ئه‌ڤرۆ نیۆز،زنار تۆڤى:
هه‌ر چه‌نده رووبارى خابیرى ل ناڤبه‌را ناحیا كانى ماسێ و ناحیا باتیفا دا جهه‌كێ ئێكجار خۆش و سه‌رنجراكێشه بۆ گه‌شتیاران و سالانه رێژه‌یه‌كا باش یا خه‌لكێ سه‌ره‌دانا ڤى جهى دكه‌ن ب مه‌ره‌ما گه‌شتكرنێ،لێ هه‌تاكو نوكه چ خزمه‌تگۆزارى ل ڤى جهى نه‌هاتینه چێكرن،له‌ورا نه‌بوونا خزمه‌تگۆزاریان بوویه ئه‌گه‌ر كو ئه‌ڤ جهه وه‌كو پێدڤى نه‌كه‌فتینه دخزمه‌تا كه‌رتێ گه‌شت و گۆزارى دا.
ژنه‌ك بناڤێ نازك مه‌حموود كو خه‌لكا باژێرێ دهوكێ یه ب مه‌ره‌ما گه‌شتكرنێ هاتبوو سه‌ر رووبارێ خابیرى ل نێزیك كۆمه‌لگه‌ها بێگۆڤا،بۆ ئه‌ڤرۆ نیۆز دیاركریه:كو ئه‌ڤه جارا ئێكێ یه ئه‌م ل گه‌ل خێزانا خوه دهێنه ل سه ررووبارێ خابیرى بۆ گه‌شت و سه‌یرانێ،هه‌ر چه‌نده ئه‌ڤ جهه گه‌له‌كێ خوه‌شه و هه‌روه‌سا سرۆشته‌كێ جوان و دلڤه‌كه‌ر ژى هه‌یه و هه‌بوونا ڤان داران و ئاڤێ و ئاقارى دیمه‌نه‌كێ ئێكجار زۆر دایه ڤى جهى و مرۆڤ ژ ڤان دیمه‌نێن جوان تێر نابیت و گۆت ژى:لێ مخابن ئه‌ڤه جهه‌كێ بێ خودانه،ژبه‌ركو هیچ خزمه‌تگۆزاریه‌ك لێ نینه و هه‌روه‌سا نه‌بوونا جهێن ده‌ست ئاڤێ و پاركێن ترۆمبێلا و خوارنگه‌ه و كافتیریا و چایخانان ئێك ژ ئاریشێن سه‌ره‌كیه ل ڤى جهى،له‌ورا چ پووته ب ڤى جهى نه‌هاتیه‌دان،دیسا ئه‌ڤه جهه‌كێ ئارامه و بتنێ خۆشیا ڤى جهى ئه‌وه كو هه‌ر جهێ مرۆڤ ب چیتێ كه‌س پاران ژ مرۆڤى وه‌رناگریت،له‌ورا ژ ئه‌ڤرۆ پێڤه ئه‌م دێ قه‌ستا ڤى جهى كه‌ین،چونكى هه‌وایه‌كێ خۆش و ته‌زى ل ڤى جهى هه‌یه و هه‌روه‌سا سه‌قا ژى گه‌له‌ك یێ هینه و مرۆڤ نزانیت كا چاوا رۆژا مرۆڤى ل ڤێرێ ده‌رباز دبیت.
گه‌نجه‌ك بناڤێ ئازاد ره‌سول دبێژیت:هه‌ر چه‌نده ئه‌ڤه جهه‌كێ سه‌رنجراكێشه لێ نه‌بوونا خزمه‌تگۆزاریان وه‌كریه كو خه‌لك نه‌شێن ب شێوێ مه‌زن بهێنه ڤى جهى بۆ گه‌شت و گۆزارێ،هه‌روه‌سا نه‌بوونا كاره‌بێ و رێكان بۆ سه‌ر ئاڤێ ئێك ژ ئاریشێن سه‌ره‌كیه بۆ گه‌شت و گۆزارێ ل سه‌ر رووبارى خابیرى،هه‌ر چه‌نده ب درێژاهیا پتر ژ 10 كیلۆمه‌تران خه‌لك دشێت ب چنه جهێن خۆش بۆ بهێنڤه‌دانێ و گه‌شتكرنێ ل به‌ر لێڤێن ئاڤا خابیرى،زێده‌تر گۆت:له‌ورا ژ جهێن شۆله‌ژێ دخوازین كو چاڤ شخاندنه‌كێ ل ڤى جهى بكه‌ن و پتر گرنگیێ بده‌نه كه‌رتێ گه‌شت و گۆزارى ل ناحیا كانى ماسێ و باتیفا،ژبه‌ركو هه‌كه بهێته چێكرن،دێ خه‌لكێ ڤێ ده‌ڤه‌رێ مفایه‌كێ باش ژێ بینن.
