ئه‌ڤرۆ نیۆز،عه‌زیز هه‌ورامی:
ژ ئه‌گه‌رێ وه‌رگه‌ريانا ترومبێله‌كێ ل سه‌ر رێيا گوندێ گولپ – باخه‌كون سه‌ر ب ناحيا بياره يا پارێزگه‌ها هه‌له‌بجه، دو كه‌سان ژ ئێك خێزان گيانێ خوه ژ ده‌ستدا.
د. ئاراس حەمەسەعید، رێڤه‌به‌رێ نه‌خوشخانا ل هه‌وارهاتنێ يا هه‌له‌بجه بۆ ئه‌ڤرۆ نيوز دياركر كو كه‌سێن گيانێ خوه ژ ده‌ستداى، ئێك ب ناڤێ سازان ئاراس ته‌مه‌ن 20 سال و يا دى زه‌ينه‌ب خالد ته‌مه‌ن 60 سال گيانێ خوه ژ ده‌ستداينه.
ئەڤرۆ نیۆز،زنار تۆڤی:
وه‌زاره‌تا ساخلەمیا حوکمه‌تا هه‌رێما كوردستانێ كار دکەت بۆ جۆداکرنا كارێ نۆشداران ل نه‌خۆشخانێن حكومى و ئه‌هلی و دڤێت نۆشدار خۆ بۆ كه‌رتەکێ ژ وان ئێكلا بكەت.
خالس قادر پەیڤدارێ وه‌زاره‌تا ساحلەمیێ ل حوکمه‌تا هه‌رێما كوردستانێ راگه‌هاندیە:کو ب ئەگەرێ مۆله‌ت وه‌رگرتنا نۆشداران و چوونا نۆشدارێن عه‌ره‌ب بۆ باژێرێن خۆ و ئەگەرێ كێمیا میلاكی، گرفتا نه‌بوون و كێمیا نۆشداران ل مه‌لبه‌ند و بنگەهێن ساخلەمیێ هه‌یه، بۆ ڤێ مه‌به‌ستێ ژی ل ماوێ دو سالاندا، ئه‌نجومه‌نێ وه‌زیران نێزیكی هزار و (150) ده‌رچوویێن زانكۆ و په‌یمانگەهێن نۆشداری بۆ مە دامه‌زراندینە.
ئاشكرا ژی كریە،کو وه‌زاره‌تا ساخلەمیێ د هه‌ولاندایه کو كاركرنا نۆشداران ل كه‌رتێ حکومى و ئه‌هلى پێكڤە جۆدا بكەت و گوت ژی:دڤێن نۆشدار خۆ ئێکلا بکەت، چونكی ئەم دزانین ڤێ تێكه‌لبوونێ،كاریگه‌ریەکا خراپ ل سه‌ر كه‌رتێ ساخلەمیێ هه‌یه.
وی پەیڤداری گوت ژی:ل هه‌رێما كوردستانێ ( 990 ) بنگەهێن ساخلەمیێ و ( 76 ) نه‌خۆشخانێن مەزن و (54) نه‌خۆشخانێن تایبه‌ت هه‌نه،کو ب زێدەهی ڤە تێرا وان هژمارا نه‌خۆشان دکەت،ژ بلی هندێ پێش هاتنا قه‌یرانا دارایی، به‌رێ بناغه‌ى بۆ (20) نه‌خۆشخانێن حکومی یێن دی هاتینە دانان،بەلێ ژبەر قه‌یرانا دارایی ئەم نەشیاینە تەمام بكەین.
ئه‌ڤرۆ نيوز:
عوسمان بایدەمیر په‌رله‌مانتار و په‌يڤدارێ پارتا ديموكراتا گه‌لان، پشتى بۆ چه‌ند ده‌مژمێران ل باژێرێ ئیستەنبوڵ هاتيه گرتن بۆ وه‌رگرتنا ئيفادان، هاته ئازادكرن.
عۆسمان بایدەمیر پەرلەمانتارێ ھەدەپێ، بەری نھا دوسێیەک ل سەر ھاتبوو ڤەکرن، ژبەر نەبەرھەڤبوونا وی ل دادگەھێ، دادگەھا رھایێ ژى بریارا دەستەسەرکرنا وی دەرکربوو، ئەڤرۆ ئێڤاری ژی ل فرۆکخانەیا ئەتاتورک ژ ئالیێ ھێزێن ئێمناھییا تورکیێ ڤە ھات گرتن و پشتى ئيفاده وه‌رگرتنێ هاته ئازادكرن.
