ئه‌ڤرۆنيوز:
سه‌رۆك وه‌زيرێن عيراقێ، ئه‌ڤرۆ سێشه‌مبى 19/12/2017، دچارچۆڤێ كۆنگرێ رۆژنامه‌ڤانيێ هه‌فتيانه يێ خوه دا به‌حسێ مووچين فه‌رمانبه‌رين هه‌رێما كوردستانێ كر.
حه‌يده‌ر عه‌بادى، سه‌رۆك وه‌زيرين عيراقێ دكۆنگرێ خوه يێ رۆژنامه‌ڤانى دا گۆت” ئه‌م نه‌شێين مووچێن هه‌موو فه‌رمانبه‌رێن هه‌رێما كوردستانێ ب مه‌زێخين”.
ئه‌ڤرۆنيوز:
حوكمه‌تا ئيرانێ چه‌ندين رۆژه به‌رهه‌ڤيا خوه بۆ ڤه‌كرنا خالێن سنورى ل گه‌ل هه‌رێما كوردستانێ دياركريه، به‌لێ هه‌تا نوكه نه‌هاتينه ڤه‌كرن، به‌رپرسه‌كێ پارتى ديموكراتى كوردستان، ئه‌گه‌رێ نه‌ڤه‌كرنا خالێن سنورى ئاشكرا دكه‌ت.
ره‌حمان فه‌زلى وه‌زيرێ ناڤخوه‌يا ئيرانێ ل رۆژا 17/12/2017، راگه‌هاندبوو كوده‌رگه‌هێن سنورى يێن په‌رويز خان وحاج عومران دێ هێنه ڤه‌كرن، ئه‌ڤه سێ رۆژ ب سه‌ر وێ داخۆيانيا وه‌زيرێ ناڤخوه‌يا ئيرانێ ده‌ربازبوون، به‌لێ هه‌تا نوكه ئه‌و هه‌ردو ده‌رگه‌هێن سنورى ل گه‌ل هه‌رێمێ نه‌هاتينه ڤه‌كرن.
كاكه‌مين نه‌جار به‌رپرسێ جڤاتا سه‌ركردايه‌تيا هه‌ولێرێ يا پارتى ديموكراتى كوردستان ئاشكرا دكه‌ت كو حوكمه‌تا به‌غدا ئه‌گه‌رێ سه‌ره‌كيێ نه ڤه‌كرنا وان هه‌ردو ده‌رگه‌هێن سنورى يه.
كاكه‌مين نه‌جار بۆ مالپه‌رێ فه‌رميێ پارتى دبێژيت” ئيرانێ به‌رهه‌ڤيا خوه بۆ ڤه‌كرنا ده‌رگه‌هين سنورى يا دياركرى، به‌لێ ئه‌و داخوازيه ژلايێ سه‌رۆك وه‌زيرێن عيراقێ حه‌يده‌ر عه‌بادى ڤه يا هاتيه ره‌تكرن”.
پشتى چه‌ند رۆژان ژ ئه‌نجامدانا ريفراندۆما سه‌ربخوه‌يا كوردستانێ ل 25/9/2017، ئيرانێ ل سه‌ر داخوازا حه‌يده‌ر عه‌بادى، سێ ده‌رگه‌هێن سنورى يێن هه‌ڤپشك ل گه‌ل هه‌رێما كوردستانێ داخستن، نوكه تنێ ده‌رگه‌هێ سنووريێ پاشماخ يێ ڤه‌كريه.
ئه‌و بريارا حوكمه‌تا به‌غدا، ب هزاران خه‌لك ل هه‌ردو لايێن ده‌رگه‌هين سنورى بێكار كرينه.
ره‌سول خزرى نوونه‌رێ باژێرێن خانێ وسه‌رده‌شت ل په‌رله‌مانێ ئيرانێ ئاشكراكربوو كو تنێ ل لايێ ئيرانێ يێ ده‌رگه‌هێ سنوريێ حاج عومران، نێزيكى 40 هزار كه‌س بێكاربووينه.
وى په‌رله‌مانتارى دياركر، ب مه‌ره‌ما ڤه‌كرنا ده‌رگه‌هێن سنورىێ حاج عومران، ل گه‌ل هاريكارێ سه‌رۆك كۆمارى ووه‌زيرێ ناڤخوه‌يى وكۆمسيۆنا په‌يوه‌نديدار ل په‌رله‌مانێ ئيرانێ كۆمبوويه.
