ئه‌ڤرۆ نیوز ، نه‌وزاد هلۆرى:
ئه‌ڤرۆ كومسیوونا بلندا یا سه‌ربخویى یا هه‌لبژاردنان نموونه‌ك لسه‌ر چه‌وانیا ده‌نگدان لسه‌ر ریفراندۆما هه‌رێما كوردستانێ به‌لاڤكر كو تێدا دیاردبیت ب چوار زمانان لسه‌ر بیتاقا ده‌نگدانێ هاتیه‌ نڤیسان.
ب ڤى شێوه‌ى پرسیار هاتیه‌كرن ” ئه‌رێ ته‌ دڤێت هه‌رێما كوردستانێ و ده‌ڤه‌رێن كوردستانێ یێن ده‌رڤه‌یێ هه‌رێمىَ ببیته‌ ده‌وله‌ته‌كا سه‌ربخوه‌ ” كو ب سورانى ب ڤى شێوه‌ى هاتیه‌ نڤیسان ” ئایە دەتەوێت هەرێمی كوردستان و ناوچە كوردستانییەكانی دەرەوەی هەرێم ببێتە دەوڵەتێكی سەربەخۆ ، ئه‌ڤه‌ زێده‌بارى ب سێ زمانێن توركمانى و عه‌ره‌بى و سریانى ژى لسه‌ر هاتیه‌ نڤیسان.
لسه‌ر بیتاقا ده‌نگدانێ نیشانا كه‌سك به‌رامبه‌ر چوارگوشه‌یا به‌لێ هاتیه‌ چێكرن و پێدڤى یه‌ ده‌نگه‌ده‌ر نیشانا راست د چوارگوشێ دا دانیت ، بو نه‌خێر ژى هه‌روه‌سا.
پێدڤى یه‌ ده‌نگده‌ر نیشانا راست به‌رامبه‌ر ئالایێ كوردستانێ بدانیت بو سه‌ربخوى یا كوردستانێ.

ئەڤرۆ نيوز:

ھەوا بانگەشێ بۆ ریفراندۆمێ ل ھەرێما کوردستانێ دەستپێ کر و دەزگەھێن راگەھاندنا جیھانی ژی ب گرنگی بەحسێ ریفراندۆمێ دکەن و دیار دکەن کو کورد باش دزانن ئەڤە دەلیڤەکا دیرۆکی یە دا ئازاد ببن و ژ بەر ھندێ ژی کورد ناخوازن ڤێ دەلیڤێ ژ دەستان بدەن.
ھەوا بانگەشێ بۆ ریفراندۆما سەرخوەبوونا ھەرێما کوردستانێ دەستپێ کر و ل ھەرێما کوردستانێ ب ھەموو رەنگەکێ خەلک پشتەڤانیێ ل ریفراندۆمێ و سەرخوەبوونێ دکەن، دەزگەھێن راگەھاندنا جیھانی ژی ب گرنگی بەحسێ ریفراندۆمێ و ئازادیا کوردستانێ دکەن و دبێژن کورد ژی باش دزانن نھا رەوشا رۆژھەلاتا ناڤین ئالۆزە و ھەکە کورد مفایێ ژ رەوشا نھا وەرنەگرن رەنگە پاشی گەلەکێ بۆ وان ب زەحمەت بیت، ژ بەر ھندێ ژی ناخوازن ڤێ دەلیڤا گرنگ ژ دەستان بدەن.
ئاژانسا دویچە فارسی یا ئەلمانی د راپۆرتەکێ دا دیار کریە کو سەرەرای گەف و فشارێن گەلەک وەلاتێن جیھانێ و ھێزێن عیراقی، سەرۆکێ ھەرێما کوردستانێ مەسعود بارزانی راگەھاند کو ئەو دێ ریفراندۆمێ بکەن و کەس نەشێت ئاستەنگیان ل ھەمبەر مافێ رەوا یێ گەلێ کوردستانێ دروست بکەت، ژ بەر ھندێ ژی دوھی ل ھەرێما کوردستانێ کوردان وەکو جەژنەکا نەتەوی دەست ب ھەوا بانگەشێ بۆ ریفراندۆمێ کرینە و ھەموو تەخ و چینێن جڤاکی یێن کوردستانێ پشتەڤانیێ ل ریفراندۆمێ دکەن و دھێتە پێشبینی کرن کو دەنگێ ئەرێ رێژەکا باش بدەستڤە بینیت.
ئاژانسا سپۆتینگ یا روسیا ژی د راپۆرتەکێ دا راگەھاندیە کو خەلکێ ھەرێما کوردستانێ ئێدی بریارا خوە داینە کو ژ عیراقێ جودا ببن و چو ھێزەک ژی نەشێت رێگریێ ل داخوازیێن وان بگریت، ژ بەر ھندێ ژی ھەوا بانگەشا ریفراندۆمێ دوھی ب رەنگەکێ مەزن دەستپێ کر و ل پرانیا باژێرێن ھەرێما کوردستانێ خەلک پشتەڤانیێ ل ریفراندۆمێ و سەرخوەبوونێ دکەن و ئەو یەک ژی نیشا ددەت کو دێ خەلکێ ھەرێما کوردستانێ ب رێژەکا مەزن پشکداریێ د ریفراندۆمێ بکەن و دیارە دێ رێژا دەنگێ ئەرێ گەلەکێ زێدە بیت.
دەزگەھێن راگەھاندنا تورکیا ژی ب گرنگی بەحسێ ریفراندۆمێ دکەن و گەلەک نڤیسەر و رۆژنامەڤانێن تورکیا ژی دیار دکەن کو بارزانی رژدە دێ ریفراندۆم ھێتە کرن و ژ بەر ھندێ ژی دەست ب ھەوا بانگەشێ ھاتە کرن و دھێتە چاڤەرێ کرن کو ریفراندۆم ل ٢٥ ڤێ مەھێ برێڤە بچیت، ھەرچەندە گەلەک کەسان وەسا ھزر دکر کو ژ بەر فشارێن ئەمریکا و ھندەک وەلاتێن دی دەمێ ریفراندۆمێ دێ ھێتە پاشخستن، لێ سەرۆکێ ھەرێما کوردستانێ بەری ھەوا بانگەشا ریفراندۆمێ ژی راگەھاند کو دێ ریفراندۆم ل دەمێ خوە ھێتە کرن و دوھی ژی ب رەنگەکێ فەرمی ھەوا بانگەشێ دەستپێ کر و کوردێن ھەرێما کوردستانێ و جیھانێ ب گەرمی پێشوازی ل ھەوا دەستپێ کرنا ریفراندۆمێ کرن.
BBC ژی د راپۆرتەکێ دا راگەھاند کو عیراقێ ھەتا نھا گەلەک سۆز داینە کوردان لێ بجە نەئینان، ژ بەر ھندێ ژی کورد گەھشتینە ڤێ باوەریێ کو دڤێت بریارا خوە یا دووماھیێ بدەن و چارەنڤیسێ خوە ب دەستێ خوە دیار بکەن، ژ بەر ھندێ ژی ب گەرمی پێشوازی ل ھەوا بانگەشا ریفراندۆمێ ھاتە کرن و دیارە دێ رێژا دەنگێ ئەرێ گەلەکێ زێدە بیت.