ئەڤرو نیوز ، ھلۆری:

سوحبەتکرن ئێکە ژ وان تشتێن کو دلێ مرۆڤێ خوەش دکەت ، لێ سوحبەتان ژی ھونەر و سنورێن خوە ھەنە و ھەموو کەس نوزانن سوحبەتان بکەن و دڤێت د سوحبەتاندا کەسایەتی و جە و دەم بەرچاڤ بھێتە وەرگرتن، ژ بەرکو سوحبەتێن شاش پەیوەندیێن جڤاکی لاواز دکەت.

ئەڤین یاسین کچەکا دژیێ ٢٠ سالیێ دایە دیارکر کو سوحبەت ئارامیی و بەختەوەریێ بۆ دلان دروست دکەن و گوت : (ھەر تشتەکێ کو مرۆڤ بکەت پێدڤی ب ھەبوونا شارەزایەکێ یە ، ھەکە سوحبەت ژی ل سنورێن خوە بورین دێ بەروڤاژی ل سەر مرۆڤی زڤریت ، زور کەسانێن ھەیی دھێنە نیاسین کو سوحبەت خوشن و چەندەھا مرۆڤ ل دورماندورێن وان کومبوینە بەلێ د ھەمان دەمدا پرانیا تاکێن جڤاکی خوە ژ وی دوور دکەن ژ بەرکو ئەو د سوحبەتێن خودا ژ سنوران دەردکەڤن)
شینوار شیمال وەلاتیەکە دیارکرکو ھەر سوحبەتا ئارمانج بو نەبیت دێ یا بێ بەرھەم بیت گوت : (زور کەس ھەما ژ خوە و ژ نیشکەکێ ڤە بخوە سوحبەتان دکەن ب ھندەک تاکێن جڤاکی نەخاسمە دگەل مرۆڤێن عاقل سڤک ، بتنێ بو ھندێ یە کو دەمێ خوە ب وان ببورینن ، دیسا یێن ھەیی بەرامبەر خێزانا خوە یان کەساتیێن ناڤدار سوحبەتان دکەن ب ھزرا من ئەڤان کەساتیەکا لاواز و نەساخیێن دەرونی یێن ھەیی)
شارەزایەکێ جڤاکی دیارکر کو ھەر جھەکێ ئاخفتنێن خویێن تایبەت ھەنە و ھەموو جھان سوحبەت ناھێنەکرن و گوت : (ھندەک جھێن یێن ھەیی پێدڤی یە سوحبەت تێدا نەھێنەکرن ژ بەرکو ل وان جھان ھەموو جورە مرۆڤ تێدانە و دبیت ھندەک ژ وان حەژ سوحبەتان نەکەن و دیسا کەسێ سوحبەت دگەل دا دھێتەکرن دبیت ھەست ب لاوازیێ بکەت وەکی ل قوتابخانان و چایخانا و جھێن کو مرۆڤ تێدا ھەبن ، لێ پا پرانیا سوحبەتکەرێن مە بخوە ل ڤان جھان دگریێن کو ئەڤەژی تشتەکێ شاشە دجڤاکێ مەدا)
شارەزایێ جڤاکی ھێشتا دازانین کو ھەکە ھندەک کەس ئێک دوو بنیاسن و سرۆشتێ وان یێ نێزیکێ ئێک بیت ل وی دەمی سوحبەتێن ھەمەجور بھێنەگوتن تشتەکێ ئاسایی ، بەلێ د ھەمان دەمدا ئەز نابینم کو ئەڤێ چەندێ بەردەوامی بو ھەبیت و رۆژەک دێ ھێت پەیوەندیێن وان دێ گورانکاری ب سەرداھێن ژ ئەنجامێ وان سوحبەتان.
شینواری دیارکر ژی کو سوحبەتێن خوەش تشتەکێ زور جوان و ئاسایە و دبیتە جھێ دلخوشیێ نەخاسمە دناڤبەرا ئەندامێن خێزانێ ، بەلێ سوحبەتێن مەژی دڤێت مەرەم و ئارمانج بو ھەبن.
ئەحمەد سالح ئەو شارەزایێ جڤاکی زێدەتر د ئاخفتنێن خودا دیارکر کو بابەتێ سوحبەتێ ژ بابەتێن ھەستیارە و نھا ئەم دجڤاکەکێ گرتی دا دژین و پێدڤیە مە ئاگەھی ژ سوحبەتێن خوە ھەبیت و گوت : (ھەر سوحبەتەکا تاما شکەستنێ و رەزیلیێ تێدا ھەبیت دێ کارتێکرنێن جڤاکی و دەرونی کەتە سەر پەیوەندیێن ھەردوو ئالیان ، تایبەتی وان سوحبەتێن کو ناسناڤان بو کەسێ بەرامبەر ددانیت دیسا سوحبەتێن شاش ھەڤالان بو مرۆڤی ناھێلن و کەساتیا مرۆڤی لاواز دکەت و ژلایێ ئاینی ڤەژی دبیت گونەھبار بیت و د ئەنجامدا مرۆڤ دبیتە پێ ترانکێ خەلکی )
شارەزایی جڤاکی دیارکرژی کو سوحبەت پێدڤیەکا جڤاکی یە و دل پێ ئارام دبن و نەیا جوانە مرۆڤ یێ کیڤی بیت و ژسوحبەتێن جڤاکی دوربیت ، بەلێ دڤێت ئەڤ چەندە ل سەر حسابا تاکێن جڤاکی نەبیت ل دوماھیکێ گوت : ( باشترین سوحبەت ئەون کو ل سەر ئاستێ تاکە کەسی بھێنە گوتن و دڤێت د سوحبەتێن خودا ژ دەلیڤ و مەوقوفان بگەرین ، وان سوحبەتان بێژین کو د بەرھەمداربن و پەیوەندیێن مە ب ھێزتر بکەن و دیسا مە ئارمانجەک بۆ ھەبیت و دەمێ کرنا وان ژی یێ کورت بیت)