ئه‌ڤرۆنيوز:
مالپه‌رێ (مه‌علومه) ژزارده‌ڤێ ژێده‌ره‌كێ بلند به‌لاڤكر كو باليۆزێ ئه‌لمانيا ل عيراقێ داخوازا سه‌ره‌دانا نێچيرڤان بارزانى بۆ ئه‌لمانيا كربوو، سه‌ره‌دانا سه‌رۆك وه‌زيرێن هه‌رێما كوردستانێ بۆ ئه‌لمانيا ژى، پێشكێشكرنا چه‌كى بۆ كوردان ب خوه‌ڤه دگريت.
وى ژێده‌رى دياركريه ژى، وه‌زاره‌تا ده‌رڤه‌يا ئه‌لمانيا نامه‌ك بۆ به‌غدا هنارتبوو ل دۆر حه‌زا وه‌زيرێ ده‌رڤه‌يێ ئه‌لمانيا “زيگمار گابريێل” بۆ سه‌ره‌دانا عيراقێ، به‌لێ وه‌زاره‌تا ده‌رڤه‌يا عيراقێ نه‌رازيبوونا خوه دياركر پشتى ئاگه‌هدارى خشتێ كارێن وى بووين ل عيراقێ كو سه‌ره‌دانا هه‌رێما كوردستانێ ب خوه‌ڤه دگرت”.
ژێده‌رى ناڤبرى ئاماژه دا” وه‌زاره‌تا ده‌رڤه‌يا ئه‌لمانى ب وێ چه‌ندێ رانه‌وه‌ستيا، به‌لكو داخواز ژباليۆزێ ئه‌لمانى ل عيراقێ كر سه‌ره‌دانا هه‌رێما كوردستانێ بكه‌ت سه‌رۆك وه‌زيرێن هه‌رێما كوردستانێ بۆ سه‌ره‌دانا ئه‌لمانيا داخواز بكه‌ت” دياركر ژى كو مه‌ره‌مێ سه‌ره‌دانا بارزانى” رێككه‌فتنه ل سه‌ر دانا چه‌كى بۆ كوردان كو موشه‌كێن هه‌مه‌جۆر وچه‌كێن گران ب خوه‌ڤه دگريت”.
ئه‌ڤرۆنيوز:
ئه‌ندامه‌كا په‌رله‌مانێ كوردستانێ ژ فراكسيۆنا پارتى ديموكراتى كوردستان، نڤيساره‌كێ ئاراسته‌ى هه‌موو ده‌زگه‌هێن ئه‌منى ل سنوێ پاريزگه‌ها سلێمانيێ دكه‌ت وتێدا داخوازا پاراستنا گيانێ كادرێن پارتى دكه‌ت.
حه‌يات مه‌جيد ئه‌نداما په‌رله‌مانێ كوردستانێ ژفراكسيۆنا پارتى دوێ نڤيسارێ دا، داخوازێ ژپاريزگه‌هێن سلێمانيێ وهه‌له‌بجه وئيدارا راپه‌رين دكه‌ت كو ئه‌ركێ وان پاراستنا گيانێ كادرێن پارتى بيت .
ئه‌و په‌رله‌مانتاره، پاراستنا گيانێ كادرێن پارتى دئێخيته ستوويێ پاريزگه‌رێ سلێمانيێ وده‌زگه‌هين ئه‌منى.
ل دووڤ وێ نڤيسارێ، باره‌گايێن پارتى ل سنورێ سلێمانيێ يێن بووينه ئارمانجا هێرشێن خوه‌نيشانده‌ران.
ئەڤرۆ نیوز، نەوزاد هلۆری:
ب هەلکەفتا روژا ئالایێ کوردستانێ ، رێڤەبەریا ڤیتەرنەریا پارێزگەها دهۆکێ ، کونفرانسێ پێنجێ یێ نەخۆشیێن پەلەوەران ل پارێزگەها دهۆک ئەنجامدا و تێدا کۆمەکا تەوەرێن گرێدای نەخۆشیێن مریشک و رێگریێن فروتنا بەرهەمێ وان و رێیێن چارەسەریێ هاتنە بەحسکرن.
دلشێر رەجەب، بەرپرسێ پشکا پەلەوەران ل رێڤەبەریا ڤیتەرنەريێ ل پارێزگەها دهۆکێ بۆ ئەڤرۆ نیوز گۆت” دكونفرانسى دا چه‌ندين تەوەرێن گرێدای نەخۆشیێن مریشک و رێگریێن فروتنا بەرهەمێ وان و رێیێن چارەسەریێ ژلایێ کەسانێن تایبەتمەند و بسپور و خودانێن کۆمپانی و پرۆژێن مریشکان هاتنە بەحسکرن و کونفرانس ژی بەردەوامە و ئەڤرۆ ئێڤاری دێ دووماهی ب کارێن خوە ئینیت و هەموو ئەنجام و راسپاردەیێن کونفراسی دێ بۆ جهێن شولەژێ هێنە بلندکرن ب مەرەما چارەسەرکرنێ”.
