ئه‌ڤرۆ نیوز:
نوونه‌رێ پارتى دیموكراتى كوردستان ل لژنا بلندنا ریفراندومێ، هشیار زێبارى دیاركر چ ده‌مه‌ك یێ نموونه‌یى نینه‌ كو هه‌موو تشت یێ ل به‌رده‌ست و گونجایى بیت، به‌لێ ریفراندوم دێ هاریكاریا مه‌ كه‌ت بۆ چاره‌كرنا كێشێن ناڤ مالا كوردى، وه‌كو كاراكرنا په‌رله‌مانى و پشكداریا حزبان ل حكومه‌تێ، له‌وما ریفراندوم بۆ ئه‌گه‌رێ دانوستاندنێن ڤێ دووماهیێ ب تایبه‌ت یێن ناڤبه‌را پارتى و ئێكه‌تیێ و پێشنیاز هاته‌ كرن په‌رله‌مان بهێته‌ كاراكرن و وه‌زیرێن گۆڕان ڤه‌گه‌رن و ده‌ست ب كاربن.
زێبارى دیاركر ژى كو بڕیاره‌ شانده‌كێ بلندێ هه‌رێمێ سه‌ره‌دانا به‌غدا كه‌ت، به‌لێ بۆ هندێ نینه‌ رازیبوونا عیراقێ وه‌ربگرن، به‌لكو بۆ هوورده‌كارى و چاوانیا ئه‌نجامدانا ریفراندومێ و چه‌ند پرسێن دى یه‌، ژبه‌ر كو چ بڕیاره‌ك یان مادده‌كێ دستوورى نینه‌ كو رێگریێ ل هه‌رێمێ بكه‌ت كو سه‌ربخوه‌ نه‌بیت.

ئه‌ڤرۆ نیوز:
پشتى ڤه‌گه‌ریانا شاندێ ئێكه‌تیا نیشتمانیا كوردستانێ ل ئیرانێ، مه‌لا به‌ختیار به‌رپرسێ ده‌سته‌یا كارگێرى یا مه‌كته‌با سیاسى یا ئێكه‌تیا نیشتمانیا كوردستانێ راگه‌هاند، بریارا ریفراندومێ ب تنێ بڕیارا لایه‌نه‌كى نینه‌، به‌لكو بڕیارا هه‌موو لایه‌نه‌كێ یه‌.
مه‌لا به‌ختیار دیاركر كو وان ل ئیرانێ چوار كۆمبوونێن فه‌رمى هه‌بوون، ل هه‌ر چواران ب فه‌رمى مه‌ گوته‌ كۆمارا ئیرانێ ” ئه‌م نه‌ ل ره‌وشا عیراقێ و نه‌ ل شه‌رێ پشتى شه‌رێ داعش ل پاشه‌رۆژا خوه‌ د مسۆگه‌ر نینن، له‌وا مه‌ بڕیارا ریفراندومێ دایه‌، ژبه‌ر كو ریفراندۆم رێیا گرنتى یا پاشه‌رۆژا مه‌یه‌”.
مه‌لا به‌ختیار دیاركرژى كو وان گوتیه‌ كۆمارا ئیرانێ كانێ چاوان ئه‌و حسابێ بۆ سیاسه‌تا خوه‌ ئاسایشا ده‌ڤه‌رێ و عیراقێ دكه‌ن، ئه‌م ژى پشكه‌كین ژ ڤێ پرۆسێ، ره‌وش هه‌موو هاتیه‌ گوهۆرین، بێ گومان ئه‌م ژى وه‌كو كورد ب هزره‌كا هوورتر و هه‌مه‌لایه‌ن تر هزر ل چاره‌نڤیسێ خوه‌ دكه‌ین.

ئه‌ڤرۆ نیوز:
ئۆسمان بایده‌میر په‌یڤدارێ پارتیا دیموكراتیك یا گه‌لان راگه‌هاند سه‌رۆك كۆمارێ توركیا هه‌ر رۆژ دبێژیت كورد برایێ مه‌نه‌، نوكه‌ ژی گه‌فان ل هه‌رێما كوردستانێ و رۆژئاڤایێ كوردستانێ دكه‌ت و گۆت” ئه‌و وه‌كو هه‌ده‌په‌ بێی مه‌رج پشته‌ڤانیێ ل ریفراندۆما هه‌رێما كوردستانێ دكه‌ن”.
ئۆسمان بایده‌میر دیاركر ژى” هه‌رێما كوردستانێ به‌ر ب ئاڤاكرنا ده‌وله‌تا سه‌ربخوه‌ ڤه‌ دچیت، ئه‌و یه‌ك بۆ مه‌ هه‌موو كوردان پێشڤه‌چوونه‌كا مه‌زنه‌، ئه‌م وه‌كو پارتیا دیموكراتیك یا گه‌لان ب هه‌موو ره‌نگه‌كێ پشته‌ڤانیێ ل برایێن خوه‌ ل هه‌رێما كوردستانێ دكه‌ین “.