ئه‌ڤرۆ نيوز:

رێڤەبەرا چاکسازیا ژن و سنێلان ل ھەولێرێ راگەھاند، کو ڤان سالێن دووماھیێ رێژەیا ئەنجامدانا تاوانان زێدەکریە و ددەمێ نوکەدا پتری 400 ژن و سنێلە ب تۆمەتێن جودا دناڤا چاکسازیێ دا ژیانا خوە دەرباز دکەن و ھاتینە سزادان، ھەروەسا دیار کر کو ب تۆمەتا ئەنجامدانا تاوانێن گران فەرمانا سێدارەدانێ بۆ حەفت ژنان دەرچوویە، بەلێ ھێشتا ئەڤ سزا ب سەر دا نەھاتیە بجە ئینان.
ھەولێر، قائید میرۆ:
دیمەن محەمەد، رێڤەبەرا چاکسازیا سنێلە و ژنان ل باژێڕێ ھەولێرێ بۆ ئەڤرۆ گۆت: رۆژ بۆ رۆژێ رێژەیا تاوانان ل ھەرێما کوردستانێ بەرەڤ زێدەبوونێ ڤە دچیت و ئەگەرێن زێدەبوونا تاوانان ژی زۆرن، بەلێ ئەڤ تێکەلیا نوکە چێبوی دگەل ھاتنا ڤێ ھژمارا زۆرا ئاوارەیان بۆ ھەرێما کوردستانێ ئەگەرێن سەرەکینە بۆ بلندبوونا رێژەیا تاوانان، ددەمێ نوکەدا پتری 400 ژن و زارۆ ل چاکسازیا سنێلە و ژنان ھاتینە زیندانکرن و تاوانێن جودا ئەنجامداینە و ژ لایێ دادوەری حوکمێ زیندانکرنێ بۆ دەرچوویە، گۆتژی ئەڤە سەرەرای ڤێ چەندێ کو جھێ چاکسازیا ئەم تێدا تنێ بەھرا 100 کەسان دکەت و نوکە 400 کەس تێدانە، بەلێ دگەل ڤێ ئێکێ ژی مە بزاڤێن زۆر یێن کرین باشترین شێوە خزمەتا زیندانیان بکەین و وەک بەرێ نەمایە کەسەک تاوانەکێ ئەنجامبدەت و وەکو تاوانبار بەرێ خوە بدەینێ و چو گرنگی پێنەھێتەدان، بەرۆڤاژی حوکمەتا ھەرێما کوردستانێ بزاڤێن خوە یێن کری کو ئەڤ زیندانە ببنە چاکسازی بۆ ئەڤان کەسێن دھێنە حوکمدان و ب پلان و بەرنامە کار تێدا دھێتەکرن ئەڤ کەس جارەکا دی ئەگەر ڤەگەڕن ناڤ جڤاکی و سزایێ وانا ب دووماھی ھات، وی دەمی بشێن وەکو کەسەکێ ئاسایی بژیت و دووبارە دەستێ خوە نەبەت بۆ تاوانەکا دی.
دیمەن محەمەد گۆتژی: ل ھەرێما کوردستانێ سزایێ سێدارەدانێ بۆ حەفت ژنان دەرچوویە کو ئەڤان ژنان تاوانێن مەزنکرینە و گۆرەی قانوونێن سزادانا عێراقی سزایێ سێدارەدانێ بۆ ھاتیە دەرکرن، بەلێ ژبەرکو نوکە سزایێ سێدارەدانێ ناھێتە بجە ئینان ھێشتا ئەو حەفت ژن د چاکسازیێ دا ژیانا خوە دەرباز دکەن و ئەم ژی نوزانین دێ سزایی سێدارەدانێ ب سەر دا ھێتە بجە ئینان یان ژی نە، ھەروەسا رێژەیەکا زۆرا ژن و سنێلان ب تۆمەتا تیرۆرێ ھاتینە سزدان و نوکە دناڤ چاکسازیا مەدا 169 ژن زارۆک ھەنە و ب ھەر شێوازەکێ ھەبیت ھەڤکار بوونە دگەل گروپا تیرۆرستیا داعش و پەیوەندی دگەل ئەڤێ گروپا تیرۆرستی ھەبوویە، ئەڤ کەسێن ب تۆمەتا داعشبوونێ ھاتینە دەستەسەرکرن و حوکمدان پتریا وان وەلاتیێن عەرەبن و ھژمارەکا کێم ژی کورد دناڤدا ھەنە.