زێدەتر گۆت”ل پارێزگەها دهۆکێ 267 پرۆژێن مریشکان هەنە کو دو ژ وان تایبەتن ب درۆستکرنا چیچەلوکان ڤە ، هەموو مریشکێن پارێزگەها دهۆک د هێنە رەوانەکرن بۆ دەرڤەی هەرێما کوردستانێ ب تایبەتی بۆ باشوورێ عیراقێ ، بەلێ د بەرامبەر دا پارێزگەها دهۆک پشت بەستنێ ب مریشکا هاوردەکری دکەت بۆ دابینکرنا پێدڤیێن بازاری و وەلاتیان”.
دیارکر ژی کو خودان پرۆژێن مریشکان ل دهۆکێ دشێن 15 ملیون مریشکان سالانە بەرهەم بینن و گۆت ” سالانە ل دهۆکێ زێدەتر ژ 30 ملیون کیلویێن گوشتێ مریشکێ دهێتە بەرهەم ئینان ، دیسان سالانە 140 ملیون چیچەلوکان بەرهەم دئینن بەلێ ئەوان چیچەلوکان ژی وەکو مریشكان دهينه هنارتن بۆ دەرڤەی هەرێمێ “.
ل دۆر ئاریشەیێن خودانکرنا مریشک و پرۆژەیێن وان ، دلشێری گۆت” ئاریشا پارێزگەها دهۆک ئەوە کو ل سنورێ وێ چو بازار ل ناڤخوە نینن بۆ فروتنا مریشکان، ژبەرڤێ چه‌ندێ ب نەچاری هەمووان ژ دەرڤە دفروشن ، د کونفرانسا ئەڤرۆ دا دێ بەحس ل پەیداکرنا بازارەکێ ناڤخوەی هێتەکرن”.
ئه‌ڤرۆنيوز:
مالپه‌رێ “به‌غداد پۆست” يێ عيراقى ژ ژێده‌ره‌كێ ئاگه‌هدار به‌لاڤكر، خوه‌نيشادانێن سلێمانيێ ژلايێ وان هێزێن كوردى دهێنه ئاراسته‌كرن كو مه‌يلێ وان ب لايێ ئيرانێ ڤه‌يه وقه‌يرانا مووچان بۆ خوه‌نيشانده‌ران ب ده‌ليڤه ديتيه.
مالپه‌رێ ناڤبرى دبێژيت” ئيران يا كار دكه‌ت بۆ سۆتنا ده‌زگه‌هێن حكومى وباره‌گايێن حزبى تاكو بێخيته دبن ده‌ستێ خوه‌ڤه”.
وى ژێده‌رى دياركريه ژى” ئه‌و خوه‌نيشاندانێن ل سلێمانيێ ده‌ستپێكرين ژ ئه‌گه‌رێ هاندانا ئيرانێ بوو، ده‌ستێ ئيرانێ ووان كه‌سايه‌تيان تێدايه كو سه‌ر ب ده‌زگه‌هێ هه‌والگيريێ ئيرانى (ئيتيلاعات) ن وكار بۆ وێ چه‌ندێ دكه‌ن ئه‌و خوه‌نيشاندانێن بۆ هه‌موو جاده وتاخان بهێنه ڤه‌گۆهاستن”.
ل دووڤ وى مالپه‌رى” ئيتيلاعاتا ئيرانێ ب رێيا ياريه‌كا ب گومان ل گه‌ل هنده‌ك هيز وكه‌سايه‌تيێن كورد خوه‌نيشانده‌ران پالدده‌ن وقه‌يرانا دارايى وخرابيا مووچان ب ده‌ليڤه ديتيه”.
ژێده‌رێ به‌غداد پوست” دبێژيت”پلانه‌كا مه‌زن دژى باژێرێ سلێمانێێ يا هه‌ى وئيران دخوازيت توره‌ييا خه‌لكى دژى پارتى ديموكراتى كوردستان ئاراسته بكه‌ت ب مه‌ره‌ما دابرانا سلێمانيێ ژهه‌ولێرێ وپه‌داكرنا ناكۆكيان دناڤبه‌را پارتى وئێكه‌تيێ وه‌كو پێشتر ل كه‌ركووكێ روودايى، نوكه ژى هه‌والگيريا ئيرانێ بزاڤێ دكه‌ت پارتى وئێكه‌تيێ ژێك دووربێخيت”.
