ئه‌ڤرۆ نيوز:

ده‌سته‌يا ده‌ستپاكيێ ل هه‌رێما كوردستانێ، راگه‌هاند460 كه‌س ب پلێن وه‌زير ورێڤه‌به‌رێ گشتى يێن هاتينه‌ خانه‌نشين كرن، دده‌مه‌كى دا ئه‌و كاره‌ نه‌كرينه‌ ودێ ڤه‌كۆلين ل دۆر وان هێته‌ كرن.

حاكم ئه‌حمه‌د ئه‌نوه‌ر، سه‌رۆكێ ده‌سته‌يا ده‌ستپاكيێ ل هه‌رێما كوردستانێ ئه‌ڤرۆ ئێكشه‌مبى 10/12/2017، دا ل گونگره‌كێ رۆژنامه‌ڤانى ب هه‌لكه‌فتا رۆژا جيهانى يا به‌رهنگاريا گه‌نده‌ليێ، گۆت” مه‌ ل دووماهيا سالا 2015 كار ل سه‌ر پرسا خانه‌نشينيا نه‌ قانوونى كر ومه‌ پێشنياركربوو حوكمه‌ت مووچێن وان ب راوه‌ستينيت تاكو ليست ب رێيا ده‌سته‌يا ده‌ستپاكيێ وديوانا چاڤدێريا دارايى بهێنه‌ پاقژكرن”.

گۆت ژى” دێ ڤه‌كۆلينێ دكه‌يسا وان 460 خانه‌نشينان ژى كه‌ين كو پلێن وه‌زير ورێڤه‌به‌رێ گشتى هاتينه‌ خانه‌نشينكرن وچو جاران ئه‌و كاره‌ ژى نه‌كريه‌”.

ئه‌ڤرۆنيوز:

سه‌رۆكێ فراكسيۆنا پارتى ديموكراتى كوردستان ل جڤاتا نوونه‌رين عيراقێ، عه‌ره‌فات كه‌ره‌م،  راگه‌هاند، ژبه‌ركو به‌حسێ هێزا پێشمه‌رگه‌ى نه‌هاتيه‌ كرن، مه‌ پشكدارى درێ وره‌سمێن ب دووماهى ئينان وژناڤبرنا داعشێ نه‌كر.

دوهى شه‌مبيێ، سه‌رۆك وه‌زيرێن عيراقێ، حه‌يده‌ر عه‌بادى ب دووماهى هاتنا داعشێ ل عيراقێ راگه‌هاند وئاهه‌نگێن سه‌ركه‌فتنێ ئه‌ڤرۆ ل به‌غدا وچه‌ندين پارێزگه‌هێن عيراقێ هاتن سازكرن و سه‌رۆك وه‌زيرێن عيراقێ برياردا وو ئه‌ڤرۆ ئێكشه‌مبى وه‌كو بێهنڤه‌دانا فه‌رمى بيت ل عيراقێ.

نڤيسينگه‌ها سه‌رۆك وه‌زيرێن عيراقێ داخوازنامه‌ ئاراسته‌ى فراكسيۆنێن كوردستانى ل جڤاتا نوونه‌رين عيراقێ كربوو بۆ به‌رهه‌ڤبوونێ ل وان رێ وره‌سمان، ل دۆر وێ چه‌ندێ عه‌ره‌فات كه‌ره‌م سه‌رۆكێ فراكسيۆنا پارتى راگه‌هاند”ژبه‌ركو به‌حسێ هێزا پێشمه‌رگه‌ى نه‌كربوو، سه‌ره‌راى وان هه‌موو قوربانيێن ل شه‌رێ دژى تيرۆرێ داين، مه‌ پايكۆتا وان رێ وره‌سمان كر”.

عه‌ره‌فاتى گۆت ژى” چاوان پشكداريێ دوان رێ وره‌سمان دا بكه‌ن كو رێز ل خوينا شه‌هيدێن مه‌ نه‌گرت وب ئێك په‌يڤ ژى به‌حسێ وان نه‌كه‌ت”.

ژلايێ خوه‌ڤه‌، ئارێز عه‌بدوللا سه‌رۆكێ فراكسيۆنا ئێكه‌تى نيشتمانى كوردستان ل جڤاتا نوونه‌رێن عيراقێ،د به‌رپه‌رێ خوه‌ ل سه‌ر تۆرا فه‌يسبووكى به‌لاڤكر” ژلايێ نڤيسينگه‌ها سه‌رۆك وه‌زيرێن عيراقێ حه‌يده‌ر عه‌بادى هاتمه‌ داخوازكرن بۆ به‌رهه‌ڤبوونێ ل فيسته‌ڤاله‌كا له‌شكرى ب هه‌لكه‌فتا سه‌ركه‌فتنێ ل سه‌ر داعشێ، من ژى ئه‌و داخوازيه‌ قه‌بوول كر”.

زێده‌تر دبێژيت” پشتى من گوهداريا گۆتارا حه‌يده‌ر عه‌بادى كرى، كو ب هه‌لكه‌فتا سه‌ركه‌فتنێ ل سه‌ر داعشێ ئاراسته‌كرى، من تێبينى كر كو ناڤێ پێشمه‌رگه‌ى نه‌ئينا وبه‌حسێ قاره‌مانيێن وان دژى داعشێ نه‌كر، له‌وما من برياردا پشكداريێ دوێ فيسته‌ڤالێ دا نه‌كه‌م”.

