ئەڤرۆ نیوز:
یانا ریال مەدرید یا ئسپانی پێگوھورک بو یاریزانێ خوە کەریم بنزیمای دیت ئەوێ ل ڤێ دووماھیێ ئاستێ وی داکەفتی و بویە جھێ رەخنەگرتنێ.
دڤی بیاڤی دا دانیللی میارو ستێرا بەرێ یا یانا میلان یا ئیتالی ئاماژەکریە کو ستێرا یانا میلان یا ئەرژەنتینی ماورو ئیکاری ل وەرزێ نوو دێ ھێتە ڤەگوھاستن بو ناڤا رێزێن ریال مەدرید و دێ بیتە جە گرێ یاریزان کەریم بنزیمای.
ھێرشبەرێ ئەرژەنتینی کاروانێ خوە یێ تەپا پێ ل ئەکادیمیا بەرشەلونە دەستپێکریە بەری بھێتە ڤەگوھاستن بو ناڤا رێزێن یانا سامبدوریا و ژ وێ یانێ بو یانا ئەنتەر میلان ل ٢٠١٣ و کاروانێ خوە بەرب سەرکەفتنا بر.
یاریزانێ ناڤھاتی یێ ٢٤ سالی ھەتا نوکە دخولا ئیتالیا دا ١٣ گول ژ ١٣ یاریێن ھاتینە کرن تومارکرینە و ب تنێ نەە گولان یێ دوورە ب گەڤیتە ناڤا یاریزانێن ١٠٠ گول بو یانا ئەنتەر تومارکرینە کو ھەتا نوکە ٩١ گول یێن ھەین و ٢٣ یێن بەرھەڤکرین د ١٥٩ یاریێن بو یانێ کرین.

زاخۆ, ھشیار دوبانکی:
نوونەرا ھەرێما کوردستانێ ژ بۆ سەرکەفتنا ئێکێ ژڤانە سوباھی یاریا خوە یا گەرا دویێ ژدەرڤەێ یاریگەھا خوە ل باژێرێ بەغدا بەرامبەر یانا حدود بکەت ژ چارچوڤێ یاریێن خولا عیراقێ یا تەپا پێ بۆ یانیێن پلا نایاب و دڤێ یاریێ زاخۆ دێ بزاڤێن سەرکەفتنا ئێکێ کەت پشتی د یاریا خوە یا ئێکێ دا ل دەستپێکا وەرزێ نوو خوسارەت بووی..
ل دور ڤێ یاریێ ردوان نازی سەرۆک شاندێ یانا زاخۆ بۆ روژناما ئەڤرۆ دبێژیت: د یاریا بوری دا ئاستێ تیما مە ژ نەفت ئەلجنوب باشتربۆ و ژ خەلەتیەکا ھێلا بەرەڤانیێ شیان گەلەکێ ل سەر زاخۆ توماربکەن.
ھەروەسا ناڤھاتی گوت: بۆ ڤێ یاریێ مە ھەموو ئامادەکاری کرینە و کارگێریا یانا زاخۆ ژی وەسا دیارکریە ب سەرکەفتنێ یاریزان دێ ژلایێ کارگیری ڤە ھێنە خەلاتکرن و یاریزان ژی ھەموو دگەشبین بۆ ب دەستڤە ئینانا سێ خالان و تایبەت کو ددەمەکی دا ئەم ئێکانە نوونەرا ھەرێما کوردستانێ نە و چاڤێ ھەموو خەلکێ کوردستانێ ل سەرکەفتنا تیما مەیە و مە چو گێماسی دناڤا پێکھاتیێ تیمێ نینن، ب تنێ یاریزان حەمید ئیسماعیل نەبیت ئەوی ژ بەر ھندەک کاودانا نەشیای دگەل شاندێ بھێتە بەغدا و راھێنەرێ تیمێ ژی دێ شێت کێماسیێن یاریا ئێکێ چارەسەرکەت.

ئەڤرۆ، محەمەد عەلی:
دھێتە چاڤەرێکرن ئەڤرۆ قارەمانیا شەترەنجێ یا ڤەکری ل سەر ئاستێ کچان و کوران ل سنۆرێ پارێزگەھا دھۆکێ بھێتە ئەنجامدان، ئەوا ژلایێ ئێکەتیا شەترەنجا پارێزگەھێ ب ھەڤکاریا نوونەراتیا دھۆک یا لژنا ئۆلۆمپیا کوردستانێ ھاتیە رێکخستن.
دداخویانیەکێ دا کەمال جەلال سەرۆکێ ئێکەتیا شەترەنجێ ل پارێزگەھا دھۆکێ بۆ رۆژناما ئەڤرۆ گۆت: لدووڤ بەرنامێ سالانە یێ ئێکەتیا مە و بەردەوامی دان ب چالاکیێن خوە بریارە ئەڤرۆ قارەمانیا پارێزگەھێ یا ڤەکری بۆ کور و کچان لدووڤ سیستەمێ رابید حەفت گەر بۆ ماوێ دو روژان ل ھۆلا گرتیا ناڤەندا وەرزش و لاوان دەمژمێر شەشی ئێڤاری یا بەردەوامبیت و گۆت: پێشبینی دھێتـە کرن ژمارەکا بەرچاڤ یا یاریزانان پشکداریێ بکەن ژبەرکو ئەڤە ماوەکێ درێژە ئەڤ جورە قارەمانیە نەھاتینە رێکخستن.
ھەروەسا ناڤھاتی دیارکر کو مەرەم ژ ڤەکرنا ڤێ قارەمانیێ بەردەوامی دانە ژبۆ پێشئێخستنا وەرزشا شەترەنجێ و بەرھەڤی بۆ ھەموو یاریزانێن یانێن پارێزگەھێ ئەوێن دێ بەرھەڤیان کەن بۆ قارەمانی و خولێن بھێت یێن عیراقێ و کوردستانێ چو لسەر ئاستێ کەسۆکی بن یان یانا کو ببیتە جھێ مفا وەرگرتنێ و دیسا زێدەتر لسەر یاسا و سیستەمێ ڤێ یاریێ شارەزابن.
لدۆر بابەتەکێ جودا سەروکێ ئێکەتیا شەترەنجێ ل پارێزگەھا دھۆکێ گۆت: بریار بوو ئەڤرۆ یاریزانێن پارێزگەھێ پشکداری قارەمانیا عیراقێ بن لسەر ژیێن جودا ئەوا نوکە ھەڤرکیێن وێ ل بەغدا دھێنە کرن، لێ ژبەر کاودانێن سیاسی و دارایی نەچاربووین پشکداریێ نەکەن، لێ دێ بزاڤێ کەین بۆ چالاکیێن وەرزێ ٢٠١٨ پشکداریێن خوە بەرفرەھبکەین ئەگەر پشتەڤانی و کاودان د ھاریکاربن.