ئه‌و مالپه‌رێ عيراقى، ژێده‌رێن ره‌هه‌ندێن پيلانێن ئيرانى ل سلێمانيێ ئاشكرا دكه‌ت ودبێژيت” ئيران دخوايت هه‌موو بالاخانه وژيرخان وده‌زگه‌هێن حوكمه‌تێ وكه‌ره‌ستێن وان وباره‌گايێن حزبان وێران بكه‌ت وب تمامى ب سوژيت تاكو رابكێشيته لايێ خوه ، بۆ وێ چه‌ندێ سلێمانى وه‌كو به‌غدا وسه‌نعا وديمه‌شق وده‌ڤه‌رێن دى يێن دبن هه‌ژموونا ئيرانێ لێ بهێت”.
به‌غداد پۆست به‌لاڤكريه ژى” ژێده‌ره‌كێ ئاگه‌هدار ل هه‌رێما كوردستانێ دبێژيت، نابيت بهێينه راكێشان بۆ ناڤ وى سيناريۆيێ ئيرانى، كێشا مووچه‌ى ژى دستوويێ به‌غدا دايه كو دده‌مێ دو هه‌يڤين بۆرى دا، ئه‌نجامدانا دانوستاندنان ل گه‌ل هه‌رێما كوردستانێ ره‌ت دكه‌ت ودڤێت وه‌كو ئيرانێ، هه‌رێما كوردستانێ ب سوژيت”.
ئه‌و مالپه‌ره ئاشكرا دكه‌ت ” به‌رى چه‌ند رۆژان كۆمبوونه‌كا نهێنى دناڤبه‌را ئه‌و سه‌ركردێن بزاڤا گۆران وكۆمه‌لا ئيسلامى كو مه‌يلێ وان به‌ر ب ئيرانێ ڤه‌يه هاته ئه‌نجامدان وبريار دا جادێ ب لڤينن، يوسف محه‌مه‌د وهه‌موو په‌رله‌مانتار وكادرێن گۆرانێ ژى دێ پشكداريێ دوێ لڤينێ دا كه‌ن وده‌زگه‌هێن راگه‌هاندنێ دێ داخوازا خوه‌نيشاندانان ل سه‌رانسه‌رى پاريزگه‌ها سليمانيێ كه‌ن”.
ئه‌و ژێده‌ره دبێژيته مالپه‌رى”ئيرانێ دڤێت فشارێن تمام بكه‌ت بۆ دابرينا سلێمانيێ ژ هه‌ولێرێ وژێك جودا بكه‌ت تاكو پيلانێن خوه بجهبينيت وناسناما كوردبوونا وێ ب گوهۆريت”.
ئه‌ڤرۆنيوز:
سه‌رۆكاتيا په‌رله‌مانێ كوردستانێ ئه‌ڤرۆ سێشه‌مبى 19/12/2017، په‌يامه‌ك ئاراسته ى خوه‌نيشانده‌ران كر وتێدا پشته‌ڤانيا خوه بۆ داخوازيێن وان دكه‌ت، دهه‌مان ده‌مدا داخواز ژێ دكه‌ت خوه ژ توندوتيژيێ وسۆتنا ده‌زگه‌هين فه‌رمى وخزمه‌تگوزارى دوور بكه‌ن، چونكى ئه‌و مولكێ گشتى نه وخزمه‌تا خه‌لكى دكه‌ن ول دووماهيێ تنێ دێ خه‌لك زيانداربيت.
دپه‌ياما په‌رله‌مانێ كوردستانێ دا هاتيه” ده‌مه‌كه په‌رله‌مان هه‌ست ب ره‌وشا خه‌لكێ كوردستانێ وسه‌ختيا بارێ ژيانا وه‌لاتيان وفه‌رمانبه‌ران وپێشمه‌رگه‌ى وخانه‌نشيان دكه‌ت، كو ژئه‌گه‌رێ قه‌يرانێن سياسى ودارايى وئابورى يێن تووشى هه‌رێمێ بووين، كاريگه‌ريا خراب ل سه‌ر ئاستێ خومه‌تگوزارى ومووچه‌يێن فه‌رمانبه‌ران وخانه‌نشيانان كريه”.