ئه‌ڤرۆنيوز:

دوهى وه‌زاره‌تا ده‌رڤه‌يا ئه‌مريكى به‌ياننامه‌ك ب هه‌لكه‌فتا سه‌ركه‌فتنێ ل سه‌ر داعشێ ل عيراقێ ده‌ركر وتێدا ئاماژه‌ ب ناڤێ كوردستانێ و پێشمه‌رگه‌ى نه‌كر.

دوهى شه‌مبيێ 9/12/2017، پشتى په‌يڤا حه‌يده‌ر عه‌بادى سه‌رۆك وه‌زيرێن عيراقێ ب هه‌لكه‌فتا سه‌ركه‌فتنێ ل سه‌ر داعشێ، هيزر نويرت په‌يڤدارا وه‌زاره‌تا ده‌رڤه‌ يا ئه‌مريكى، به‌ياننامه‌كا رۆژنامه‌ڤانى ده‌ركر وتێدا ئاماژه‌ ب ناڤێ پێشمه‌رگه‌ى نه‌كر، به‌لكو تنێ به‌حسێ هێزێن ئه‌منى يێن عيراقى كر.

 به‌يانناما ناڤبرى كو د مالپه‌رێ وه‌زاره‌تا ده‌رڤه‌يا ئه‌مريكى دا هاتيه‌ به‌لاڤكرن، دبێژيت” پشتى هه‌وا وێره‌كانه‌ بۆ ده‌مێ سێ سالان ژ شه‌رى، حه‌يده‌ر عه‌بادى سه‌رۆك وه‌زيران ئازادكرنا تمام يا هه‌موو ئاخا عيراقێ ژبن كونترۆلا داعشێ راگه‌هاند”.

وه‌زاره‌تا ده‌رڤه‌يا ئه‌مريكى زێده‌تر دبێژيت” ئه‌مريكا ده‌ستخوه‌شيێ ل سه‌ركردايه‌تيا سه‌رۆك وه‌زيران عه‌بادى دكه‌ت، وپيرۆزباهيێن خوه‌ ئاراسته‌ى گه‌لێ عيراقێ وهێزێن ئه‌منى يێن عيراقى يێن وێره‌ك دكه‌ت كو گه‌له‌ك ژوان گيانێ خوه‌ ژده‌ستداى دشه‌رێن دژى داعشێ دا، وراگه‌هاندنا سه‌ركه‌فتنا عيراقێ ئاماژێ ب پاشمايێن (خيلافا) داعشێ ل عيراقێ راگه‌هاندى دكه‌ت كو يا هاتيه‌ ژناڤبرن وئاكنجيێن وان ده‌ڤه‌ران ژبن كونترۆلا داعشێ هاتينه‌ رزگاركرن”.

زێده‌تر تێدا هاتيه‌” ئه‌مريكا يا هه‌ڤرايه‌ ل گه‌ل حوكمه‌تا عيراقێ ددوپاتكرنێ ل سه‌ر وێ چه‌ندێ كو ئازادكرنا ده‌ڤه‌رين عيراقێ، رامانا ب دووماهى ئينانا تيرۆرێ وداعشێ ل عيراقێ نينه‌ وئه‌مريكا دێ به‌رده‌وام بيت مل ب ملێ هه‌ڤپه‌يمانيا نێڤده‌وله‌تيا دژى داعشێ، دهه‌ڤپشكيێ دا ل گه‌ل هێزێن ئه‌منى يێن عيراقى وپێشكێشكرنا راوێژ ومه‌شقێ وپرچه‌ككرنا وان وپێدڤيه‌ ئه‌م دهشيار بين د به‌رهنگاريا ئايديولۆژيێن توندره‌و بۆ رێگريێ ل زڤرينا داعشێ يان ژى په‌يدابوونا گه‌فان ژ گرۆپێن تيرۆرستى يێن دى”.

به‌يانناما وه‌زاره‌تا ده‌رڤه‌يا ئه‌مريكى دبێژيت ژى” هه‌ڤپه‌يمانيا جيهانى شانازيێ ب پشته‌ڤانيا هێزێن ئه‌منى يێن عيراقى دكه‌ت كو ب وێره‌كانه‌ شه‌ركرى بۆ شكاندنا وان تيرۆرستان”.

وه‌زاره‌تا ده‌رڤه‌يا ئه‌مريكى، دووپات دكه‌ت كو دێ ب رێيا حوكمه‌تا عيراقێ به‌رده‌وامبيت ل سه‌ر هاريكاريا هه‌ڤالێن خوه‌ يێن عيراقى يێن ده‌ربه‌ده‌ر كو بزڤرن جهێن خوه‌ يێن ره‌سه‌ن ودبه‌رده‌وامين ب پێگيريێ ب راوه‌ستانێ ل گه‌ل حوكمه‌تا عيراقێ وگه‌لێ عيراقێ ژبۆ بده‌ستڤه‌ئينانا سه‌قامگيريێ ل ده‌ڤه‌رێن ئازادكرى ژداعشێ.