سه‌رنجا خه‌لكێ بیانى بۆ دۆزا خوه‌ رابكێشین و ئه‌م دشێین ئێش و ئازارێن خوه‌ بۆ وانا بده‌ینه‌ دیاركرن،دیسا ب رێیا سینه‌مایێ ئه‌م شیاینه‌ ده‌نگێ خوه‌ بگه‌هینینه‌ پرانیا جیهانێ،لێ هه‌كه‌ ئه‌م نه‌ بینه‌ ده‌وله‌ت،ئه‌و په‌یاما ملله‌تێ مه‌ دڤێت ئه‌م نه‌شێین ب دروستى وێ په‌یامێ بگه‌هینین.