ئەڤرو نیوز:
وەزارەتا ساخلەمیێ یا حکومەتا ھەرێما کوردستانێ ب ھەلکەفتا ھاتنا مەھا رەمەزانا پیروز چەند رێنمایەکێن نوو دەرکرن ، و ل گورەی ئەوان رێنمایان نابیت کەسانێن نەخۆش و زارو ب روژی بن بەروڤاژی کارتێکرن لسەر ژیانا وان ھەیە.
وەزارەتا ساخلەمیێ یا حکومەتا ھەرێما کوردستانێ نووترین رێنمایێن خوە راگەھاندن و تێدا داخوازێ ژ وەلاتیان دکەت کو ل دەما پاشیڤێ و فتارێ ھوشیاری جورێ خوارنێن خوە بن و خوارنێن ھەڤسەنگ بخون و گەلەک ئاڤ و کەسکاتی و فێقی بخون تایبەتی پشتی فتار و شکاندنا روژیێ.
ھەروەسا داخوازێ ژ نەخۆشان دکەت کو ب مەرەما پاراستنا سلامەتیا خوە بلا ب روژی نەبن ، بو ڤێ مەرەمێ ژی راوێژێ ل گەل نوشدارێن تایبەتمەند بکەن ب تایبەتی ئەو کەسێن کو نەخۆشێن دومدرێژ ھەیی وەکو نەخۆشێن شەکرێ ، پەککەفتنا گولچیسکان ، دلی …ھتد
ژلایەکێ دنڤە وەزارەتا ساخلەمیێ ددەتن دیارکر کو نابیت زارو ب روژی بن ئەگەر بزانن دێ کارتێکرنێن ل ساخلەمیا وان ھێتەکرن ، چونکی رۆژی دبیتە ئەگەرا ھشکبوونێ و زیانێن ساخلەمیێ ل زاروکان دکەت تایبەت دنھادا کو رۆژی د ١٦ دەمژمێران دا دبووریت ب تایبەتی ئەو زاروکێن کو ئاریشەیێن گەشەسەندنێ و لاوازی یا لەشی ھەیی یان ژی جورەک ژ جورێن نەخوشیان ھەیی.
ژلایەکێ دنڤە ئەڤرۆ وەزارەتا ئەوقاف و کاروبارێن ئاینی یا حکومەتا ھەرێما کوردستانێ راگەھاند کو سوبەھی روژا شەمبی رێکەفتی ٢٧/٥/٢٠١٧ دێ بیتە ئێکەم رۆژا رەمەزانا پیروز.

ئەڤرو نیوز :نەوزاد ھلوری:
چەند رۆژ بەریا نھا وەلاتیەکێ ناحیا کەلەکچی یا سەر ب قەزا شێخان بناڤێ ” نەوزاد ئەحمەد ” ژ بو رزگارکرنا گیانێ برایێ خوە بناڤێ ” عیسا ئەحمەد ” پشکەکا مێلاکا خوە دایە برایێ خوە ، بەلێ دئەنجامێ نەشتەرگەریێ دا ” نەوزاد”ی گیانێ خوە ژدەست دا و ” عیسا” ژی رزگاربوو ، ئەڤرۆ ” عیسای”ی ژی گیانێ خوە ژ دەستدا.
عەبدوللا شکاک ھەڤالێ ھەردوو برایان بۆ ئەڤرۆ نیوز گۆت: (چەند رۆژ بەریا نھا ھەڤالەکێ من بناڤێ “عیسا ئەحمەد “مێلاکا خوە ژ دەست دابوو ، ژبەرڤێ سەرەدانا نەخوشخانێ کر و نوژداران ژی گوت دڤێت بلەز نەشتەرگەریەک بو بھێتەکرن ئەگەر دێ گیانی َخوە ژ دەست دەت ، و برایێ وی بناڤێ ” نەوزاد ئەحمەد ” وەکو دلپێڤەمان و بو رزگارکرنا گیانێ برایێ خوە گوتە نوژداران بەرھەڤم گیانێ برایێ خوە رزگاربکەم ب دانا پشکەک ژ مێلاکا خوە ، بەلێ ب لێبورین ڤە ل دەما ئەنجام دانا نەشتەرگەیێ ” نەوزاد”ی گیانێ خوە ژ دەست دا و ” عیسا”ژی رزگاربوو ، و ئەڤرو عیسای ژی گیانێ خوە ژ دەست دا و گەھشتە برایێ خوە)
زێدەتر گۆت: (ئەڤێ روودانێ کارتێکرنەکا زور ل خەلکێ دەڤەرا کەلەکچی و کوردستانێ کر ژبەرکو برایەکێ بو رزگارکرنا گیانێ برایێ خوە ، خوە کرە قوربان)
دھێتە زانین چەند رۆژ بەریا نھا تیمەکا ئەمریکی ب مەرەما ئەنجامدانا چەند نەشتەرگەریەکان گەهشتنە باشوورێ کوردستانێ و ل نەخوشخانا ئازادی ل دهۆکێ دەست ب ئەنجامدانا چەند نەشتەرگەریەکان کر ، و نەشتەرگەریا ھەردوو برایان ژی ژلایێ ئەوێ تیمێ ڤە ھاتیەکرن ، ل گورەی راگەھاندنەکا ئەوێ تیمێ ” نەوزاد”ی ژبەر شاشیا ئەوان گیانێ خوە ژ دەست نەدایە بەلکو جورێ نەشتەرگەریێ یێ ب زەحمەت بوویە.