ئەڤرۆ نیۆز،زنار تۆڤی:
تۆرا میدیایی یا عێراقی، کوو دامه‌زراوه‌کا فه‌رمی یا سه‌ر ب حومه‌تا فیدرالی ڤەیە فه‌رمانەکا كارگێرى ل دژی هه‌رێما كوردستانێ ده‌رکر و رێڤەبەراتیا هه‌رێما كوردستانێ دناڤا وێ تۆرێدا هه‌ل دوەشینیت و دکەتە سێ به‌شێن هه‌ولێر و سلێمانى و دهۆك.
د فه‌رمانا كارگێریا هژمار 1/ 4/ 2/ 15204 ك ل 9/ 11/ 2017 ب ئیمزایا موجاهید ئه‌بو هێل به‌در،هاتیه ده‌ركرن، بریار هاتیەدان به هه‌لوه‌شاندنا رێڤە‌به‌راتیا هه‌رێما كوردستانێ كو ب فه‌رمانا كارگێرى یا هژماره (1/ 4/ 2/ 5866) ل 18/ 5/ 2016 هاتیە پێکئینان.
وه‌ك دوێ فه‌رمانا كارگێریدا هاتی،کو كۆپیەک ده‌ست ب ئەڤرۆ نیۆز کەفتیە،کو ئەو رێڤەبەرایەتیە کریە سێ به‌ش و ژ به‌شێن هه‌ولێر، سلێمانى و دهۆك پێكهاتینە.
لدووڤ ژێدەرەکێ سیاسی، ئه‌م بریارهژی درێژیا هه‌مان وان بریار و ڕێكارێن سزاكاریێن نەدستوورینه، کو حوکمه‌تا فیدرال ب سه‌رۆكاتیا حه‌یده‌ر عه‌بادى و ب پشتەڤانیا ئیران و توركیا به‌رامبه‌ری هه‌رێما كوردستانێ، گرتیه به‌ر.
ئه‌ڤرۆنيۆز:
په‌يڤدارێ ئۆفيسا راگه‌هاندنێ يا سه‌رۆك وه‌زيرێن عيراقێ، سه‌عد حه‌ديسى، ئه‌ڤرۆ ئێكشه‌مبى راگه‌هاند، ره‌شنڤيسا بۆدجا سالا 2018 دقۆناغا دووماهيێ دايه وچو ئاماژه ب ناڤێ پارێزگه‌هێن باكوورێ عيراقێ تێدا نينن.
سه‌عد حه‌ديسى دداخۆيانيه‌كا رۆژنامه‌ڤانى دا گۆت( مادا 143 ژ دستوورێ عيراقێ دبێژيت پارێزگه‌هێن ئه‌ربيل وسلێمانيێ ودهۆكێ هه‌رێمه‌كا سه‌ربخوه‌يه) گۆت ژى( دستوورى سنۆرێن ئيدارا هه‌رێمێ ژى يێن دياركرين).
خوياكر ژى( دستوورێ عيراقێ مه‌رجه‌عێ سه‌ره‌كيێ هه‌موو پێكهاتێن عيراقێ يه بێ جوداهى، حوكمه‌تا عيراقێ ژى يا پێگيره ب دستوورى وماده وبه‌ندێن وى بجه دئينيت).
په‌يڤدارێ ئۆفيسا راگه‌هاندنا سه‌رۆك وه‌زيرێن عيراقێ گۆت ژى( ئه‌و پێنگاڤێن ل گه‌ل هه‌رێمێ هاتينه هاڤێتن بجهئينانا دستوورێ عيراقێ يه ل دۆر ئێكگرتنا ئاخا عيراقێ).
دره‌شنڤيسێ پرۆژێ بۆدجا عيراقێ يا سالا 2018، پشكا هه‌رێما كوردستانێ ژ 17% بۆ 12.67% هاتبوو كێمكرن ، ديسا چو به‌حسێ دوباره ئاڤه‌دانكرنا باژێرێن ئازادكرى ژ داعشێ تێدا نه‌بوو.
