ئه‌ڤرۆ نيوز:
سەرۆکێ جڤاتا قەزا شنگال دیارکر کو ژ بەر ئالوزیێن ڤێ دووماھیێ پتریا نۆشدار و کارمەندێن ساخلەمیێ ل قەزا شنگال دووبارە ئاوارە بووینە و دەرگەھێن نەخۆشخانا و بنگەھێن ساخلەمیێ ژی ھاتینە دایخستن.
وەیسی نایف، سەرۆکێ جڤاتا قەزا شنگال بۆ ئەڤرۆ دیارکر کو رەوشا ساخلەمی ل شنگال زۆر یا خرابە ژ بەر گرتنا نەخۆشخانا و بنگەھێن ساخلەمیێ دەمێ پێشمەرگەیێ کوردستانێ شنگال رزگارکری دەم ل دەست حوکمەتا ھەرێما کوردستانێ ب رێیا رێڤەبەریا گشتیا ساخلەمیا پارێزگەھا دھۆکێ بنگەە و نەخۆشخانا ل دەڤەرا شنگال بۆ نەخۆشان ڤەکرن، بەلێ پشتی ئالوزیێن ڤێ دووماھیێ ھاتینە پێش ل شنگالێ جارەکا دێ نۆشدار و کارمەندێن ساخلەمیێ ئاوارەی دھۆک بووینە و جارەکا دی دەرگەھێ وان بنگەە و نەخۆشخانەیان ل بەر نەخۆشان ھاتیە دایخستن.
زێدەتر گۆت: “ستافێ ساخلەمیێ ل شنگال ب خوە ژی گەلەک دکێم بوون و ئاریشە د واری نۆشدار و کارمەندیێن ساخلەمیێ دا ھەبوون، بەلێ ئەوێن ھاتینە دەوامی ژی جارەکا دی ئاوارە بووینە”.
سەرۆکێ جڤاتا قەزا شنگال ئەو ژی دیارکر کو حوکمەتا عیراقی چو پووتەکێ ب واری ساخلەمیێ ل قەزا شنگال نادەت، ئەو کەسێن ماینە ل سەر مالێن خوە، مەترسیێن ساخلەمیێ ل سەر ژیانا وان ھەنە ب تایبەتی ژی ژن و زارۆیان چونکو خەلک نەشێن قەستا مووسل ژی بکەن ژ بەر وێ زۆرداری و کارەساتا سالا 2014ێ ب سەری خەلکی ھاتی، ھێشتا ترس د دلی خەلکی دایە.
وەیسی نایف ئاشکرا ژی کر کو حوکمەتا ھەرێما کوردستانێ پلانا ئاڤاکرنا نەخۆشخانەکا مۆدرێن و ھەڤچەرخ ل شنگال ھەبوو، بەلێ ئالوزیێن ڤێ دووماھیێ نەھێلا چو پلانێن خزمەتگوزاری ل شنگال بکەڤنە وارێ بجە ئینانێ، “ئەم ب ھیڤی بووین بنگەە و نەخۆشخانە ل شنگال بھێنە ئاڤاکرن، بەلێ ئەو ھیڤیە ژی نەمایە چونکو ژ سالا 1921 وەرە ھەتا نوکە بەغدا پووتە ب شنگال نەدایە ئەم د وێ باوەریێ ژی دا نینن جارەکێ بەغدا پووتەکێ باش ب شنگال بدەت ب تنی ئەو مەرەمێن خوە یێن سیاسی ل شنگال دژی خەلکآ شنگال بجە دئینن چو تشتەکێ دی بۆ وەلاتیێن شنگال ناکەن”.
نيشاندان