په‌رله‌مانى پشته‌ڤانيا خوه بۆ مافێن ره‌وا يێن وه‌لاتيان دووپات دووپاتكروراگه‌هاند” دهه‌مان ده‌مدا داخواز دكه‌ين خوه‌نيشانده‌ر ب شێوازه‌كێ هێمن وشارستانى نه‌رازيبوون وداخوازيێن خوه به‌رچاڤ بكه‌ن وخوه ژ توندوتيژيێ وسۆتنا باره‌گايێن ده‌زگه‌هێن فه‌رمى وخزمه‌تگوزارى دوور بكه‌ن، چونكى مولكێ گشتى نه وخزمه‌تا هه‌وه دكه‌ن ول دووماهيێ ژى تنێ وه‌لاتى دێ زيانداربن”.
دياركر ژى” توندوتيژى ئارمانجێن راسته‌قينه يێن وه‌لاتيان وبده‌ستڤه‌ئينانا داخوازيێن وان په‌يدا ناكه‌ت، خزمه‌تا نه‌يارێن گه‌لێ مه دكه‌ت كو دخوازن ئاژاوه‌گێريێ دروست بكه‌ن وئارمانجا وان ژناڤبرنا قه‌وارێ سياسى ودستووريێ هه‌رێما كوردستانێ وخوينا شه‌هيدانه”.
ل دووماهيا په‌يا خوه‌دا، سه‌رۆكاتيا په‌رله‌مانێ كوردستانێ دبێژيته خوه‌نيشانده‌ران” په‌رله‌مانێ كوردستانێ ل گه‌ل سه‌رۆكاتيا حوكمه‌تا هه‌رێمێ ولايه‌نێن سياسى دراوێژ وپه‌يوه‌نديێن به‌رده‌وام دايه بۆ وێ چه‌ندێ پێنگاڤێن جدى وراسته‌قينه بهێنه هاڤێتن بۆ چاره‌سه‌ركرنا كێشان وبجهئينانا داخوازيێن هه‌وه”.
ئه‌ڤرۆ نيوز:
ل سنورێ مه‌خمۆر شه‌ر د ناڤبه‌را هێزێن پێشمه‌رگه‌ى و كۆمه‌كا چه‌كدارێن داعش دا روودا، د شه‌رى دا پێشمه‌رگه‌ك شه‌هيد بوو و ته‌رمێ سێ چه‌كدارێن داعش ل جهـ ماينه.
سيروان بارزانى، سه‌رپه‌رشتيارێ ميحوه‌رێ گۆێر – مه‌خمۆر يێ پێشمه‌رگه‌ى بۆ رووداو گۆت: “نيڤرۆيا ئه‌ڤرۆ رۆژا سێشه‌مبى 19ى كانوونا ئێكێ 2017 ل ده‌شتا قه‌راج يا بنارێ چيايێ قه‌ره‌چووغ يێ سنورێ قه‌زا مه‌خمۆر، شه‌ر د ناڤبه‌را پێشمه‌رگه‌ى و گرۆپه‌كێ چه‌كدارى يێ داعش دا روودا.
سيروان بارزانى ئاماژه ب وێ چه‌ندێ ژى كر كو پێشمه‌رگه‌ك شه‌هيد بوويه و ته‌رمێ سێ چه‌كدارێن داعش ژى ل جهـ ماينه و كه‌فتينه ده‌ست پێِشمه‌رگه‌ى.
ئه‌ڤرۆ نيوز:
سه‌رۆكێ داخوازكه‌ريا گشتى ل سلێمانيێ بڕيارا ده‌سته‌سه‌ركرنێ بۆ شاسوار عه‌بدولواحد، رابه‌رێ بزاڤێ نه‌وه‌ى نوێ ب تۆمه‌تا هاندانا خوه‌نيشانده‌ران ده‌ركر.
ب گۆره‌ى نڤيساره‌كا فه‌رمى كو ب ده‌ست ئه‌ڤرۆ نيوز كه‌فتيه و ئيمزار سه‌رۆكێ داخوازكه‌رێ گشتى ب وه‌كاله‌ت ل سه‌ره، بڕيارا ده‌سته‌سه‌ركرنا “شاسوار عه‌بدولا” ده‌ركريه ب تۆمه‌تا هاندنا خوه‌نيشانده‌ران و ليڤينپێكرنێ و ژ ئه‌نجامێ ڤێ چه‌ندێ ژى خوه‌نيشانده‌ر رابووينه ب سۆتنا چه‌ندين باره‌گايێن حكۆمى و تێكدانا جهێن گشتى و بكارئينانا زارڤى ب هه‌رفيت حوكمه‌ت و دامه‌زراوێن وێ.
نيشاندان