داود بێتكارى وه‌لاتیه‌كێ خۆجهێ كۆمه‌لگه‌ها بێگۆڤا یه بۆ ئه‌ڤرۆ دبێژیت:نه‌بوونا خزمه‌تگۆزاریا بۆ كه‌رتێ گه‌شت و گۆزارى ل سه‌ر رووبارێ خابیرى ژ كه‌مته‌رخه‌میا حوكمه‌تێ و جهێن شۆله‌ژێ بوویه،ژبه‌ركو هه‌كه حوكمه‌تێ هێله‌كا كاره‌بێ بۆ بربا و هه‌روه‌سا هه‌كه ل چه‌ندین جهان رێك بربانه سه‌ر رووبارى و چاڤدانه‌كا باش هه‌با،دا خه‌لكێ مه بۆ خوه جهێن باش چێكه‌ن و دا بۆ خوه ده‌نه بكرێ و ب ڤێ چه‌ندێ دا داهاته‌ك بۆ وان ژێ هێت،چونكى ئه‌ڤه جهه‌كێ نموونه‌یه بۆ گه‌شت و گۆزارێ،ژبه‌ركو داروباره‌كێ مشه ل سه‌ر رووبارى هه‌یه و هه‌روه‌سا ل وه‌رزێ هاڤینان ژى ئاڤا خابیرى كێم دبیت و چ مه‌ترسى ناكه‌ڤیته سه‌ر ژیانا وى خه‌لكێ دهێنه گه‌شتێ ل ڤى جهى و ل پرانیا جهان مرۆڤ دشێت خوه بهاڤێژیته ئاڤى،زێده‌تر دبێَژیت:ئه‌ڤ جهێ خه‌لك قه‌ست دكه‌تێ یێ ئێمنه و چو جاران ژلایێ توركیا ڤه ناهێته تۆپ بارانكرن،هه‌روه‌سا خه‌لكێ ڤێ ده‌ڤه‌رێ رێزێ ل گه‌شتیاران دگرن و هاریكاریا وان ژى دكه‌ن،لێ خه‌لكێ مه یێ هه‌ژاره و نه‌شێن ڤان جهان بكه‌نه جهێن گه‌شتیارى.
ناڤهاتى ئه‌و ژى دیاركر:خه‌لكێ مه ژى یێ كه‌مته‌ر خه‌مه،ژبه‌ركو خه‌لكێ ڤێ ده‌ڤه‌رێ ئه‌ردێ خوه ب ده‌ست كه‌سێ ڤه به‌رناده‌ن كو بكه‌نه جهێن گه‌شتیارى،لێ هه‌كه خه‌لكێ هاریكاربا،هنده‌ك كه‌سێن ده‌وله‌مه‌ند یێن هه‌ین،داشێن جهێن باش ل سه‌ر رووبارێ خابیرى چێكه‌ن و دا ئه‌ڤه بیته ده‌لیڤه‌كا باش بۆ كه‌رتێ گه‌شتیارى،هه‌روه‌سا هه‌كه حوكمه‌ت هاریكاریا خه‌لكێ بكه‌ت،دێ كه‌رتێ گه‌شتیارى ڤه‌ژاندنه‌كا باش ب خوه‌ڤه بینیت،كو ل رۆژێن بهێنڤه‌دانا ل دۆرێن (4_5) هزار مرۆڤان قه‌ستا ڤى جهى دكه‌ن،لێ هه‌تاكو نوكه خه‌لكێ ڤێ ده‌ڤه‌رێ كه‌پر و جهێن تایبه‌ت چێنه‌كرینه‌كو بۆ خوه بده‌نه بكرێ و گۆت ژى:ئه‌ڤ ساله ژ ئه‌گه‌رێ بێ كاره‌بیێ و هه‌روه‌سا ژبه‌ر گه‌رمێ ژى رێژه‌یه‌كا باش یا خه‌لكێ قه‌ستا رووبارى خابیرى ل ناڤبه‌را ناحیا كانى ماسێ و ناحیا باتیفا دا دكه‌ن،لێ مخابن هێشتا خه‌لكێ مه نه‌شیا یه وه‌كو پێدڤه مفاى ژ گه‌شت و گۆزارێ ب بینیت و هێشتا كه‌رتێ گه‌شتیارى نه‌كه‌فتیه دخزمه‌تا خه‌لكێ مه‌دا ل ڤێ ده‌ڤه‌رێ،دیسا خه‌لكێ مه هزر ل هندێ نه‌كریه،كو ئه‌و مفایێ ژلایێ گه‌شتیارى ڤه ب ده‌ست وان دكه‌ڤیت،چه‌ندین سالان ب كارێ چاندنێ ڤه ئه‌و پاره و داهات ناگه‌هیته وان،لێ نه‌بوونا بنه‌مایێن گه‌شتكرنێ و نه‌بوونا خزمه‌تگۆزاریان وه‌كریه كو هه‌تاكو نوكه مفا نه گه‌هیته خه‌لكێ.
نيشاندان
