ئه‌ڤرۆ نيوز، نيوار محه‌مه‌د سه‌ليم:

سه‌رۆكاتيا په‌رله‌مانێ كوردستانێ ئه‌ندامێن په‌رله‌مانى گازى دكه‌ت بۆ پشكداريكرن د روونشتنا په‌رله‌مانى ل ده‌سپێكا حه‌فتيا بهێت و جێگرا سه‌رۆكا فراكسيۆنا پارتى ژى ديار دكه‌ت كو دێ ده‌ست ژ كاركێشانا سێ په‌رله‌مانتاران كه‌ڤيته‌ به‌ر ده‌نگدانێ

ب گۆره‌ى گازيكرنه‌كێ كو ئيمزا جه‌عفه‌ر ئێمينكى جێگرێ سه‌رۆكێ په‌رله‌مانێ كوردستانێ ل سه‌ره‌، په‌رله‌مانێ كوردستانێ رۆژا شه‌مبى 23ى ئيلۆنێ بۆ روونشتنا ژماره‌ ئێك يا ئاسايى يا خولا پايزى هاتينه‌ گازيكرن.

ئامينا زكرى جێگرا سه‌رۆكا فراكسيۆنا پارتى ديموكراتى كوردستان ل په‌رله‌مانێ كوردستانێ بۆ ئه‌ڤرۆ نيوز گۆت: “ب گۆره‌ى به‌رنامێ كارى يێ كۆمبوونا په‌رله‌مانێ كوردستانێ بڕياره‌ د وێ روونشتنێ دا، خواندنا ئێكێ بۆ پرۆژێ زێده‌كرنا ماوێ قانوونا تيرۆرێ و خواندنا ئێكێ بۆ پرۆژێ زێده‌كرنا راگرتنا كارپێكرن ب قانوونا كرێدانا خانيان بهێته‌ كرن”.

جێگرا سه‌رۆكا فراكسيۆنا پارتى ديموكراتى كوردستان دا زانين ژى كو هه‌ر د روونشتنا په‌رله‌مانى دا دێ ده‌ست ژ كاركێشانا هه‌ر ئێك ژ فه‌رهاد سه‌نگاوى ژ فراكسيۆنا ئێكه‌تى نشتيمانى كوردستان و حاجى كاروان و عه‌مه‌ر كۆچه‌ر كه‌ڤيته‌ به‌ر ده‌نگدانێ.

ده‌رباره‌ى هه‌لويستێ فه‌رميێ پارتى ل سه‌ر ده‌نگدان ل سه‌ر ده‌ست ژ كاركێشانا ڤان سێ په‌رله‌مانتاران ئامينا زكرى گۆت: “پارتى هێشتا هه‌لويستێ خوه‌ يێ فه‌رمى ديار نه‌كريه‌، به‌لێ دێ چاڤه‌رێ بڕيارا فراكسيۆنێن وان ب خوه‌ ژى كه‌ين”.

ئەڤرۆ نیوز ، مەحمود نھێلی:
پارتی دیموکراتی کوردستان لسەر روودانا شێلادزێ بەیاننامەیەک دەرئێخست

