ئەڤرو نیوز ، نەوزاد ھلۆری:
چەند رۆژەکان بەریا نھا کچەک بناڤێ ” ە ، ئ ” ل ئێک ژ سەیرانێن دەڤەرا ئامێدیێ دکەڤیت و کەس ، و کارێن وێ ژی بلەز دگەھینن نەخۆشخانا تەنگاڤیا دھوکێ ، و نوشداران ژی بلەز نەشتەرگەریەک بۆ ئەنجام دا ، بەلێ ئەوا کو بویە جھێ حێبەتیێ ئەوە وێنەیێن نەشتەرگەریێن وێ کچێ ل پارێزگەھا دیالا ھاتینە نیشاندان و بەلاڤکرن وددەن دیارکرن کو گەنجەکێ دیالا ژبەر سەدەما کێشانا نارگیلێ ئاشک”مەعیدە” ێ خوە ژ دەستدایە ، ھاریکارەکێ نوشداری ل پارێزگەھا دھوکێ کو ھایدارێ نەشتەرگەریێ یە چێروکا ئەوێ کچا شێلادزێ ڤەدگوھێزیت.

غەریب عەبدلکەریم ھاریکارێ نوشداری و رێڤەبەرێ بنگەھێ نەخوشخانا ئەڤریکێ ل پارێزگەھا دھوکێ بۆ ئەڤرو نیوز گۆت: (نوچەیێ نەخوشکەفتن و دژواریا کچەکا شێلادزێ نوشدارێن دھوکێ حێبەتی کرینە کو ھەتا نھا چوو ب سەرێ وێ نەھاتیە و گیانێ خوە ژ دەست نەدایە ، چەند رۆژەکان بەریا نھا کچەکا شێلادزێ ل سەیرانەکێ دکەڤیت و کەس و کارێن وێ ژی بلەز دئینن نەخۆشخانا تەنگاڤیا ل دھوکێ و نوشداران ژی بلەز تیمەک پێکئینا و نەشتەرگەریەک ب سەرکەفتیانە بۆ ئەنجام دا کو ئەڤ یەک ژی جھێ دلخوشیێ یە ، بەلێ ئەوا کو ئەم حێبەتی کرین ئەوە چەوا وێنەیێن نەشتەرگەریا ئەوێ کچێ گەھشتیە پارێزگەھا دیالا و ب رەنگەک دن ھاتیە بەلاڤکرن ئەو ژی کو گەنجەکێ دیالا ژبەر سەدەما کێشانا نارگیلێ ئاشکێ خوە ژ دەستدایە و رەنگێ وێ ھاتیە گوھرین بو رەش)

زێدەتر گۆت: (ئاشکێ ئەڤێ کچا شێلادزێ رزی بو و توشی تەسەموم بو درۆست بوو ، وەسا دھێتە دیارکرن کو ئەڤ کچە ژ زاروکینی و زکماکدا ھوسا بویە ، ئەگەر ل دەما کەفتنا ئەڤێ کچێ پشتی ٤٨ دەمژمێران نەشتەرگەری بو نەھاتبایە ئەنجامدان دا گیانێ خوە ژ دەست دەتن ، بەلێ سوپاس بو خودێ و رێڤەبەریا تەنگاڤیا دھۆکێ کو ئەڤ کچە رزگارکری ، یا من دڤێت بێژم ئەوە کو ئەگەر ئەڤ نەشتەرگەریە ل وەلاتەکێ دن ھاتبایە کرن دا نوشدارێن وێ بنە جھێ شانازیێ و جھێ دەستخوشیێ چونکی ئەڤ جورێ نەشتەرگەریێ زێدەباری کو پارەکێ مەزن پێدڤی یە و دەفتەران پارە پێدڤێت د ھەمان دەم دا ئێکە ژ نەشتەرگەریێن ئالووز ل جیھانێ)

ل بارا چەوانیا بەلاڤبوونا وێنەیێن نەشتەرگەریا ئەوێ کچێ ل دیالا و تورێن جڤاکی ، ھاریکارێ نوشداری گۆت: (ئەڤ وێنە ژلایێ رێڤەبەریا نەخۆشخانا تەنگاڤیان ڤە ل دھوکێ نەھاتینە بەلاڤکرن ، بەلێ یا سەیر ئەوە کو ئەم نوزانین چەوا گەھشتینە دەستێ وان کەسان ، ب ھزرا من ئەگەرا سەرەکی یا بەحس نەکرن و گرنگی نەدانا نەشتەرگەریێن بڤی رەنگی ل پارێزگەھا دھوکێ دزڤریت بو نەبونا چوو دەزگەھێن راگەھاندنێ یێن کارا ب گشتی و نەبوونا راگەھاندنەکا کارا ل رێڤەبەریا نەخۆشخانا تەنگاڤیان ل دھوکێ)

ل گورەی زانیاریێن ئەڤرو نیوز ئەو کچا شێلادزێ ژیێ وێ ١٤ سالن و قوتابیە ، و ئەو تیما کو نەشتەرگەریا وێ کری پێکھاتبوون ژ ژ ھەر ئێک ژ بەرێزان “دکتور سەردار حسێن ، دکتور کەریم محەمەد ، دکتور مەحمود عەلی و دکتور سەمیع سیفەددین ” نھا رەوشا ئەوێ کچێ باشە و ڤەگەریایە شێلادزێ.

