ئەڤرۆ نیوز، نەوزاد ھلۆری:

پرۆژێ ئاڤا ستراتیجیا دەڤەرا بارزان کو زێدەتری ٥١ گوندان پێکڤە گرێددەت سێ سالە ب سەر ماوەیێ وێڤە چووی و ھەتا نھا نێزیکێ ٦٠% ھاتیە چێکرن ، و بو دەستکەفتنا ئاڤا ڤەخوارنێ پرانیا گوندان ئاڤا رووباران بکاردئینن و ئەڤێ یەکێ ژی کارتێکرن ل ساخلەمیا وەلاتیان کریە ، رێڤەبەرێ ئاڤا بارزان ژی ددەتن دیارکرن کو ھەتا پرۆژێ ستراتیجیێ ئاڤا بارزان دوماھی نەھێت ئەو نکارن چوو چارەسەریان ببینن.

سەمیع سەدیق ئێکە ژ وەلاتیێن گوندێ بالندا دیارکر کو گوندێ وان پتری ٨٠٠ کەس تێدا ئاکنجی نە و ھەتا نھا ئاڤا پیسا رووباری بکاردئینن و گۆت : ( پرۆژەکێ ئاڤێ ل سالێن نوتان ژ بوو گوندێ مە ھاتیە چێکرن و ئاڤا وێ ل رووبارێ شین ل گەلیێ بالندا دھێتن و ئاڤا رووبارێ شین ژی ژبەر ھەبوونا کورانکاریێن کەش و ھەوایی نەیا درۆستە ژلایێ ساخلەمیێ ڤە و دیسان چەندین جھێن خودانکرنا پەزی و جھێ راوەستاندنا چێلان و پیساتیێ چەندین مال و خوارنگەھان و سەیرانیان ژی د چیتە سەر رووباری کو ئەڤ یەک ژی دبیتە سەدەما پیستبوونا ئاڤا مەیا ڤەخوارنێ ، و دخوازین کو حکومەتا ھەرێما کوردستانێ چارەسەریا ئاڤا مە بکەت )
مەقبولا کو ئەو ژی وەلاتیەکا دەڤەرێ یە دیارکر زێدەباری نە پاقژیا ئاڤێ د ھەمان دەم دا دوو رۆژان جارەکێ بتنێ بوو دەمێ ئێک دەمژمێر ئاڤ بو وان دھێتەدان و گۆت : ( ئەو ئاڤا ژ بوو مە دھێتە بەردان ئاڤەکا نەیا ساخلەمە و دبیتە سەدەما بەرکی و رەملێ و نەساخیێن گولچیسکان و چەندین نەساخیێن دن ، و دیسان ئاڤا مە زور یا کێمە ژ بەرکو پرۆژە ژ مێژە ھاتیە چێکرن و سالانە چەندین خێزانێن نوو لسەر گوندی زێدەدبن و پرۆژەش ھەر پرۆژێ کەڤنە )
ژلایێ خوڤە ئەندازیار زیاب میقداد رێڤەبەرێ ئاڤا بارزان دیارکر کو وەلاتیێن دەڤەرا بارزان مافدارن لسەر نەبوونا ئاڤا پاقژ و بۆ ئەڤرۆ نیوز گۆت : ( ھندەک ژ گوندێن دەڤەرا بارزان بو دەستکەفتنا ئاڤا ڤەخوارنێ پەنایێ بو ئاڤا رووباران دبەن ھەر بوو نموونە وەلاتیێن گوندێ بالندا ئاڤا وان ل رووبارێ شین دھێتە دابینکرن و ئەڤ یەک ژی پشتی وێ یەکێ ھاتیە کو ل سالێن بوری پێنج جاران بیرێن ئیرتیوازی ل گوندێ ناڤھاتی ھاتیە تاقیکرن بەلێ چوو ژ وان سەرکەفتن نەئینایە و ئەم نەچارین کو ل رووباری ئاڤێ بوو دابین بکەین سەرەرایی کو ئەڤ ئاڤە نەیا ساخلەمە ، بەلێ نھا پرۆژەکێ ستراتیجیێ مەزن ژلایێ حکومەتا ھەرێما کوردستانێ ژ بوو ھەموو دەڤەرا بارزان دھێتە چێکرن و ب تەمامبوونا ئەوی پرۆژەی چوو ئاریشەیێن ئاڤێ نامینن ل دەڤەرێ)
زێدەتر گۆت: ( نھا ب رەنگەک بەردەوام کار لسەر پرۆژێ ستراتیجیێ ئاڤا بارزان کو ٥١ گوندان بخوڤە دگریت دھێتەکرن بەلێ ژبەر قەیرانا دارایی کارێن وان ب خاڤی ب رێڤە دچن )