ل سەر بوردومانکرنا دوھی یا گوندێن دەڤەرا ئامێدیێ ژلایێ فرۆکەیێن تورکیا ڤە و شەھیدکرنا ھەژمارەکا ھاولاتیان لقی ھەژدە یێ پارتی بەیاننامەک دەرکریە و تێدا زێدەباری شەرمزارکرنا وی کارێ ھوڤانە ژ تورکیا دحوازیت ڤان بوردومانان راوەستینت و داخازا لێبورێنی ژ خەلک وحکومەتا ھەرێما کوردستانێ بکەت.
ئەڤەژی دەقێ بەیاننامێ یە بەیاننامەک
ژ لقێ ١٨– ئامێدیێ یێ پارتی دیموکراتی کوردستان سەبارەت بومبەبارانا بالەفرێن تورکیا لسەر دەڤەرا نێروە و رێکان. جەماوەرێ دەڤەرا ئامێدیێ یێ خەباتکەر د دەمەکیدا کو گەلێ کوردستانێ نە بتنێ ل سنورێ قەزا ئامێدیێ بەلکو ل سەرانسەری ھەرێما کوردستانێ خو بەرھەڤ دکەن و ئاھەنگا دگێرن ژبو پالپشتی کرنا پروسا ریفراندوما سەربەخویا کوردستانێ ئەوا کو بریارە ل رێکەفتی ٢٥/٩/٢٠١٧ خەلکێ دەڤەرا ئامێدیێ و کوردستانێ ب ھەمی تەخ و چین و توێژە و پێکھات و ئول و نەتەوە ڤە ب ئاوایەکێ جوش و خروش ڤە قەستا سندوقێن دەندگدانێ بکەن و پێکڤە بێژن بەلێ بو سەرخوبوونا کوردستانێ ژبو دیارکرنا مافێ خو یێ چارەنڤیسی ب رەنەگەکێ شارستیانە و دویر ژ توند و تیژیێ پێخەمەت دویماھیک ئینانا وێ غەدر و زولم و زورداریێ ئەوا ب درێژاھیا مێژووێ ب دژی گەلێ مە ھاتیە ئەنجامدان، بەلێ ب مخابنیڤە ل رێکەفتی ١٩/٩/٢٠١٧ و ٢٠/٩/٢٠١٧ بالەفرێن سەر ب لەشکەرێ تورکیا ڤە بەردەوام بومبەبارانا دەڤەرا نێروە و رێکان کریە و د ئەگەرێ دا (٧) حەفت ھاولاتیێن بێ گونەھـ ل سنورێ قەزا ئامێدیێ بوینە قوربانیێن ڤان بومبە بارانا و ب خەم و کوڤان ڤە سەرەخوشیێ ل خو و مالباتێن وان دکەین کو ئەڤێن ل خارێ ناڤین وانن ( حکیم سعید چیچو، خەلکێ گوندێ کریادێرێ سەر ب ناحیا شێلادزێ ڤە، عەلی موستەفا محەمەد تاھر، خەلکێ گوندێ سیدان سەر ب ناحیا شێلادزێ ڤە ، جگر موستەفا محەمەد تاھر، خەلکێ گوندێ سیدان سەر ب ناحیا شێلادزێ ڤە.،سیداد سدقی محمد تاھر، خەلکێ گوندێ سیدان سەر ب ناحیا شێلادزێ ڤە. ، فاخر تاھر موستەفا ، خەلکێ گوندێ سارکێ – سەر ب ناحیا دێرەلوکێ ڤە ، عسمەت تەمەر ئەمین ،خەلکێ گوندێ سیتە سەر ب ناحیا شێلادزێ ڤە، شعبان رشید مێگفی خەلکێ گوندێ دھیکێ) سەر ب ناحیا شێلادزێ ڤە
ئەم بناڤێ لقێ ١٨ یێ پارتی دیموکراتی کوردستان ب توندی ڤێ کریارا لەشکەرێ تورکیا بدژی ھاولاتیێن بێ گونەھـ ئیدانە و شەرمزار دکەین و ھەروەسا داخوازێ ژ حکومەتا تورکیا دکەین کو داخوازا لێبورینێ ژ ھەرێما کوردستانێ بکەت ب ئاوایەکێ فەرمی، ھەروەسا ئەو فروکەڤانێن ئەڤ کریارە ئەنجامداین بھێنە دادگەھکرن و سزادان.
دیسان ئەم داخوازێ ژ حکومەتا تورکیا و ھێزێن (pkk)ێ دکەین ئێدی ژ نوکە وێڤە خاکا ھەرێما کوردستانێ بکار نەئینن بو تەسفیا حسابات و ململانێن خو یێن لەشکەری و سیاسی و کوردستانێ نەکەنە مەیدانا شەر و پێکدادانا.