ئه‌ڤرۆنيۆز:
پارێزگه‌رێ نه‌ينه‌وا يێ ژكار لاداى، نه‌وفه‌ل ئه‌لعاگۆب، راگه‌هاند ئه‌و دێ سكالايه‌كێ دژى 21 ئه‌ندامێن جڤاتا پارێزگه‌هێ ب تۆمه‌تا بێ ده‌نگبوونێ ل سه‌ر هنده‌ك تۆمه‌تباران.
ئه‌لعاگۆب دداخۆيانيه‌كا رۆژنامه‌ڤانى دا دياركر، 21 ئه‌ندامێن جڤاتا پارێزگه‌ها نه‌ينه‌وا بێ ده‌نگ بووينه ل سه‌ر هنده‌ك تۆمه‌تباران كو دداخوازكرينه بۆ دادگه‌هێ ب تۆمه‌تا تيرۆرێ وسكالا دێ هێته بلندكرن ژبه‌ربێ ده‌نگ بوونێ ل سه‌ر تاوانباران و بجهنه‌ئينانا فه‌رمانێن دادوه‌رى ژلايێ ئه‌ندامێن جڤاتێ ڤه.
ل دووماهى كۆمبوونا جڤاتا پارێزگه‌ها نه‌ينه‌وا، بريارا لادانا نه‌وفه‌ل ئه‌لعاگۆب، ب تۆمه‌تا گه‌نده‌ليێ، ژپۆستێ پارێزگه‌رێ نه‌ينه‌وا هاتبوو دان.
ئه‌ڤرۆنيۆز:
هه‌لبژارتيه‌كێ گه‌هشتيه مونديالا 2078 ل رۆسيا، دڤاڤارتنان دا 11 گۆل يێن تۆماركرين و چ گۆل ل سه‌ر نه‌هاتينه تۆماركرن.
هه‌لبژارتيێ مه‌غرب كو شياى دوهى ب سه‌ركه‌ڤيت بۆ مونديالا رۆسيا 2018، دكۆما سيێ دابوو ژ ڤاڤارتنێن كێشوه‌رێ ئه‌فريقيا ل گه‌ل هه‌لبژارتيێن (كوت ديفوار، گابون ومالى) دشه‌ش ياريان دا سێ سه‌ركه‌فتن وسێ وه‌كهه‌ڤى بده‌ستڤه‌ئينان ودچو ياريان دا نه‌هاته دوراندن وچو گۆل ژى ل سه‌ر نه‌هاتن تۆماركرن وشيا 11 گۆلان تۆمار بكه‌ت و 12 خالان كۆم بكه‌ت.
ئه‌ڤرۆنيۆز:
پارێزگارێ کەرکووکێ نه‌جمه‌دين كه‌ريم ئاشكراركر ميليشيا وگرۆپێن ب سه‌ر زێره‌ڤانێن شۆره‌شا ئيسلامى يا ئیرانێ ڤه گه‌له‌ك جاران گه‌فێن كوشتنێ ئاراسته‌ى وى كرينه.
نەجمەدین کەریم دداخۆيانيه‌كا رۆژنامه‌ڤانى دا بۆ رادیۆیا (NPR) یا ئەمریکی دبێژيت، ئەو چه‌ندا ل 16 چريا ئێكێ 2017 ل كه‌ركووكێ رووداى خیانەت بوو و کەرکووک دێ هه‌ر مينيت پشکەک ژ ئاخا کوردستانێ و چو جاران ژى ئەو دەستان ژ ناسناما کەرکووکێ بەرنادەن.
خوياكر، ميليشيا و گرۆپێن ب سەر زێره‌ڤانێن شۆره‌شا ئيسلامى (پاسدار) په‌يوه‌نديێ پێ دكه‌ن وداخوازا زڤرينا وى بۆ كه‌ركووكێ دكه‌ن. دياركر ژى (مەرەما وان کوشتنا منه).
نەجمەدینى ره‌خنه ل ئه‌مريكا وئورۆپا گرتن وگۆت، ئەمریکا و ئورۆپا ل دۆر پرسا کوردان د دو رى بوون.
نيشاندان