ئەڤرۆ نیۆز، سالار دۆسکی: 

رێڤەبەرێ گشتیێ ئەوقاف و کارۆبارێن ئاینی ل پارێزگەھا دھۆک ئاشکراکر کو ل دووڤ بەرنامەکێ تایبەتێ سالانە و ل وەرزێ ھاڤینێ و بھێنڤەدانا قوتابیان خولێن فێربوونا قورئانێ بۆ زارۆکان ژ کچ و کوران ل سەرانسەری پارێزگەھا دھۆک دێ ھێنەڤەکرن.
د.سەمیان عەبدالخالق سەعدی رێڤەبەرێ گشتیێ ئەوقاف و کارۆبارێن ئاینی ل پارێزگەھا دھۆک زێدەتر بۆ ئەڤرۆنیۆز گۆت: سالانە ئەڤ خولە بۆ قوتابیان پشتی تاقیکرێن قوتابیان ب دووماھی دھێن دھێنەڤەکرن و ئەڤ سالە 120 خولێن فێربوونا قورئانێ بۆ کچ و کوران دێ ھێنە ڤەکرن و ئەڤ خولە دێ بۆ چەند ھەیڤان بەردەوام بن.
ھێشتا گۆت: ئارمانجا خولان ئەوە مفا ژ دەمی بھێتە وەرگرتن و قوتابی فێری قورئانا پیروز ببن و مامۆستایێن شارەزا بۆ ئەڤان خولان ھاتینە دەست نیشانکرن.

ئامێدیێ ، نەوزاد ھلۆری:
وەلاتیەکێ قەزا ئامێدیێ بناڤێ خسرو ئامێدی ماوەیێ ٣٧ سالایە ترومبێلەکێ ژ جورێ بەرازیلی دھاژوت و ددەتن دیارکر کو ئەو ترومبێلا خوە ل گەل مونیکایەکێ ژی ناگوھریت.
خسرو ئیبراھیم موستەفا ناسیار ب خسرو ئامێدی شوفێرێ ترومبێلا بەرازیلی بۆ ئەڤرۆ نیوز گۆت: (ل سالا ١٩٨٠ من ترومبێلەکا بەرازیلی کری کو ئەز ئێکەمین کەس بووم کو ترومبێلەکا بەرازیلی ل سنوورێ قەزا ئامێدیێ و دەروبەران بکرم و ھەتا نوکەژی ھەر ئێکەمین کەسم کو ھێشتا ترومبێلا بەرازیلی ھەیی ، و گەلەک سەبرا من ب ترومبێلا برازیلی دھێت و ب ھیچ شێوەیەکێ بەرھەڤ نینم بفروشم یان بگوھرم خوە ئەگەر دەفتەران ژی بدەن من و ترومبێلەکا مونیکا ژی بدەن من ژبەرکو دلێ مرۆڤی ب چوو خوشە دڤێت مرۆڤ بزاڤێ بو وی تشتی بکەت و گەلەک گەلەک دلخوش و ئارامم ب ترومبێلا خوە)
زێدەتر گۆت: (ژبلی گوھرینا مەکینا ترومبێلا خوە من چوو گوھرینێن دن لسەر نەکرینە ، ئەڤ جورێ ترومبێلێ د وەختێ خودا باشترین بوون و گەلەک ژی ب لەز بوون ، نوکە ھەر ئاریشە و خراب بوونەکا بکەڤیتە ترومبێلا من ھەر ئەز بخوە درست دکەم ڤە و ماوەیێ چەندین سالایە من نەبریە فیتەری)
خسرو ئامێدی ١٩٦١ ژ دایکبویە و خێزاندارە و چەند زارویەکێن ھەیی و ھەتا رێزا شەشێ سەرەتایی خواندیە و نھا وەکو فەرمانبەر ل گەنجینەیا ئامێدیێ کاردکەت و زێدەتر گۆت: (ھیڤیا من یا سەرەکی دژیانێ دا ئەوە کو کورد ھەموو پێکڤە ببنە ئێک و پێکڤە پشکداریێ د ریفراندومێ دا بکەن داکو ل قوناغا دوڤدا بکارین ببینە خودان دەولەت و سەربخوەیێ رابگەھینین)

ئەڤرۆ نیوز:
ب مەرەما رێزگرتن ل کار و خەباتا وان رۆژنامەڤانێن دوارێ ژینگەھی دا کار دکەن بو ناساندن و ڤەوژاندنا ژینگەھێ و بەرزراگرتنا ژینگەھێ و بەرچاڤ کرنا کار و بزاڤ و چالاکیێن رێکخراوا وار بۆ پاراستنا ژینگەھێ ، ٣٥ رۆژنامەڤانێن سنوورێ قەزا سوران ژلایێ رێکخراوا وار بۆ پاراستنا ژینگەھێ د رێورسمەکێ ژ ھەژی دا ھاتنە خەلاتکرن کو ئێک ژ وان پەیامنێرێ مالپەرا ئەڤرۆ نیوز بو.
دڤی واریدا ھەژار ئیدلیبی بەرپرسێ رێکخراوا وار بو پاراستنا ژینگەھێ دیارکر کو ئەوان ب ھەلکەفتا چوار سالیا دامەزراندنا رێکخراوا وار رێورسمەکێ ژ ھەژی بو خەلاتکرن و رێزگرتنا ٣٥ رۆژنامەڤانێن سنوورێ قەزا سوران رێکخست و بۆ ئەڤرۆ نیوز گۆت: ( ئێک ژ وان رۆژنامەڤانێن کو د دەمێ بوری دا کار و خەباتەکا زور بو ناساندن و پاراستنا ژینگەھێ ل سنوورێ قەزا سوران و دەڤەرا بارزان و چەند دەڤەرەکێن دن کری رۆژنامەڤا و و پەیامنێر و ئێک ژ سەرپەرشتیارێن مالپەرا ئەڤرۆ نیوز ” نەوزاد زادە ھلوری ” بوویە ، و جھێ شانازیێ یە کو ل کوردستانێ مە کومەکا زورا کەسان ھەبن کار بو پاراستنا ژینگەھێ بکەن)
زێدەتر گۆت: (زێدەباری خەلاتکرنا رۆژنامەڤانان د ھەمان دەم دا ٢١ کارمەندێن ژینگەھێ ژی ھاتنە خەلاتکرن کو دەمەکێ زورە کار بو پاراستنا ژینگەھێ دکەن)