ئەڤرۆ نیوز:
نڤیسەرەکێ ئەمریکی دیار دکەت کو سەرکەڤتنا حەشدا شەعبی ل عیراقێ پێگەھێ ئیرانێ بھێز دکەت و نابیت ئەمریکا چاڤەرێ ھندێ بیت کو دێ عەبادی حەشدا شەعبی ھلوەشینیت و ھەکە نھا ئەمریکا دەستێوەردانێ نەکەت و ھێزا سەربازی ل دژی حەشدا شەعبی بکار نەئینیت دێ پێگەھێ ئیرانێ بھێز بیت و ئەو یەک ب تەمامی دژی بەرژەوەندیێن ئەمریکا یە.
تۆم رۆجان نڤیسەرێ ئەمریکی دیار دکەت کو مەترسیا حەشدا شەعبی ژی وەکو یا داعشێ لێ دھێت و ھەکە نھا رێگری لێ نەھێتە کرن دێ مەترسیا وێ رێکخراوێ ژی وەکو یا داعشێ بیت، چونکو بەرپرسێن حەشدا شەعبی رۆژانە گەفان ل ئەمریکا دکەن و دبێژن دڤێت ئەمریکا ژ عیراقێ دەرکەڤیت و ل ئالیێ دی حەشدا شەعبی ب تەمامی کەفتیە دەستێ ئیرانێ و سەرۆک وەزیر حەیدەر عەبادی ژی چو کاریگەری ل سەر چەکدارێن حەشدا شەعبی نینە، ژ بەر ھندێ ژی ھەکە ئەمریکا بلەز دەستێوەردانێ نەکەت و ھێزا سەربازی ل دژی حەشدا شەعبی نەھێتە بکار ئینن دێ زیانەکا مەزن گەھیتە ئەمریکا و گۆت: (ئاشکرایە کو ئیران ھیلالا شیعی بەرفرەە دکەت و ھەرچەندە بەرپرسێن ئەمریکی دبێژن ئەم ناھێلین ئیران بھێز کەڤیت، لێ مخابن تشتێ نھا ئەمریکا دکەت ھەموو د خزمەتا ئیرانێ دانە، کەرکووک ھاتە گرتن و ئەمریکا چو نەکر. ئیران و بەرپرسێن حەشدا شەعبی گەفان ل ئەمریکا دکەن و ھەتا نھا ژی ئەمریکا چو ھەلویستەکێ توند ل دژی وان نیشا نەدایە و ئەو یەک ژی نیشا ددەت کو ستراتیژیا نھا یا ئەمریکا ل عیراقێ شاشە و دڤێت ترامپ بلەز دەستێوەردانێ بکەت).
ناڤبری ئاماژە ب پیلانێن ئەمریکا ل عیراقێ و سووریێ دکەت و دیار دکەت کو دڤێت شاشیێن بەری نھا ئەمریکی کری دوبارە نەکەت، ئەمریکا عیراق ژ دەستێ سەدامی دەرخست و رادەستی ئیرانێ کر و نھا ژی نابیت ھەمان تشت ل سووریێ بھێتە کرن و پێدڤی ئەمریکا بەری ھەر تشتەکێ ھێزا سەربازی ل دژی حەشدا شەعبی بکار بینیت و وان ژناڤ ببەت دا دەستێ ئیرانێ ل عیراقێ بھێتە کورتکرن، ھەکە ئەو یەک نەھاتە کرن دێ مەترسیا ئیرانێ ب رێیا حەشدا شەعبی زێدەتر لێ ھێت و مخابن ھەتا نھا ئەمریکا یا پێدڤی ل دژی وان نەکریە.
نڤیسەرێ ناڤھاتی ئەو یەک ژی دیار کریە کو ئارمانجا سەرەکی یا ئیرانێ ئەڤە کو ب رێیا ھیلالا شیعی شەرێ خوە ڤەگۆھێزیتە ناڤ ئیسرائیلێ و ھەر کەس ژی باش دزانیت کو ئیسرائیل ھەڤپەیمانا سەرەکی یا ئەمریکایە و نابیت ئەمریکا ل ھەمبەر زێدەگاڤیێن ئیرانێ بێدەنگ بمینیت، رەنگە ژ بەر شەرێ ل دژی داعشێ ئەمریکا پێدڤی ب حەشدا شەعبی بیت لێ مەترسیا داعشێ وەکو جاران نەمایە و یا دی حەشدا شەعبی پتر ژ داعشێ مەترسیا خوە بۆ ئەمریکا ھەیە و ژ بەر ھندێ ژی دڤێت ئەمریکا پێداچوونەکا باش د ھەلویستێ خوە دا بکەت و بێی گیروبوون دڤێت ھێزا سەربازی ل دژی حەشدا شەعبی بھێتە بکار ئینان.
ناڤبری د دووماھیا ئاخڤتنا خوە دا ژی دبێژیت مخابن ئەمریکا کورد تنێ ھێلاینە، کورد ھەڤپەیمانێ ھەری دلسۆز یێ ئەمریکا نە و دڤێت ئیدارا ئەمریکا ب لێدانا حەشدا شەعبی بەرگیریێ ل کوردان بکەت، ھەکە ئەم کوردان ب تنێ بھێلین و پشتەڤانیێ ل عیراقێ بکەین دێ پێگەھێ ئیرانێ بھێز کەڤیت و مخابن ھەتا نھا ئەمریکا وەسا کریە و دڤێت ئیدارا ترامپ ل ھەمبەر مەترسیا حەشدا شەعبی پشتەڤانیێ ل کوردان بکەت.