ئەڤرۆ نیوز ، نەوزاد هلۆری:

جەژنێن گوندان هێشتا تایبەتمەندی یا جاران هەیە بەلکو زێدەتر ژی خورت بوینە ، ل گوندان زێدەباری زارۆکان دهەمان دەم دا زەلام و مەزن ژی عەلاگان د هەلگرن و ل هەموو مالێن گوندی دزڤرن.

ئەڤ دیمەنێن ل خوارێ دیمەنێن ئەڤرو یێن جەژنا قوربانا پیروزن ل گوندێ بالندا یا سەر ب دەڤەرا بارزان ، وەسا دهێتە خویاکرن کو زاروکێن گوندی ب گەرما و گەرم ل جەژنان دگەرن و هەند شیریناهیێن جەژنێ کومکرینە هەتاکو نکارن عەلاگێن خوە ب هەلگرن.

بیلال عەبدوللا زارۆکەکێ دژیێ 12 سالیێ دایە و د دەستێ ویدا پێنج عەلاگێن مەزن یێن شیریناهیێن جەژنێ هەبوون بۆ ئەڤرۆ نیوز گۆت: (خوشترین روژ د ژیانا مەدا روژێن جەژنێ نە و ئەم گەلەک شیریناهیان بخوە کوم دکەین و ل هەموو مالان ژی دگەرین و هندەک جاران ژی دچینە گوندێن نێزیکێ مەژی ، من ئەڤرو پێنج عەلاگێن کێک و چکلێت و شەکرووک و پفەک و شیریناهیێن دن کومکرینە و تێرا من بو دوو سێ هەیڤێن دی هەیە)

سالار شیمال ئەو ژی زاروکەکێ گوندێ بالندایە دیارکر کو ئەوی ژی سێ عەلاگێن شیریناهیێن جەژنێ کومکرینە و گۆت: (جەژنێن گوندان خوشترن ژبەرکو ئەم هەموو مروڤێن ئێکین و هەڤدوو دنیاسین ، ئەڤرو ئەز ل هەموو گوندی گەریامە و گەلەک شیریناهی کومکرینە)

زێدەتر گۆت: ( تشتێ نەخوش ئەوە هەموو مالان جەژنانەیێن خوە کرینە جبس و پسکێت ئەڤە بویە ئەگەر کو زویکا عەلاگێن مە تەژی ببن)