ئەڤرو نیوز :
ڤان رۆژێن بوری ب رێیا ھەردوو فروخانەیێن ھەولێر و سلێمانیێ جورە یاریەکا نو بناڤێ ” فیدگت سپینەر ” کەفتیە بازاری و بازارێن دھوکێ ژی بێ بەھر نەبویە ، لگورەی زانیاریان دبێژن ئەڤ یاریە خەمێن مرۆڤی سڤک دکەت و تشتێن نەخوش ژ بیرا مرۆڤی دبەن ب چەند رەنگ و شێوەیان کەفتیە بازارێن دھوکێ ژی.
دەستپێکا یاریا ناڤبری بو سالا ١٩٩٣ل وەلاتێ ئەمریکا دزڤریت کو ئەو ژی ژنەکێ بناڤێ ” کاسرین ھیتینگەر ” بو کچا خوە یا نەخوش ژلایێ دەرونی کری داکو خوە پێڤە مژول بکەت ، بەلێ دوڤدا ب رەنگەگ بەرفرەە ھاتە بەلاڤکرن و تەڤایا ئەمریکا و جیھانێ بەلاڤ ب ، دوڤدا ل ھندەک سازیان ھاتیە چێکرن بو نەخوشیا بناڤ توتر.
پشتی کو ئافرەتا ناڤبری دیتی ئەڤ یاریە سەرنجراکێشە و خەلکی ڤیا رابو ب وەرگرتنا مولەتەکێ وەکو ئێک ژ داھێنانێن نوویێن ئەمریکا لسەر دەستێ وێ و بکارئینانا یاریا ناڤبری بو نەخوشیێن دەروونی و ئارامکرنا دلان ، و ل سالا ٢٠٠٧ باوەرنامەیا داھێنان ب یاریا ناڤبری وەرگرت و ل سالا ٢٠٠٥ ژی بو ئێکەمین جار کومپانیێن بچوک ب ئەرکێ درۆستکرنا ئەڤێ یاریێ رابوون و وەبەرھێنان پێکر بو زارویێن توشبوی ب نەخوشیێن ئوتیزم و کێم ژیری و ب رەنگەکێ گشتی ھەموو نەخوشیێن دەرونی ژی.
دوڤدا ل سالا ٢٠١٦ کومپانیێن مەزن پشتی دیتی ئەڤ یاریە بویە جھێ سەرنجراکێشا خەلکی و داخوازی لسەر ھەیە ژبەرڤێ وەبەرھێنەرەکێ ئەمریکی بناڤێ ” کیک ستاتەر ” داخوازا ١٥ ھزار دولاران ژ وەبەرھێنانا ئەمریکا کر کو ئەو دێ ئەڤ جورێ یاریێ ئێخیتە بازاری و ئارمانجا وی ھەموو جیھانە و ھەر وێ سالێ ب بھایێ شەش ملیون دولارن فروتن و مفایەکێ زور دەستخوڤە ئینا.
وەبەرھێنەرێ ناڤبری دانەیا ئەڤێ یاریێ ب چوار دولاران د فروت و ژ یاریەکا زاروکان ھاتە ڤەگوھاستن بو یاریەکا ھەموو کەسان و مەزن ژی ڤەگرتن بەلێ ئارمانجا وێ ھەر ئەوە کو کەسانێن ژلایێ دەروونی ڤە نەدئارام پیچەک خەمێن خوە ڤەرەڤینن.
ل چەند رۆژێن بوری ب رەنگەک بەرفرە ئەڤ جورێ یاریێ دناڤا بازارێ دھوکێ بەلاڤبویە زێدەباری وێ یەکێ کو د تورێن جڤاکی ژی دا ئەڤ یەک ب رەنگەکێ بەرچاڤ بەلاڤ بوویە.
ئێک ژ پشکدارێن فێسبوکێ ب شێوەیەکێ پرسیاری ددەتن دیارکر ئەرێ گەلو ما خەلکێ دھوکێ ژ چوو تشی بێزارە و دڤێت کیژان خەمێ ل خوە ب رەڤینیت ، ئەرێ لسەر مافێن خوە یان نەبوونا خزمەتگوزاریان یان ژی خوشیێن خوەیێن تایبەت و دبێژیت: (ئەو کەسێن ئەڤ یاریە ئینایی ب راستی ژی دزانن چوو جورە داوەت ل ملەتێ کورد دھێنەکرن و چەند خەم ھەنە)
یاریا سپینەر پێکدھێت ژ یاریەکا سێ پەری و نێزیکێ سێ خولەکان لسەر دەستێ مرۆڤی دزڤریت و لدەما زڤرینێ مرۆڤ ھەست ب جورە ئارامیەکێ دکەت.